Taa, on wara tî xakn̂e Xosias, 8 cimn̂ipu makî tî xakn̂e noro yewrutoponho kayaritomo me ecir̂ataw. 31 cimn̂ipu tî xakn̂e kayaritomo me. Xerusaren tî xakn̂e noro yewton.

2 Kir̂wan̂he tî noro xakn̂e Kporin komo ya. Tporin pen yehtoponho yaw roro rma tî xakn̂e, Tapi pen yehtoponho yaw roro ha. Etowra ro makî tî xakn̂e okre, poowa me, kaari me, ero wa tî etowra xakn̂e.

3 On wara tî xakn̂e noro 8 cimn̂ipu exitaw kayaritomo me cehtoponhîrî, kar̂pamxan me makî ka cexitaw, Kaan ponaro takî tî n̂ehtîkekn̂e, ponaro Tapi pen yehtoponho ponaro ha. Ero yinhîrî 12 cimn̂ipu exîtaw takî tî kayaritomo me cehtoponhîrî, Xuta yepamtho rowon tî nakir̂wamekn̂e, Xerusaren meero tî nakir̂wamekn̂e. N̂ihciyakn̂e mak ha ka ero wa akir̂wamacho poko. Îh pono mko tî nar̂mapekn̂e. Mîk hak warai me ciixapu mko marha tî nar̂mapekn̂e. Weewe tî xakn̂e ero yipu me ciixapu, toopu marha, kuripara marha, ero yipu mko tî nar̂mapekn̂e ahnoro ha.

4 Baaw ya tîmsom yakn̂itoponho komo tî nakuhr̂apetken̂e Xosias maywen komo noro wero ro rma. Kotoporem yakn̂itoponho mko marha tî nar̂mapekn̂e ero yepoyino mko hara. Iito marha tî xakn̂e mîk hak warai me ciixapu komo, weewe, toopu marha. Ero yiputho tî nakuhr̂apopekn̂e yupupunthîrî me cehso ro. Ero yinhîrî yupupunthîrî takî tî pahyakn̂e pahxan pen komo yocho pore, noro yipu ya tîmsom yakn̂in̂enho komo yocho pore.

5 Noro yipu ya tîmsom yakn̂in̂enho pen komo yocho marha tî nowpekn̂e. N̂examro pen n̂iritho pona rma takî tî iyochîrî komo nakn̂ipekn̂e kr̂a, akn̂itopo mko pona. Ero wa tî Xuta yewtonî mko nakir̂wamekn̂e, Xerusaren meero marha.

6 Ero wa marha tî Manases yewtonî mko nakir̂wamekn̂e, Eprain yewtonî mko marha, Simeaw komo yewtonî mko marha. Meyeno meero tî nakir̂wamekn̂e Nahtari yewtonî mko meero. Ewto panawno mko meero tî namapekn̂e yawaka ke ahnoro enporixapunhîrî mko.

7 Ero wa tî iitono mko n̂iir̂akn̂e Xosias, anarî ro komo ya tîmsom yakn̂itopo mko tî nar̂mapekn̂e, kotoporem yakn̂itopo mko marha. Mîk hak warai me ciixaputho marha tî namapekn̂e weewe. Toopu ciixapu mko tî nakuhr̂apekn̂e yupupunthîrî me cehso ro. Ero wa tî n̂iir̂akn̂e miya rma Ixaw Yana komo rowon poko hakî. Ero wara ciriche Xerusaren pona takî tî n̂etîramekn̂e hara. Ero wa tî xakn̂e Xosias.

