Taa, on wara tî xakn̂e Xotaw, 25 cimn̂ipu tî xakn̂e noro yewrutoponho kayaritomo me ecir̂ataw. 16 cimn̂ipu tî xakn̂e kayaritomo me. Xerusaren tî xakn̂e noro yewton. Xerusa tî xakn̂e yînocwan yosotî. Satoke yemsîrî tî mîk xakn̂e yînocwan.

2 Takîhso tî noro n̂een̂akn̂e Kporin komo. Tîîm pen wara rma tî xakn̂e, Usias pen wara. Kporin komo mîn yaka tko tî ewomra xakn̂e. Kicicitho poko rma tko tî xatken̂e maywen kom okwe, Xuta yepamtho komo.

3 Kporin komo mîn metatan tî nakîhtopekn̂e Xotaw, îîpî n̂ixan ha. Opew wacan marha tî n̂irpekn̂e miya rorono rma.

4 Ewto mko marha tî n̂irpekn̂e îh pono mko, Xuta yepamtho chewno pono ha. Comota chew tî sowtatu mîn marha n̂irpekn̂e yaake. Mîîmo mko marha tî n̂irpekn̂e kawno mko ero yaw so ehtome ewto yukurunpen̂e komo, sowtatu.

5 Amonita komo kayaritomon yakro marha tî n̂etar̂mekn̂e. N̂examro pen tî nar̂mekn̂e. Ero ke ero cimn̂ipu po takî tî on warai nîmyatken̂e Amonita komo Xotaw ya, prata 100 tarentu wicakî awsîn, puruma yatho 2.200 kiruritru wicakî, sepata yatho 2.200 kiruritru wicakî xa marha. 3 cimn̂ipu po roro tî ero wicakî so nîmyatken̂e Amonita komo Xotaw ya. Yicimn̂ipuntaxera tî nîmyatken̂e yîwya.

6 Karitî me tî n̂ehtîkekn̂e Xotaw. Kporin komo yanme cexi xe makî tî xakkn̂e. Ero ke kar̂pe tak xakn̂e.

7 Miya rma nai Xotaw yehtoponho, waapa me totoponhîrî, ahce wa na ehtoponhîrî. Ahnoro rma nasî tmewreso karita yaw, Ixaw Yana Kayaritomon Komo Yehtoponho, Xuta Kayaritomon Komo Yehtoponho Marha, kacho yaw.

8 25 cimn̂ipu tî xakn̂e noro yewrutoponho kayaritomo me ecir̂ataw. 16 cimn̂ipu tî xakn̂e kayaritomo me. Xerusaren tî xakn̂e noro yewton.

9 Ero yinhîrî takî tî nîwînîkyakn̂e Xotaw tporin pen komo yakro. Noro yokoputho tî nahruyatken̂e Tapi Pen Yewtontho pona. Ero yinhîrî yumumuthîrî takî tî xakn̂e kayaritomo me hara. Akas tî xakn̂e yumumuthîrî yosotî. Ero wa tî xakn̂e.