Ero yinhîrî erewusmano takî tî n̂iir̂akn̂e Xosias. Kwatotoponhîrî yimawno yukukmacho me tî Ixaw Yana komo n̂erewusmekn̂e Xerusaren po. Yihcirî nuun̂i po tî kahn̂eru komo waihketken̂e noro maywen komo, 14-nhîrî kaamo po. Kwatotoponhîrî yimaw tonosom mîk waihketken̂e.

2 Tîmsom pokono komo tî nantomekn̂e Xosias emyarîrî ro komo poko. On wara tî kekn̂e yîwya so, Kporin komo mîn yenîrî yawno poko ehcoko tahwore, kekn̂e tî yîwya so.

3 Repita komo marha tî nantomekn̂e. Ixaw Yana komo panatanmekn̂e komo tî mîkyam xatken̂e, Kporin komo yantonî ro kom ha. On wara tî kekn̂e Xosias yîwya so, On wara tak men ciicoko Kaan yamatan, Noro yekenî ro me cehsom mîn. Ero ke tak Kporin komo mîn yaka ciicoko, Saromaw n̂iritho yaka, kekn̂e tî. Tapi pen mumutho mîk xakn̂e Saromaw, Ixaw Yana komo kayaritomon pen mumutho ha. Noro n̂iritho yaka tak cicoko. Amotaw so tak arîhra maxe Kaan yamatan oroto. Aporin komo Kaan yantonî ro me mak tak ehcoko. Noro mîn yentopo ponaro mak tak ehcoko, Kaan yanan komo ponaro marha ehcoko, Ixaw Yana komo ponaro.

4 Tîraconkaxi so ehcoko ayananî ro komo yakro, ero re pokono ro komo yakro ha. Aporin pen komo nantomekn̂e Tapi pen, Ixaw Yana kayaritomon pen, yumumuthîrî pen marha. Karita yaw so nasî yînmewrethîrî komo ero wa kacho yaw roro ehcoko.

5 Kaan mîn yaw tak ececetocoko ero re pokono komo yakro, Repita komo yakro ha. Tîraconkaxi so marha naxe ahnoro Ixaw Yana komo. Ero ke araconhîrî ro komo yakro ececetocoko amyamro.

6 Kahn̂eru tak waihkacoko Kwatotoponhîrî yimaw tonosom, Kaan ponaro xa tak ehcoko marha. Ero yinhîrî ayanan komo yotî tak yupucoko. Ero wa ehcoko Kporin komo mtapotachonho yaw roro Moises pen ya kekn̂e yîn̂ekatîmrî hara ero yaw roro ehcoko, kekn̂e tî Xosias Repita komo ya.

7 Ero yinhîrî oper̂a xîkrî komo takî tî nîmyakn̂e Xosias ceseresmaxmu komo yotî me, Kwatotoponhîrî yimaw tonosom. Kabritu marha tî nîmyakn̂e yîwya so. Mer̂pora tî nîmyakn̂e 30.000 ha tî. Paaka marha tî nîmyakn̂e yîwya so 3.000 tî. Tokuthîrî rma tî mîk nîmyakn̂e.

8 Antomano rin̂e komo marha tî tookuthîrî nîmyatken̂e Ixaw Yana komo ya, tîmsom pokono komo ya marha, Repita komo ya marha. Iwkias, Sakarias, Xeiew, ero wara tî xakn̂e tîmn̂e komo yosotî. Tîmsom pokono komo tî mîkyam xatken̂e. Oper̂a xîkrî tî nîmyatken̂e n̂examro yîwya so Kwatoponhîrî yimaw tonosom, 2.600. Paaka marha tî nîmyatken̂e yîwya so 300.

9 Konanias marha tî nîmyakn̂e tookuthîrî Repita komo ya. Noro yakno komo marha tî nîmyatken̂e, Semaias, Natanaew, Asabias, Xeiew, Xosabace, ero wara tî xakn̂e noro yakno komo yosotî. Repita komo yantoman̂e komo tî mîkyam xatken̂e. Oper̂a xîkrî tî nîmyatken̂e yîwya so Kwatotoponhîrî yimaw tonosom, 5.000. Paaka marha tî nîmyatken̂e, 500. Ero wa tî nîmyatken̂e.

