Ero wara tî xakn̂e Esekias, kir̂wan̂he ro makî tî ciino n̂iir̂akn̂e Kaan yanme. Ero yinhîrî tko tî mokyakn̂e Senakeribe, Asiriu komo kayaritomon. Xuta yewtonî mko pona tî mokyakn̂e. Ewto mko tî wamcekn̂e, sowtatu ke tukuruyemu mko rma tî wamcekn̂e. Ero yipu pono komo yahsî xe tî xakn̂e tmaywen me so.

2-3 Noro mohtopo tî n̂encekn̂e Esekias. Xerusaren pono komo waparî me meero tî noro mokya, kacho marha tî n̂encekn̂e. Ero wa tî Senakeribe yehtopo n̂encekn̂e. Ero ke antomano rin̂e komo yakro tî n̂esencekn̂e, sowtatu yantoman̂e komo yakro marha. Tuuna pîtho mko nasî tahrupore ewto panawno mko, kacho poko tî n̂esencetken̂e. Ero ke tî Esekias nakronometken̂e ero yahrutopo poko.

4 Kîrkomo tî mokyatken̂e mer̂pono pîn tuuna pîtho yahruso. Aporî meero tî nahruyatken̂e, Xuta rowon pore tîhtosom. On wara tî ketken̂e, Oona mokuche so Asiriu kayaritomon komo on wara men ketu, Okre mer̂pono pîn on tuuna Xuta pono okre, ketu na kica. Ero ke aporî meero tahrucerî kra, ketken̂e tî.

5 On wara marha tî xakn̂e Esekias, kar̂pe tî n̂etapickekn̂e ewto wacan poko. Etawkaxapu mko tî nahrupekn̂e. Ero wa tî waaca nakir̂wamapekn̂e. Ero pona takî tî ewto kurunpetopo mko n̂irpekn̂e. Kawno mko tî n̂ir̂pekn̂e mîîmoci, yaw ehtome so sowtatu komo. Anarî marha tî n̂ir̂pekn̂e ero yipu ewto wacan, yihcirî yantari rma. Miro marha tî nakir̂wamekn̂e, Tapi pen Yewtontho pono. Sowtatu kurunu mko marha tî nakîhtopekn̂e mer̂pono pîn, raapu mko tî nakîhtopekn̂e cecehkemu mko, waiwî mko marha tî, kecen̂anî mko marha tî, ero yipu tî nakîhtopekn̂e. Ero wara tî xakn̂e Esekias.

6 Ero yinhîrî takî tî sowtatu yantoman̂e komo n̂iir̂akn̂e Esekias, mîk hak yenîn̂e me hara. Ero yinhîrî Xerusaren pono komo takî tî nan̂ikyakn̂e ewto roron pona, waaca metatan mîtwono pona. Mokuche so tî n̂examro nahworekn̂e.

7 On wara tî kekn̂e yîwya so, Ai oyakno komo, kar̂pe ehcoko, erasîra marha ehcoko. Ahwokara ro mak ehcoko Asiriu komo kayaritomon pona. Mer̂pora rma re naxe noro sowtatun komo. N̂examro poko tko ahwokara ehcoko. Mer̂pora xa naxe kukurunpen̂e komo noro sowtatun komo yopo ro mak.

8 Toototho kyam makî reha mîkyam noro sowtatun komo. Kporin komo Kaan xa nasî kukurunpen̂e komo me. Noro rma nasî kakronoman̂e me, kwaparî komo yar̂man̂e me marha nasî, kekn̂e tî yîwya so, esenmexapu komo ya. Tahwore n̂he takî tî xatken̂e n̂examro Esekiasî mtapotarî yentache. Ero wa tî xatken̂e.

9 Ero yinhîrî takî tî on wara xakn̂e Senakeribe, Asiriu komo kayaritomon, tmaywen komo tî n̂en̂epekn̂e Xerusaren pona. Rakis po tî xakn̂e noro reha. Ahnoro tîsowtatun komo yakro tî xakn̂e iito ero wamton̂e me ar̂machome. Esekias yaka tko tî tmaywen komo n̂en̂epekn̂e Xuta pono komo kayaritomon yaka. Xuta yepamtho komo yaka meero tî n̂examro n̂en̂epekn̂e, mîk hak yaka, Xerusaren pono komo yaka meero.

10 Xerusaren panaka tmokuche so on wara tî kekn̂e Senakeribe maywen Xerusaren pono komo ya, Ai Xerusaren pono komo, on wara kesî Senakeribe Asiriu komo kayaritomon, Ahce pona re meen̂at ha Xerusaren po rma awehtome so epatakan me ro mak.

11 On wara kyam na nîîke Esekias awya so, Kporin komo Kaan xa kukurunpexe so, Asiriu komo kayaritomon ya kar̂mapora nasî, nîîke. Awemîknoyaxe so ro mak okwe. Mîwaiyaxe xa matko rooma yaka, tuuna xe awehtopo komo yaka marha. Ero yipu yaka awaitome so kr̂a awemîknoyaxe so Noro.

