Ero yinhîrî takî tî on wara xakn̂e Esekias, ceseresmacho yekaiporen̂e komo tî n̂en̂epekn̂e Xuta yepamtho komo cheka, Ixaw Yana komo cheka marha. Karita tî mewrekn̂e Eprain yepamtho komo yakan, Manases yepamtho komo yakan marha. On wara kacho tî mewrekn̂e, Kporin komo mîn yaka amohcoko Xerusaren pona. Kwatotoponhîrî yukukmachome amohcoko. Kporin komo ponarono me rma ceseresmacerî, ponaro Ixaw Yana komo yehtopo ponarono me ha, kacho tî mewrekn̂e.

2 N̂esencetken̂e cokorî ka kayaritomo, antomano rin̂e komo yakro, ahnoro Ixaw Yana komo yakro, Xerusaren pona mohxapu komo yakro. On wara tî ketken̂e, 2-înhîrî nuun̂i po tak Kwatotoponhîrî tukukmacerî, ketken̂e tî.

3 Ero yimaw rma tî ka eseresmara thakwa xatken̂e okwe. Asakî makî tî ka xatken̂e cetakir̂wamaxi tîmsom pokono komo. Xerusaren pona mohtîkara marha tî ka xatken̂e anîhxapu komo ero yimaw. Ero ke, Amn̂e mak ceseeresme ham, ketken̂e tî.

4 Kir̂wan̂he tî ero wa xakn̂e kayaritomo ya, kir̂wan̂he marha tî xakn̂e Ixaw Yana komo ya.

5 Ero ke ceseresmacho komo yekaiporen̂e komo yen̂epetopo takî tî nîhtînoyatken̂e. On wara tî ketken̂e, Keseresmacho yekaiporen̂e komo cen̂epepore nasî Ixaw Yana komo chere ro miya roro, Behseba pona roro, Taan pona roro marha. Amohcoko tî Kwatotoponhîrî yukukmaxi Xerusaren pona, kacho centamexpocerî, ketken̂e tî. On wara tî nîhtînoyatken̂e, Kaanî mtapotarî yaw roro rma Kwatotoponhîrî yukukmachome ha ka eseresmara xatken̂e pahxan pen komo. Pahkî ro makî tî ero wara eseresmara xatken̂e okwe, ketken̂e.

6 Ero ke takî tî cetken̂e ekaiporen̂e komo Ixaw Yana komo chere ro, Xuta komo chere ro marha. Kayaritomo yanme tî cetken̂e. Karita tî naar̂atken̂e kayaritomo nmewretho, antomano rin̂e komo yakro yînmewrethîrî komo. Kayaritomo mtapotachonho yaw roro marha n̂ekatîmyatken̂e ekaiporen̂e komo. On wara tî ketken̂e, Ai Ixaw Yana komo, on wara kes amna awya so, Kporin komo ponaro tak ehcoko xa hara. Kaan ponaro tî xakn̂e Abraaw pen, Isake pen, Xako pen. Ero ke ponaro n̂examro yehtopo ponaro tak ehcoko amyamro hara. Noro ponaro awexitaw so awakronomexe so tak Noro okre. Asak mak maxe okwe Asiriu kayaritomon komo nwaikatho pen poyinonho, wara rma awakronomexe so.

7 Kporin komo mtapotachonho tî nanwekyatken̂e aporin pen komo okwe, awaknonhîrî pen komo marha. Ponaro tporin pen komo yehtopo mtapotachonho nanwekyatken̂e, n̂examro pen warahra tak ehcoko. Okwe ro mak, kacho me mak takî tî n̂examro pen n̂iir̂akn̂e Kporin komo. Enko xe, ero wara exirî komo.

8 Ero ke tîpîmîyewaxke exihra ro mak ehcoko amyamro reha. Aporin pen komo warahra ehcoko. Kporin komo tak ewetîcoko. Yîmîn yaka amohcoko, eroromero nahsîyakn̂e tîmîn me ero yaka amohcoko. Aporin komo yanton me tak ehcoko, ponaro awehtopo komo yanton me ha. Nîrwonasî ro mak Noro apoko so. Ero ke ero wa ehcoko etîrwoxinkachome hara apoko so.