8 Taa, ero yinhîrî 18 cimn̂ipu takî tî xakn̂e kayaritomo me noro yehtoponho. Takir̂wamaxi takî tî xakn̂e Ixaw Yana komo rowon. Kicicitho mko ken̂ehra marha takî tî xakn̂e Kaan mîn. Ero yimaw takî tî tmaywen komo n̂en̂epekn̂e Kporin komo mîn yakir̂wamachome, ponaro cehtopo mîn ha. Sapan, Asarias mumuru mîkî, Maaseias, Xerusaren pono komo kayaritomon mîk ha, Xoa. Xoakas mumuru tî mîk xakn̂e Xoa, kayaritomo yehtoponho mewren̂e mumuru ha. N̂examro tî n̂en̂epekn̂e Kporin komo mîn yakir̂waman̂e komo.

9 Ero ke Iwkias yaka tî cetken̂e, Kporin komo yaka cewomsom yaka. Yîwya takî tî nîmyatken̂e puranta Ixaw Yana komo n̂ekîtho Kaan mîn yaka. Pahxa rma tî Ixaw Yana komo n̂ekyatken̂e, Manases komo, Eprain komo. Xuta komo marha, Benxamin komo marha, ero warai komo tî puranta n̂ekyatken̂e. Xerusaren pono komo meero tî n̂ekyatken̂e. Ero yimaw tî Repita komo ya tî nîmyatken̂e, Kaan min metatan yenîn̂e komo ya. Yîn̂ekîthîrî komo takî tî Sapan naar̂akn̂e Iwkias yaka. Ero wa naar̂akn̂e.

10 Ero yinhîrî cetapickaxmu yenîn̂e komo yemyaka takî tî puranta nîmyatken̂e hara Iwkias komo, Kporin komo mîn yakir̂waman̂e yenîn̂e komo yemyaka ha. N̂examro makîrha takî tî akir̂waman̂e komo n̂epemetken̂e, akir̂wamachonhîrî yepetho tî nîmyatken̂e yîwya so.

11 Mîîmo ciin̂e ro komo ya tî n̂examro nîmyatken̂e hara. Ero ke ero pona takî tî toopu nahsîyatken̂e enporixapu, weewe marha sahsamaxapu. Makwanan me ciisom mîn nahsîyatken̂e, kamru me ciisom marha, mîîmo yetarî me ciisom hara. Ero warai tî nahsîyatken̂e epethîrî pona mîîmo mko yakir̂wamacho me, Xuta kayaritomon pen komo nîwîrîmatho yakir̂wamacho me ha.

12-13 Esemîknopîn me tî n̂etapickekn̂e akir̂waman̂e komo. On wara tî xakn̂e cetapickaxmu yenîn̂e komo yosotî, Xaace, Obacias, ero wara tî. Repita tî mîkyam xatken̂e, Merari yepamtho ha. Koace yepamtho marha tî xatken̂e noro yipu komo yenîn̂e me, Sakarias, Mesuraw kom ha. Ero wara tî xakn̂e cetapickaxmu yenîn̂e komo yosotî. Anarî komo marha tî xatken̂e mîn hak pokono komo yenîn̂e me. Ero wa tî xatken̂e Repita komo. Yaana tî mîkyam xatken̂e raatî yecetopo poko, iyorkacho poko marha. Wara rma ahce na mko yenmekn̂e komo yenîn̂e me marha tî xatken̂e, mîn hak pokono komo yenîn̂e me tî xatken̂e. Anarî komo tî xatken̂e karita mewren̂e ro me, porisia warai me, metata yenîn̂e me. Ero pokono me tî xatken̂e Repita komo.

14 Taa, on wara tî xakn̂e Iwkias, Kporin komo yaka cewomsom, puranta takî tî naar̂atken̂e yîhyaka, Kaan mîn yaka ehxapunhîrî. Ero yimaw takî tî Kaan Karitan n̂een̂akn̂e. Kporin komo ya kpanatanmetopo tî mîn n̂een̂akn̂e. Moises pen ya n̂entamexpekn̂e, ero rma.

15 Ero ke on wara tî kekn̂e Iwkias Sapan ya, karita mewren̂e ro ya, Ai oyakno, karita ween̂e Kporin komo mîn yaw, kpanatanmetopo komo, kekn̂e tî. Yîwya takî tî nîmyakn̂e, Sapan ya.

