Ero yinhîrî takî 7-nhîrî cimn̂ipu po on wara takî tî xakn̂e Xoiata, antomano rin̂e me takî tî n̂ecir̂akn̂e noro rma. Ero ke sowtatu yantoman̂e komo yakro tî nîmtapowakn̂e, 100 komo yantoman̂e komo yakro ha. Yaaro xa tîtkacerî, awakronoman̂e me nas amna, mîîkexe cma re owya, ow marha ero wa wîîkes awya so hara, kekn̂e tî. On warai komo yakro tî nîmtapowakn̂e, Asarias, Xeroaw mumuru mîkî, Ismaew, Xoanan mumuru mîkî, Asarias, Obece mumuru mîkî, Maaseias, Ataias mumuru mîkî, Erisapace, Sikri mumuru mîkî. Noro yipu komo yakro tî nîmtapowakn̂e Xoiata cetakronomacho komo poko.

2 Ero ke takî tî n̂examro cetken̂e miya so, Xuta rowon pore ro. Repita komo tî nan̂ikyatken̂e Xuta yewton pono komo ahnoro. Ixaw Yana marha nan̂ikyatken̂e noro re yepamtho komo yantoman̂e kom ha.

3 Kaan mîn yaka takî tî n̂esenmekyatken̂e cetakronomacho komo poko tîmtapotachome so tkayaritomon komo yakro ciki. On wara tî kekn̂e Xoiata yîwya so, Kayaritomo mumuru xa matko cirpore nasî kayaritomo me. Ero wara rma tî kekn̂e Kporin komo Tapi pen mumutho komo poko, n̂examro makî reha naxe kayaritomo me.

4 Ero ke on wara ehcoko amyamro sabatu po cemyarkem komo, tîmsom pokono komo, Repita komo marha, cetîraconkaxi so tak ehcoko, on wara, Tehsa wicakno mak ehcoko amyamro Kaan mîn metatan yenîn̂e me.

5 Kayaritomo mîn mîtwo ececetocoko tehsa wicakno kom hara. Kaan mîn metatan mîtwo tak ececetocoko amyamro hara, tehsa wicakno xa hara. Kaan Mîn Yapon Metatan, kacho mîtwo ececetocoko. Tîmsom pokono pîn komo reha n̂ehcowpe Kaan mîn roron po mak.

6 Tîmsom pokono pîn komo ewomra ro mak n̂ehcowpe oona Kaan mîn yaka. Tîmsom pokono komo, Repita komo marha, tîmsom pokono komo yakronoman̂e komo, noro yipu komo mak xa n̂ewomcowpe oona. Kaan nmen̂ekatho me cexirî ke so n̂ewomcowpe. Katpanaw makî reha n̂ehcowpe anarî komo kayaritomo xatî pîn komo wahkoton̂e me. Kporin komo yanme ero wara n̂ehcowpe.

7 Taa, on wara ehcoko amyamro Repita kom hara, kayaritomo mamtocoko amyamro yukurunpetome. Kacipara imo ahsîcoko. Anarî ro yewomuche oona Kaan mîn yaka noro pen waihkacoko. Kayaritomo cetaw Kaan mîn yai etocoko noro yakro ro, mokyataw oona hara amohcoko xa hara noro yakro ro hara, kekn̂e tî. Ero wa tî kekn̂e Xoiata esenmexapu komo ya.

8 Ero ke Xoiata mtapotacho yaw roro rma takî tî xatken̂e Repita komo, Xuta komo ahnoro. Anarî komo tî xatken̂e sabatu po emyarîtoxapu ro me, anarî komo reha tî xatken̂e emyarîn me sabatu po. Iito rma tko tî xatken̂e ahnoro, yîraconhîrî komo tî en̂epera rma, N̂ex ha, etocoko hara, kahra tî ka xakn̂e Xoiata ero yimaw. Ero ke iito rma ka xatken̂e tantoman̂e ro komo yewetîtome.

9 On wara marha tî xakn̂e Xoiata, sowtatu yantoman̂e komo yemyaka tî nîmyakn̂e raapu imo mko, cecehkem, kecen̂anî mko marha. Tapi pen n̂ir̂potho tî mîn xakn̂e. Porin me tî xakn̂e anarî mko, kecen̂anî mko, wahra tî xakn̂e anarî mko hara. Iitono ro tî mîn xakn̂e ero yipu, Kaan mîn yawno ro me mak.

10 Ero yinhîrî Kaan mîn yawno komo tî panahcekn̂e Xoiata Kaan mîn yaw. Poowa n̂ixa tî panahcekn̂e anarî komo, kaari n̂ixa tî panahcekn̂e hara anarî komo. Anarî komo tî panahcekn̂e Kaan ya tîmsom yakn̂itopo mîtkoso. Kayaritomo wamton̂e me tî n̂examro n̂iir̂akn̂e ahnoro.