10 Ero ke cehtopo ro to so takî tî n̂ecececetken̂e tîmsom pokono komo. Repita komo marha tî n̂ecececetken̂e iito takrono ro komo yakro. Kayaritomo mtapotachonho yaw roro rma tî n̂ecececetken̂e.

11 Ero yinhîrî takî tî oper̂a xîkrî komo waihketken̂e Kwatotoponhîrî yimaw tonosom. Noro pen kamxukutho tî carametken̂e tîmsom pokono komo tamorî ke so. Waihkaxapu tî n̂ipiketken̂e Repita komo reha.

12 Ero yimaw takî tî takn̂itîkaxmu komo tî naar̂atken̂e anana. Mooxe n̂he tî ka n̂enmekyatken̂e Ixaw yana komo ya tîmtome, noro re yepamtho komo ya tîmtome. On wara tî ketken̂e yîwya so, Awanme ro so tak akn̂icoko Kporin komo ya tîmsom. Moises pen nmewretho yaw roro rma tak akn̂icoko. Ero wara ciitome yîwya so anana naar̂atken̂e.

13 Kwatotoponhîrî yimaw tonosom reha tî nupur̂atken̂e kapanatanmetopo yaw roro. Anarme tîmsomu reha tî nîyetken̂e, Kporin komo ya tîmsom ha. Tahrem yaw so tî nîyetken̂e anarmerpan yaw so. Tîyoche takî tî Ixaw Yana komo ya n̂ekamyatken̂e yohno rma.

14 Ero yinhîrî takî tî tootî ro komo takî tî nanîmyatken̂e hara Repita komo, Tîmsom pokono komo yotî marha. Cemyarke so tî xatken̂e tîmn̂e komo, Araw yepamtho komo. Takn̂itîkaxmu yakn̂irî poko tî xatken̂e kokmamso ro, katî yakn̂irî poko marha. Ero ke wooto poko reha tî xatken̂e Repita komo, tootî komo tî nanîmyatken̂e, tîmsom pokono komo yotî marha, Araw yepamtho yot ha. Ero poko tî xatken̂e Repita komo.

15 Waano yaan̂e komo reha tî n̂ecececetken̂e esenmexapu komo yeepatai cehtopo ro to. Karita yaw roro rma tî iito xatken̂e. Tapi nmewretho, Asape nmewretho, Eman nmewretho, Xetutun nmewretho, ero warai pen komo nmewretho yaw roro tî iito xatken̂e. Kaan n̂enporî yenîn̂e ro tî mîk xakn̂e Xetutun, kayaritomo ya centamexposom yenîn̂e ro. N̂examro mtapotachonho yaw roro tî xatken̂e waano yaan̂e komo. Metata mîtwo so marha tî xatken̂e metata yenîn̂e komo. Tootî yanîmso tohra tî xatken̂e. Iyotî komo tî nanîmyatken̂e iyanan komo, Repita kom ha.

16 Ero ke ero po rma tî Kporin komo ya tîmsom me takn̂itîkaxmu nakn̂iyatken̂e. Kporin komo ya tîmsom yapon pona tî nakn̂iyatken̂e. Kwatotoponhîrî yimaw tonosom marha tî nupur̂atken̂e ero kaamo po. Ero wa tî n̂iitîketken̂e Xosias yanme rma.

17 Ero wara tî xatken̂e Ixaw Yana komo, Xerusaren pona esenmexapu komo, Kwatotoponhîrî yukukmacho me tî n̂eseresmetken̂e. Wahrututpamnî Tohtopo me marha tî n̂eseresmetken̂e 7 kaamo.

