Ero yinhîrî takî tî on wara kekn̂e Saromaw Kaan ya, On wara mîîkekn̂e Apa, Tuuna yewru chewno me wasî cicwiyem chewno me ha, mîîkekn̂e.

2 Wara rma tko amîn wiirî, awekenî ro xa on on̂iritho kir̂wanî ro. Eroromero nas on awekenî ro me, kekn̂e tî Saromaw Kaan ya.

3 Ero yinhîrî takî tî Ixaw Yana komo wece n̂etaknamekn̂e hara Saromaw. N̂examro tî nakronomapekn̂e Kporin komo ya. Piiri tî n̂ecececetken̂e n̂examro Kaan yakro yîmtapowataw.

4 On wara tî kekn̂e Saromaw, Kir̂wan̂he xa nai ham Kporin komo okre, ponaro Ixaw Yana komo yehtopo. Tîmtapotachonhîrî yaw roro rma tak kakronomacow so, apapa pen ya kekn̂e ero wa kachonho yaw roro rma.

5 On wara tî kekn̂e Kaan apapa pen ya, Pahxa oyanan komo wekyakn̂e oona Exitu poi. Ero yimawnonho n̂ixa rma oyewtonî ro men̂ekara rma ka wîxakn̂e, Ixaw Yana tribun komo yewton poyino men̂ekara wîxakn̂e. On xa wahsîyasî ewto omîn yewtî me, oyosotî yeken me xa ehtome, kahra ka wîxakn̂e. Apoyino komo men̂ekara marha ka wîxakn̂e oyanan komo kayaritomon me ciisom.

6 Kokon̂oro n̂he mak tak Xerusaren wîhtînoyakn̂e oyosotî yeken me. Tapi marha men̂ekekn̂e oyanan komo kayaritomon me, Ixaw Yana komo kayaritomon me, kekn̂e tî. Ero wa tî kekn̂e Kporin komo.

7 Taa, on wara tî xakn̂e apapa pen, Kporin komo mîn ciri xe cma re xakn̂e ponaro Ixaw Yana komo yehtopo yosotî yeken me.

8 On wara tko tî kekn̂e Kporin komo apapa pen ya, Omîn ciri xe mai ham, oyosotî yeken me. Kir̂wan̂he nasî ero wa yîhtînotopo awya.

9 Omîn cirihra rma tko masî amoro. Amumuru xa nasî amn̂e ero ciin̂e me, apun me cehsomu rma, kekn̂e tî yîwya.

10 Ero ke ero wa kacho yaw roro rma tak tîmîn ciin̂e me oriye. Ow tak wasî apapa pen yekenho yakan me. Ixaw Yana komo kayaritomon me tak wasî Kporin komo mtapotachonho yaw roro rma. Mîîmo marha wiire Kporin komo yosotî yeken, ponaro Ixaw Yana komo yehtopo yosotî yeken ha.

11 Ero yaka tak wiire Kaan yamatan. Ero yaw nasî Kporin komo mtapotachonho, Kakronomexe so oyewehcataw awya so, kachonho Ixaw Yana komo ya. Ero yipu tak wiire Kaan mîn yaka, kekn̂e tî Saromaw.

12 Ero yinhîrî takî tî piiri nawomyakn̂e Saromaw. Kporin komo ya tîmsom yakn̂itopo mîtwo tî n̂ecececekn̂e Ixaw Yana komo yeepatai rma. Napockanwakn̂e takî tî iito.

13 Aapo po tî xakn̂e Saromaw tîn̂irpothîrî po rma. Kporin komo mîn roron pona n̂irpekn̂e rakataka rma. Bronse tî mîn n̂irpekn̂e. 2,3 metru tî mîn xakn̂e kawnon. 2,3 metru marha tî xakn̂e akwerî, 1,3 metru tî xakn̂e kawnon. Ero po tî n̂ecececekn̂e piiri ha ka. Tosokmuru po takî tî n̂eremekn̂e hara. Kahsî tî napockanwakn̂e.

