Taa, Amasias yehtoponho tan wekatîmyasî hara awya so. 25 cimn̂ipu tî xakn̂e Amasias yewrutoponho kayaritomo me ecir̂ataw. 29 cimn̂ipu takî tî xakn̂e kayaritomo me. Xerusaren tî xakn̂e noro yewton. Xoatan tî xakn̂e yînocwan yosotî. Xerusaren pono tî mîk xakn̂e yîson.

2 Kir̂wan̂he tî xakn̂e Amasias Kporin komo ya. Yîraco me n̂he makî tko tî xakn̂e Noro ponaro okwe.

3 On wara takî tî xakn̂e noro yukurumîkno me xa takî tî n̂ehtîkekn̂e. Ero ke tîîm pen wapatho komo tî waihkekn̂e hara.

4 Yîmxîkîthîrî komo tko tî waihkara xakn̂e. Moises ya kpanatanmetopo yaw roro rma tî ero wa xakn̂e yîmxîkîthîrî komo poko. On wara kacho mîn Mosese nmewretho, Yîîm waihkara ehcoko yîmxîkrî komo yehtoponho yanme, yîmxîkrî komo marha waihkara ehcoko yîîm yehtoponho yanme hara. Kicicme ehxapu makî reha waihkacoko, kicicme ehtoponhîrî ro yanme makî, kacho mîn Moises nmewretho. Ero ke ero wa kacho yaw roro n̂examro xîkîtho komo waihkara xakn̂e.

5 Ero yinhîrî takî tî Xuta komo takî tî nan̂ikyakn̂e Amasias. Ero ke yîhyaka takî tî n̂esenmekyatken̂e. On wara takî tî n̂examro n̂iir̂akn̂e, sowtatu yantoman̂e komo tî n̂iir̂akn̂e, 1.000 yantoman̂e komo, 100 yantoman̂e komo marha. Tîyanan komo yantoman̂e me so tî n̂iir̂akn̂e. Ero wa tî Xuta komo n̂iir̂akn̂e, Benxamin komo marha. N̂examro marha tî nukuknomekn̂e kîrkomo, 20 cimn̂ipu ehxapu komo, ero yopono komo marha. 300.000 tî xatken̂e. Karitî komo re tî mîkyam xatken̂e, enpamxapu komo raapu poko, kecen̂an poko marha. Ero wa tî xatken̂e Xuta sowtatun komo.

6 Ixaw Yana komo marha tî nan̂ikyakn̂e 100.000. Karitî komo marha tî mîkyam xatken̂e erasîn komo. 100 tarentu wicakî tî nîmyakn̂e yîwya so prata, takronomacho komo yepetho.

7 Ero yinhîrî tko tî mokyakn̂e Kaan yakrono ro Amasias yakro yîmtapotaxi. On wara tî kekn̂e yîwya, Ai kayaritomo, Ixaw Yana sowtatun komo arîhra ro mak men esko awakrono komo me. Ixaw Yana komo yakronoman̂e me exihra ro mak nasî Kporin komo okwe, Eprain yepamtho komo yakronoman̂e me exihra ro mak nas ha.

8 Ero wara rma awto xe awexitaw etocoko rma kr̂a. Ekaritocoko ar̂mano ritopo poko. Awar̂mapexe so tko Kaan aaxatî pîn komo ya. Waapa komo yopono me kiin̂e Mîkî Kaan anarimaw, waapa komo mamakan me cepîrkaxmu me kiin̂e marha Mîk anarimaw. Noro yipu Mîkî Kaan, kekn̂e tî Kaan yakrono ro.

9 On wara tko tî kekn̂e hara Amasias Kaan yakrono ro ya, Ahce okwe, Opurantantho okwe, ahce wa wai ero poko? 100 tarentu thakwa wîmye yîwya so okwe opurantantho, kekn̂e tî. On wara tî n̂eyukyakn̂e Kaan yakrono ro, N̂expe mak, 100 tarentu yopono yosom mîkî Kaan. Ero yipu tîmn̂e rma mîk ha tîmî xe cexitaw awya amn̂e, kekn̂e tî.

