On wara marha tî xakn̂e Hoboaw, kayaritomo me xa tak n̂ehtîkekn̂e. Yukurumîkno me marha tî n̂ehtîkekn̂e. Ero yimaw takî tî Kporin komo poko kpanatanmetopo takî tî nahsîpînkekn̂e okwe. Ixaw Yana komo marha tî xatken̂e ero wa xa marha noro yakro ro rma okwe.

2 Taa, 5 cimn̂ipu exitaw takî tî kayaritomo me Hoboaw yehtoponho Sisake takî tî mokyakn̂e Xerusaren pono komo waparî me. Exitu pono komo kayaritomon tî mîk xakn̂e Sisake. Kporin komo mtapotarî yanwekrî poyero tî mokyakn̂e.

3 1.200 tî n̂ekyakn̂e tîtararan, 60.000 tî n̂ekyakn̂e kawaru mkaw tîtosom komo. Mer̂pora ro makî tî n̂ekyakn̂e tîhtarî po tîtosom komo yukuknomarî yopo ro mak. Exipsiu komo tî mîkyam xatken̂e, Rubin komo, Sukin komo, Eciopia pono komo, ero warai komo tî mokyatken̂e noro maywen me.

4 Xuta komo yewton tî ka nahsîyakn̂e sowtatu ke tîchewnoyem komo rma. Ero yinhîrî takî tî Xerusaren pona roro mokyakn̂e.

5 Ero ke Xuta yantoman̂e komo tî mohtîketken̂e Xerusaren pona Sisake pona cerahtîmrî ke so. Iito exitaw so takî tî mokyakn̂e xa hara tî Semaias Hoboaw komo yaka, Xuta yepamtho yantoman̂e komo yaka. Kweronoman̂e tî mîk xakn̂e Semaias. On wara tî kekn̂e noro yîwya so, On wara kesî Kporin komo awya so, Ow tak mahsîpînkace okwe. Ero ke anomn̂e komo me tak was Ow hara Sisake yewetîn̂e me tak awehtome so, kesî, kekn̂e tî. Ero wa tî kekn̂e Semaias yîwya so.

6 Ero yipu yentache takî tî Kporin komo yewetîn̂e me n̂ecir̂atken̂e Ixaw Yana yantoman̂e komo, Hoboaw marha. On wara tî ketken̂e, Yaaro on wara kiice so ham Kporin komo, ketken̂e tî.

7 Ero yinhîrî tmamakan me ecitopo komo tî n̂een̂akn̂e Kporin komo. Ero ke tîmtapotarî takî tî n̂ekatîmyakn̂e xa hara Semaias ya. On wara tî kekn̂e yîwya, Ai, Semaias, omamakan me tak n̂ecir̂at ham Xuta yepamtho komo. Ero ke n̂examro waihkara wasî. Wakronomesî rma ha re. Yîrwonîmtîkara wasî poko so. Emetanmetîkano cirpora tak wasî Sisake ya.

8 Noro yewetîn̂e me rma tko naxe okwe on wara kachome yîwya so, Kicicme ro mak nasî kica anarî rowon pono komo maywen me kehtopo, Kir̂wan̂he reha nasî Kporin komo maywen me kehtopo hara, kexe. Ero wa kexe amn̂e, kekn̂e tî Semaias ya.

9 Ero ke Xerusaren pona takî tî mokyakn̂e Sisake. Cepethîkemu mko tî naar̂akn̂e Kporin komo mîn yawnonho. Ero warai komo marha tî naar̂akn̂e kayaritomo mîn yawnonho hara. Ahnoro tî naatîkekn̂e okwe. Ecen̂an komo marha tî naar̂akn̂e Saromaw pen n̂ir̂potho. Ooru ciixapu mîn naar̂akn̂e okwe. Ero yipu tî naatîkekn̂e.

10 Ero yinhîrî takî tî cecen̂anî mko tî n̂irpekn̂e hara Hoboaw ooru ciixaputho yemtakan hara. Bronse makî tî n̂irpekn̂e ero yipu me hara. Ero yipu tî nîmyakn̂e kayaritomo kurun yantoman̂e komo yemyaka, kayaritomo metatan yenîn̂e komo yemyaka ha.

11 Kporin komo mîn yaka cetaw kayaritomo, noro kurun komo tî cetken̂e ecen̂an yehso. Amn̂e takî tî sowtatu mîn yaka n̂ermonoyatken̂e xa hara.

12 Cewetîn̂e me eciriche Hoboaw noro poko takî tî n̂etîrwoxinkekn̂e Kporin komo. Noro maywen pen komo tî waihkatîkara xakn̂e. Ero ke kirwanhe rma xatken̂e ha re iitono komo, Xuta komo. Ehn̂an me tî xatken̂e n̂examro ha re, ahce na poko cexitaw so.

13 Ero yinhîrî takî tî kayaritomo me xa n̂ecitîkekn̂e Hoboaw Xerusaren po rma. 41 cimn̂ipu tî xakn̂e noro yewrutoponho kayaritomo me ecir̂ataw. 17 cimn̂ipu tî xakn̂e kayaritomo me. Xerusaren tî xakn̂e noro yewton. Kporin komo nmen̂ekatho tî mîn xakn̂e Xerusaren, Ixaw Yana tribun yewton poyino. On ewto wiir̂asî oyosotî yekenî ro me, kacho tî mîn xakn̂e. Ero wa tî xakn̂e. Taa, Naama tî xakn̂e Hoboaw yon yosotî. Amonita wosîn tî mîk xakn̂e.

14 Kicicme tî xakn̂e Hoboaw okwe tîropotarî yaknamara cexirî ke Kporin komo wece.

15 Miya rma tî nai Hoboaw yehtoponho. Ahnoro rma nasî tmewreso karita yaw, Semaias nmewretho yaw. Kweronoman̂enho pen mîk xakn̂e Semaias. Tmewreso marha nasî Ito nmewretho yaw hara, Kaanî n̂enporî yenîn̂enho ro mîk xakn̂e Ito. Xuta komo yosotî nasî tmewreso noro karitan yaw. Ero yaw marha nasî Hoboaw yehtoponho. N̂etar̂metken̂e tko tî okwe Hoboaw komo, Xeroboaw komo yakro. Pahkî tî n̂etar̂metken̂e okwe twaihtopo komo pona roro.

16 Ero yinhîrî nîwînîkyakn̂e takî tî Hoboaw tporin pen komo yakro. Tapi pen Yewtontho po tî okoputhîrî nahruyatken̂e. Ero yinhîrî yumumuthîrî takî tî xakn̂e kayaritomo me Hoboaw pen yîhretawno me hara. Abias tî mîk xakn̂e noro yosotî. Ero wa tî xakn̂e.