Taa, on wara tî xakn̂e Manases, 12 cimn̂ipu tî xakn̂e noro yewrutoponho kayaritomo me ecirataw. 55 cimn̂ipu tî xakn̂e kayaritomo me. Xerusaren tî xakn̂e noro yewton.

2 Kicicme tko noro xakn̂e Kporin komo ya okwe. Kicicme ro makî tî xatken̂e mîk hak rowon pono komo, pahxan pen komo. Ixaw Yana komo ya Kporin komo nar̂mapekn̂e n̂examro. Kicicme n̂examro pen yehtoponho yaw roro rma tî xakn̂e noro hara kica Manases.

3 Mîk hak ya tîmsom yakn̂itopo tî n̂irpekn̂e hara tîîm pen n̂ixkatho yekenho na rma okwe. Baaw ya tîmsom yakn̂itopo marha tî n̂irpekn̂e. Weewe n̂enpor̂pekn̂e mîk hak warai me kica. Yaake n̂enpor̂pekn̂e. Ahnoro kah yawno komo poko marha tî nahwowakn̂e. Noro yipu ya tîmsom tî nakn̂iyakn̂e marha kica.

4 Anarî ro komo ya tîmsom yakn̂itopo mko marha tî nakîhtopekn̂e Kporin komo mîn yaka rma okwe. On wara tko tî kekn̂e Kporin komo tîmîn poko, Xerusaren tak nasî oyosotî yeken me eroromero, kekn̂e tî. Ero wa kachonho yaka rma tî nakîhtopekn̂e anarî ro komo ya tîmsom yakn̂itopo yaake kica.

5 Asakî tî xakn̂e Kporin komo mîn roron. Asak hakno yaka rma tî kah yawno komo ya tîmsom yakn̂itopo nakîhtopekn̂e okwe.

6 Tumumuthîrî pen komo marha tî nakn̂iyakn̂e wehto ywaka oco. Aporî yecihtaw tî nakn̂iyakn̂e, Inon Mumuru yekenho po ha. Pahxarono yentan̂e me marha tî xakn̂e. Kicicitho yekatî komo mtapotarî poko marha tî xakn̂e kica. Yaskomo me tî xakn̂e, erem poko marha tî xakn̂e kica. Worokyam ponaro marha xakn̂e. Kicicitho pokono me mak xakn̂e noro, miyan pokono me rma. Ero ke tî kicicme ro mak noro yehtopo n̂een̂akn̂e Kporin komo, tîrwonmekn̂e me.

7 On wara meero tî xakn̂e. Weewe tî n̂irpekn̂e onoke na kuknon me. Ponaro cehtopo me tî n̂irpekn̂e. Kporin komo mîn yaka rma n̂iir̂akn̂e kica, tîn̂irpothîrî rma. On wara tî kekn̂e pahxa Kaan Tapi pen ya, yumumuthîrî pen ya marha Saromaw pen ya, On mîîmo yaka oyosotî wiir̂asî eroromero. Onahsîtho on mîîmo, anarî ahsîra wasî. Xerusaren marha wahsîye oyewton me. Anarî yahsîra wîxakn̂e Ixaw Yana tribun komo yewton ha. On xa wahsîye oyewton me, kekn̂e tî.

8 On wara marha kekn̂e Noro, On roowo wîmyakn̂e aporin pen komo rowon me. On poi Ixaw Yana komo yen̂epera ro mak tak wasî. Ero wa wasî owya apanatanmetopo komo ponaro xa exitaw so mak ha tko. Ahnoro cewetpore nasî apanatanmetopo komo Moises pen ya wentamexpekn̂e ero ha. Ahnoro ero yipu yewehcataw Ixaw Yana komo ya tantono ro me tak n̂examro wiir̂asî, kekn̂e. Ero wa tî kekn̂e Kaan Tapi pen komo ya.

9 Ero warahra tko tî xakn̂e Manases, kicicitho poko xa matko tî Xuta yepamtho komo panatanmekyakn̂e, Xerusaren pono komo marha. Miya xe xa ro makî tî kicicitho poko panatanmekyakn̂e. Pahxa mîk hak rowon pono komo waihkapekn̂e Kporin komo Ixaw Yana komo ya, n̂examro yopo tî xakn̂e kicicitho pokono me ro mak okwe. Ero wa tî xakn̂e Manases okwe.

10 Noro yakro rma tî re nîmtapowakn̂e Kporin komo. Ahnoro Xuta yepamtho komo yakro tî nîmtapowakn̂e. Yîmtapotarî yentan̂e pîn wara ro makî tko tî xatken̂e okwe.

11 Ero ke takî tî Asiriu komo kayaritomon sowtatun komo n̂ekmexpekn̂e Kporin komo, sowtatu yantoman̂e kom ha. Manases pen tî nahsîyatken̂e. Kiiwi warai tî n̂iir̂atken̂e noro pen yewnarî yaro oko. Napomiyatken̂e marha bronse ke. Ero yinhîrî takî tî noro pen naar̂atken̂e Babiron̂a pona.

12 Iito cexitaw Kporin komo Kaan yakro takî tî nîmtapowakn̂e Manases cerewre ro mak. Opînîn yaw cma re mas Apa. Kicicitho ro mak ow ha kica, kekn̂e Kaan ya, ponaro tporin pen komo yehtopo ya ha.

13 Ero ke tî yîmtapotarî n̂encekn̂e Kaan. Ero ke Xerusaren pona takî tî n̂ekpekn̂e hara. Kayaritomo me tî n̂iir̂akn̂e hara. Ero yimaw on wara takî tî kekn̂e Manases tîropotaw, Kaan xa Mîk ham Kporin komo, kekn̂e takî tî.

