Ero yinhîrî takî tî on wara xatken̂e Xuta yepamtho komo, Xosias pen mumutho tî n̂iir̂atken̂e kayaritomo me tîîm pen retawno me. Xeoakasî tî xakn̂e yumumuthîrî yosotî. Xerusaren tî xakn̂e noro yewton.

2 On wara tî xakn̂e Xeoakasî, 23 cimn̂ipu tî xakn̂e noro yewrutoponho kayaritomo me ecir̂ataw. 3 nuun̂i makî tî xakn̂e kayaritomo me Xerusaren po.

3 Ero yinhîrî takî tî iina mokyakn̂e Exipsiu komo kayaritomon. Noro tî Xeoakas pen nowyakn̂e kayaritomo me ehxapunhîrî. Xuta yepamtho komo marha tî nantomekn̂e tupurantan tîmtopo poko. Owya men tîmcoko prata 100 tarentu wicakî, ooru marha tîmcoko owya 1 tarentu wicakî, kekn̂e tî yîwya so.

4 On wara marha tî xakn̂e Exipsiu komo kayaritomon, Eriakin takî tî n̂iir̂akn̂e Xuta komo kayaritomon me, Xerusaren pono komo kayaritomon me marha. Xeoakas yakno tî mîk xakn̂e Eriakin. Noro yosotî tko tî nowyakn̂e Exipsiu komo kayaritomon. Xeoiakin me takî tî nosohcekn̂e hara. Xeoakasî reha tî naar̂akn̂e Exitu pona. Ero wa tî naar̂akn̂e.

5 Taa, on wara tî xakn̂e Xeoiakin, 25 cimn̂ipu tî xakn̂e noro yewrutoponho kayaritomo me ciir̂ataw N̂eko ya. 11 cimn̂ipu tî xakn̂e kayaritomo me. Xerusaren tî xakn̂e noro yewton. Kicicme tî noro xakn̂e Kporin komo ya, ponaro noro yehtopo ya rma.

6 Ero yinhîrî takî tî noro yahsîso mokyakn̂e Nabukotonoso, Babiron̂a pono komo kayaritomon. Xeoiakin pen tî nîhromiyakn̂e bronse ke oko. Babiron̂a pona tî naar̂akn̂e okwe.

7 Kporin komo mîn yawno mko marha tî naar̂akn̂e Nabukotonoso Babiron̂a pona ahnoro rma okwe. Iina arîche ponaro cehtopo mîn yaka tî n̂iir̂akn̂e.

8 Miya rma tî nai Xeoiakin yehtoponho. Kicicitho poko tî xakn̂e, Nabukotonoso marha tî nanwekyakn̂e. Ero wara ehtoponhîrî nasî tmewreso karita yaw, Ixaw Yana Kayaritomon Komo Yehtoponho, Xuta Yepamtho Kayaritomon Komo Yehtoponho Marha, kacho yaw. Ero yinhîrî yumumuru takî tî xakn̂e kayaritomo me hara. Xoakin tî xakn̂e noro yosotî.

9 On wara tî xakn̂e Xoakin, 18 cimn̂ipu tî xakn̂e noro yewrutoponho kayaritomo me ecir̂ataw. Xerusaren tî xakn̂e noro yewton. 3 nuun̂i, 10 kaamo xa hara, ero wicakî makî tî xakn̂e noro kayaritomo me. Kicicme xa marha tî noro xakn̂e Kporin komo ya okwe.

10 Anarî cimn̂ipu yihciyataw rma takî tî noro pen n̂ekmexpekn̂e Nabukotonoso Babiron̂a pona. Ero wa tî naar̂atken̂e Xoakin pen. Cepethîkemu mko marha tî naar̂atken̂e Kporin komo mîn yawnonho. Setekias takî tî n̂iir̂akn̂e hara Xuta kayaritomon me, Xerusaren pono komo kayaritomon me marha. Xoakin yakno tî mîk xakn̂e Setekias.

11 Taa, on wara tî xakn̂e Setekias hara, 21 cimn̂ipu tî xakn̂e noro yewrutoponho kayaritomo me ecir̂ataw. 11 cimn̂ipu tî xakn̂e kayaritomo me. Xerusaren tî xakn̂e noro yewton.

12 Noro marha tî kicicme xakn̂e Kporin komo ya, ponaro ehtopo ya rma okwe. Panatanmekyakn̂e cma tî re Xeremias. Weronomano rin̂e tî mîk xakn̂e Xeremias. Kporin komo mtapotarî xa tî n̂ekatîmyakn̂e yîwya. Yaaro mîîkesî, kicicme wehxe ham okwe, kahra ro makî tko tî xakn̂e Setekias Xeremiasî mtapotarî yentache.

13 Nabukotonoso marha tî nanwekyakn̂e Setekias. On wara tî ka kekn̂e Nabukotonoso yîwya, Awanwekîra ro mak wa wasî, kasko ha, Kaan n̂entarî me tan wîîkesî esemîknopîra ro mak, kasko men, kekn̂e tî yîwya. Ero ke tî ero wa kekn̂e. Wara rma tîropotarî ceipamnon̂e wara makî tî xakn̂e Setekias, tîpîmîyewaxkem wara tî n̂ecir̂akn̂e okwe. Kporin komo yewetîn̂e me cexi xera ro makî tî xakn̂e okwe.

