Ero yinhîrî takî tî, Xerusaren po eseresmacho komo yîtîhkache on wara xatken̂e Ixaw Yana komo, Xerusaren pona mohxapu komo ahnoro. Xuta komo yewton pore ro tî cetken̂e. Anarî ro komo ponaro tî ka xatken̂e iitono komo. Noro yipu komo poko ehtoponhîrî tî nakuhr̂apetken̂e toh pen, pataw ciixapu mko. Mîk hak warai ciixaputho mko marha tî nametken̂e weewe pen. Îh pono pen marha tî n̂ixketken̂e anarî ro komo ya tîmsom yakn̂itopo pen. Ewto pono marha tî n̂ixketken̂e ero yipu mko. Ero warai tî n̂ixketken̂e ahnoro Xuta pono mko Benxamin pono, Eprain pono, Manases pono. Ahnoro mak n̂ixketken̂e exihra cehso ro. Ero yinhîrî cewton pona so takî tî cetken̂e hara Ixaw Yana komo, cekenî ro komo pona so.

2 Ero yinhîrî takî tî tîmsom pokono komo nantomekn̂e Esekias, Repita komo marha. Cemyarîrî ro pokono me so tî n̂iir̂akn̂e. On warai pokono me tî n̂examro n̂iir̂akn̂e, tîraconkaxi so. Takn̂itîkaxmu me tîmsom yakn̂itopo pokono me tî n̂iir̂akn̂e, Aaxe xa wasî, kacho me tîmsom yakn̂itopo poko marha, tîyanan komo yakronomacho poko marha, Kir̂wan̂he mai ham Apa, kacho poko marha, Kporin komo poko ahwotacho poko. Ero warai pokono me tî n̂examro n̂iir̂akn̂e Esekias, Kaan mîn yawno pokono me.

3 On wara marha tî xakn̂e kayaritomo, tooku poyinonho takî tî nîmcekn̂e Kporin komo ya tîmsom ro me. Noro yipu tî nîmyakn̂e takn̂isom me, pahxaxaro so, kokon̂i so marha. Ero yimawno me tî nîmyakn̂e, sabatu po rorono me marha tî, nuun̂i yepatakache rorono me marha tî, ahwotacho komo yimaw rorono me marha tî, ero yimaw so takn̂isom me tooku poyinonho nîmyakn̂e Esekias. Kporin komo ya kpanatanmetopo yaw roro ero yimaw so nîmyakn̂e.

4 On wara marha tî kekn̂e noro Xerusaren pono komo ya, Oyakno komo, anatîrî komo yeperîrî raconho men ehcoko tîmsom pokono komo nahrî me, Repita komo nahrî me marha. Ero yipu ehcoko Kporin komo ya kpanatanmetopo pokono me mak ehtome so n̂examro, kekn̂e tî yîwya so.

5 Ero ke ero wa kacho yentache rma Ixaw Yana komo ya tînatîrî komo yeperîrî raconho tî n̂ekyatken̂e mer̂pora ro makî. Puruma tî n̂ekyatken̂e, sepata marha. Yihcirî me epetaxapu tî n̂ekyatken̂e. Uupa yukun, katî, weenu, ahce na komo n̂ekyatken̂e tînatîrî komo yeperîrî raconho. Cisimu wicakî so tî n̂ekyatken̂e.

6 Xuta komo tî ero yipu n̂ekyatken̂e. Ixaw Yana komo marha tî n̂ekyatken̂e, Xuta komo chewno kom ha. Tookuthîrî komo poyino tî n̂ekyatken̂e paaka komo, oper̂a komo marha. Cemyawno komo raconho marha tî n̂ekyatken̂e, Kaan ya tîmxapu ro raconho rma. Cisimu wicakî tî n̂ekyatken̂e. Xerusaren pona arîche cemyawnonhîrî takî tî n̂enmekyatken̂e tukuhkaw cehso ro.

7 3-nhîrî nuun̂i po tî n̂ihciyatken̂e cemyawno komo yenmetopo Xerusaren pona, tukuhkaw enmetopo kom ha. 7-nhîrî nuun̂i po takî tî nîtîhketken̂e ero wa enmetopo.

8 Ero yinhîrî takî tî enmexapu yenso mokyakn̂e Esekias, antomano rin̂e komo yakro. Enîche on wara tî ketken̂e, Kir̂wan̂he xa Kporin komo nai ham okre. Yiixatî me mat ham amyamro noro yanan komo, Ixaw Yana kom ha, ketken̂e tî.

9-10 Ero yinhîrî takî tî tîmsom pokono komo yakro n̂esencekn̂e Esekias, Repita komo yakro marha. On wara tî n̂eyukyakn̂e Asarias, Kaan yaka cewomsom, Satoke yepamtho ha, Pahxa tînahrî komo raconho tîmtopo n̂ihciyatken̂e Ixaw Yana komo. Ero yimawnonho rma mer̂pora nas amna nahrî. Amna mak nîmcesî ahtîkara. Tîyanan komo wakrei ham Kporin komo, tînatke xa n̂iire okre. Amna nîmtotho mak mîn enmexapu. Mer̂pora ro mak ekrî ke amna nîmcesî, kekn̂e tî.