14 Ero yinhîrî takî tî waaca n̂irpekn̂e xa hara Manases Tapi pen Yewtontho mkai. Xion mîtkoso rma n̂irpekn̂e oesce n̂ixa, aporî yecihtaw. Kaw roro tî n̂irpekn̂e Ootî Metatan pona roro. Opew wacan me tî xakn̂e. Kaw xa tî n̂irpekn̂e waaca. Ero yinhîrî sowtatu yantoman̂e komo tî n̂ekenmekn̂e Xuta yewton pona so, sowtatu wacan ken̂arî pona so.

15 Mîk hak warai me ciixaputho mko marha kr̂a tî nar̂mapekn̂e, ponaro anarî yana komo yehtopo komo. Kaan mîn yawnonho marha tî nar̂mapekn̂e ero yipu. Anarî ro komo ya tîmsom yakn̂itopo mko marha tî nar̂mapekn̂e, Kaan mîn roron pononho mko, îh pononho mko ha. Yîhroronî mkainonho marha tî nar̂mapekn̂e Xerusaren pononho mko, tîn̂irpothîrî mko rma.

16 Kporin komo ya tîmsom yakn̂itopo tî nakir̂wamapekn̂e hara. Ero pona takî tî nakn̂iyakn̂e tokuthîrî pun. Aaxe xa was Apa, kacho me tî nakn̂iyakn̂e, Kir̂wan̂he xa mai ham amna ya, kacho me marha. Xuta yepamtho komo marha tî panatanmekyakn̂e Kporin komo ponaro ehtopo komo poko. On wara tî kekn̂e yîwya so, Kporin komo ya tîmsom me mak tak akn̂icoko, ponaro Ixaw Yana komo yehtopo ya tîmsom ha, kekn̂e tî yîwya so.

17 Îh pona so rma tko tî tokuthîrî komo pun nakn̂iyatken̂e Xuta komo. Kporin komo ya tîmsom makî tko tî nakn̂iyatken̂e, ponaro cehtopo komo ya tîmsom ha.

18 Miya rma nai Manases yehtoponho. Kaan yakro tî nîmtapowakn̂e. Kaan n̂enporî yenîn̂e ro komo mtapotarî marha tî n̂encekn̂e. Kporin komo mtapotacho tan ha, ponaro Ixaw Yana komo mtapotacho, ketken̂e tî yîwya. Ahnoro ero yipu nasî tmewreso karita yaw, Ixaw Yana Kayaritomon Komo Yehtoponho, kacho yaw.

19 Kaan yakro yîmtapotachonhîrî marha nasî tmewreso Kaan n̂enporî yenîn̂e ro komo karitan yaw. On warai marha nasî tmewreso ero yaw, yîmtapotarî yentachonho Kaan ya, tîpîn̂e entachonhîrî. Kicicme ehtoponhîrî marha nasî tmewreso, Kaan yanwechonho yîwya, îh po so tîmsom yakn̂itopo ciitoponho yîwya, mîk hak warai me weewe ciitoponho yîwya, toopu ciitoponho marha yîwya, ero warai me hara. Ero wa Manases yehtoponho nai tmewreso karita yaw, Kicicitho ow ha, kan̂e pîn me ka exitawno ha. Ero yipu nasî tmewreso Kaanî mtapotarî yentan̂e ro komo karitan yaw.

20 Ero yinhîrî takî tî nîwînîkyakn̂e Manases tporin pen komo yakro. Yîmînthîrî yaka rma tî okoputhîrî nahruyatken̂e. Ero yinhîrî yumumuthîrî takî tî xakn̂e kayaritomo me tîîmînhîrî yekenho yakan me hara. Amon tî mîk xakn̂e yumumuthîrî yosot ha.

21 Taa, on wara tî xakn̂e Amon, 22 cimn̂ipu tî xakn̂e ewrutoponhîrî kayaritomo me ecir̂ataw. 2 cimn̂ipu makî tî xakn̂e kayaritomo me. Xerusaren tî xakn̂e noro yewton.

22 Kicicme tî noro xakn̂e Kporin komo ya. Tîîm pen wara rma tî xakn̂e Manases pen wara kica. Iito rma tî xakn̂e mîk hak warai me yîîm pen n̂irpotho mko ha. Noro yipu ya tîmsom tî nakn̂iyakn̂e kica Amon, mer̂pono pîn ya tîmsom ha. Noro yipu poko makî tî xakn̂e kica.

23 Noro reha tko tî kicicitho me esehtînopîra ro mak xakn̂e tîîm pen wara. Kicicitho ro mak ow ha kica, kahra tî xakn̂e okwe Kporin komo ya. Kicicme xa matko tî n̂ehtîkekn̂e okwe. Ero wara tî xakn̂e Amon okwe.

24 Ero yinhîrî takî tî Amon maywen komo rma n̂esencetken̂e noro pen waihkacho poko. Ero ke noro pen takî tî waihketken̂e okwe yîmînthîrî yaw rma. Ero wa tî waihyakn̂e Amon pen okwe.

25 Ero yinhîrî on wara xatken̂e Xuta komo, Amon pen waihkan̂enho pen komo tî waihketken̂e hara. Ero yinhîrî Amon pen mumutho takî tî n̂iir̂atken̂e hara kayaritomo me tporin pen komo retawno me. Xosias tî xakn̂e yumumuthîrî yosotî. Ero wa tî noro n̂iir̂atken̂e.