Ero yinhîrî takî tî on wara xakn̂e Hoboaw, Siken pona tî cekn̂e. Iina tî cetken̂e Ixaw Yana komo ahnoro kayaritomo me noro ciiso. Ero ke tî iina cekn̂e.

2 Meye tî ka xakn̂e Xeroboaw Exitu po. N̂ebace pen mumutho tî mîk xakn̂e. Pahxa rma tî iina cekn̂e, noro pen tî waihka xe xakn̂e Saromaw. Ero ke Exitu pona n̂emahciyakn̂e. Iito cexitaw tî n̂encekn̂e Ixaw Yana komo yesenmetopo Siken pona. Ero ke takî tî Exitu poi tî mokyakn̂e hara. Ero wa tî xakn̂e Xeroboaw.

3 Noro rma tko tî nan̂ikyatken̂e Ixaw Yana komo. Ero yinhîrî takî tî noro yakro cetken̂e ahnoro Ixaw Yana komo Hoboaw yaka.

4 On wara tî ketken̂e esenmexapu komo, Ai, Hoboaw, on wara kes amna awya, amna yopo thakwa aamo pen amna napickekn̂e. Tawsîn̂em wara xa xakn̂e noro ya amna yentomacho. Ero ke on wara kes amna awya, wara n̂he tak amna apickakî aamo pen warahra nhe. Taponukyem wara n̂he tak cirko amna yantomacho awya. Ero wa awexitaw tak awewetîn̂e me rma nas amna, ketken̂e tî yîwya.

5 Ai ha, kekn̂e tî Hoboaw, on wara makî ka wîîkes awya so, Etocoko cokorî kapu. Osorwaw ro enmapuche tak amohcoko hara. Ero yimaw tak amtapotachonhîrî komo weyukyasî, kekn̂e tî. Ero ke tî ka cetken̂e hara Ixaw Yana komo.

6 Ero yinhîrî takî tî poritomo komo yakro ka n̂esencekn̂e Hoboaw, Saromaw pen yakro cesentaxmunhîrî komo tî mîkyam xatken̂e noro pen waipînaw ka. On wara tî kekn̂e yîwya so, Ai, apa komo, ahce wa Ixaw komo weyukya awya so? kekn̂e tî.

7 On wara tî n̂eyukyatken̂e n̂examro, Tawake xa cexpore nasî n̂examro poko, yiixatî me cesenpopore nasî. Taa, ero wa ham, kapore nasî yîwya so. Kir̂wan̂he eikuche awya amaywen me roro naxe miya roro okre, ketken̂e tî yîwya.

8 N̂examro mtapotachonho tko tî nanwekyakn̂e Hoboaw, poritomo komo mtapotachonho. Kar̂pamxan komo mtapotarî yentaxi makîrha tî cekn̂e, tpor̂mamyemînhîrî komo yentaxi. Noro yakro cesentaxmu me tî xatken̂e n̂examro.

9 On wara tî kekn̂e Hoboaw yîwya so, Ai, oyakno komo, awya so wîîkes hara, ahce wa wîîke n̂examro ya awya so? Wara n̂he amna apickakî aamo pen warahra, ketken̂e owya. Ahce wa wîîke yiwya so? kekn̂e tî.

10 On wara takî tî ketken̂e n̂examro reha, karpamxan komo, noro por̂mamyemînhîrî komo. On wara men kasko yîwya so, aamo pen warahra cma re amna mapickesî, ketken̂e, n̂examro ya, ketken̂e tî Hoboaw ya. Amna napickekn̂e ro mak aamo pen okwe. Amna yopono me xakn̂e noro ya amna yapickacho, tawsîn̂em wara xa. Wara nhe amna apickakî amoro, aamo pen warahra n̂he, ketken̂e. On wara xa matko n̂examro eyuhko, Apapa pen yawrutarî yopo ro mak nasî oyamoyaran wahraitho rma.

11 Yaaro, awapicketken̂e so ro mak apapa pen. Ow tak kapicketîkexe so n̂he tak noro pen yopo ro mak. Ahyokyatken̂e so apapa pen ososwa ke. Owî reha kîhyokyaxe so cikiri ke oco, kasko yîwya so, ketken̂e tî. Ero wa tî ketken̂e kar̂pamxan komo Hoboaw ya.

12 Ero yinhîrî takî tî osorwaw ro enmapuche mokyatken̂e xa hara Ixaw Yana komo Hoboaw yaka. Yîmtapotachonhîrî yaw roro rma tî mokyatken̂e, Osorwaw ro enmapuche amohcoko xa hara, kachonho yaw roro.

13 Tîrwon̂e tko tî n̂examro n̂eyukyakn̂e Hoboaw. Poritomo komo mtapotachonho tî nanwekyakn̂e.

14 Kar̂pamxan komo mtapotachonho xa matko tî n̂ewehcakn̂e. On wara tî kekn̂e esenmexapu komo ya, Ai, oyakno komo, on wara wîîkes awya so, yaaro rma mîîkexe, awapicketken̂e so xa apapa pen. Miya xe xa tko kapicketîkexe so owî reha noro pen yopo. Ahyokyatken̂e so apapa pen ososwa ke. Owî reha kîhyokyaxe so cikiri ke tak oco, kekn̂e tî.

15 Ero wa tî kekn̂e Hoboaw Ixaw Yana komo ya. Yîmtapotarî komo tî ewetîra xakn̂e okwe. Kaanî rma tko ero wa n̂iir̂akn̂e tîmtapotachonhîrî yaw roro rma ciino ritohme. Pahxa n̂he tî Xeroboaw N̂ebace yakro nîmtapowakn̂e Kporin komo Aias mtari, Siiro pono mtari. Ero ke tîmtapotachonhîrî yaw roro rma ero wa ciino n̂iir̂akn̂e Kaan.

16 Taa, Hoboaw mtapotarî tî n̂encetken̂e Ixaw Yana komo, tîmtapotachonhîrî komo yanwecho me tî n̂encetken̂e. Ero ke on wara takî tî ketken̂e hara, Ahce kacho Tapi pen yepamtho maywen me tatu ke kica? Xese pen yepamtho xe ma re tatu kîkayaritomon komo me? Kaikatko kr̂a hara kîmîn komo yaka kîwyam Ixaw Yana komo. Ayananî ro komo yenîn̂e me kr̂a mak esko amoro, Tapi pen yepamtho mak ha, ketken̂e tî yîwya. Ero wa tî ketken̂e Ixaw Yana komo Hoboaw ya. Ero wa kache cetken̂e hara ahnoro Ixaw Yana komo tîmîn komo yaka.

17 On wara tko tî xatken̂e anarî komo, Ixaw Yana komo rma, Xuta tribun yewton pono komo. Hoboaw maywen me rma tî re n̂esehtînoyatken̂e n̂examro reha.

18 Ero yinhîrî takî tî on wara tî xakn̂e Hoboaw, kayaritomo ha, Atoraw n̂en̂epekn̂e Ixaw Yana komo yaka. Epeman me cetapickaxmu komo yapickan̂e tî mîk xakn̂e. Noro penî tko tî waihketken̂e okwe Ixaw Yana komo, toh ke so tî waihketken̂e. Ero ke takî tî yohno Hoboaw n̂esenkai tîtararan yaka. Ero yaw takî tî n̂emahciyakn̂e Xerusaren pona hara.

19 Ero ke Tapi pen yepamtho komo yanwekn̂e me roro tak xatken̂e Ixaw Yana komo. Ero wara rma naxe oroto okwe n̂examro maywen mera tak. Ero wara naxe.