Ero yinhîrî tak, Kaan yakro Saromaw yîmtapotatîkache wehto takî tî nîhcekn̂e kah yai oco. Takn̂itîkaxmu me tîmsom takî tî nakn̂iyakn̂e. Ahnoro tî Kporin komo ya tîmsom nakn̂iyakn̂e. Kporin komo weyuru marha tak n̂esenpekn̂e. Yîmîn weipetîkekn̂e miya ro mak.

2 Ero ke tîmsom pokono komo ewomra thakwa tî xatken̂e iina Kporin komo mîn yaka noro weyuru yesenporî ke iito. Weipetîkekn̂e ro mak oco.

3 Iito rma tî xatken̂e Ixaw Yana komo ahnoro. Wehto mokrî tî n̂een̂atken̂e. Kaan weyuru yîhtorî marha tî n̂een̂atken̂e Noro mîn pona. Ero yipu yenîche takî tî n̂esewnapetken̂e Kaan mîn roron po rma. Kporin komo poko tî nahwowatken̂e. On wara tî ketken̂e, Kir̂wan̂he xa Kaan nai ham okre. Yîtîhkan me ro mak kwakren̂e Mîk ham, ketken̂e tî.

4 Ero yinhîrî takî tî tokuthîrî komo pun nakn̂iyatken̂e Kporin komo ya tîmsom me. Kayaritomo tî ero yipu nakn̂iyakn̂e, Ixaw Yana komo marha tî nakn̂iyatken̂e.

5 Mer̂pono pînî ro makî tî paraxkapekn̂e Saromaw tokuthîrî pen. 22.000 tî paraxkapekn̂e bui pen. 120.000 tî paraxkapekn̂e oper̂a pen hara. Ero wicakno pun tî nakn̂ipekn̂e ero yimaw. Ero wa tî mîîmo nîmyatken̂e n̂examro Kporin komo ya Saromaw n̂ir̂potho ha.

6 Ero yimaw takî tî cemyawno ro poko so xatken̂e tîmsom pokono komo, Repita komo marha. N̂examro tî nîyorketken̂e raatî, cecesom marha tî n̂eceyatken̂e hara. Pahxa rma Tapi pen nakîhtopekn̂e ratî mko, Kaan poko Ixaw Yana komo yahwotacho. Kir̂wan̂he xa nai Kaan ham, yîtîhkan me ro mak kwakren̂e Mîkî Kaan, kacho me tî nakîhtopekn̂e. Ero poko rma tî xatken̂e, yînakîtothîrî poko. Tîmsom pokono komo tî n̂ecececetken̂e Repita komo yemtacho me. Cecesom tî n̂eceyatken̂e n̂examro hara. Piiri tî xatken̂e iito Ixaw Yana komo ahnoro.

7 Ero yinhîrî takî tî on wara kekn̂e Saromaw Kaan mîn roron raconho poko, Yîrakatawno xa tak nasî Kporin komo ya tîmsom yakn̂itopo me anarî hara, kekn̂e. Kporin komo mîn potawno mîn xakn̂e roro. Ero ke iina takî tî takn̂itîkaxmu pun nakn̂iyatken̂e. Katîthîrî marha tî nakn̂ipekn̂e iina, Aaxe xa wasî, kacho me tîmsom hara. Ecenarîra thakwa tî xakn̂e Kaan ya tîmsom yakn̂itopo ro mer̂pora ro mak exirî ke takn̂itîkaxmu pun, katîthîr̂î marha, puruma yeperîrî marha.

8 Ero yimaw takî tî tahwotacho komo n̂iir̂akn̂e Saromaw 7 kaamo. Noro yakro tî nahwowatken̂e Ixaw Yana komo ahnoro. Mer̂pono pînî ro makî tî xatken̂e esenmexapu kom ha. Amace pona rorono komo tî mokyatken̂e, Exitu Yewku kwaka rorono komo marha.

9 8-nhîri kaamo po takî tî n̂esenmekyatken̂e xa hara Kaan pokono me. Kaan ya tîmsom yakn̂itopo yentome tî n̂esenmekyatken̂e 7 kaamo. Ero yinhîrî takî tî n̂esenmekyatken̂e 7 kaamo xa hara ahwotacho komo me rma. Ero wa tî xatken̂e.

10 Taa, 7-nhîrî nuun̂i po takî tî, Ixaw Yana komo n̂en̂epekn̂e hara Saromaw yîmîn komo yaka 23-înhîrî kaamo po xa. Tahwore tî cetken̂e Kporin komo ya Tapi yakronomarî ke, Saromaw yakronomarî ke marha, takronomarî komo ke marha, Ixaw Yana komo yakronomarî ke ha. Ero wa tî cetken̂e hara.

