Ero yinhîrî 18 cimn̂ipu takî tî xakn̂e kayaritomo me Xeroboaw yehtoponho. Ero yimaw takî tî Xuta komo kayaritomon me takî tî xakn̂e Abias hara.

2 3 cimn̂ipu makî tî xakn̂e noro kayaritomo me. Xerusaren pono me tî xakn̂e. Mikaia tî xakn̂e yîson yosotî. Uriew yemsîtho tî mîk xakn̂e Xibea pono yemsîtho. N̂etar̂metken̂e tko tî Abias komo, Xeroboaw komo yakro.

3 Ero ke sowtatu komo tî panahcekn̂e Abias Xeroboaw komo yakro etar̂machome. Erasîn komo tî mîkyam xatken̂e Abias sowtatun komo. 400.000 makî tî xatken̂e. N̂examro yemtaka takî tî tîsowtatun komo panahcekn̂e Xeroboaw hara. 800.000 tî noro sowtatun komo xatken̂e. Karitî komo marha tî mîkyam xatken̂e, erasîn komo marha.

4 Ero yinhîrî takî tî on wara xakn̂e Abias, Semarain Yîpîn tî nawnukyakn̂e. Ero meretwo tî n̂ecececekn̂e. Eprain yepamtho chewno mîn Semarain Yîpîn, îîpî chewno ha. En̂exa tî nîmtapowakn̂e Abias Xeroboaw komo yakro. On wara tî kekn̂e yîwya so, Ai Xeroboaw, omtapotarî ka entakî, Ixaw Yana komo ahnoro amyamro, omtapotarî ka entacoko.

5 On wara tî xakn̂e Kporin komo, ponaro Ixaw Yana komo yehtopo, Pahxa tî Tapi pen n̂iir̂akn̂e Ixaw Yana komo kayaritomon me. Yumumuru komo poko so meero tî nîmtapowakn̂e. On wara tî kekn̂e, Yaaro tan wîîkesî cemaro pîn me ro makî, kayaritomo me naxe Tapi komo miya roro etowîn me mak. Noro yepamtho komo meero naxe kayaritomo me miya roro etowîn me ro mak, kekn̂e tî. Ero wa kacho yentara katî matu?

6 Xeroboaw tko tî xakn̂e Saromaw pen maywenînho, Tapi pen mumutho maywenînho ha. Noro takî tî tîkayaritomonînhîrî nanwekyakn̂e okwe.

7 Ero yinhîrî takî tî warai makno komo n̂esenmekyatken̂e yîhyaka maywen me so. Noro yipu komo tî n̂iir̂akn̂e Xeroboaw tîsowtatun komo me. Ero yimaw Saromaw pen mumutho xakn̂e kayaritomo me Hoboaw ha. Kar̂pamxan me ka exitaw noro yar̂ma xe xakn̂e Xeroboaw okwe, Ketar̂macho poko enpamra ka exitaw okwe, waapa komo yar̂mapon̂e pîn me ka exitaw. Ero yimaw rma ar̂ma xe xakn̂e.

8 Oroto Kporin komo n̂iritho yar̂ma xe tak mat ham okwe, kayaritomo me yin̂irithîrî ha. Tapi yepamtho amna, kayaritomo me cehsom. Noro yipu rma amna yar̂ma xe mat okwe. Mer̂pono pînî rma re amyamro. Ahyaw so marha nasî paaka xîkrî warai, Xeroboaw n̂ir̂potho, ponaro awehtopo komo me yin̂irithîrî kica.

9 Kporin komo mîn yenîn̂e komo mowyatken̂e okwe, Araw pen yepamtho komo. Repita komo marha mowyatken̂e okwe. Anarî yana komo wara rma maxe, mîk hak mak miir̂axe ponaro awehtopo komo ya tîmsom pokono me. Onoke warai na mokyataw ahyaka so noro yipu komo miir̂axe rma kica. Bui na n̂ekya, kahn̂eru na n̂ekya anarimaw, 7 ha. Noro yipu mokuche ponaro awehtopo komo ya tîmsom pokono ro me miir̂axe kica, Kaan pîn ya tîmsom pokono me okwe.

10 Ero warahra reha nas amna. Kporin komo rma nasî ponaro amna yehtopo. Noro yahsîpînkara rma nas amna. Araw pen yepamtho makî reha amna n̂iir̂asî Kporin komo ya tîmsom pokono ro me. Repita komo marha naxe n̂examro yakronoman̂e ro me.

