Taa, Xoas yehtoponho tan wekatîmyas awya so, 7 cimn̂ipu tî xakn̂e Xoas yewrutoponho kayaritomo me ciir̂ataw yîwya so. 40 cimn̂ipu takî tî xakn̂e kayaritomo me. Xerusaren tî xakn̂e noro yewton. Sibia tî xakn̂e noro nocwan, Behseba pononho.

2 Kirwanhe tî ka noro yehtopo n̂een̂akn̂e Kporin komo Xoiata exitaw ha ka Kaan yaka cewomsom me.

3 Noro tî n̂ipihcekn̂e Xoiata, asakî tî nîmyakn̂e yipici. Ero yinhîrî n̂examro tî nîmxîkwatken̂e Xoas mumuru komo, emsîrî komo marha.

4 Ero yinhîrî takî tî Kporin komo mîn yakir̂wamacho nîhtînoyakn̂e Xoas.

5 Ero ke tîmsom pokono komo takî tî nan̂ikyakn̂e, Repita komo marha. On wara tî kekn̂e yîwya so, Ahnoro Xuta yewton pona etocoko puranta yahsîso, Kaan mîn yakir̂wamacho yepetho yahsîso ha. Ixaw Yana komo yewton pona marha etocoko. Yohno men ahsîtatko. Eroyinhîrî tak cimn̂ipu po roro marha etocoko yînîmrî komo yahsîso, kekn̂e tî yîwya so. Repita komo tko tî yohno tohra xatken̂e okwe.

6 Ero ke Xoiata takî tî nan̂ikyakn̂e kayaritomo. On wara tî kekn̂e yîwya, Ahce kacho Repita komo ya ekpora mai puranta, Xuta komo nîmîtho, Xerusaren pono komo nîmîtho marha, Ixaw Yana komo nîmîtho ahnoro. Ero yipu yahsîtopo poko tî kpanatanmekyatken̂e so Moises pen pahxa. Kporin komo yakro kesentacho yaka men n̂ehcowpe puranta Ixaw Yana komo ahnoro, kekn̂e tî noro pen, kekn̂e tî Xoas yîwya.

7 On wara tî xakn̂e Kporin komo mîn ero yimaw, tawkaxi tî xakn̂e okwe. Ataria penî mretho komo tî nawketken̂e, kicicitho mretho kom ha. Kaan ya tîmxapunhîrî komo tî naatîketken̂e Baaw ya tîmsom me hara kica.

8 Ero ke kayaritomo yanme takî tî yamata nakîhcetken̂e Repita komo. Kaan mîn potaw tî n̂iir̂atken̂e metata mîtwo.

9 Ero yimaw marha tî Xuta yepamtho komo ahnoro panatanmekyatken̂e Repita komo. Xerusaren pono komo marha. On wara tî ketken̂e yîwya so, Ai Xuta yepamtho komo Xerusaren pono komo marha, awya so kesî kayaritomo on wara, Kaan purantan tak ehcoko. Mosese pen tî kekn̂e Ixaw Yana komo ya pahxa axawa imo po exitaw so ero yaw roro rma ehcoko oroto, ketken̂e tî.

10 Ero yipu yentache nahwowatken̂e takî tî Xuta yepamtho yantoman̂e komo ahnoro, yînantomarî komo marha ahnoro. Tupurantan komo takî tî n̂ekyatken̂e tîmsom. Yamata yaka tî n̂enkayatken̂e copoi cehso ro.

11 Ero yinhîrî takî tî Kaan purantan yen takî tî naar̂atken̂e Repita komo kayaritomo maywen yaka. Yamata yahrunkache mer̂pora tî n̂een̂atken̂e puranta pen. Ero ke kayaritomo karitan mewren̂e tî mokyakn̂e, Kaan yaka cewomsom maywen marha tî mokyakn̂e. N̂examro takî tî yamata yawnonho nowyatken̂e. Ero yinhîrî Kaan mîn yaka tî naar̂atken̂e hara ekenhîrî na hara. Ero wa tî yamata yawnonho nowyatken̂e enmar̂atîxera. Mer̂pora tî n̂epamnoyatken̂e puranta.

