Ero yinhîrî takî tî on wara xakn̂e Saba pono komo kayaritomon. Wooxam tî mîk xakn̂e kayaritomo. Saromaw yekaci tî noro n̂encekn̂e. Ero ke Xerusaren pona tî mokyakn̂e yîmtapotarî yentaxi, camkîno ro pokono yentax ha. Mer̂pono pîn ke tmaywei tî mokyakn̂e. Kameru tî n̂ekyakn̂e knahrî poxuretopo ke tîmkawnoyem ha. Ooru marha tî n̂ekyakn̂e mer̂pono pîn, toopuci enporixapu mko marha. Saromaw yaka tmokuche noro yakro tî nîmtapowakn̂e. Ahce na ponaro cehtopo tî n̂ekatîmtîkekn̂e yîwya.

2 Ero ke noro takî tî nîhcamhokekn̂e Saromaw camkî ehtoponhîrî poko. Apohana, camkî wasî ero poko, kahra ro makî tî xakn̂e.

3 N̂eserepokekn̂e ro makî tî Saba pono komo kayaritomon takîhso yîmtapotarî poko. Yîmîn poko marha tî n̂eserepokekn̂e.

4 Yînahrî poko marha tî n̂eserepokekn̂e, iyotî poko, anton komo yapon poko, anton komo ponon poko, noro wokru yekn̂e komo poko, n̂examro ponon poko marha, Kporin komo mîn yaka noro totopo poko, ero yipu poko tî n̂eserepoketîkekn̂e ro mak ha. Cekar̂kaxi ro makî tî n̂eserepokekn̂e. Ero wa tî xakn̂e Saba pono komo kayaritomon wooxam.

5 On wara tî kekn̂e noro kayaritomo ya, Saromaw ya, Yaarono xa mîn wencekn̂e ham tapota, takîhsom me amtapotarî pokono. Meye rma wencekn̂e awehtopo yaaro xa ham.

6 Awekatîmn̂e komo tko ka wanwekyakn̂e iito rma oyexitaw. Omokrî ke mak tak oyewru ke rma tak ween̂asî. Takîhso awehtopo yekatîmtîkara rma xatken̂e owya. Awehtopo raconho yekatîmtîkara rma xatken̂e owya. Takîhsom me xa masî awekaci yopono me ro mak.

7 Tawake xa nat ham amaywen komo, moxam marha awanton komo. Amîtwo roro n̂ecececexe amtapotarî yentachome, takîhsom yentachome ha. Ero ke tawake xa nat ham okre.

8 Kir̂wan̂he nai ham Kporin komo, ponaro awehtopo. Kayaritomo mexan me ween̂asî noro okre, kekn̂e apoko ham. Ero ke kayaritomo me awir̂akn̂e tîyanan komo panatanmetome cehtopo poko. Ixaw Yana komo xe xa nai ham Kaan, ponaro awehtopo. Eroromero n̂examro n̂ecehcesî. Yiixe so cexirî ke marha n̂examro kayaritomon me awir̂akn̂e. Ero wa awir̂akn̂e takîhso cino ritohme, takîhso panatanmekno ritohme marha, kekn̂e tî. Ero wa tî kekn̂e Saba pono komo kayaritomon wooxam.

9 Ero yinhîrî takî tî ooru nîmyakn̂e noro Saromaw ya, 120 tarentu wicakî. Yînahrî poxuretopo marha tî nîmyakn̂e yîwya mer̂pono pîn. Kir̂wanî ro tî mîn xakn̂e yînahrî poxuretopo. Ero warai exihra ro makî tî ka xakn̂e anarî, Saromaw ya nîmyakn̂e Saba kayaritomon ero warai exihra xakn̂e. Toopuci enporixapu mko marha tî nîmyakn̂e yîwya. Ero warai komo tî nîmyakn̂e yîwya.

10 On warai mko marha tî n̂ekyatken̂e Saromaw maywen komo Iraw maywen komo yakro, Ooru n̂ekyatken̂e Saromaw yaka, Opi pononho. Santaru yepu marha tî n̂ekyatken̂e, toopuci enporixapu mko marha.