11 Amna yokutho pun nîmyaxe enmar̂atîxera takn̂itîkaxmu me. Pahxaxaro, kokon̂i marha nakn̂iyaxe. Kotoporem marha nakn̂iyaxe. Cuure warai marha panahcexe ero yaponî ro pona. Amna yaw marha nasî ramha yapon ooru ciixapu. Ero pokono mko marha potuhcexe ramha kokon̂i kaamo. Kporin komo mtapotacho yaw roro reha nas amna. Amyamro reha noro pona enîhkan̂e me maxe okwe.

12 Ero ke on wara wîîkes awya so, Kaanî rma nas amna yakro. Amna yaan̂e me nasî. Noro mîn yenîn̂e komo marha tuu kexe awaparî komo me amna totohme. Ero ke on wara wîîkesî awya so, Ixaw Yana komo ya, Kporin komo yakro etar̂mara ehcoko, ponaro aporin pen komo yehtopo yakro. Noro yopo exihra men maxe okwe, kekn̂e tî. Ero wa tî kekn̂e Abias Xeroboaw komo ya.

13 On wara tko tî xakn̂e Xeroboaw, en̂epa me tî n̂en̂epekn̂e tîsowtatun komo raconho Xuta komo mkai. Iito rma tî xatken̂e anarî komo Ixaw Yana komo raconho hara kir̂wantaw rma, Xuta komo yeepatai rma. Yîmkai so tî xatken̂e eseyamxapu kom hara.

14 Ero yinhîrî takî tî tîmkai so n̂een̂atken̂e Xuta komo. Kopi, ketken̂e, n̂esekatketken̂e ro makî tî okwe. Twaparî komo tî n̂een̂atken̂e ceepatai so, tîmkai so marha okwe. Ero ke Kporin komo yakro tî nîmtapowatken̂e cerewre. Tuu ketken̂e marha tîmsom pokono komo.

15 Ero yinhîrî takî tî n̂emtaraketken̂e Xuta komo. Emtaraketaw so on wara takî tî xatken̂e Xeroboaw komo, Ixaw Yana kom ha, Kaanî rma tî n̂examro pen nar̂mapekn̂e Abias komo ya, Xuta komo ya.

16 Ero ke n̂emahciyatken̂e takî tî Ixaw Yana komo pen yuu, yuu, ketaw tî Xuta komo. Iixaw yana pen komo tî Kaan nar̂mapekn̂e yîwya so, Xuta komo ya.

17 Ero ke n̂examro pen tî waihketken̂e Abias komo mer̂pono pîn. 500.000 yakenon tî waihketken̂e ero kaamo po rma okwe. Ero wicakî tî waihyatken̂e Ixaw Yana pen komo karitînhîrî pen komo okwe.

18 Ero ke etar̂mara takî tî xatken̂e Ixaw Yana komo. Iyopo so tî xatken̂e Xuta komo. Ero wa tî xatken̂e n̂examro Kporin komo pona enîrî ke, ponaro tporin pen komo yehtopo pona ha.

19 Ero yinhîrî takî tî Xeroboaw komo wenari rma cetken̂e Abias komo. N̂examro yewtontho mko takî tî nahsîyatken̂e cewton komo me so. Betew, Xesana, Epron, ero wicakî tî nahsîyatken̂e Ixaw Yana komo yewtontho. Ewtoci mko yakro rma tî nahsîyatken̂e.

20 Ero yinhîrî takî tî sowtatu komo epamnopîra xa hara xakn̂e Xeroboaw Abias exitaw kayaritomo me. Ero yinhîrî takî tî Xeroboaw pen n̂eper̂ancekn̂e Kporin komo. Ero yanme rma takî tî waihyakn̂e. Ero wa tî xakn̂e Xeroboaw pen okwe.

21 Yukurumîkno me tko tî n̂ehtîkekn̂e Abias. Cipici komo marha tî nahsîyakn̂e, 14. Yumumuru komo tî n̂ewruyatken̂e 22, emsîrî komo tî n̂ewruyatken̂e hara 16. Ero wicakî tî xatken̂e Abias xîkrî komo.

22 Miya rma nai Abias pen yehtoponho, ahce na komo yin̂irithîrî marha, yîmtapotachonhîrî marha. Ero yipu nasî tmewreso karita yaw, Ito nmewretho yaw. Kweronoman̂enhîrî mîk xakn̂e Ito noro nmewretho yaw nai ha. Ero wa tî xakn̂e Abias.