16 Ero ke kayaritomo yaka tî naar̂akn̂e Sapan. On wara tî kekn̂e yîwya, Apa, amaywen komo mantomai Kporin komo mîn yakir̂wamacho poko, ahnoro amtapotachonhîrî yaw roro rma n̂iir̂axe watohnî me ro mak.

17 Puranta tî nahsîyatken̂e Kporin komo mîn yawnonho. Ero tî nîmyatken̂e cetapickaxmu yenîn̂e komo ya, cetapickaxmu komo ya marha, kekn̂e tî.

18 On wara marha tî kekn̂e Sapan kayaritomo ya, On karita nîîm owya Iwkias, Kporin komo yaka cewomsom, kekn̂e tî. Ero yinhîrî takî tî n̂îmtapotarekn̂e kayaritomo n̂entarî me.

19 On wara takî tî xakn̂e kayaritomo kpanatanmetopo yencetaw, tpononthîrî takî tî nahyaxkekn̂e ceserepokarî ke xa.

20 Ero yinhîrî takî tî tmaywen komo nan̂ikyakn̂e, Iwkias, Aikaw, Sapan mumuru ha, Abiton, Mika mumuru ha, Sapan, kayaritomo yehtoponho mewren̂e ha, Asaias, kayaritomo yanton ha, ero warai komo tî nan̂ikyakn̂e.

21 On wara tî kekn̂e yîwya so, Kporin komo mtapotarî entatatko opokono, Ixaw Yana komo pokono, Xuta komo pokono marha, etîmtoxapu komo pokono ha, ero pokono entatatko yîmtapotarî ha. Kaanî rwonîmtopo men n̂ekatîmyas on Kaan Karitan kopi Iwkias n̂enîtho. Kaan men nîrwonasî kpoko so kopi. Ero wa tî tatu Kporin komo mtapotachonho yewetîra exirî ke kporin pen komo pahxa. On karita yaw mewrexapu yewetîtîkara tî xatken̂e kopi, kekn̂e tî.

22 Ero ke cetken̂e takî tî Iwkias komo, kayaritomo n̂en̂epetho komo ahnoro. Uwta yaka tî cetken̂e, kweronoman̂e yaka. Sarun pici tî mîk xakn̂e Uwta. Tokace mumuru tî mîk xakn̂e Sarun, Aras parî ha. Kayaritomo ponon yenîn̂e ro tî mîk xakn̂e Sarun. Xerusaren pono tî mîk xakn̂e Uwta, ewto mahrimachonho pono ha. Yîwya takî tî n̂ekatîmyatken̂e kayaritomo mtapotarî.

23-24 On wara tî n̂eyukyakn̂e Uwta, Ai ha, taa, on wara kacoko awen̂epen̂enhîrî komo ya, On wara kesî Kporin komo awya, Awewtonthîrî pen komo men wîwîrîmes amn̂e. Ero pono pen komo marha wîwîrîmes okwe. Okaritan nîmtapotarece Xuta kayaritomon n̂entarî me, Oyewetîn̂e pîn komo men wîwîrîmesî, anararmepaso nasî yîwîrîmacho komo, kacho nîmtapotarece. Ero wa kacho yaw roro rma yîwîrîmano wiiras okwe.

25 Oyahsîpînketken̂e okwe. Anarî ro komo ya tîmsom me nakn̂ice kotoporem, ponaro cehtopo komo ya tîmsom me. Ahnoro tîn̂irithîrî komo ke rma orwonmekyatken̂e okwe. Ero ke iitono pen komo tak wîwîrîmetîkesî ro mak orwon yanme. Wehto warai ro mak mîn orwon ha, eihkanî ro warai, kes awya, kacoko yîwya.

26 On wara marha kacoko Xuta kayaritomon ya, Kporin komo mtapotarî entatko, kan̂enho ya, On wara kesî Kporin komo awya reha, ponaro Ixaw Yana komo yehtopo, Omtapotarî mentai amoro orwonîmtopo pokono.