11 Santaru yepu tî n̂irpekn̂e Saromaw esama me, Kporin komo mîn yaka awomtopo me, kayaritomo mîn yaka awomtopo me marha. Ahpa komo marha tî n̂irpekn̂e, raatî mko marha tîyorkaxmu, cewanomaxmu komo ratîn. Ero warai exihra ro makî tî ka xakn̂e raatî Xuta yepamtho komo chew. Kir̂wanî ro tî mîn xakn̂e raatî.

12 Ero ke Saba kayaritomon ya tî nîmyakn̂e Saromaw yîn̂etacithîrî ahnoro, Ero xe cma re wasî, kachonho mko ha. Saromaw yaka yîn̂ekîthîrî yopono tî nîmyakn̂e yîwya. Ero yinhîrî cekn̂e hara tîrowonî ro pona, tmaywen komo marha tî cetken̂e akro rma. Ero wa tî cekn̂e Saba pono komo kayaritomon wooxam.

13 Anarî komo marha tî n̂ekyatken̂e ooru Saromaw yaka. Yicimn̂ipuntaxera tî n̂ekyatken̂e yîhyaka. Ahnoro cimn̂ipu po roro 666 ton̂erata wicakî so tî n̂ekyatken̂e yîhyaka. Ero wicakî roro tî n̂ekyatken̂e yîhyaka yicimn̂ipuntaxera.

14 Anarî komo marha tî n̂ekyatken̂e ooru yîhyaka, twarawantaxmu kom ha. Arabia pono kayaritomon komo marha tî ooru n̂ekyatken̂e, anarî rowon pono kopenato komo marha tî. Ahnoro tî n̂ekyatken̂e ooru Saromaw yaka, prata marha. Ero wara tî n̂ekyatken̂e yîhyaka.

15 Ero yinhîrî takî tî kecen̂anî mko n̂irpekn̂e Saromaw ooru ha. 200 tî n̂irpekn̂e. Porin tî mîn n̂irpekn̂e, 3,5 kiru wicakî so tî ooru n̂irpekn̂e cewn̂e kecen̂an me.

16 Wahrai komo n̂he marha tî n̂irpekn̂e kecen̂anî mko. 1,7 kiru wicakî so makî tî ero n̂irpekn̂e. 300 tî ero yipu n̂irpekn̂e. Ero mko ahnoro ciitîkache mîîmo yaka tî n̂iir̂akn̂e, Ribanu Pononho, Comota Pononho On Weewe, kacho yaka.

17 Kayaritomo yaponî ro marha tî nakîhtopekn̂e noro porinî ro mak. Erepanci yorî tî n̂irpekn̂e ero me. Cirpoche nîmkarinomapekn̂e ooru ke esmanî ro ke.

18 6 tî xakn̂e ero yaka awomtopo yetapitopo. Kayaritomo tarî yapon marha tî n̂irpekn̂e ooru. Kayaritomo yapon poko cetahsîso tî xakn̂e etapitopo, yîhtarî yapon marha. Kayaritomo yaporî yecepu tî xakn̂e eremacho poko xehxa mehxa wara. Aporî yecepu mkai tî xakn̂e reaw warai ciixapu, asakî tî xakn̂e mehxa anarî, xehxa anarî hara.

19 12 reaw warai marha tî xakn̂e awomtopo yetapitopo po cececetoso so. Cewn̂e etapitopo po tî xakn̂e reaw warai xehxa, mehxa wara. Ero wa tî xakn̂e 6 etapitopo poko hakî. Ero warai tî cirpora ro makî tî xakn̂e anarî kayaritomo komo roowo poko hakno komo.

20 Yaake xakn̂e Saromaw wokru yeetopo. Ero mko marha tî ooru ciixapu me xakn̂e ahnoro. Ero wa xa marha tî xakn̂e mîîmo yamtakpon yawno hara, Ribanu Comotan, kacho yawno. Etîme re tî xakn̂e ooru ciixapu me re, esman me ciixapu. Ero wa tî xakn̂e ahnoro. Prata ciixapu exihra ro makî tî xakn̂e Saromaw yaw wooku yetopo mko. Ero yipu poko tî eserepokara rma xatken̂e Saromaw maywen komo, ero pîntho me makî tî n̂een̂atken̂e. Ero ke ooru makî tî xakn̂e yîhyaw.