12 Ero yinhîrî takî tî Kporin komo mîn yakir̂waman̂e komo ya tî nîmyatken̂e kayaritomo, Xoiata yakro. N̂examro makîrha tî nantometken̂e toopu ciin̂e ro komo, sahsamaxapu ciin̂e ro komo marha. Epethîrî pona tî nantometken̂e. Pehu ciin̂e ro komo marha tî nantometken̂e, bronse ciin̂e ro komo marha. Kporin komo mîn yakir̂wamacho poko tî noro yipu komo nantometken̂e.

13 Ero ke n̂etapicketken̂e takî tî noro yipu komo. Kporin komo mîn takî tî nakir̂wametîketken̂e. Pahxa xakn̂e ero wara rma tî n̂iir̂atken̂e hara. Waaca yecepu marha tî n̂iir̂atken̂e.

14 Taa, Kaan mîn yakir̂wamatîkache puranta yakwenho takî tî n̂ekyatken̂e hara kayaritomo yaka, Xoiata komo yaka. Ero yipu rma takî tî nukuyatken̂e Kporin komo mîn yawno ro me so ciitome. Kaan ya tîmsom pokono me n̂iir̂atken̂e, takn̂isom tîmtopo me marha. Warapapoturu mko n̂iir̂atken̂e, paayu mko marha, tutumu mko marha. Ero yipu me so tî ooru n̂irpetken̂e, prata marha. Ero yinhîrî paaka pun takî tî nakn̂iyatken̂e roro Kporin komo ya tîmsom me, oper̂a pun marha. Kporin komo mîn yaw tî nakn̂iyatken̂e. Xoiata waihtopo pona roro tî nakn̂iyatken̂e. Ero wara tî xatken̂e.

15 Ero yinhîrî takî tî poritomo me n̂ehtîkekn̂e okwe Xoiata. Mer̂pora cimn̂ipu takî tî xakn̂e ewrutoponhîrî. Ero yinhîrî waihyakn̂e takî tî okwe. 130 cimn̂ipu tî xakn̂e ewrutoponhîrî waihyataw.

16 Noro yokoputho tî nahruyatken̂e Tapi pen Yewtontho pona kayaritomo pen komo yocho yawxari rma. Iina tî nahruyatken̂e kir̂wan̂he Ixaw Yana komo yakronoman̂e me exirî ke. Kaan poko Ixaw Yana komo yahworen̂e me tî xakn̂e noro Xoiata pen, yîmîn yakir̂waman̂e me marha tî xakn̂e okre. Ero ke tî iina nahruyatken̂e.

17 Taa, Xoiata waipuche Xuta yepamtho yantoman̂e komo takî tî mokyatken̂e kayaritomo yaka. Noro mamaka tî nutupenwatken̂e tosokmuru komo po. Yîmtapotarî komo tî n̂encekn̂e kayaritomo.

18 Ero ke Kporin komo mîn takî tî nahsîpînketken̂e hara okwe, ponaro tporin pen komo yehtoponho mîn tî nahsîpînketken̂e. Ciixaputho ponaro takî tî xatken̂e hara kica, weewetho mak. Mîk hak warai me ciixaputho komo ponaro tak xatken̂e hara kica. Ero ke Kaan takî tî nîrwonakn̂e Xuta pono komo poko, Xerusaren pono komo poko marha. Nîrwonakn̂e ro makî tî panatanmetopo komo yanwekrî poyero.

19 Tpoko weronomano rin̂e komo rma tî re n̂en̂epekn̂e Kporin komo yîhyaka so tponarono me ciitome so xa hara. Kicicme maxe kica Kporin komo poko, ketken̂e tî yîwya so. Panahra ro makî tko tî xatken̂e okwe.

