Taa, on wara tî xakn̂e Akas, 20 cimn̂ipu tî xakn̂e noro yewrutoponho kayaritomo me ecir̂ataw. 16 cimn̂ipu tî xakn̂e kayaritomo me. Xerusaren tî xakn̂e noro yewton. Kir̂wan̂he exihra xakn̂e noro Kporin komo ya. Ero ke kir̂wan̂he noro yenîhra xakn̂e Kporin komo okwe. Tporin pen warahra tî xakn̂e okwe, Tapi pen warahra.

2 Ixaw Yana kayaritomon komo yehtopo yaw roro makî tî xakn̂e okwe. Kuripara tî nukuipekn̂e Baaw warai me mko cirpotome kica n̂examro wara rma.

3 Kotoporem marha tî nakn̂iyakn̂e aporî yecihtaw, Inon Mumuru yewku yecihtaw ha. Tîmxîkîthîrî pen komo tî nakn̂iyakn̂e marha wehto ywaka oco. Kicicme ro makî tî xatken̂e mîk hak rowon pono pen komo, Kporin komo nar̂mapotho komo Ixaw Yana komo ya, n̂examro pen yehtoponho yaw roro rma tî xakn̂e Akas okwe.

4 Tokuthîrî pun tî nakn̂iyakn̂e îh pona so, weewe yapomyaka so marha tî taakem yapomyaka. Iina so marha tî kotoporem nakn̂iyakn̂e.

5 Ero ke on wara takî tî Akas pen n̂iir̂akn̂e Kporin komo, ponaro noro yehtopo rma, Siriu komo kayaritomon ya tî noro pen narmapekn̂e. Xuta pono pen komo tî nahsîyatken̂e mer̂pono pîn. Naar̂atken̂e Tamasku pona cemeknumiso so rma. Ero yinhîrî Ixaw Yana komo kayaritomon ya marha tî Akas pen komo nar̂mapekn̂e Kporin komo. Xuta pen komo tî waihketken̂e n̂examro mer̂pono pînî ro mak okwe.

6 Peka tî xakn̂e Ixaw Yana komo kayaritomon yosotî. Noro tî Xuta pen komo waihkekn̂e, 120.000 pen, cewn̂e kaamo po rma okwe. Sowtatu pen komo rma tî mîkyam waihketken̂e okwe. Ero wa tî waihyatken̂e Xuta pen komo Kporin komo yahsîpînkarî ke, ponaro cehtoponhîrî komo yahsîpînkarî ke ha.

7 Ero yimaw iito tî xakn̂e Sikri, Eprain sowtatun. Noro tî Maasias pen waihkekn̂e, Akas mumutho pen,. Asîrikaw pen marha tî waihkekn̂e, kayaritomo mîn yenîn̂enho pen, Ewkana pen marha, kayaritomo ponan penî rma, noro yipu pen komo tî waihkekn̂e okwe Sikri.

8 On wara marha tî xatken̂e Ixaw Yana komo, Xuta yepamtho pen komo wosîn komo tî naar̂atken̂e okwe. Yîmxîkîthîrî pen komo marha tî naar̂atken̂e, kîîrî mren, woosî mren. Mer̂pora tî noro yipu pen komo naar̂atken̂e 200.000 okwe. Mer̂pora marha tî naar̂atken̂e emyawnonhîrî pen okwe. Ero warai komo tî naar̂atken̂e Ixaw Yana komo Samaria pona.

9 Iito tko tî xakn̂e weronomano rin̂e, Obece tî osotî. Ixaw Yana sowtatun komo yepataketaw Samaria pona on wara tî kekn̂e noro yîwya so, Ai, oyakno komo, on wara wîîkes awya so, Xuta komo poko nîrwonakn̂e ham Kporin komo. Ero ke mak n̂examro pen nar̂mapoi awya so. Wara rma n̂examro pen mîwaikace tîrwon̂e ro mak okwe. Miya rorono wara ro mak nasî kopi n̂examro poko arwonîmtopo komo, kah yaka roro tawomsom wara.

