Ero yinhîrî on wara takî tî xakn̂e Hoboaw, Xerusaren pona tmokuche Xuta yepamtho komo tî nan̂ikyakn̂e, Benxamin yepamtho komo marha tî. Kîrkomo tî nan̂ikyakn̂e, sowtatu me tîtosom kom ha. Ero ke mokyatken̂e mer̂pono pîn, 180.000 ha tî. Ixaw Yana komo yakro etar̂maxi tîto xe tî xakn̂e Hoboaw tmaywen komo me ahsîso xa hara. Ero wa tîto xe tî xakn̂e Hoboaw.

2-3 Ero yimaw rma tko tî Kporin komo mtapotarî n̂encekn̂e Kaan yakrono ro, Semaias tî osotî. On wara kacho tî n̂encekn̂e, Ai Semaias, Hoboaw yakro amtapotata, Saromaw pen mumutho yakro, Xuta yepamtho kayaritomon yakro ha. Ahnoro Ixaw Yana komo ya kasko, Xuta yepamtho chewno komo ya, Benxamin yepamtho chewno komo ya marha.

4 On wara kasko yîwya so, On wara tî nîîke Kporin komo awya so, ayanan komo yakro etar̂maxi tohra ro mak men ehcoko. Etîramacoko hara amîn komo yaka. Oyanme rma n̂examro n̂etowce. Ero ke n̂etowcowpe rma, kasko yîwya so, kacho tî n̂encekn̂e. Ero ke ero wara rma tî kekn̂e Semaias yîwya so. Ero wa kacho yentache takî tî Hoboaw komo ya tohra rma takî tî xatken̂e etar̂maxi Xeroboaw komo yakro. Ero wa tî xatken̂e.

5 Ero yimaw tî Xerusaren pono ro me xakn̂e Hoboaw. Ero yinhîrî anarî ewto pona so tî n̂irpekn̂e sowtatu komo mîn. Mîn hak ewto pona so tî n̂irpekn̂e Xuta yepamtho komo yewton pona so. Tîrowon kurunpen̂e komo mîn tî n̂irpekn̂e ha.

6-10 On warai pona tî n̂irpekn̂e sowtatu komo mîn, Beren, Etan, Tekoa, Bece-Suu, Soko, Aturaw, Kace, Maresa, Sipe, Atorain, Rakis, Aseka, Sora, Aixaron, Ebron, ero warai pona so tî n̂irpekn̂e. Xuta yepamtho komo yewton pona tî ero yipu mko n̂iir̂akn̂e, Benxamin yepamtho komo yewton pona marha. Ero wa tî sowtatu mîn n̂irpekn̂e iina so.

11 Sowtatu mînî mko ciitîkache takî tî wacantopekn̂e yahcono ke. Sowtatu yantoman̂e komo marha tî n̂iir̂akn̂e iina so. Erewsî marha tî n̂enmekpekn̂e iina so, katî marha, wok marha, ero wara so tî.

12 Sowtatu yecen̂an marha tî iina so n̂iir̂akn̂e kamorî yaw taasom, raapu marha cecehkem. Yaake tî ero yipu n̂iir̂akn̂e iina so waapa mokuchen. Ero wa tî n̂iir̂akn̂e tmaywen me rma exirî ke so Xuta yepamtho komo, Benxamin yepamtho komo marha.

13-14 Ero yimaw on wara tî xatken̂e tîmsom pokono komo, cewtonthîrî komo takî tî nahsîpînketken̂e Hoboaw yaka mohtome so. Ero wa xa marha tî xatken̂e Repita kom hara, Hoboaw yaka mokyatken̂e ahnoro Ixaw Yana komo chewnonho komo. Cewtonthîrî komo tî nahsîpînketken̂e Repita komo, twoskaranthîrî komo marha. Xuta yepamtho komo cheka tî mokyatken̂e, Xerusaren pona marha tî mokyatken̂e anarî komo. Ero wa tî mokyatken̂e. Tîmsom pokononho komo tî mîkyam xatken̂e mohxapu komo, Repita kom ha. Xeroboaw komo tî n̂examro nowyatken̂e okwe tumumuru komo yakro ero yipu pokohra ro mak tak ehtome so. Ero wa xatken̂e n̂examro Repita komo poko okwe.