18 Ero wara xa Kwatotoponhîrî me eseresmara ka xatken̂e Ixaw Yana komo. Pahxa makî tî ero wara n̂eseresmetken̂e Samuew pen exitaw, weronomano rin̂enho pen ha. Ixaw Yana kayaritomon komo tî re n̂eseresmetken̂e ero warahra ha tko tî. Kir̂wan̂he reha tî eseresmacho komo n̂iir̂akn̂e Xosias reha. Tîmsom pokono komo tî xatken̂e iito, Repita komo, Xuta yepamtho komo ahnoro, Ixaw Yana komo, Xerusaren pono komo, ero warai komo tî xatken̂e iito okre.

19 18 cimn̂ipu tî xakn̂e kayaritomo me Xosias yehtoponho ero wara Kwatotoponhîrî me eseresmetaw so. Ero wa tî n̂eseresmetken̂e.

20 Ero yinhîrî takî tî on wara xakn̂e Xosias Kporin komo mîn yakir̂wamatîkache, ero yimaw Exipsiu komo kayaritomon tî cekn̂e etar̂maxi, N̂eko tî noro yosotî. Kahkemis pona tî cekn̂e, Ewpratesî yecihtawno pona. Noro yakro etar̂maxi tî cekn̂e Xosias hara N̂eko yakro.

21 On wara tko tî tîmtapotarî n̂entamexpekn̂e N̂eko Xosias ya, Ai, Xuta komo kayaritomon amoro, ahce kacho oyakro etar̂maxi mîmokya hara okwe? Awakro so etar̂maxi mokuhnî ro mak ow. Anarî yana komo yakro etar̂maxi makî reha kmoko. Kaanî rma oyantomekn̂e n̂examro yakro oyetar̂macho poko. Yohno etoko n̂examro yakro etar̂maxi, kekn̂e owya. Kaanî rma nas oyakro. Ero ke Kaan yewetîn̂e pîn me exihra men esko amoro. Awaihke ha men Noro okwe anarimaw, kacho tî n̂entamexpekn̂e yîwya.

22 Ero wa kacho tî n̂encekn̂e Xosias. Wara rma, Taa, tohra wai ham, kahra tî xakn̂e Xosias. Cekn̂e rma tî etar̂maxi, anarî kuknon yaw makî tî cekn̂e. N̂eko mtapotachonho ponarora ro makî tî xakn̂e. Kaanî mtapotachonho rma tî mîn xakn̂e yîmtapotachonhîrî. Wara rma ponarora tî xakn̂e Xosias okwe. Ero ke Mexito pona tî cekn̂e etar̂maxi woskara pona. Ero wa tî cekn̂e Xosias.

23 Noro penî tko tî wetken̂e cetwosom komo. Ero ke on wara tî kekn̂e tmaywen komo ya, Ow aacoko miya. Owaitopo me owocow oko, kekn̂e tî.

24 Ero ke tarara yai takî tî naar̂atken̂e maywen komo. Anarî yaka tî n̂enkayatken̂e hara yîtararan yaka. Ero yaw takî tî naar̂atken̂e Xerusaren pona. Iito takî tî waihyakn̂e okwe. Okoputhîrî tî nahruyatken̂e noro porin pen yocho yawxaka rma. Ero yinhîrî ahnoro Xuta yepamtho komo tî nîwracetken̂e Xosias pînîn yaw, Xerusaren pono komo marha tî.

25 Xeremias tî waano n̂iir̂akn̂e yîwratarî komo me taasom. Ero takî tî naar̂atken̂e waano yaan̂e komo, kîrkomo, wooxam komo marha. Ero yimaw ciixapu rma waano naar̂axe oroto tîwratarî komo me. Xosias pen pokono naar̂axe. Ahnoro Ixaw Yana komo meero ero pokono naar̂axe waano tîwracetaw so. Ero wa kacho marha nasî tmewreso karita yaw, Yîwratacho Komo, kacho yaw ha.

26 Miya rma tî nai Xosias yehtoponho, kir̂wan̂he ehtoponhîrî. Kporin komo ya kpanatanmetopo yaw rorononho tî mîk xakn̂e okre.

27 Ahnoro rma noro yehtoponho nasî tmewreso karita yaw, Ixaw Yana Kayaritomon Komo Yehtoponho, Xuta Yepamtho Kayaritomon Komo Yehtoponho Marha, kacho yaw. Ero wa nasî tmewreso.