10 On wara mîîkexe, Moxam tak amna nahsîyasî tanton me, kîrkomo, wooxam komo marha. Ero wa amna nahsîyasî Xuta pen komo, Xerusaren pononho pen komo marha, mîîkexe. Kicicme ehxapu mera katî Aporin komo Kaan awen̂atu so hara awya so?

11 Ero ke omtapotarî men entacoko, anahsîthîrî komo en̂epecoko hara. Ayanan komo rma thakwa mîkyam anahsîthîrî komo okwe. Ero ke tîrowon pona tocowpe hara. Nîrwonasî ro mak men Kporin komo apoko so n̂examro yahsîrî ke okwe, kekn̂e tî. Ero wa tî kekn̂e Otece yîwya so.

12 Ero yimaw tî iito xatken̂e Eprain yepamtho yantoman̂e komo. Asarias, Xoanan mumuru ha, Berekias, Mesiremoce mumuru ha, Xeiskias, Sarun mumuru ha, Amasa, Atîrai mumuru ha, ero wara tî xatken̂e n̂examro yosotî. Sowtatu komo tî wahkocetken̂e n̂examro.

13 Ero wa xa marha tî ketken̂e n̂examro hara. Anahsîthîrî komo ekîhra ro mak men ehcoko oona, ketken̂e tî. Pahxa rma re Kporin komo tîrwonmekyatken̂e kpoko so. Oroto tak kicicme kehtoponhîrî yîhrema xe tak mat ham okwe. Miya xe xa tak n̂ehtîkesî men okwe kicicme kehtoponhîrî komo. Ero ke nîrwonîmtîke tak men okwe Kporin komo Ixaw Yana komo poko oona n̂examro yekyataw awya so, ketken̂e tî.

14 Ero ke tînahsîthîrî komo taki tî nahsîpînketken̂e sowtatu komo. Iito mak tak nînomyatken̂e. Emyawnonhîrî komo marha tî nînomyatken̂e iito rma antomano rin̂e komo mîtwo, esenmexapu komo mîtwo marha.

15 Ero yinhîrî takî tî sowtatu nahsîtho komo wakrekn̂e antomano rin̂e komo, wetaci n̂examro rma. Ponomnî komo takî tî pononmetken̂e n̂examro yemyawnonho ke rma. Yîhtarî komo marha tî nîmyatken̂e. Nînahmetken̂e marha tî, wokpetken̂e marha. Eper̂an komo marha tî n̂ehcemetken̂e. Kar̂pen komo tî nakriyatken̂e buhu mkahsî noro mkaw totohme so. Ero yinhîrî n̂examro tî naar̂atken̂e iyanan komo yaka hara, Xer̂ko pono komo yaka. You Warai Ken̂arî, kacho rma mîn Xer̂ko, iina tî naar̂atken̂e. En̂exa takî tî n̂etîrametken̂e Samaria pona hara. Ero wa tî xatken̂e Samaria pono komo.

16 Ero yinhîrî takî tî on wara xakn̂e Akas, Asiriu komo kayaritomon komo yaka tî n̂en̂epekn̂e tîmtapotarî yekatîmn̂e komo. Oyetar̂macho poko cma re oyakronomaxi mîmokyaxe, kacho tî n̂entamexpekn̂e.

17 Mehxarpa thakwa tî mokyatken̂e Xuta pono komo waparî. Eton pono komo tî mokyatken̂e n̂examro waparî me. Xuta pen komo tî naar̂atken̂e tapomiso so okwe.

18 Piristew komo marha tî mokyatken̂e Xuta yewton pono komo waparî me. Woskara pono komo, suu n̂ixan komo, iitono komo waparî me tî mokyatken̂e. Ewto komo marha tî nahsîyatken̂e, Bece-Semes, Aixaron, Xeteroce, Soko, yîmîtwononhîrî komo marha, Cimna, yîmîtwononhîrî komo marha, Xinso, yîmîtwononhîrî komo marha, ero warai tî nahsîyatkn̂e Xuta yepamtho yewtontho komo. Ero mko pona so takî tî n̂esekenmetken̂e. Ero wa tî xatken̂e Piristew komo.