10 Ero ke Eprain yepamtho sowtatun komo takî tî n̂en̂epekn̂e hara Amasias. Amîn komo yaka etocoko hara, kekn̂e tî yîwya so. Ero ke nîrwonatken̂e xa takî tî n̂examro Xuta komo poko. Cetken̂e rma tîmîn komo yaka, tîrwon̂e makî tko tî cetken̂e okwe.

11 Ero yinhîrî takî tî n̂ekaricekn̂e Amasias cetarmaxmu me tîtotome. Ero ke tîsowtatun komo yakro rma taki tî cekn̂e etar̂maxi. Woskara pona tî cetken̂e, yîmîtî ken̂arî pona. Iito takî tî Sei pono komo waihketken̂e mer̂pono pîn komo, 10.000 tî.

12 Anarî komo tî nahsîyatken̂e hara waihkara rma tî ka nahsîyatken̂e. 10.000 tî ero wa nahsîyatken̂e. Iito tî xakn̂e toopu, porin. N̂examro pen tî naar̂atken̂e ero meretkoso. En̂exa takî tî nar̂metken̂e okwe. Ero ke ahnoro rma tî n̂examro pen n̂ewakroketken̂e mak oko kai ro cepîrkarî ke so. Ero wa tî Sei pono pen komo waihketîketken̂e okwe.

13 On wara tko tî xatken̂e Ixaw Yana sowtatun komo. Amasias n̂en̂epekn̂e hara takro tohra ehtome so etarmaxi, n̂examro tî waapa me cetken̂e Xuta yewtonî mko pona so yakeno pona. Samaria pono pen komo poko n̂ihciyatken̂e waihkano ritopo, miya rorono komo tî waihketken̂e Bece-Oron pona rorono kom ha. 3.000 tî waihketken̂e okwe. Emyawnonhîrî komo marha tî naar̂atken̂e mer̂pono pîn. Ero wa tî xatken̂e n̂examro okwe.

14 Taa, on wara takî tî xakn̂e Amasias Eton pono komo yar̂man̂enho, ponaro Sei pen komo yehtopo mko tî n̂ekyakn̂e kica, enporixaputho mko. Cewton pona rma takî tî naponmekn̂e hara. Noro yipu mamaka tî nutupenwakn̂e kica. Kotoporem marha tî nakn̂iyakn̂e noro yipu komo ya tîmsom me. Ero wa tî xakn̂e Amasias okwe.

15 Ero ke nîrwonakn̂e takî tî Kporin komo Amasias poko okwe. Ero ke tî weronoman̂e n̂en̂epekn̂e yîhyaka. On wara tî kekn̂e noro Amasias ya, Ai apa, ahce kacho ponaro Sei pono komo yehtoponho ponaro tak mai amoro hara okwe? Tosomînhîrî pen komo yakronomara ro makî tî xatken̂e. Enko xe, n̂examro pen yukurunpera ro mak wa xatken̂e etar̂mapora ehtome so awya so, kekn̂e tî Amasias ya.

16 Ero wa ketaw rma on wara takî tî kekn̂e Amasias yîwya, Onoke ma re nîîka awya, Kayaritomo panatamekn̂e me esko, nîîka? Atîtmamko kr̂a. Kwaihkesî kr̂a men ketaw rma awya, kekn̂e tî yîwya okwe. Ero ke takî tî nîtîtmamyakn̂e weronoman̂e. On wara makî tî kekn̂e, Omtapotarî yentara awexirî ke tînarmarî me tak wa ahtînoya ham Kaan okwe, wîîkesî. Ero wa kekn̂e.

17 Ero yinhîrî on wara takî tî xakn̂e Amasias, Xuta komo kayaritomon, cesentayem komo yakro tî n̂esencekn̂e. Ero yinhîrî tîmtapotarî yekatîmn̂e takî tî n̂en̂epekn̂e Xeoas yaka, Ixaw Yana kayaritomon yaka. Xeoakas pen mumutho tî mîk xakn̂e Xeoas, Xeu pen parînho ha. On wara tî kekn̂e ekatîmn̂e yîwya, Ai Xeoas, xiya amohcoko amyamro etar̂maxi amna yakro, kekn̂e tî.