12 On wara mexe tî xakn̂e noro Esekias, Aporin komo ya tîmsom yakn̂itopo tî n̂ixkekn̂e ewto pono mko, îh pono mko marha. On wara tî kekn̂e awya so, Xuta pono komo ya, Xerusaren pono komo ya marha, On mîtkoso mak Kaan poko ahwotatamcoko Kaan ya tîmsom yakn̂itopo mîtkoso. On pona mak kotoporem akn̂icoko, kekn̂e tko tî awya so.

13 Oyekaci yentara katî mîxatken̂e amyamro, oporin pen komo yekaci yentara marha? Mîk hak rowon pono pen komo yar̂man̂enho ow ha. Xatken̂e rma re ponaro n̂examro pen yehtoponho. Yukurunpeno cirihra ro makî tko wa xatken̂e n̂examro, ponaro ehtoponhîrî kom ha. Oyopono me n̂examro cirihra ro mak xatken̂e.

14 Pahxa marha tî mîk hak rowon pono komo waihketîketken̂e kr̂a oporin pen komo. Xatken̂e marha re ponaro n̂examro pen yehtoponho kom hara. Wara rma yukurunpeno cirihra rma tî xatken̂e n̂examro, oporin pen komo yopono me cirihra rma xatken̂e. Ero ke ahce wa thakwa re ponaro awehtopo komo akurunpetu so hara?

15 Tohnaw ro mak nîmtapowasî Esekias okwe. Yîmtapotarî ponarora ro mak men ehcoko. Oyopono me n̂examro pen cirihra thakwa xatken̂e ponaro meyeno komo yehtoponho, oporin pen yopono cirihra marha xatken̂e. Soroso xa ponaro awehtopo komo oyopono me awirira so nasî, kekn̂e tî. Ero wa kacho tî kekn̂e Senakeribe maywen Xerusaren pono komo ya.

16 Noro yanton komo meero tî Kporin komo Kaan nîwîrîyaketken̂e Esekias pen marha tî nîwîrîyaketken̂e okwe.

17 Karita marha tî mewrekn̂e Senakeribe yaake. Kporin komo yîwîrîyakacho pokono xa mîn xakn̂e karita mko, ponaro Ixaw Yana komo yehtopo yîwîrîyakacho pokono. Noro yanwetopo pokono marha makî tî mîn xakn̂e. On wara kacho tî mewrekn̂e, Tponarono komo yukurunpera ro mak xatken̂e ponaro anarî rowon pono pen komo yehtoponho, oyopono me n̂examro pen cirihra ro mak xatken̂e. Ero ke ero wa xa marha oyopono me awirira so marha nasî ponaro Esekias yehtopo hara, kacho tî mewrekn̂e.

18 Ero yinhîrî takî tî kar̂pe xa tak nîmtapocetîketken̂e Asiriu kayaritomon maywen komo. Ebrew mtapotarî yaro tî nîmtapowatken̂e Xerusaren pono komo n̂entarî me, waaca pono komo n̂entarî me. Ero wa tî nîmtapowatken̂e eraspeno ciitome, ahwokano ciitome so marha ewto pono komo yahsîtome tîwya so.

19 Ponaro Xerusaren pono komo yehtopo marha tî nîwîrîyaketken̂e. Ponaro roowo pono komo yehtopo yîwîrîyakacho wara rma Kporin komo nîwîrîyaketken̂e kica. Tooto nakîhtotho makî reha mîn ponaro n̂examro yehtopo. Ero wara re tî nîmtapowatken̂e noro yipu komo poko, Kporin komo poko marha.

20 Ero wa kacho yentache Esekias ya, Isaias Amos ya marha, n̂examro takî tî nîmtapowatken̂e kah yawno yakro. Cerewre ro makî tî nîmtapowatken̂e.

21 Ero yinhîrî takî tî ancu n̂en̂epekn̂e Kporin komo. Noro takî tî waihkekn̂e Senakeribe sowtatun pen komo, ahnoro karitînhîrî pen komo, antomano rin̂e pen komo marha. Ero ke tîrowon pona takî tî n̂etîramekn̂e hara Senakeribe. Tîhyapamso tî cekn̂e. Ero yinhîrî takî tî iito cexitaw ponaro cehtopo mîn yaka cekn̂e. Iito takî tî noro pen waihketken̂e yumumuru komo rma kacipara imo ke.

22 Ero wa tî Esekias nukurunpekn̂e Kporin komo. Senakeribe ya ar̂mapora xakn̂e, Asiriu komo kayaritomon ya ar̂mapora xakn̂e ha. Xerusaren pono komo marha tî nukurunpekn̂e. Anarî komo ya marha tî ar̂mapora xakn̂e. N̂examro tî n̂iir̂akn̂e mehxa xehxa mohxapu komo yopono me.