15 On wara tî xakn̂e Xeroboaw, paaka xîkrî mko tî n̂enpor̂akn̂e ponaro cehtopo me. Îh po so tî xakn̂e yîn̂enporithîrî mko. Tanme ro takî tî îh po so tîmsom pokono komo n̂iir̂akn̂e kica. Worokyam ya tîmsom pokono ro me tî n̂examro nantomekn̂e, tîn̂enporithîrî pokono ro me marha.

16 On wara takî tî xatken̂e anarî komo, Ixaw Yana tribun poyino komo rma, Repita komo toche Xuta pona, anarî komo takî ti tîtotopo komo nîhtînoyatken̂e Xerusaren pona Kporin komo ya tîmsom yakn̂iso iina. On wara tî ketken̂e, Kporin komo yehtopo yenî xe ro mak wasî. Yîwya tîmsom marha akn̂ipu xe was ha iito, ketken̂e. Ero ke Xerusaren pona cetken̂e.

17 Ero ke n̂examro tî xatken̂e Xuta yepamtho komo yepamnon̂e me, Hoboaw maywen komo yepamnon̂e me ha. Hoboaw karihton̂e me xatken̂e, Saromaw pen mumutho karihton̂e me. 3 cimn̂ipu tî ero wa xatken̂e. Tapi pen yehtoponho yaw roro rma tî ka xatken̂e, Saromaw pen yehtoponho yaw roro marha tî. 3 cimn̂ipu makî tî ero wara xatken̂e. Ero wa tî ka xatken̂e ero yimaw.

18 Ero yimaw takî tî cipici nahsîyakn̂e Hoboaw, Maarace tî osotî. Xerimoce yemsîrî tî mîk xakn̂e, Tapi pen mumutho yemsîrî. Abiaiw tî xakn̂e yîson yosotî. Eriabe pen yemsîtho tî mîk xakn̂e Abiaiw, Xese pen parî ha.

19 Osorwaw ro tî n̂ewruyakn̂e Maarace Hoboaw mumuru kom ha. Xeus, Semarias, Saan, ero wa tî xakn̂e yîmrerî komo yosotî.

20 Ero yinhîrî takî tî Maaka nahsîyakn̂e hara Hoboaw cipici me. Abisaraw parî tî mîk xakn̂e Maaka. 4 ro tî noro nîmxîkwakn̂e Hoboaw mumuru kom ha. Abias, Atai, Sisa, Seromice, ero wicakî tî xakn̂e yîmrerî komo.

21 Maaka xe xa tî xakn̂e Hoboaw, Abisaraw parî xe. Anarî komo yopo tî yiixe xakn̂e cipici komo yopo, cipici wara cehsom komo yopo marha tî. Yaake tî wooxam nahsîyakn̂e Hoboaw cipici me, 18. 60 tî nahsîyakn̂e cipici wara cehsom kom hara. 28 tî xatken̂e yumumuru komo, 60 tî xatken̂e emsîrî kom hara.

22 On wara tî xakn̂e Hoboaw, Abias tî n̂een̂akn̂e tumumuru kayaritomo me ciisom me. Maaka mrerî tî mîk xakn̂e.Kayaritomo me tî noro ciri xe xakn̂e. Ero ke tî akno komo yopono me n̂iir̂akn̂e.

23 Takîhso tî xakn̂e Hoboaw tumumuru komo poko. Miya so tî n̂examro nakpayakn̂e mak Xuta tribun chere, Benxamin tribun komo chere marha. Anarî komo makî tî ero wa nakpayakn̂e. Sowtatu komo ken̂arî pona so tî n̂ekenmekn̂e, ewto pona so. N̂examro tî nînahmekn̂e mer̂pono pîn ke, n̂emyawnomekn̂e marha tî mer̂pono pîn ke. Mer̂pono pîn ke so marha tî n̂ipihcekn̂e. Ero wa tî xakn̂e Hoboaw tumumuru komo poko.