14 Kporin komo yakro tî nîmtapowakn̂e Saromaw. On wara tî kekn̂e yîwya, Apa, ponaro Ixaw Yana komo yehtopo Amoro, amna Porin. Amoro mak Amoro Kaan ha. Anarî exihra ro mak nasî awarai. Kah yaw exihra nasî, roowo po marha exihra nasî. Amtapotachonhîrî yaw roro kakronoman̂e rma Amoro, awanton komo yemîknon̂e pînî ro mak ha. N̂examro pînîn yawno xa matko Amoro yîpînînkan̂e pîn me ro mak. Ero wara masî awanton komo poko, tahwore awewetîn̂e komo poko.

15 Amtapotachonhîrî yaw roro rma tak amna makronomai ham, apapa pen ya mîîkekn̂e ero wa kachonho yaw roro rma. Awanton mîk xakn̂e, Tapi pen ha. Amtarî ke ka mîîkekn̂e yîwya, ero yaw roro tak awamorî ke tak on ciitopo poko amna makronomai. Ero ke ciitîkaxi tak nasî oroto.

16 Ero ke amtapotachonhîrî yaw roro rma amna cirko apapa pen ya mîîkekn̂e ero yaw roro rma. Awanton mîk xakn̂e apapa pen, Tapi pen. On wara tî mîîkekn̂e yîwya, on wara awepamthîrî komo exitaw so, Ixaw Yana komo kayaritomon me naxe amn̂e miya roro. Kir̂wan̂he cehtopo komo ponaro ro cexitaw so, owya apanatanmetopo komo yewetîn̂e me roro exitaw so marha. Ewetîn̂e me mîxakn̂e, ero wara rma exitaw so kayaritomo me naxe miya roro, mîîkekn̂e tî yîwya.

17 Ero ke awantonînhîrî ya mîîkekn̂e Tapi pen ya, ero wa kachonho yaw roro rma cma re amna miir̂asî.

18 On wara tko wîîkes awya, ahce wa thakwa re Kaan n̂esekenme tooto komo cheka roowo pono komo cheka? Porinî ro mak Amoro kaapu yopono, kaapu yepoyino yopono marha. Ero ke ahce wa thakwa re on yaw mai, on̂iritho yaw.

19 Wara rma omtapotarî cma re mencesî Apa, yiixe oyehtopo pokono. Amna porin xa Amoro, ponaro oyehtopo ha. Yaaro xa tan wîîkes awya. Awepatai xa tan kîmtapowasî awakro. Ero ke cma re ow mencesî.

20 On amîn poko cewke cma re masî enponkara ro mak. Yîtîhkan me ro makî cma re on meen̂asî katapanaw, kosope marha. On wara mîîkekn̂e, Oyosotî yeken me wahsîyasî an̂irithîrî, mîîkekn̂e. Ero ke omtapotarî cma re mencesî on amîn wece cewru omtapowataw ha.

21 Ero ke pahxaro omtapowataw xa hara on wece cewru omtapotarî cma re mencesî roro. Ero wara xa marha ayanan komo nîmtapowatu amn̂e on wece cewru, Ixaw Yana komo. Ero wa amna yîmtapowataw so yîmtapotarî komo cma re mencesî roro. Kah yawno Amoro apa. En̂exa rma Amna entakî, kicicme amna yehtoponho yîhcamnoko.

22 Anarimaw kicicme na nai amna poyino tîmîtwono poko. Ero yinhîrî antomano rin̂e na n̂ekya oona amîn mîtkoso, awya tîmsom yakn̂itopo mîtkoso. Yaaro xa men awehtoponhîrî ekatîmko, Kaan n̂entarî me kasko, nîîke ha na antomano rin̂e yîwya.

23 Ero wa yîmtapowataw Amoro cma re mencesî kah yaw rma. Awanton komo yehtopo yîhtînoko. Kicicme ehxapu me exitaw kicicme ehtoponhîrî rma yîramanko hara noro pona rma yîwîrîmacho me. Kir̂wan̂he exitaw reha, kir̂wan̂he ehtoponhîrî yanme rma kirwanhe cirko hara.