21 Xakn̂e xa hara kayaritomo kanawarî yaake. Ero yipu yaw so tî cetken̂e emapona roro noro maywen komo Tahsisi pona. Iraw maywen komo marha tî cetken̂e roro Ixaw Yana komo yakro. 3 ro yicimn̂ipuntache tî cetken̂e roro iina warawantaxi. En̂exa tî n̂ekyatken̂e ooru, prata, erepanci yorî, xîpîrî imo, meeku, ero yipu mko tî n̂ekyatken̂e roro Tahsisi poi.

22 Ero ke Saromaw yemyawno tî xakn̂e anarî komo kayaritomon yemyawno yopo ro mak, roowo poko hakno komo yemyawno yopo. On wara marha tî noro xakn̂e, camkîra ro mak keyukn̂e me tî xakn̂e miyan poko rma. Anarî komo reha ero warahra ro mak xatken̂e kayaritomo komo.

23 Saromaw mtapotarî yenta xe tî xatken̂e kayaritomo komo ahnoro roowo poko hakno komo. Yuhnari yîhtînotopo tî Kporin komo n̂iir̂akn̂e Saromaw ropotaka. Ero ke yîmtapotarî yenta xe tî xatken̂e.

24 Mokyataw so yîwya tîmsom tî n̂ekyatken̂e, prata ciixapu mko, ooru ciixapu mko, poono, sowtatu ponon kuripara ciixapu, yînahrî poxuretopo, iyoh komo marha, kawaru, muura marha. Ero yipu tî n̂ekyatken̂e Saromaw yaka. Tukuknomaxi so tî n̂ekyatken̂e roro yicimn̂ipuntaxera.

25 Kawaru mîn tî xakn̂e tamtakpoi so. Tarara mîn marha tî xakn̂e tamtakpoi so. 4.000 tî ero mko xakn̂e amtakpo mko ha. 12.000 tî xatken̂e kawaru mkaw tîtosom komo. Tarara yewton po so marha tî xakn̂e n̂examro mîn. Xerusaren po marha tî xakn̂e anarî komo mîn hara, kayaritomo mîtwo.

26 Kayaritomo komo kayaritomon me tî xakn̂e Saromaw. Ewpratesî kwaka rorono komo kayaritomon me tî xakn̂e, Piristew komo yaka rorono komo, Exitu rowon wokpan yaka rorono komo. Ero warai komo kayaritomon me tî xakn̂e noro.

27 On wara marha tî xakn̂e prata Xerusaren po kayaritomo yanme, mer̂pora ro makî tî xakn̂e. Tohkarara wara mak xakn̂e iitono komo ya. Setru yepu marha tî xakn̂e mer̂pora ro mak noro yanme. Sikomoru yepu nasî aporî yecihtaw so ero wara ro makî tî xakn̂e setru yepu mer̂pora.

28 Kawaru marha tî n̂ekyatken̂e twarawantaxmu komo Exitu poi. Mîk hak rowon komo poi tî n̂ekyatken̂e.

29 Miya rma nai Saromaw yehtoponho. Ahnoro rma nasî tmewreso tatke karita yaw, Natan Karitan yaka, kweronoman̂e mîk xakn̂e Natan. Kar̂pamxan me Saromaw yehtoponho nasî tmewreso, poritomo me noro yehtoponho marha. Anarî yaw marha nasî tmewreso, Aias karitan yaw, Siro pono karitan yaw ha. Ito karitan yaw marha nasî tmewreso, Kaan n̂enporî yenîn̂e ro mîk xakn̂e Ito. Xeroboaw yehtoponho tî Kaan n̂enpekn̂e yîwya, N̂ebace mumuru yehtoponho ha. Ero yipu tî mewrekn̂e karita yaw. Saromaw yehtoponho marha tî mewrekn̂e ero yaw rma.

30 40 cimn̂ipu tî xakn̂e Saromaw Ixaw Yana komo kayaritomon me. Xerusaren tî xakn̂e noro yewton.

31 Ero yinhîrî takî tî nîwînîkyakn̂e Saromaw pen tporin pen komo yakro. Tapi pen Yewtontho pona tî okoputhîrî nahruyatken̂e. Ero yinhîrî yumumuthîrî takî tî xakn̂e kayaritomo me tîîm pen retawno me. Hoboaw tî xakn̂e noro yosotî. Ero wa tî xakn̂e.