11 Ero ke on wara takî tî kekn̂e Esekias, Taa, amtakpo mko tak ciicoko Kporin komo mîn yaw ero yipu yîmtotopo me, kekn̂e tî. Ero ke amtakpo tî n̂iir̂atken̂e Kporin komo mîn yaw.

12 Ero yinhîrî takî tî ero yaka n̂enmekyatken̂e Ixaw Yana komo nîmîtho, cisimu me yînmîthîrî komo marha, Kaan ya tîmxapu ro mko marha. Ero yenîn̂e me tî xakn̂e Kononias, Repi yepamtho ha. Simei marha tî xakn̂e ero yipu yenîn̂e me, Kononias yakno.

13 N̂examro maywen komo marha tî xatken̂e ero yipu pokono komo, Xeiew, Asarias, Naace, Asaew, Xerimoce, Xosabace, Eriew, Ismakias, Maace, Benaia, ero wara. N̂examro tî xatken̂e Kononias maywen me, Simei maywen me marha. Ixaw Yana komo nîmîtho yenîn̂e me tî n̂examro n̂iir̂atken̂e Esekias, Asarias komo. Asariasî tî mîk xakn̂e Kporin komo mîn yawno mko yenîn̂e ro.

14 Kore tî xakn̂e Kporin komo ya tîmxapu yekamn̂e me, tanme ro so tîmxapu yekamn̂e ro me ha. Ahnoro Kaan ya tîmxapu yenîn̂e me tî xakn̂e noro. Kaan mîn metatan yenîn̂e rma tî mîk xakn̂e, resce n̂ixan yenîn̂e. Imna pen mumutho tî mîk xakn̂e Kore, Repita pen mumutho.

15 Noro maywen komo tî xatken̂e tîmxapu yekamtopo pokono kom hara, Eten, Miniamin, Xesua, Semaias, Amarias, Sekanias, ero wara. N̂examro tî xatken̂e meye so, tîmsom pokono komo yewton pono me so. N̂examro tî n̂ekamyatken̂e Kporin komo yaka ehxapu mko, Takrono komo ya tî nîmyatken̂e, cemyawnoyem komo ya tî, emyawnomnî komo ya marha tî. Etîme re tî n̂ekamyatken̂e.

16 Ahnoro Repita komo ya tî nîmyatken̂e kîrkomo ya, 3 cimn̂ipu ehxapu komo ya, ero yopono komo ya marha. Karita yaka osotî mewrexapu komo tî mîkyam xatken̂e. Noro yipu komo ya tî nîmyatken̂e. On warai komo ya meero tî nîmyatken̂e enmar̂atîxera Kporin komo mîn yaka cewomsom komo ya. Cemyawno ro poko ehtome tî n̂ewomyatken̂e roro, noro yipu komo ya tî nîmyatken̂e.

17 Xatken̂e marha tî tîmsom pokono komo, karita yaka mewrexapu komo. Osotî komo tî xakn̂e tmewreso iyanan komo yosotî yakro rma. Noro yipu komo ya marha tî nîmyatken̂e. Xatken̂e marha tî Repita komo, 20 cimn̂ipu ehxapu komo, ero yopo ehxapu komo marha. Iito re mewrexapu me tî xakn̂e ero re pokono ro komo. N̂examro ya marha tî nîmyatken̂e. Ero wa tî n̂ekamyatken̂e Kaan ya tîmxapu mko ha.

18 Yîmxîkrî komo yosotî marha tî xakn̂e karita yaka tmewreso, wahrai komo meero, yipici komo marha, yumumuru komo marha, emsîrî komo marha. Karita yaka osotî mewrexapu re tî mîkyam xatken̂e ahnoro, Repita Komo Yosotî Onî, kacho yaka. Kir̂wan̂he ro makî tî xatken̂e n̂examro. Kporin komo ya xa tî n̂etîmyatken̂e yînantomarî me so.

19 Meye rma tko tî xatken̂e anarî komo, tîmsom pokono mumuru komo, Araw mumuru kom ha. Mararî po so tî xatken̂e ewto panawno po so. Anarî komo tî xatken̂e ewtoci po so mak. Tîmxapu yekamn̂e komo tî xatken̂e iito marha, ero pokono me etacixapu komo. Ero ke iitono komo ya nîmyatken̂e, Ahnoro kîrkomo ya tî n̂ekamyatken̂e Repita Komo Yosotî Onî, kacho yaw mewrexapu komo ya.

20 Ero wa tî xakn̂e Esekias ahnoro Xuta pono komo poko. Kir̂wan̂he ciino tî n̂iir̂akn̂e, takîhso xa. Kporin komo yanme makî tî xakn̂e, ponaro cehtopo yanme ha.

21 Ehn̂ara ro makî tî xakn̂e Kaan mîn yaw cetapickaxmu komo yantomacho poko. Ahce wa so na ciino riyataw, Kaan ya kpanatanmetopo yaw roro mak ciino n̂iir̂akn̂e. Tahwore xa tî xakn̂e ero yipu poko, Kaan yepon̂e me ro makî tî. Ero ke ehn̂ara tî xakn̂e ahce na poko. Ero wara tî xakn̂e Esekias.