11 Ero wa tî xakn̂e Saromaw, Kporin komo mîn tî n̂irpetîkekn̂e, kayaritomo mîn marha. Ehn̂ara ro makî tî n̂irpekn̂e tînîhtînoputhîrî ahnoro, Kporin komo mîn yawno mko, tîmîn yawno mko marha. Ero wa tî n̂irpekn̂e Saromaw.

12 Ero yinhîrî takî tî Kporin komo n̂esenpekn̂e xa hara Saromaw ya. Kosope tî n̂esenpekn̂e yîwya. On wara tî kekn̂e yîwya, Ai okopuci Saromaw, amtapotarî wentai. Ero ke an̂irithîrî wahsîy omîn me, owya tîmsom yakn̂itopo me ha.

13 Anarimaw na kaapu wahruya tuuna mokuhra ehtome. Anarimaw makaka warai komo ya wahpe anatîthîrî komo okwe. Anarimaw na eper̂a ya oyanan komo wahsîpe okwe.

14 Ero wa mesemetanmekyatu amn̂e amyamro oyanan komo, oyosoken komo amyamro. Ero ke on wara xa kapore nasî ero yimaw, Kicicitho mak amna kica, kan̂e me tak cexpore nasî, oyakro marha tîmtapotapore nasî. Oyewru yenîn̂e xatî wara cexpore nasî, kicicme awehtoponhîrî komo tpoxunkapore marha tak nasî. Ero wa awexitaw so tak amtapotarî komo wencesî kah yaw. Kicicme awehtoponhîrî komo wîhcamnoyasî. Arowon komo tak wakir̂wames hara.

15 On omîn yaka tmohsom komo ween̂asî, yîmtapotarî komo ponaro tak wasî.

16 On omîn me wahsîy. Wakir̂wamai marha. Eroromero oyosotî ciri xe wasî oona towhnî me ro mak. Eroromero enîn̂e me wasî. Ponaro marha wasî eroromero.

17-18 On wara marha wîîkes awya, oponaro rma awexitaw aamo pen wara xa marha kakronomesî xa. Watohnî me ro mak owya apanatanmetopo yewehcataw awya, atwermacho komo yewehcataw marha, kayaritomo me xa kiir̂asî. Awepamthîrî marha wiir̂asî kayaritomo me eroromero. Aamo pen ya wîîkekn̂e on wara, Awepamthîrî exihra tak nas okwe kayaritomo me cehsom, kacho mera ro mak nasî amn̂e, wîîkekn̂e yîwya. Ero wa xa marha wîîkes awya hara. Ero wa xa marha wîîkesî awepamthîrî komo ya hara.

19 Wara rma on wara na matu amn̂e, owya apanatanmetopo komo ponarora na matu, ero yipu marha na mahsîpînketu. Anarî ro komo ponaro marha na matu. Noro yipu komo poko na mahwowatu. Ero wara awexitaw so awakronomara tak was okwe.

20 Ixaw Yana komo tak men mohkesî peen mîmohkexe yimicinthîrî meero ero wara. On po exihra tak naxe onîmîtho po. On omîntho marha wixkapesî on̂enîrî mera tak ehtome. Ero wa wiir̂as on, Oyosotî yeken onî, kachonho ha. On wara tak kexe anarî yana komo ahce na poko yîwîrîmaxapu poko. On tak nasî tîwîrîmaxi ro mak Kaan mîntho wara rma kica, kexe okwe. Ero wa kan̂e me naxe anarî yana komo miyan komo rma.

21 Oroto ka aweserepokacho komo me nas on omîn kir̂wan̂he exirî ke. Ero warahra tak nas amn̂e ahsîpînkache owya. Ero yimaw tak n̂eserepokexe on yari tîtosom komo cixkaxi exirî poko hara. On wara tak kexe, Ahce poyero Kporin komo nîwîrîmai ontho okwe tantononhîrî komo rowontho? Ahce kacho on mîîmotho n̂ixkapoi okwe? kexe marha okwe.

22 On wara n̂eyukyaxe anarî kom hara, Kporin komo tak nahsîpînketken̂e ham okwe, ponaro tporin pen komo yehtoponho ha. Exitu poi cekn̂enhîrî komo nahsîpînketken̂e okwe. Ponaro anarî komo yehtopo poko tak xatken̂e hara kica. Noro yipu komo poko nahwowatken̂e, yîmtapotarî komo marha n̂ewehcatken̂e kica. Ero ke on warai n̂ekmexpoi Kporin komo n̂examro pen yîwîrîmacho okwe, kexe. Ero wa men kexe miyan komo rma amn̂e oyahsîpînketaw awya so, kekn̂e tî Kporin komo. Ero wa tî kekn̂e Saromaw ya.