18 Tîmtapotarî yekatîmn̂e tko tî n̂en̂epekn̂e hara Xeoas Amasias yaka, On wara tî nîîke Xeoas awya, kekn̂e tî, Ribanu po xakn̂e peentho, cekyekyem, setru yepu marha tî xakn̂e iito. Cekyekyem takî tî n̂en̂epekn̂e setru yepu yaka tîmtapotarî yekatîmn̂e, On wara tî nîîke cekyekyem awya, kekn̂e, Awemsîrî cma re mîmyas îomumuru ya yipici me, kekn̂e. Ero yimaw rma tko mokyakn̂e comota pono. Cekyekyem pen tak napikyakn̂e thakwa okwe, kekn̂e tî.

19 On wara mîîke ham, Eton pono pen komo yar̂man̂enho ow ha, mîîke ham. Mehcoyoponke thakwa ham okwe. Awewton po rma tko esko ha ke. Ahce kacho awetwîrîmacho poko awexi xe thakwa mai hara okwe. Awar̂mesî men amna Xuta pen komo yakro rma okwe, nîîke tî Xeoas awya, kekn̂e tî ekatîmn̂e.

20 Entara tko tî xakn̂e Amasias. Kaanî rma tî ero wa n̂iir̂akn̂e Amasias pen yiixatî pîn komo ya ar̂mapochome. Ero wa tî Xuta yepamtho komo yar̂mapotopo nîhtînoyakn̂e Kaan ero yimaw enporixaputho ponaro exirî ke so, ponaro Eton pono komo yehtopo poko exirî ke so okwe.

21 Ero ke Xeoas komo tî cetken̂e etar̂maxi, Amasias komo marha. Bece-Semes po takî tî n̂etar̂metken̂e. Xuta yewton mîn Bece-Semes.

22 Etar̂metaw so Xuta yepamtho pen komo tî nar̂metken̂e Ixaw Yana komo okwe. Ero ke ahnoro Xuta pono pen komo takî tî n̂emahciyatken̂e tîmîn komo yaka hara.

23 Ero yinhîrî Amasias pen tî nahsîyatken̂e Xeoas komo. Xoas pen mumutho tî mîk xakn̂e Amasias, Xeoakas pen parînho ha. Bece-Semes po tî nahsîyatken̂e. Noro pen takî tî naar̂atken̂e Xerusaren pona. Xerusaren wacan pen tî n̂ixketken̂e Xeoas komo. Eprain metatanî n̂ixa tî n̂ixketken̂e miya roro Eknu Metatan yaka rorono. 180 metru wicakî tî n̂ixketken̂e okwe.

24 Ooru marha tî naar̂akn̂e Xeoas, prata marha, Kaan mîn yawnonho. Obece-Eton tî xakn̂e enîn̂e me, ero ke noro yawnonho tî naatîketken̂e okwe ahnoro. Kayaritomo mîn yawnonho marha tî naar̂akn̂e cepethîkemu mko. Xuta yepamtho komo marha tî naar̂akn̂e yaake. Ero yinhîrî cetken̂e hara Xeoas komo Samaria pona. Ero wa tî xakn̂e Xeoas, Ixaw Yana kayaritomon.

25 Ero yinhîrî pahkî rma tî xakn̂e Amasias, Xuta komo kayaritomon me. Waihyakn̂e Xeoas penî reha, Ixaw Yana kayaritomon pen. Ero yinhîrî 15 cimn̂ipu rma tî xakn̂e Amasias waipîra rma ka.

26 Miya rma tî nai Amasias yehtoponho. Ahnoro rma tko nai tmewreso karita yaw, Xuta Komo Kayaritomon Komo Yehtoponho, Ixaw Yana Komo Kayaritomon Komo Yehtoponho Marha, kacho yaw ha.

27 On wara marha tî xakn̂e Amasias Kporin komo pona enîhkan̂enhîrî, noro pen waihkacho tî nîhtînoyatken̂e maywen komo, iitono komo, Xerusaren pono komo. Ero yipu yentache Amasias ya Rakis pona tî n̂emahciyakn̂e. Waparî komo rma tko tî n̂en̂epetken̂e maywen komo noro wenari. Iito takî tî noro pen waihketken̂e okwe.

28 Okoputhîrî tî n̂ekyatken̂e hara kawaru mkaw. Xuta Yewton pona tî nahruyatken̂e noro porin pen yocho yawxari rma. Ero wa tî xakn̂e Amasias pen okwe.