On wara tî xakn̂e Esekias, 25 cimn̂ipu tî xakn̂e kayaritomo me ecir̂ataw. 29 cimn̂ipu tî xakn̂e kayaritomo me. Xerusaren tî xakn̂e noro yewton. Abia tî xakn̂e yînocwan yosotî. Sakarias yemsîrî tî mîk xakn̂e.

2 Kir̂wan̂he tî xakn̂e Esekias Kporin komo ya. Tporin pen yehtoponho yaw roro rma tî xakn̂e, Tapi pen yehtoponho yaw roro ha.

3 On wara tî xakn̂e noro, yihcirî cimn̂ipu po kayaritomo me cehtopo po, yihcirî nuun̂i po ha. Kporin komo mîn metatan tî nahrunkekn̂e. Metatanî mko rma tî nakir̂wamapekn̂e.

4 Ero yinhîrî takî tî tîmsom pokono komo nan̂ikyakn̂e, Repita komo marha. N̂examro tî n̂enmekyakn̂e Kaan mîn roron pona, resce n̂ixan pona.

5 On wara tî kekn̂e yîwya so, Ai oyakno komo, Repita komo, kîmtapowasî awakro so. Ero ke omtapotarî ka entacoko. Kaan ya etîmcoko amyamro. On marha akir̂wamacoko Kaan mîn, ponaro aporin pen komo yehtopo mîn. Ero wa ehcoko noro mînî ro me tak ehtome hara. Tamnuke thakwa nas okwe Kaan yamtakponî ro, Ero ke amnukacoko hara.

6 Kporin komo mtapotachonho tî nanwekyatken̂e kporin pen komo okwe. Kicicme xa tî n̂examro pen n̂een̂akn̂e Noro. Noro tî nahsîpînketken̂e. Kporin komo mîn yai cesewkor̂maxmu wara tî xatken̂e okwe. Noro pona enîn̂e pîn me ro mak tak xatken̂e okwe n̂examro pen.

7 Kaan mîn potarî metatan nahruyatken̂e, ramha marha n̂eihketken̂e iitononhîrî. Kotoporem yakn̂ipîra xatken̂e iito, takn̂itîkaxmu me tîmsom yakn̂ipîra marha xatken̂e Kaan mîn mîtwo. Ponaro Ixaw Yana komo yehtopo ya tîmsom yakn̂ipîra ro mak xatken̂e okwe. Ero wa tî xatken̂e okwe.

8 Ero ke takî tî nîrwonakn̂e Kporin komo Xuta pen komo poko. N̂examro pen takî tî nahsîpînketken̂e etwîrîmachome so tak, poko so eserepokachome anarî yana komo, poko so etaporetome so marha. Ero wara rma wa kehtopo komo meen̂axe.

9 Kicicme exirî ke so tî kporin pen komo waihyatken̂e okwe kacipara ke paraxkaxapu me. Ero ke marha anarî yana komo chew thakwa naxe kumumuru komo, kemsîrî komo, kihcinhîrî komo. Iitono komo nahsîtho me thakwa naxe okwe.

10 Ero ke on wara ka xe wasî Kporin komo ya, ponaro Ixaw Yana komo yehtopo ya, etîrwoxinkachome tak Noro kpoko so. On wara ka xe wasî, Apa, yaaro xa tan amna kesî esemîknopîn me ro mak, Amna tak awewehcasî, ka xe wasî yîwya.

11 Ero ke on wara wîîkes awya so okopuci komo, yuwun̂ura ro mak tak ehcoko. Kporin komo nahsîtho amyamro tanton me so. Tîmîn yawno pokono me amen̂eketken̂e so, ceepatai cececetosom me. Kotoporem yakn̂in̂e me marha awir̂atken̂e so, kekn̂e tî. Ero wa tî kekn̂e Esekias Repita komo ya, tîmsom pokono komo ya marha.