19 Ero wa tî Xuta pono komo n̂emetanmekpekn̂e Kporin komo Akas yanme, Ixaw Yana kayaritomon yanme. Kicicitho poko tî Xuta pono komo panatanmekyakn̂e noro kica. Kporin komo mtapotarî yewetîn̂e pîn me roro tî xakn̂e okwe. Ero wa tî xakn̂e Akas okwe.

20 Mokyakn̂e rma re Cikrace Pirese, Asiriu komo kayaritomon. Akasî tko tî n̂emetanmekyakn̂e, akronomara ro makî tî xakn̂e okwe.

21 On wara tî xakn̂e Akas, Kporin komo mîn yawnonho mko tî nahsîyakn̂e cepethîkemu mko, poyino makî tî. Kayaritomo mîn yawnonho mko marha tî nahsîyakn̂e, antomano rin̂e komo yemyawnonho mko marha tî. Ero yipu takî tî nîmyakn̂e Asiriu komo kayaritomon ya. Akronomara rma tko tî noro xakn̂e okwe.

22 On wara marha tî n̂ehtîkekn̂e Akasî cesemetanmekyataw xa, Kporin komo tî nanwetîkekn̂e okwe. Noro yipu tî mîk xakn̂e okwe Akas.

23 Anarî ro komo tî xatken̂e, ponaro Tamasku pono ehtopo. Noro yipu ponarono komo tî Akas pen komo nar̂metken̂e. Ero ke ponaro n̂examro yehtopo ya tîmsom tî nakn̂iyakn̂e noro hara kica, Akas ha. On wara tî kekn̂e, Noro yipu komo ponaro naxe Siriu komo kar̂pe cehtome so. Ero ke n̂examro ponaro tak wai ow haram oyakronomachome hara yîwya so, kekn̂e tî. Wara rma Akasî yakronomara rma tî xatken̂e. Akas yîwîrîman̂e me xa matko tî xatken̂e okwe, Ixaw Yana komo yîwîrîman̂e me marha.

24 Ero ke Kaan mîn yawno mko nahsîyakn̂e xa hara Akas. Nîknoyakn̂e kr̂a tak okwe. Ero yinhîrî Kaan mîn metatan tî nahruyakn̂e okwe. Mîk hak ya tîmsom yakn̂itopo xa matko tî nakîhtopekn̂e yaake okwe Xerusaren po. Esama yetahsîtopo to so tî n̂irpekn̂e.

25 Îh pono mko marha tî nakîhtopekn̂e kotoporem yakn̂itopo, anarî ro komo ya tîmsom yakn̂itopo kica. Ahnoro Xuta komo yewton pona so tî ero yipu nakîhtopekn̂e. Ero wa tî Kporin komo nîrwonmekyakn̂e okwe, ponaro tporin pen komo yehtopo. Ero wa tî xakn̂e Akas okwe.

26 Miya rma tî nai Akas yehtoponho. Ahnoro rma nasî tmewreso karita yaw, Xuta Kayaritomon Komo Yehtoponho, Ixaw Yana Kayaritomon Komo Yehtoponho Marha, kacho yaw. Ero yaw nasî tmewreso.

27 Ero yinhîrî takî tî nîwînîkyakn̂e Akas pen tporin pen komo yakro. Okoputhîrî tî nahruyatken̂e ewto pona, Xerusaren pona. Ixaw Yana kayaritomon komo yocho yawxari tko tî ahrura xatken̂e noro pen yokoputho. Ero yinhîrî yumumuthîrî takî tî xakn̂e kayaritomo me hara tîîmînhîrî pen retawno me hara. Esekiasî tî xakn̂e noro yosotî. Ero wa tî xakn̂e.