24 Anarimaw on wara na nat hara ayanan komo, Ixaw Yana kom ha, waparî komo na natu iyopono me so okwe kicicme exirî ke so apoko. Wara rma oona tak na mokyatu emahcixapu komo. Tan amîn yaw tak awosotî n̂etahcatu. Awakro na nîmtapowatu tukurunpetopo komo poko.

25 Ero wa exitaw so kah yaw rma entakî Apa. Kicicme ayanan komo yehtoponho tak yîhcamnoko, Ixaw Yana komo yehtoponho. On pona tak n̂examro pen ek hara, yîwya so anmîthîrî pona, yîîm pen komo ya marha mîmyakn̂e ero pona ekno cirko hara.

26 Anarimaw na tahruso tak nai kaapu. Tuuna na mokuhra ro mak nai kicicme exirî komo ke apoko. Ero yinhîrî na nîmtapowatu on wece cewru, amîn wece ha. Awosotî marha na n̂etahcatu. Kicicme cehtoponhîrî tak na nahsîpînketu. Ero wara tak na n̂esehtînoyatu tak tpanarerî komo ke awya.

27 Ero wa exitaw so yîmtapotarî komo entakî kah yaw rma. Kicicme awanton komo yehtoponho tak yîhcamnoko, Ixaw Yana komo yehtoponho ha. Ero yinhîrî tak n̂examro panatanmeko kir̂wan̂he ehtopo komo poko hara. Ero yinhîrî tuuna tak ekpoko hara oona arowon pona. Ayanan komo ya mîmyakn̂e on roowo eken komo me ero ke on pona ekpoko hara.

28 Anarimaw na rooma poko natu tantono komo. Anarimaw hara eper̂a ken̂e na natu, yînatîrî komo na kir̂wan̂he atîhtara nai okwe. Tpayaye so na nai anarimaw, makaka warai na mokya yînatîrî komo yahn̂e okwe. Anarimaw waapa komo na mokyatu. Ayanan komo yewton na wamcetu iitono komo wahkototome. Ahce wa so na n̂examro pen n̂etwîrîmetu, eper̂a yaw na natu anarimaw so.

29 Ero wara exitaw so awakro na nîmtapowatu, cewn̂e rma na nîmtapowa, Ixaw Yana komo ahnoro na nîmtapowatu anarimaw. Yiixe cehtopo komo poko nîmtapowatu, cetwîrmarî komo ke ero wa nîmtapowatu, tahwokarî komo ke okwe. Ero wa cexirî ke so na napockanwatu on amîn wece.

30 Ero wa yîmtapowataw so awakro yîmtapotarî komo entakî Apa kah yaw rma, aweken po ha. Kicicme ehtoponhîrî komo tak yîhcamnoko. Ehtopo komo rma yîhtînoko ahce wa so na ciitome awya. Yîropotarî komo yenîn̂e Amoro. Roowo poko hakno komo ropotarî yenîn̂e Amoro, Amoro mak ha.

31 Panareko rma Apa, aponarono me xa tak ehtome so, awehtopo yaw roro tak ehtome so miya roro. Pahkî ro mak awehtopo yaw roro n̂examro cirko, on roowo po ehtopo komo poko hakî. Amna porin pen komo ya mîmyakn̂e on roowo ero po ehtopo komo poko hakî awehtopo yaw rorono me cirko.

32 Anarimaw na anarî yana komo mokyatu oona awakro yîmtapotaxi. Ixaw Yana pîn na mîkyam, meyeno komo na mîkyam mokyatu. Awosotî na n̂encetu cekacaxmu me xa awexirî ke. Kar̂pe awehtopo na n̂encetu, ahce wa na ciino ritoponho awya. Ero yipu yentan̂e komo na mokyatu oona amîn yaka awakro yîmtapotaxi.

