Taa, on wara tî xakn̂e Saromaw, 20 cimn̂ipu tî xakn̂e Kporin komo mîn ciitopo poko, tîmîn ciitopo poko marha.

2 Xakn̂e marha tî ewto mko Iraw nîmîtho Saromaw ya. Ero pona so takî tî mîîmo mko n̂irpekn̂e Saromaw. Iina so tî Ixaw Yana komo n̂ekenmekn̂e.

3 Ero yinhîrî takî tî Amace-Soba pona cekn̂e Saromaw. Iitono komo tî nahsîyatken̂e tmaywen me so.

4 Tacmo marha tî n̂ewtomekn̂e axawa imo pono. Cemyawno yewton me marha tî ewtotho mko nakirwamekn̂e, Amace pono mko.

5 Bece-Oron marha tî n̂irpekn̂e yaasîno. Bece-Oron marha tî n̂irpekn̂e uuman hara. Ewto mîn xakn̂e twacayem, tmetatayem, metata yecehtotopo ken̂arî, ero warai tî ewto mko n̂irpekn̂e iina so.

6 Baarace marha tî n̂irpekn̂e ewto. Mîîmo mko marha tî n̂irpekn̂e Xerusaren pona. Ahce warai na ciri xe cexitaw ero warai rma tî n̂irpekn̂e mîîmo mko, ewto mko marha. Cemyawno yewton me anarî mko n̂irpekn̂e, tarara yewtonî ro me anarî mko hara, kawaru mkaw tîtosom komo yewtonî ro me anarî mko hara. Ero warai mko tî n̂irpekn̂e Ribanu pona, miyan pona so marha tî n̂irpekn̂e tîrowon me ahsîxapu poko ha kî so. Ero warai mko tî n̂irpekn̂e Saromaw.

7 Iito rma tî xatken̂e Etew komo poyinonho, Amohew komo poyinonho, Peresew komo poyinonho, Epew komo poyinonho, Xebusew poyinonho, Ixaw Yana pîn tî mîkyam xatken̂e n̂examro.

8 Pahxan pen komo tî waihketken̂e Ixaw Yana komo, noro yipu komo porin pen komo. N̂etîmcetken̂e rma tko n̂examro yepamtho, waipîra rma xatken̂e. N̂examronhîrî tî nantomekn̂e Saromaw mîn hak ciitopo poko. Epeman me tî napickekn̂e. Ero wara rma noro yipu komo napickexe oroto rma.

9 Ixaw Yana komo yantomara reha tî xakn̂e Saromaw ahce na ciitopo poko. Sowtatu me makî tî xatken̂e n̂examro reha. Anarî komo tî xatken̂e sowtatu komo yantoman̂e me, tarara yaan̂e komo yantoman̂e me, kawaru mkaw tîtosom komo yantoman̂e me, ero warai me tî xatken̂e Ixaw Yana komo reha.

10 Ixaw Yana komo marha tî xatken̂e antomano rin̂e komo yenîn̂e me, Saromaw maywen komo yenîn̂e me. 250 tî mîkyam xatken̂e ero pokono kom ha.

11 On wara marha tî xakn̂e Saromaw Paraw yemsîrî poko, yîmînî ro tî n̂iir̂akn̂e. Ero ke ero yaka takî tî noro n̂ekyakn̂e Tapi pen Yewtontho poi. On wara tî kekn̂e Saromaw noro poko, Tapi pen mîntho yaw exihra ro mak cexpore nasî opici. Kporin komo yamatan mîn me ehxapunhîrî mko nasî Kaan mînî ro me rma. Ero ke ero yipu yaw exihra cexpore nasî noro opici, kekn̂e tî.

12 Ero yinhîrî takî tî Kporin komo ya tîmsom tî nakn̂iyakn̂e Saromaw tîmsom yakn̂itopo ro pona. Yin̂ir̂pothîrî rma mîn xakn̂e. Kporin komo mîn potuhremacho mîtkoso rma tî n̂irpekn̂e, ero pona tî nakn̂iyakn̂e.

13 Enmar̂atîxera tî tîmsom nakn̂iyakn̂e, Moises penî mtapotachonho yaw roro rma. Sabatu po roro tîmsom marha tî nakn̂iyakn̂e, nuun̂i yepatakache roro tîmsom marha, cimn̂ipu po roro tîmsom marha. 3 ro tî nahwowatken̂e Ixaw Yana komo Xerusaren po, Wahrututpamnî Tohtopo me tî nahwowatken̂e iito, 7 ro Yusuntintaxapu me marha, Kuum Yarî Warai Yaw enmatopo me marha, ero warai me tî nahwowatken̂e yicimn̂ipuntache roro Xerusaren po. Ero yimaw so tîmsom tî nakn̂iyakn̂e marha Saromaw akn̂itopo ro pona.

14 Tîmsom pokono komo marha tî nantomekn̂e emyawno ro poko so. Tîracoi so tî nantomekn̂e Tapi penî mtapotachonho yaw roro rma. Repita komo marha tî n̂iir̂akn̂e Kporin komo poko ahwotacho komo pokono me, tîmsom pokono komo yakronomacho poko marha. Anarî kaamo po tî anarî poko xatken̂e, anarî kaamo po anarî poko tî xatken̂e hara. Ero warai pokono me tî Repita komo n̂iir̂akn̂e. Kaan mîn metatan yenîn̂e komo marha tî nantomekn̂e, tîracoi so tî nantomekn̂e yîwyanî ro poko so metata poko. Ero wa tî antomano n̂iir̂akn̂e Saromaw Tapi penî mtapotachonho yaw roro, Kaan yakrono ro me xakn̂e, noro mtapotachonho yaw roro ha.

15 Kayaritomo ya tantomachonho yaw roro makî tî n̂etapicketken̂e tîmsom pokono komo, Repita komo marha. Ahce na poko cexitaw so noro yanme makî tî n̂etapicketken̂e, Kaan purantan yamtakpon yenîn̂e me marha xatken̂e noro yanme.

16 Ahnoro Saromaw nîhtînoputho poko tî xatken̂e cetapickaxmu komo. Ero wa tî xatken̂e Kporin komo mîn poko, mîîmo yapon ciitopo poko tî ka n̂ihciyatken̂e, mîîmo yahruru marha tî n̂iir̂atken̂e. Mîn hak ciitopo poko tî xatken̂e hara. Ahnoro tî n̂iir̂atken̂e, ciitîkacho pona roro. Ero ke ciitîkaxi takî tî xakn̂e Kporin komo mîn. Ero wa tî xakn̂e.

17 Ero yinhîrî Esion-Xebe pona takî tî cekn̂e Saromaw, Erace pona marha. Tuuna imo yecihtawno mîn xakn̂e ewto mko Eton rowon pono ha. Iina tî cekn̂e Saromaw.

18 Iina takî tî kanawa imo narpekn̂e Iraw Saromaw yaka, tmaywen komo ya tî narpekn̂e. Tuuna imo poko yaana komo tî mîkyam xatken̂e Iraw maywen komo. N̂examro takî tî cetken̂e Saromaw maywen komo yakro Opi pona. Iito tî ooru nahsîyatken̂e 450 tarentu wicakî. Tînahsîthîrî takî tî n̂ekyatken̂e Saromaw yaka ooru ha. Ero wa tî xatken̂e.