9 Kporin komo ponaro awexitaw so xa hara, awakno komo pînîn yaw tak naxe aan̂enhîrî komo, amxîkrî komo pînîn yaw marha. Taa, etocoko hara arowon komo pona hara, kexe tak yîwya so. Kîpînîn yawno komo Mîk Kporin komo, kakronoman̂e Mîk ponaro awehtopo kom ha. Ero ke Noro ponaro awexitaw so xa hara ahyai so etaknamara ro mak nasî, ketken̂e tî. Ero wa tî ketken̂e Ixaw Yana komo ya, Xuta yepamtho komo ya marha.

10 Ewto mko pore tî cetken̂e. Eprain yepamtho komo chere ro tî cetken̂e, Manases yepamtho komo chere ro marha. Seburon yepamtho komo cheka meero tî cetken̂e. N̂ewretken̂e makî tko tî yîmtapotarî komo yencetaw, n̂etaporetken̂e marha tî poko so kica.

11 Mokyatken̂e rma anarî kom mak. Yaaro ham, kicicme cehce ham kica, ketken̂e n̂examro. Ero ke mokyatken̂e rma Xerusarem pona. Ase yepamtho poyino komo, Manases yepamtho poyino komo, Seburon yepamtho poyino komo, ero warai komo tî mokyatken̂e rma Xerusaren pona.

12 On wara tî xatken̂e Xuta pono komo reha. Kaan yamorî tî xakn̂e poko so akronomachome so. Iito re yîhtînon̂e me tî n̂examro n̂iir̂akn̂e. Ero ke ahnoro rma tî kayaritomo mtapotarî n̂ewehcatken̂e. Antomano rin̂e komo mtapotarî marha tî n̂ewehcatken̂e. Kporin komo yanme tî nîmtapowatken̂e. Ero ke ewetîn̂e me n̂examro n̂iir̂akn̂e Noro.

13 Ero ke mer̂pono pîn takî tî mokyatken̂e Ixaw Yana komo Xerusaren pona. 2-înhîrî nuun̂i po tî mokyatken̂e. Wahrututpamnî Tohtopo yimawno me ahwotaxi so tî mokyatken̂e.

14 Ero yinhîrî takî tî mîk hak ya tîmsom yakn̂itopo mko tî naar̂atken̂e Xerusaren pononho. Iito marha tî xakn̂e kotoporem yakn̂itopo mko hara, ero mko marha tî naar̂atken̂e. Aporî kwaka kr̂a tî nar̂metken̂e Ketîron kwaka.

15 Ero yinhîrî kahn̂eru takî tî waihketken̂e 14-nhîrî kaamo po, 2-înhîrî nuun̂i po. Kwatotoponhîrî yimawno tî mîn waihketken̂e. Ero yimaw tî nîhyapamyatken̂e tî tîmsom pokono komo, Repita komo marha. Ero ke n̂etakir̂wametken̂e. Ero yinhîrî takî tî takn̂itîkaxmu tî n̂ekyatken̂e Kporin komo mîn yaka.

16 Ero yinhîrî takî tî cehtopo ro komo to tî n̂ecececetken̂e, Moises mtapotachonho yaw roro, Kaan yakrono ro mtapotachonho yaw roro ha. Kamxuku ke takî tî tîmsom pokono komo carametken̂e iitono mko. Repita komo nîmyatken̂e yîwya so tîmsom kamxukutho. Ero ke iike rma tî carametken̂e.

17 Mer̂pora mohxapu komo tî xatken̂e etakîrwamara rma okwe. Ero ke n̂examro yanme rma Repita komo mak waihketken̂e oper̂a xîkrî komo, Kwatoponhîrî yimaw tonosom. Ero poko tî xatken̂e Repita komo etakir̂waman komo yanme kir̂wan̂he ehtome so tak yînîmrî komo Kporin komo ya.