20 Ero yinhîrî takî tî Kaan Yekatî mokyakn̂e Sakarias ropotaka, Xoiata pen mumutho ropotaka. Xuta yepamtho komo yeepatai tî n̂ecececekn̂e. On wara tî kekn̂e yîwya so, Ai, oyakno komo, on wara nîîke Kaan awya so, Ahce kacho Kporin komo ya apanatanmetopo komo manwekyatu okwe? Ero wa anwekrî ke awya so cehn̂axmu me tak men maxe okwe. Kporin komo yahsîpînkarî ke awya so, Noro takî tî awahsîpînkace so hara, kekn̂e tî. Ero wa tî kekn̂e Sakarias yîwya so.

21 Ero ke noro pen waihkacho poko takî tî n̂esencetken̂e okwe. Kporin komo mîn roron po rma tî noro pen waihketken̂e toh ke oko. Kayaritomo mtapotarî yanme rma tî waihketken̂e okwe.

22 Ero wa tî xakn̂e Xoas okwe, Sakarias yîîm pen ya twakrechonhîrî ponarora ro makî tî xakn̂e, Xoiata pen ya twakrechonhîrî ponarora ha. Yumumuthîrî pen tî waihkapekn̂e. On wara tko tî kekn̂e Sakariasî twaihîrî me, Owaikacho rma n̂enpe Kporin komo. Noro rma oyepanpe amn̂e, kekn̂e tî. Ero wa tî kekn̂e Sakarias pen.

23 Ero yinhîrî takî tî kaamo me exitaw tak cwotu yimawnonho, Siriu komo tî mokyatken̂e Xoas yakro etar̂maxi. Xuta pona tî mokyatken̂e, Xerusaren pona marha. Xuta yantoman̂e pen komo takî tî waihketken̂e ahnoro. N̂examro yemyawnonho tî narpetken̂e tîkayaritomon komo yaka Tamasku pono yaka.

24 Asakî makno tî mîkyam xatken̂e Siriu sowtatun komo. Mer̂pora tî xatken̂e Xuta sowtatun komo. Wara rma Xuta pen komo tî nar̂mapekn̂e Kporin komo Siriu komo ya. Tporin komo yahsîpînkarî ke tî nar̂mapekn̂e, ponaro tporin pen komo yehtoponho yahsîpînkarî ke okwe. Ero wa tî xatken̂e Siriu komo. Xoas panarecho me tî ero wa xatken̂e.

25 Xoas pen meero tî paraxketken̂e tî oko. Ero ke tî karpera ro mak xakn̂e. N̂etîrapekn̂e makî tî tukuywan pona. Ero yinhîrî Siriu komo toche hara Xoas maywen komo rma tî n̂esencetken̂e noro waihkacho poko. Xoiata pen mumutho waihkaporî yanme tî waihka xe tî xatken̂e. Ero ke Xoas pen takî tî waihketken̂e noro kaman pona rma. Ero wa tî Xoas pen waihketken̂e okwe. Okoputhîrî tî nahruyatken̂e Tapi pen Yewtontho pona. Kayaritomo pen komo yocho yawxari tko tî ahrura xatken̂e.

26 On warai tî mîkyam xatken̂e Xoas waihkacho poko cesentaxmu komo, Sabace, Simeace mrerî mîk, Amon̂ita wosînî mrerî, Xeosabace marha, Sin̂irice mrerî mîk, Moabita wosînî mrerî ha.

27 Miya rma nai Xoas pen yehtoponho. Mer̂pora nai Kaanî mtapotachonho noro pen pokono. Kaan mîn yakir̂wamachonho marha nasî tmewreso. Ahnoro noro yehtoponho nasî tmewreso karita yaw, Kayaritomo Komo Yehtoponho, kacho yaw. Ero yinhîrî yumumuthîrî takî tî xakn̂e kayaritomo me tîîm pen retawno me hara. Amasias tî xakn̂e yumumuthîrî yosotî. Ero wa tî xakn̂e.