14 Kicicme ro makî takî tî n̂ehtîketken̂e tîmsom pokono yantoman̂e komo. Xuta yepamtho komo marha tî kicicme n̂ehtîketken̂e. Kaan yanwekn̂e me makî takî tî n̂ehtîketken̂e okwe. Mîk hak rowon pono komo yehtopo yaw roro rma tî xatken̂e kica, kicicitho poko ro makî tî xatken̂e n̂examro wara. Kporin komo mîn marha tî nîwîrîmetken̂e xa hara okwe. Omînî ro me wahsîyas on, kekn̂e cma re Kporin komo. Ero yipu rma tko tî nîwîrîmetken̂e okwe. Ero wa tî xatken̂e okwe.

15 Tîmtapotarî yekatîmn̂e komo rma re n̂en̂epekn̂e yîhyaka so, Ero wara men exihra ehcoko, kan̂e kom ha. Pahxaxa ro so tpakaxmu wara tî xakn̂e ekatîmn̂e komo yen̂eperî poko. Emapona roro tî noro yipu komo n̂en̂epekn̂e yîpînîn yaw so cexirî ke, ceken ponaro cexirî ke marha.

16 N̂etaporetken̂e mak tko tîhyaka so Kaan n̂en̂epetho komo poko kica. Ero pîntho me ro makî tî n̂encetken̂e yîmtapotarî komo. N̂ewretken̂e marha tî tweronoman̂e komo poko. Ero wa tî xatken̂e pahkî. Ero ke nîrwonîmtîkekn̂e takî tî Kporin komo tîyanan komo poko. Etîrwoxinkan me ro makî tî nîrwonakn̂e.

17 Ero ke Noro rma takî tî Kawtew komo kayaritomon n̂ekpekn̂e n̂examro waparî me. Kacipara imo ke tî waihkano n̂iir̂akn̂e noro Kporin komo mîn yaw rma. Kar̂pamxan komo pînîn yawra ro makî tî xakn̂e, emasî komo pînîn yawra marha, poritomo komo pînîn yawra marha, nocwakomo pînîn yawra marha, kar̂pen komo pînîn yawra marha. Ahnoro rma tî waihkapekn̂e Kporin komo Nabukotonoso ya.

18 Kporin komo mîn yawnonho marha tî naatîkekn̂e Nabukotonoso. Porin komo tî naar̂akn̂e, wahrai komo marha tî. Ahnoro tî naar̂akn̂e cepethîkemu mko kayaritomo yemyawnonho marha tî naar̂akn̂e cepethîkemu mko noro maywen komo yemyawnonho marha. Ero warai tî naatîkekn̂e Babiron̂a pona.

19 Ero yinhîrî takî tî Kaan mîn pen nakn̂iyatken̂e noro maywen komo okwe. Xerusaren wacan marha tî mohraketken̂e. Kayaritomo mîntho marha tî nakn̂itîketken̂e, antomano rin̂e komo mîntho ahnoro. Emyawnonhîrî komo marha tî nakn̂itîketken̂e.

20 Anarî komo reha tî waihkara xakn̂e Nabukotonoso. N̂examro tî naar̂akn̂e Babiron̂a pona. Iito takî tî tanton me n̂iir̂akn̂e. Yumumuthîrî komo yanton me marha xatken̂e. Pahkî tî ero wara xatken̂e, Pehsia kayaritomon komo yehtopo pona roro.

21 Ero wa tî Xuta pen komo xatken̂e Kaanî mtapotachonho yaw roro rma tak ehtome so. Xeremiasî mtari kekn̂e ero wa kacho yaw roro rma tak xatken̂e. On wara tî kekn̂e Kporin komo, Pohra ka n̂expe Ixaw Yana komo rowontho epokarechome. 70 cimn̂ipu cma re xakn̂e epokaretoponhîrî. Epokarera ro mak tî ka xakn̂e. Ero ke ero wicakî xa marha tak n̂epokarepe 70 cimn̂ipu xa marha, kekn̂e tî. Ero wa tî kekn̂e Kporin komo.

22 Taa, ero yinhîrî Siru takî tî xakn̂e kayaritomo me hara, Pehsia komo kayaritomon me. Ero yimaw noro takî tî n̂iir̂akn̂e Kporin komo Xuta yepamtho komo yakronomacho ponaro xa. Tîmtapotachonhîrî yaw roro rma ehtome so tî ero wa n̂iir̂akn̂e. Xeremiasî mtari kekn̂e ero yaw roro rma ehtome so ha. On wara kacho takî tî mewrekn̂e Siru tmaywen komo n̂enîrî me, miyan komo n̂enîrî me rma.

23 Ai oyakno komo, omaywen komo amyamro, on wara wîîkes awya so. Siru ow ha Pehsia komo kayaritomon. Ahnoro kayaritomo komo n̂iir̂akn̂e Kporin komo Kaan omaywen me. Roowo poko hakno komo ero warai me n̂iir̂akn̂e. Kah yawno Mîk ero wa n̂iir̂akn̂e. Noro rma tak oyantomai tîmîn cirpotopo poko. On wara kekn̂e owya, Omîn men cirpoko amoro Xerusaren pona, Xuta yepamtho komo rowontho pona, kekn̂e owya. Ero ke on wara wîîkes awya so, Kaan yanan komo ya, tan matu omaywen komo chew rma. Awya so wîîkesî, tîtopore tak nas hara iina. Ero ke etocoko rma, wîîkesî. Kporin komo rma awakronomacowpe, ponaro awehtopo komo ha. Ero wa men wîîkes awya so, kacho tî mewrekn̂e. Ero wa kacho tî mewrekn̂e Siru. Iina mak nai ekatîmtopo.