11 Ero yinhîrî kayaritomo mumuru takî tî n̂en̂emhataketken̂e Xoiata komo. Kayaritomo yarokorî tak namrupetken̂e yîwya. Kaan ya kpanatanmetopo tî nîmyatken̂e yîwya karita. Ero wa tî noro cik n̂iir̂atken̂e kayaritomo me tak. Ero yinhîrî takî tî noro nîhkapetken̂e Xoiata komo. Ero wa kayaritomo me ciki noro n̂iir̂atken̂e Xoiata, tumumuru komo yakro rma. On wara tî ketken̂e yîhkapetaw, Pahkî n̂he moso n̂expe kîkayaritomon komo me, ketken̂e tî.

12 Ero yinhîrî on wara takî tî xakn̂e Ataria, wara hakî kano tî n̂encekn̂e, emahcitopo komo marha tî n̂encekn̂e. Kir̂wan̂he nai ham okre kîkayaritomon, kacho tî n̂encekn̂e. Ero ke noro takî tî mokyakn̂e Kporin komo mîn yaka iina esenmexapu komo yenso.

13 Iito takî tî kayaritomo n̂een̂akn̂e Ataria Kaan mîn mapatan wararî. Kayaritomo panaw tî antomano rin̂e komo n̂een̂akn̂e, tuu kan̂e komo marha. Ahnoro tî Xuta yepamtho komo nahwowatken̂e, raatî marha tî nîyorketken̂e. Cewanomaxmu komo marha tî n̂een̂akn̂e, raatî iyorkan̂e komo, Kir̂wan̂he Kaan nai ham okre, kan̂e komo. Noro yipu yenîche tponon takî tî nahyaxkekn̂e Ataria. On wara tî kekn̂e, Kayaritomo yar̂macho tan ham kica, kekn̂e. Kekn̂e xa hara, ero wa xa marha, Kayaritomo yar̂macho tan ham kica, kekn̂e tî. Kar̂pe ro makî tî kekn̂e ero wa.

14 Ero yinhîrî takî tî sowtatu yantoman̂e komo nan̂ikyakn̂e Xoiata, Kporin komo yaka cewomsom. 100 komo yantoman̂e komo mîkyam nan̂ikyakn̂e. On wara tî kekn̂e yîwya so, Noro tak aacoko Kaan mîn yai. Wamtocoko aar̂ataw. Anarî komo cetaw noro yakro n̂examro penî rma waihkacoko. Kporin komo mîn yaw noro waihkara ehcoko, kekn̂e tî noro.

15 Ero ke Ataria pen takî tî nahsîyatken̂e. Kawaru Metatan yari cetaw tî nahsîyatken̂e, kayaritomo mîn potaw rma. Iito takî tî noro pen waihketken̂e. Ero wa tî waihyakn̂e Ataria pen.

16 Ero yinhîrî Kporin komo ponaro cehtopo komo poko takî tî nîmtapowakn̂e Xoiata. Xuta yepamtho komo yakro tî nîmtapowakn̂e, kayaritomo yakro marha. Kporin komo ponarono me xa tak taxe, eroromero, ketken̂e tî.

17 Ero yinhîrî takî tî Baaw mîn yaka takî tî cetken̂e Xuta komo. N̂ixketken̂e kr̂a takî tî. Ero yawnonho mko marha tî nakuhr̂apetken̂e, Baaw ya tîmsom yakn̂itopo mko, Baaw warai me ciixaputho mko marha. Baaw ya tîmsom pokono marha tî waihketken̂e iito rma, tîmsom yakn̂itopo mîtwo rma. Matan tî xakn̂e noro pen yosotî.

18 Ero yinhîrî takî tî Kaan mîn yawno pokono ro me takî tî Xoiata n̂iir̂akn̂e tîmsom pokono komo. Repita komo rma tî mîkyam ero warai me n̂iir̂akn̂e. Ero poko rma tî wa n̂examro nantomekn̂e Tapi pen pahxa rma. On wara tî kekn̂e yîwya so, Kporin komo ya tîmsom akn̂icoko amyamro. Moises pen ya kpanatanmetopo yaw roro rma akn̂icoko. Ahwotacoko akn̂iyataw, waano aacoko, kekn̂e. Ero wara tî kekn̂e Tapi pen pahxa. Ero wa kachonho yaw roro rma tî n̂iir̂akn̂e Xoiata.

19 Anarî komo tî nantomekn̂e Kporin komo mîn metatan yenîrî poko hara. Metata wararî rma tî n̂ecececetken̂e n̂examro kicicme ehxapu komo porohkan̂e me.

20 Ero yinhîrî sowtatu yantoman̂e komo takî tî naar̂akn̂e Xoiata. Kayaritomo yanan komo, Xuta yepamtho kopenato komo, ahnoro tî naar̂akn̂e Xuta rowon pono komo. Kayaritomo yakro rma tî n̂examro naar̂akn̂e Kporin komo mîn yai kayaritomo mîn yaka. Waaca metatan yaro tî cetken̂e, îh pono yaro. Iito takî tî tkayaritomon komo n̂eremanmekyatken̂e kayaritomo yaponî ro pona.

21 Ero yinhîrî nahwowatken̂e takî tî Xuta rowon pono komo ahnoro. Cerepore tî xatken̂e Xerusaren pono komo. Ero wa tî xatken̂e Ataria pen waihkarî ke kacipara imo ke. Ero wa tî xatken̂e.