12 Ero ke on warai komo takî tî nawomyatken̂e Esekiasî mtapotarî yewetîtome, Maace, Amasai mumuru mîk ha, Xoew, Asarias mumuru mîk ha, ero wara tî xatken̂e Koace yepamtho komo. Taa, Merari yepamtho kom hara, Kis, Abici mumuru ha, Asarias, Xearerew mumuru ha. Taa, Xehson yepamtho kom hara, Xoa, Sima mumuru mîk ha, Eten, Xoa mumuru mîk ha.

13 Erisapan yepamtho hara, Siniri, Xeuew, ero wara. Asape yepamtho hara, Sakarias, Matanias, ero wara.

14 Eman yepamtho hara, Xeuew, Simei, ero wara. Xetutun yepamtho hara, Semaias, Usiew, ero wara. Ero warai komo tî kayaritomo mtapotarî n̂ewehcatken̂e.

15 N̂examro takî tî takno komo nan̂ikyatken̂e. Ero yinhîrî Kaan ya xa tî n̂etîmyatken̂e xa hara. Ero yinhîrî takî tî cetken̂e kayaritomo mtapotarî yanme Kaan mîn yakir̂wamaxi. Kporin komo mtapotachonho yanme rma tî ero wa cetken̂e.

16 Tîmsom pokono komo tî n̂ewomyatken̂e Kaan yamtakponî ro yaka akirwamachome tak. Iitononhîrî takî tî nar̂metken̂e yukpurukpurunthîrî. Kporin komo mîn roron pona tî n̂enmekyatken̂e. En̂exa takî tî naar̂atken̂e hara Repita komo Ketîron yewku yecihtaka.

17 Yihcirî nuun̂i po tî Kporin komo mîn yakir̂wamacho n̂ihciyatken̂e, yihcirî kaamo po rma. 8-nhîrî kaamo po takî tî nîtîhketken̂e hara, Kporin komo mîn potuhremacho yaka roro takir̂wamaxi tak xakn̂e. Ero yinhîrî takî tî 8 kaamo wicakî xa hara xatken̂e Kporin komo mîn tîmtopo poko hara, Kaan ya tîmtopo poko. Nîtîhketken̂e tak yihcirî nuun̂i po, 16-înhîrî kaamo po, ero po xa tî nîtîhketken̂e Kaan mîn tîmtopo yîwya.

18 Ero yinhîrî takî tî cetken̂e akir̂waman̂enhîrî komo Esekias yaka. On wara tî ketken̂e yîwya, Ai apa, Kporin komo mîn tak amna nakîrwamatîkai. Taknitîkaxmu me tîmsom yakn̂itopo marha amna nakîrwamai, ero pona takn̂isom pokono mko marha. Cuure warai yapon marha amna nakir̂wamai cenposom yapon, ero ponan pokono mko marha.

19 Mer̂pono pîn Kaan mîn yawnonho mko nar̂mekn̂e ham kica Akas pen ero pîntho wara. Ero wa tî nar̂mekn̂e Kporin komo yanwekrî ke tîwya. Yînar̂mathîrî mko tak amna nakir̂wamai hara. Kporin komo ya amna nîmye marha. Iito tak nasî amna nakir̂wamatho ahnoro Kporin komo ya tîmsom yakn̂itopo mîtwo, ketken̂e tî. Ero wa tî ketken̂e Repita komo Esekias ya.

20 Ero yinhîrî enmapuche xa hara pahxaxa ro rma tî pakekn̂e Esekias. Xerusaren pono yantoman̂e komo tî nan̂ikpekn̂e. N̂examro yakro takî tî cekn̂e Kporin komo mîn yaka.

21 Iina tî naar̂atken̂e bui, 7, kahn̂eru, 7 xa marha, oper̂a xîkrî, 7 xa marha, boce, 7 xa marha. Noro yipu komo tî naar̂atken̂e kicicme kayaritomo yehtoponho yahrutopo me, kicicme Kaan mîn yehtoponho yahrutopo me, kicicme Xuta yepamtho komo yehtoponho yahrutopo me marha. On wara takî tî kekn̂e tîmsom pokono komo ya, Araw yepamtho komo ya, Kporin komo ya tîmsom yakn̂itopo pona tak yupun akn̂icoko, kekn̂e.