18 Mer̂pora ro makî tî xatken̂e etakir̂waman komo, Eprain yepamtho komo, Manases yepamtho komo, Isaka yepamtho komo, Seburon yepamtho komo. Wara rma Kwatotoponhîrî yukukmacho tî non̂etken̂e Kaan Karitan yaw rorohra okwe. N̂examro poko tko tî nîmtapowakn̂e Esekias. On wara tî kekn̂e Kporin komo ya, Ai Apa, kir̂wan Amoro okre. Ero ke anarî me moxam yehtoponho cma re mîhcamnoyasî.

19 On warai komo yehtoponho rma cma re mîhcamnoyas Apa, Kaan wece tîropotarî naknamexe anarî komo Kporin komo wece, ponaro tporin pen komo yehtopo wece ha, noro yipu komo yehtoponho cma re mîhcamnoyasî. Etakir̂wamara rma na natu kpanatanmetopo yaw roro, Kaan mîn pokono yaw roro ha, wara rma etakir̂wamara ehtopo komo cma re mîhcamnoyasî, kekn̂e tî Kaan ya.

20 Ero ke Esekiasî mtapotarî tî n̂encekn̂e Kporin komo. Etakir̂waman komo takî tî nakir̂wamekn̂e rma.

21 Ero yinhîrî takî tî on wara xatken̂e Ixaw Yana komo, Xerusaren pona mohxapu komo, Wahrututpamnî Tohtopo yimawno me takî tî nahwowatken̂e. Tahwore xa tî xatken̂e. Enmar̂atîxera tî n̂ewanometken̂e Repita komo Kporin komo poko, tîmsom pokono komo marha tî n̂ewanometken̂e akro so. Kporin komo wanorî tî naar̂atken̂e raatî yakro.

22 Repita komo tî nahworekn̂e Esekias. Takîhso tî xatken̂e n̂examro Kporin komo yehtopo poko. 7 kaamo tî nahwowatken̂e. Kporin komo ya tîmsom marha tî nakn̂iyatken̂e, Aaxe xa wasî, kacho me tîmsom. Kir̂wan̂he xa nai ham Kporin komo okre, ketken̂e emapona roro. Kaan ya tî ero wa ketken̂e, ponaro tporin pen komo yehtopo ya.

23 Ero yin̂hîrî on wara takî tî nîhtînoyatken̂e ahnoro esenmexapu komo, 7 kaamo xa hara tî ceseresmacho komo nîhtînoyatken̂e. Ero ke 7 kaamo xa hara tî nahwowatken̂e.

24 Tookuthîrî tî nîmyakn̂e Esekias, Xuta yepamtho komo kayaritomon. 1.000 tî nîmyakn̂e bui. 7.000 marha tî nîmyakn̂e oper̂a. Ero wicakî tî nîmyakn̂e esenmexapu komo ya. Antomano rin̂e komo marha tî nîmyatken̂e tookuthîrî komo. 1.000 xa marha tî nîmyatken̂e n̂examro bui. 10.000 oper̂a marha tî nîmyatken̂e. Ero wa tî nîmyatken̂e Kporin komo ya tîmsom. Mer̂pono pîn takî tî n̂etakir̂wametken̂e tîmsom pokono komo akn̂itopo poko cehtome so.

25 Ahnoro Xuta yepamtho komo tî nahwowatken̂e. Tîmsom pokono komo yakro rma tî nahwowatken̂e, Repita komo marha, Ixaw Yana komo marha iina mohxapu kom ha. Ixaw Yana komo chewno komo marha tî nahwowatken̂e, Xuta yepamtho chewno komo marha.

26 Tahwore xa takî tî xatken̂e Xerusaren pona mohxapu komo. Ero wa ahwotara xatken̂e pahxan pen komo. Pahxa mak, Soromaw pen exitaw, Tapi pen mumutho, ero yimaw makî tî ero wara nahwowatken̂e Xerusaren pona mohxapu komo.

27 Ero yinhîrî takî tî piiri nawomyatken̂e tîmsom pokono komo, Repita komo marha. Ixaw Yana komo tî nakronomapetken̂e Kporin komo ya. Yîmtapotarî komo tî n̂encekn̂e. Kah yaw rma tî xakn̂e Noro cekenî ro po. En̂exa rma tî n̂encekn̂e yîmtapotarî komo kah yai rma. Ero wa tî xakn̂e yîmtapotarî komo poko.