23 Ero yinhîrî takî ti mer̂pono pîn komo tî n̂ekyatken̂e Kporin komo ya tîmsom. Xerusaren pona tî n̂ekyatken̂e. Esekias ya tîmsom marha tî n̂ekyatken̂e, Xuta kayaritomon ya tîmsom. Ero ke takî tî on wara ketken̂e mîk hak rowon pono komo, Kayaritomo xa mîk ham Esekias, ketken̂e.

24 Ero yinhîrî takî tî okohme xakn̂e Esekias pen okwe. Waiporo takî tî xakn̂e okwe. Ero ke Kporin komo yakro tî nîmtapowakn̂e takir̂wamacho poko. Ero ke tî Esekias mtapotarî n̂eyukyakn̂e Kaan. On wara tî kekn̂e yîwya, Anarmenî ro mak wenpes awya. Ero yipu yenîche awya, oyakir̂wame ham Kaan, kasko, kekn̂e tî yîwya. Ero ke takî tî ero yipu n̂enpekn̂e yîwya.

25 Kporin komo ya takronomachonhîrî tko tî epanpîra xakn̂e Esekias okwe. Takîhsom me xa tak n̂esehtînoyakn̂e kica. Ero ke nîrwonakn̂e takî tî Kaan Xuta pono komo poko, Xerusaren pono komo poko marha.

26 Ero yinhîrî tko tî Kporin komo mamakan me n̂ecir̂akn̂e hara Esekias. Anarî komo xawyakan me takî tî n̂ecir̂akn̂e hara. Ero ke tî Kaan n̂etîrwoxinkekn̂e ka, Xuta pono komo yen̂epera tî ka xakn̂e waipîra ka exitaw Esekias. Ero wa tî xakn̂e.

27 On wara marha tî xakn̂e Esekias, mer̂pora ro makî tî xakn̂e noro purantan, emyawno mko marha. Kyopono me cekaiporesom me marha tî xakn̂e. Cemyawno mîn tî n̂irpekn̂e mer̂pora. On warai tî xakn̂e noro yemyawno mîîmo yaka so tîmtosom, prata, ooru, toopuci enporixapu mko, knahrî poxun, kecen̂an, ero warai mko ha. Ahce na komo yîmtotopo me tî n̂irpekn̂e mîîmo mko.

28 Naatî yeperîrî mîn marha tî n̂irpekn̂e yaake. Puruma mîn, sepata mîn, uupa yukun mîn, aseci mîn, ero yipu mîn tî n̂irpekn̂e. Tok mîn marha tî n̂irpekn̂e yaake, oper̂a mîn, paaka mîn marha.

29 Ewto mko marha tî n̂irpekn̂e, toh komo yewton me, cemyawno yewton me marha. Mer̂pora tî xakn̂e noro yoku oper̂a, paaka komo. Mer̂pono pîn ke ro makî tî noro n̂emyawnomekn̂e Kaan.

30 On wara marha tî n̂ir̂pekn̂e Esekias, iito tî xakn̂e tuuna pîtho, Xion ha. Mehxa tîhtosom makî tî mîn xakn̂e, ero ke takî tî Esekias wahkotopekn̂e. Anarî takî tî n̂irpekn̂e totopo, Tapi pen Yewtontho pona roro yîhtotome tak ero yaro. Oesce n̂ixa takî tî nîhcekn̂e. Ero wa tî nakîhtopekn̂e. Ahce na ciir̂ataw Esekias ya ehn̂ara ro makî tî n̂iir̂akn̂e. Ero wara tî xakn̂e.

31 Ero yinhîrî takî tî Babiron̂a pono komo mokyatken̂e Esekias yenso. Tantoman̂e komo yanme rma tî mokyatken̂e. On wara kacho tî n̂encetken̂e n̂examro, Ixaw Yana komo rowon po cirihnî tî n̂iir̂akn̂e iitono. Ero ke takî ti mokyatken̂e entaxi. N̂examro mokyataw Kaan takî tî ka n̂emoxenorekn̂e Esekias yai noro yehtopo xa yesenpotîkachome. Ero wara tî noro nukukmekn̂e Kaan.

32 Miya rma nai Esekias yehtoponho, kir̂wan̂he rma ehtoponhîrî. Ero pokono rma mewrekn̂e Isaias Amos Kaan n̂enpotho rma tîwya. Xuta Kayaritomon Komo Yehtoponho, Ixaw Yana Kayaritomon Komo Yehtoponho Marha, kacho yaw marha nasî tmewreso.

33 Ero yinhîrî takî tî nîwînîkyakn̂e Esekias tporin pen komo yakro. Okoputhîrî tî nahruyatken̂e Tapi pen yepamtho yahrutopo yaka, îh pono yaka ha. Noro pen waipuche ahnoro Xuta pono komo tî nîmtapowatken̂e kir̂wan̂he xa noro pen yehtoponho poko, Xerusaren pono komo marha tî nîmtapowatken̂e ero poko. Ero yinhîrî takî tî yumumuthîrî xakn̂e kayaritomo me hara tîîm pen retawno me. Manases tî mîk xakn̂e noro yosotî. Ero wa tî xakn̂e.