22 Ero ke bui komo ka waihketken̂e. Kamxukuthîrî tî momokyatken̂e tîmsom pokono komo. Iike takî tî akn̂itopo carametken̂e. Ero yinhîrî takî tî kahn̂eru komo waihketken̂e hara. Noro kamxukutho ke marha tî akn̂itopo carametken̂e. Ero yinhîrî oper̂a xîkrî komo tî waihketken̂e hara. Noro kamxukutho ke marha tî akn̂itopo carametken̂e.

23 Iito rma tî xatken̂e boce komo Kaan mîn yaw, waipîn ka. Ero ke takn̂isom waihkache takî tî boce komo tî naar̂atken̂e hara Kaan mîn yai kayaritomo yaka, esenmexapu komo yaka marha. Kicicme so ehtoponhîrî komo yahrutopo me tî xakn̂e noro reha, boce. Ero ke noro tîpîrî komo tî ka nahsîyatken̂e.

24 Ero yinhîrî takî tî boce pen komo waihketken̂e. Kamxukuthîrî tî nukmamyatken̂e akn̂itopo pore. Ero wa tî nukmamyatken̂e Ixaw Yana komo yehtoponho yahrutopo me. Ero yinhîrî takî tî yupunthîrî nakn̂iyatken̂e. Ero wara rma tî kekn̂e kayaritomo, Takn̂itîkaxmu me tîmsom akn̂icoko. Kicicme kehtoponhîrî komo yahrutopo me cehsom marha akn̂icoko. Ahnoro Ixaw Yana komo yehtoponho yahrutopo me akn̂icoko, kekn̂e tî. Ero ke takî tî ero warai nakn̂iyatken̂e ahnoro Ixaw Yana komo yehtoponho yeyamtopo me.

25 Ero yinhîrî takî tî Repita komo takî tî nantomekn̂e kayaritomo raatî iyorkarî poko. Kaan mîn yaw n̂examro yececetotopo ro komo tî n̂enpekn̂e. Tîyorîrem pokono komo, pioraw warai pokono komo, ahpa pokono komo, ero warai pokono komo tî nantomekn̂e yîwyanî ro iyorkarî poko. Ero warai pokono komo poko tî panatanmekno n̂iir̂akn̂e pahxa Tapi pen, Kace pen, Kaan n̂enporî yenîn̂e ro pen mîk xakn̂e. Natan pen marha panatanmekno n̂iir̂akn̂e ero poko, weronomano rin̂enho pen ha. Kporin komo rma tî kekn̂e n̂examro pen ya. Ero ke yîmtapotachonhîrî komo yaw roro rma Repita komo nantomekn̂e Esekias.

26 Ero ke piiri tî n̂ecececetken̂e Repita komo Tapi pen nakîhtopotho ke cemyarke, raatî ke cemyarke ha. Tîmsom pokono komo reha tî xatken̂e tuu kacho ke cemyarke so hara.

27 Ero yinhîrî takî tî on wara kekn̂e Esekias, Taa, takn̂itîkaxmu me tîmsom tak akn̂icoko ero yipu yakn̂itopo pona, kekn̂e tî. Ero ke tîmsom pun takî tî nakn̂iyatken̂e. Ero yakn̂itopo yihciyataw rma Kporin komo wanorî marha n̂ihciyatken̂e hara akro rma. Raatî ke takronoi so tî n̂ewanometken̂e, tuu kacho yakro, Tapi pen nakîhtopotho yakro marha.

28 Ero ke ahnoro esenmexapu komo tî n̂eremetken̂e tosokmuru po so waano yaar̂ataw aan̂e ro komo ya, raatî yeceyataw marha ecen̂e ro komo ya. Miya roro tî n̂ewanometken̂e Kporin komo ya tîmsom cecahtîkaxi ro.

