Taa, Amasias pen waipuche on wara takî tî xatken̂e Xuta yepamtho komo, noro pen mumutho takî tî n̂iir̂atken̂e tkayaritomon komo me hara. Usias tî xakn̂e yumumuthîrî yosotî. 16 cimn̂ipu tî xakn̂e noro yewrutoponho kayaritomo me ciir̂ataw yîwya so.

2 On wara takî tî noro xakn̂e tîîm pen yîwînkîche tporin pen komo yakro, ewto tî nakirwamekn̂e, Eroce, ewto yosot ha. Xuta komo yewton me takî tî nahsîyakn̂e xa hara. Ero wa tî xakn̂e Usias.

3 16 cimn̂ipu tî xakn̂e Usias yewrutoponho kayaritomo me ecir̂ataw. 52 cimn̂ipu tî xakn̂e kayaritomo me. Xerusaren tî xakn̂e noro yewton. Xekoria tî xakn̂e yînocwan yosotî. Xerusaren pono tî mîk xakn̂e yînocwan.

4 Kir̂wan̂he tî xakn̂e Usias Kporin komo ya. Tîîm pen yehtoponho yaw roro rma tî xakn̂e, Amasias pen yehtoponho yaw roro.

5 Ero yimaw tî iito xakn̂e weronomano rin̂e, Sakarias tî osotî. Yuhnari yîhtînon̂e tî mîk xakn̂e Kaan yenpotopo poko. Ero ke Kporin komo ponaro ka xakn̂e Usias waipîra ka exitaw noro. Ero wa Kaan ponaro exitaw ka Noro rma tî nakronomekn̂e ehn̂an me ehtome ahce na poko. Ero wa tî ka Usias nakronomekn̂e Kaan.

6 Ero yimaw tî Piristew komo yakro n̂etar̂mekn̂e Usias. Kace wacantho tî n̂ixkekn̂e, Xabne wacantho marha, Astoce wacantho marha. Ero yinhîrî anarî mko takî tî n̂irpekn̂e ewto mko hara. Astoce mîtkoso rma tî n̂irpekn̂e, miya so marha tî ewto mko n̂irpekn̂e Piristew komo cheka.

7 Noro tî nakronomekn̂e Kaan Piristew komo yakro etar̂macho poko. Ero wa xa marha tî nakronomekn̂e Arabia pono komo yakro etar̂macho poko, Kur-Baaw pono komo yakro etar̂macho poko marha. Ero wa xa marha tî nakronomekn̂e Mewni pono komo yakro etar̂macho poko marha.

8 On wara marha tî xatken̂e Amon̂ita kom hara Usias poko, noro tî n̂epemetken̂e roro. Miya ro makî tî n̂ekaiwakn̂e Usias Exitu potawno komo n̂entarî me meero. Tîsowtatun komo marha tî n̂epamnoyakn̂e ro mak noro.

9 Kawno mko marha tî n̂irpekn̂e Usias mîîmo, Xerusaren pona. Ero yipu yaw tî xatken̂e sowtatu komo waapa mokrî yentome yîwya so, ewto yukurunpetome marha yîwya so. Waaca Yeknutawno Metatan mîtkoso tî anarî n̂irpekn̂e. Anarî tî n̂irpekn̂e Woskara Yesamarî Metatan mîtkoso. Anarî tî n̂irpekn̂e waaca yecetî mîtkoso hara. Ero warai mko tî n̂irpekn̂e Usias.

10 Meye axawa pona marha tî ero yipu mko n̂irpekn̂e kawno mko. Tuuna marha tî nahtopekn̂e mer̂pono pîn. Mer̂pora tî xakn̂e iyoh komo. Ero ke mer̂pora tî tuuna nahtopekn̂e. Aporî yecihtaw tî nahtopekn̂e, woskara po so marha tî. Tmararîn ciin̂e ro komo tî napickekn̂e, uupa yatî yenîn̂e ro komo marha. Îh po so tî xakn̂e noro mararîn yaake, ewtî mexan po so ha. Tpoxwe tî xakn̂e roowo pomotopo yîwya. Ero ke tî ero poko xakn̂e.

11 Usias sowtatun komo marha tî xatken̂e mer̂pono pîn komo. Cetîraconkaxi so tî cetken̂e etar̂maxi. N̂examro yosotî tî mewrekn̂e Xeiew, karita mewren̂e ro. Maaseias marha tî mewrekn̂e kayaritomo maywen. N̂examro yenîn̂e me tî xakn̂e Ananias. Kayaritomo maywen komo yenîn̂e rma tî mîk xakn̂e Ananias.

12 Yaake tî xatken̂e sowtatu komo, karitî komo xa. Erasîn komo marha tî mîkyam xatken̂e. N̂examro yantoman̂e komo tî xatken̂e, 2.600.

13 Mer̂pora tî xatken̂e n̂examro nantomarî komo, sowtatu kom ha, 307.500. Kar̂pe cetar̂maxmu komo tî mîkyam xatken̂e. Kayaritomo yakronoman̂e me tî n̂examro xatken̂e yiixatî pîn komo yarmacho poko.