27 Cukmape tko n̂ehxe ham okre aropotarî. Kaan mamakan me tak mecire. Ero wa mecire omtapotarî yencetaw awya on ewto yîwîrîmacho pokono, on pono komo yîwîrîmacho pokono marha. Ero yencetaw awya omamakan me xa mecire. Apononthîrî mahyaxkai, mîwratai marha on̂entarî me. Ero ke amtapotarî wentai.

28 Ero ke aporin pen komo yaka tak kaar̂as amn̂e. Ahwokan me rma mîwayas amn̂e. Ero ke amoro reha enîhra rma masî on yîwîrîmacho ewto pen yîwîrîmacho, on pono komo yîwîrîmacho marha, kesî Kporin komo awya, kacoko yîwya, kekn̂e tî. Ero wa tî kekn̂e Uwta yîwya so. Ero ke kayaritomo yaka takî tî cetken̂e hara. Uwta mtapotarî tî n̂ekatîmyatken̂e yîwya. Ero wa tî n̂ekatîmyatken̂e.

29 Ero yinhîrî takî tî on wara xakn̂e kayaritomo, Xuta yepamtho poritomon komo tî nan̂ikpekn̂e ahnoro. Xerusaren pono komo marha tî nan̂ikpekn̂e.

30 Mokuche so Kporin komo mîn yaka takî tî cekn̂e kayaritomo. Xuta yepamtho komo tî naar̂akn̂e kîrkomo, Xerusaren pono komo marha. On warai komo naar̂akn̂e, tîmsom pokono komo, Repita komo, ahnoro Ixaw Yana komo, cemyawnoyem komo, emyawnomnî komo marha, ero warai komo tî naar̂akn̂e iina. Iito takî tî Kaan Karitan nîmtapotarekn̂e yîn̂entarî komo me. On yewehcataw mak kakronomexe so, kacho tî mîn nîmtapotarekn̂e. Kporin komo mîn yaw enxapunhîrî tî nîmtapotarekn̂e.

31 Yîmtapotaretîkache takî iito rma tî n̂ecececekn̂e kayaritomo. Kporin komo n̂entarî me takî tî nîmtapowakn̂e yîmtapotarî yewetîtopo poko. On wara tî kekn̂e, Yaaro tan wîîkesî esemîknopîn me ro mak, Kaan yehtopo yaw roro wasî, yîwya kpanatanmetopo wewetîtîkesî. On yewehcataw mak kakronomexe so, kacho wewehcasî karita wîmtapotarei ero rma. Tahwore rma wewehcasî yîkrîpîra ro mak, kekn̂e tî.

32 Ero yinhîrî takî tî on wara kekn̂e noro iina mohxapu komo ya Xerusaren pona mohxapu komo ya, Benxamin yepamtho komo ya marha, Taa, ero wa tak kacoko tak amyamro hara, wîîka ero wa xa marha. Kaan Karitan wewehcasî xa, kacoko, kekn̂e. Ero ke ero wara rma tî ketken̂e n̂examro. Kaanî ya kpanatanmetopo wewehcasî, ponaro kporin pen komo yehtopo ya kapanatanmetopo ha. Omtapotarî yewehcataw mak awya so kakronomexe so, kacho wewehcasî, ketken̂e tî.

33 Ero wa tî xakn̂e Xosias. Kicicitho mko tî nar̂metîkekn̂e ahnoro Ixaw Yana komo rowon pononho. Ixaw Yana komo tî panatanmekyakn̂e Kporin komo Kaanî yewetîtopo poko. Kporin komo poko mak ehcoko etowîn me ro mak, kekn̂e tî yîwya so. Ero ke noro exitaw ha ka kayaritomo me Kporin komo pona enîhkan̂e mera ro makî tî xatken̂e. Noro ponaro tî xatken̂e tporin pen komo wara rma. Ero wa tî ka xatken̂e.