29 Akn̂itîkache takî tî kayaritomo n̂esewnapekn̂e. Ahnoro esenmexapu komo tî n̂esewnapetken̂e. Kporin komo poko nahwowatken̂e.

30 On wara marha tî kekn̂e Esekias Repita komo ya, Kporin komo poko kahwotacho komo aacoko waano. Tapi penî n̂iritho aacoko waano, Asape penî n̂iritho marha, Kaan n̂enporî yenîn̂e ro n̂iritho ha, kekn̂e tî yîwya so. Ero ke Kporin komo poko tahwotacho komo tî naar̂atken̂e waano, tahwore tî naar̂atken̂e. Ero yinhîrî nutupenwatken̂e xa hara. Ero wara takî tî nahwowatken̂e xa hara Kporin komo poko.

31 Ero yinhîrî takî tî on wara kekn̂e hara Esekias, Taa, metîmcow tak Kporin komo ya. Ero ke amohcoko tak, Kporin komo ya tîmsom ehcoko Kaan mîn yaka. Aaxe xa wasî, kacho me tîmsom marha ehcoko, kekn̂e tî. Ero ke Kaan ya tîmsom takî tî n̂ekyatken̂e Ixaw Yana komo, Aaxe xa wasî, kacho me tîmsom marha n̂ekyatken̂e. Anarî komo tî n̂ekyatken̂e takn̂itîkaxmu hara. Tooku yamenmekn̂e pîn komo tî ero yipu n̂ekyatken̂e.

32 On wicakî tî tookuthîrî komo n̂ekyatken̂e Ixaw Yana komo, bui, 70, kahn̂eru, 100, oper̂a xîkrî, 200 ero wicakî tî tookuthîrî komo n̂ekyatken̂e. Kporin komo ya tîmsom mîk n̂ekyatken̂e, takn̂itîkaxmu me tîmsom ha.

33 On warai komo marha tî n̂ekyatken̂e Kporin komo ya tîmsom, bui, 600, oper̂a, 3,000. Ero warai komo tî n̂ekyatken̂e Kporin komo ya tîmsom.

34 Asakî makî tko tî xatken̂e tîmsom pokono komo, ehxapu mko tîmn̂e. Mer̂pora tî xakn̂e Ixaw Yana komo yokutho, Kaan ya tîmsom, yipikarî yopo tî xakn̂e okwe. Ero ke n̂examro tî nakronometken̂e iyanan komo, Repita kom ha. Ero wa tî n̂etakronometken̂e tîmsom pun takn̂itîkaxi ro. Pahkî n̂he tî akronomano n̂iir̂atken̂e tîmsom pokono komo yetakir̂wamacho momokrî poko. Yohno so n̂he tî Repita komo n̂etakir̂wametken̂e. Yamoro makî tî n̂etakir̂wametken̂e Kaan ya tîmsom pokono kom okwe.

35 Mer̂pora ro makî tî xakn̂e tîmsom pun takn̂itîkaxmu. Mer̂pora marha tî xakn̂e katîthîrî, Aaxe xa wasî, kacho me tîmsom katîtho. Takn̂itîkaxmu yakro tîmsom marha tî n̂ekyatken̂e wok hara. Ero wa tî Kporin komo mîn nakir̂wametken̂e Kporin komo ya tîmsom tîmtome roro tak.

36 Ero ke tahwore tî xakn̂e Esekias, Ixaw Yana komo ahnoro tî xatken̂e tahwore. Tponaro kiicow so ham okre Kaan, ketken̂e. Ponan̂e makî tî nîhtînoyatken̂e Kaan mîn yakir̂wamacho, Noro ya tîmsom tîmtopo marha. Wara rma tî kir̂wan̂he n̂iir̂atken̂e. Ero ke tî nahwowatken̂e. Ero wara tî xatken̂e.