14 N̂examro kurun marha tî n̂irpekn̂e Usias tîsowtatun komo kurun. Ecen̂an komo, yîrahnu komo cecehkem, yîxapikan komo kuripara, ponon komo marha kuripara, yîkrapan komo, toopu yar̂macho mko, ero warai mko tî n̂irpekn̂e Usias tîsowtatun komo kurun me.

15 Makina komo marha tî nakîhtopekn̂e noro tmaywen komo ya, yaana komo ya ha. Waiwî yar̂macho tî nakîhcetken̂e n̂examro, toopu yar̂macho marha porinî mko yar̂macho. Yînakîtothîrî komo takî tî n̂irpekn̂e kayaritomo mîîmo meretkoso, kawno meretkoso. Waaca yeknutaw so marha tî n̂irpekn̂e. Ero ke Usias takî tî n̂ekaiwakn̂e miya so ro mak. Noro yakronomarî ke Kaan ya yukurumîkno me xa n̂ehtîkekn̂e. Ero ke tî n̂ekaiwakn̂e.

16 Yukurumîkno me xa cexiche takî tko anarme takî tî xakn̂e Usias. Ow xa takîhsom ham okre, kekn̂e takî tî tîropotaw, n̂ehcoyoponkekn̂e tî. Ero wa esehtînotopo rma takî tî xakn̂e etwîrîmatopo me okwe. Kporin komo mtapotachonho takî tî ewetîra xakn̂e, ponaro cehtopo mtapotachonho rma okwe. Kporin komo mîn yaka tî n̂ewomyakn̂e, kotoporem yakn̂itome noro rma okwe.

17 Noro wenari tko tî cekn̂e Asarias, Kaan yaka cewomsom. Noro yakro marha tî cetken̂e anarî kom hara, tîmsom pokono komo, 80. Erasîn komo tî mîkyam xatken̂e.

18 Usias tî porohketken̂e n̂examro. On wara tî ketken̂e yîwya, Ai apa, kotoporem yakn̂in̂e pîn thakwa amoro. Tîmsom pokono komo makî reha naxe ero poko cehsom me, Araw yepamtho komo mak ha. N̂examro mak naxe kotoporem yakn̂in̂e ro me ciixapu. Ero ke Kaan mîn yai men epatakak hara. Noro mtapotachonho manwekyas okwe. Kir̂wan moso okre, kahra men nasî Kporin komo Kaan apoko on yaka awewomrî ke, ketken̂e tî yîwya.

19 Yîmtapotarî komo yentache nîrwonîmtîkekn̂e takî tî Usias. Iito rma tî ka xakn̂e kotoporem yen ke cemyarke rma. Rîîwo me ro makî tî nîmtapowakn̂e tîmsom pokono komo yakro. Ero wa yîmtapowataw rma repra takî tî n̂esenpekn̂e noro perî poko n̂examro wero ro rma. Kporin komo mîn yaw rma tî xakn̂e ero yimaw, kotoporem yakn̂itopo mîtwo rma.

20 Ero ke takî tî noro wece n̂een̂akn̂e Asarias, Kaan yaka cewomsom. Ahnoro tîmsom pokono komo marha tî n̂een̂atken̂e. Repra tî n̂een̂atken̂e perî pokono. Ero ke takî tî en̂exa kayaritomo n̂en̂epetken̂e yohno. Noro rma yohno cepataka xe xakn̂e tanme ro rma. Kporin komo rma on wara oyemetanmekî, ero ke men kepatakesî, kekn̂e tî.

21 Ero yinhîrî rma takî tî repra ken̂e xakn̂e Usias pen okwe miya roro twaihtopo pona roro. Cewyarono yaw thakwa takî tî xakn̂e mîîmo yaw. Kporin komo mîn yaka tohnî me ro thakwa makî tî xakn̂e okwe. Noro waipînaw rma ha ka yumumuru takî tî xakn̂e kayaritomo mîn yenîn̂e me. Xotaw tî xakn̂e yumumuru yosotî. Xuta yepamtho komo yehtopo yentan̂e me marha tî noro xakn̂e, cesen̂ekaxmu komo yentan̂e me ha. Ero wa tî xakn̂e Xotaw, Usias mumuru.

22 Miya rma nai Usias yehtoponho. Ahnoro mewrekn̂e Isaias karita yaka. Kayaritomo me ciitoponhîrî mewrekn̂e, ahce wa so na ciino ritoponho marha, ahnoro ehtoponhîrî mewrekn̂e, waihtoponhîrî ponarorono. Ero wa noro yehtoponho mewrekn̂e Isaias. Kweronoman̂e tî mîk xakn̂e Isaias, Amos mumuru ha.

23 Ero ke takî tî nîwînîkyakn̂e Usias pen tporin pen komo yakro. Tporin pen yocho yahrutopo ro pona rma tî okoputhîrî nahruyatken̂e. Repra yawnonho pen mîk xakn̂e okwe, ketken̂e. Ero yinhîrî takî tî yumumuthîrî xakn̂e kayaritomo me tîîm pen retawno me hara. Xotaw tî xakn̂e yumumuthîrî yosotî. Ero wa tî xakn̂e.