33 Ero wa mokyataw so yîmtapotarî komo meero entakî kah yaw aweken po ha. Yîmtapotarî komo yaw roro cma re n̂examro miir̂asî. Ero wa cma re miir̂asî awosotî yekaiporechome n̂he roowo poko hakno komo n̂entarî me ha. Ero wa ciino cirko Apa aponaro xa tak ehtome so, ayanan komo naxe ero wara rma on on̂iritho yentome. Kporin komo Kaan mînî ro me entome yîwya so ero wa n̂examro cirko.

34 Anarimaw ayanan komo cetu tîîxatî pîn komo yakro etarmaxi. Awanme rma na cetu. Ero wa cetaw so na nîmtapowatu awakro on ewto wece cewru, anahsîthîrî wece cewru. On mîîmo wece cewru marha na nîmtapowatu. On̂iritho on mîîmo awosotî yeken me. On wece cewru na nîmtapowatu awakro.

35 Ero wa yîmtapowataw so yîmtapotarî komo entakî kah yaw, Ero wa cma re amna miir̂asî, kacho ha. N̂examro cirko yiixatî pîn komo yopono me Apa.

36 Anarimaw kicicme so na natu ayanan komo apoko. Kicicme exihnî ro komo tko exihra ro mak nasî. Ero wa exirî ke so mîrwonasî poko so. Yiixatî pîn komo mamawno me tak na miir̂a. Ayanan pen komo na naar̂atu tapomiso so anarî komo rowon pona. Meyeno ewto pona na naar̂atu, meyeno pîn pona na anarimaw.

37 Ero yinhîrî cehtoponhîrî komo na poxunketu anarî komo rowon po cexitaw so. Waapa rowon po thakwa mak natu okwe. Ero yimaw tak na yaaro n̂esehtînoyatu ayanan komo. Kicicme cehtoponhîrî komo na poxunketu. Awakro na nîmtapowatu takronomacho komo poko. Meye rma na nîmtapowatu ahsîn̂e komo rowon po. Kicicme ro mak amna xakn̂e kica, akpîra ro mak, ket ha na awya.

38 Aponaro tak na nat hara yaaro xa tak na. Aaxe xa tak natu. Ahsîn̂e komo rowon po rma na ero wa natu. On roowo wece cewru tak na nîmtapowatu awakro, porin pen komo ya mîmyakn̂e ero wece cewru, on ewto wece cewru marha na nîmtapowatu anmen̂ekathîrî wece. On mîîmo wece cewru marha na nîmtapowatu, awosotî yeken me on̂iritho wece cewru.

39 Ero wa exitaw so yîmtapotarî komo cma re mencesî kah yaw awekenî ro po. Amna cma re makronomesî, kacho cma re mencesî. Ero ke n̂examro cma re makronomesî. Kicicme ayanan komo yehtoponho tak yîhcamnoko, apoko kicicme ehtoponhîrî kom ha.

40 Ero wa wîîkes awya Apa, on mîîmo mîtwo awakro tîmtapotaxmu ponaro cma re masî, yîmtapotarî marha cma re mencesî.

41 Ero ke on wara wîîkes awya Apa, mîmokyasî cma re on yaka, awekenî ro yaka. Ayamatan marha mokope kar̂pe awehtopo yenpotopo. On wara n̂ehcowpe awya tîmsom pokono komo, akir̂wamano ritopo yawno wara xa n̂ehcowpe, poono yawno wara. Anakir̂wamathîrî komo nahwotacowpe marha kir̂wan̂he awehtopo poko, wîîkes awya.

42 On wara marha wîîkes awya Apa, anîhkapethîrî ow. Ero ke owî cma re yîpînînkara ro mak masî. Awantonînhîrî pînîn yaw mîxakn̂e pahxa, Tapi pen pînîn yaw, ero wa xa marha cma re masî opoko hara, kekn̂e tî. Ero wa tî kekn̂e Saromaw Kporin komo ya.