Ero yinhîrî takî tî on wara xatken̂e Xerusaren pono komo, Akasias takî tî n̂iir̂atken̂e tkayaritomon komo me hara noro yîîm pen retawno me. Xeoraw pen mumutho komo mahtîkîtho tî mîk xakn̂e Akasias. Anarînhîrî komo tî etîmtora xatken̂e, Xeoraw pen mumutho pen komo. Waihketken̂e tî waapa komo, Arabia pono komo yakro mohxapu kom ha. Ero ke Akasias takî tî xakn̂e kayaritomo me.

2 22 cimn̂ipu tî xakn̂e Akasias yewrutoponho kayaritomo me ciir̂ataw yîwya so. Cewn̂e cimn̂ipu makî tî xakn̂e kayaritomo me. Xerusaren tî xakn̂e noro yewton. Akasias nocwan yosotî tî xakn̂e Ataria. Onhi pen parînho tî mîk xakn̂e Ataria.

3 Kicicme tî xakn̂e Akasias. Akabe yepamtho yehtopo yaw roro rma tî xakn̂e kica. Ero wa tî xakn̂e tînocwan poyero. Kicicme ehtopo poko tî tîmrerî panatanmekyakn̂e kica.

4 Ero ke kicicme tî Akasias yehtopo n̂een̂akn̂e Kporin komo. Akabe pen yepamtho wara rma tî xakn̂e. Akasias yîîm pen waipuche yumumuthîrî panatanmekn̂e me takî tî xatken̂e Akabe pen yepamtho okwe. N̂examro poyero rma tî twaihkaxmu me tak xakn̂e Akasias okwe.

5 N̂examro mtapotarî tî n̂ewehcakn̂e Akasias Akabe mumutho yakro tîtotome, Xoraw yakro, Ixaw Yana kayaritomon yakro ha. Asaew waparî me tî cekn̂e Xoraw Hamoce Xireace pona, Siriu kayaritomon waparî me ha. Iina cetaw Akasias marha tî cekn̂e noro yakro. Xoraw penî tko tî wetken̂e Siriu komo oko.

6 Ero ke Xiserew pona takî tî n̂etîramekn̂e noro. Iina tî cekn̂e amotoso ha ka, twotoponhîrî yecihnoso. Iito exitaw Xisirew po Akasiasî takî tî cekn̂e enso, Xuta komo kayaritomon, Xeoraw pen mumutho ha. Okohme Xoraw yehtopo tî n̂encekn̂e. Ero ke tî enso cekn̂e.

7 Kaanî rma tko tî Akasias naar̂akn̂e iina Xoraw yenso ero yimaw. Ero wa tî noro pen waihkapekn̂e Kaanî rma. Xew yukurunkaxi cma tî re cekn̂e Xoraw, Ninsi pen mumutho yukurunkax ha. Noro yakro tî cekn̂e Akasias Xew yukurunkaxi. Kporin komo nîhkapetho tko tî mîk xakn̂e Xeu, Akabe pen yepamtho komo waihkan̂e me nîhkapekn̂e.

8 On wara tî xakn̂e Xeu, Akabe pen yepamtho waihketaw n̂examro yakro rma tî n̂een̂akn̂e Xuta yepamtho kom hara, Akasias pen yaknonho mumutho komo. Antomano riin̂e komo tî mîkyam xatken̂e, Akasias maywen komo rma. Noro yipu komo yenîche Xeu ya n̂examro pen meero takî tî waihkekn̂e noro.

9 Ero yinhîrî Akasias tî n̂epor̂atken̂e Xeu maywen komo. Noro takî tî n̂een̂atken̂e Samaria po. Ceseyamso tî xakn̂e iito. Noro tî nahsîyatken̂e, naar̂atken̂e marha Xeu yaka waihkapotome tak noro ya. Ero ke takî tî noro pen waihketken̂e. Nahruyatken̂e takî tî okoputhîrî on wara karî ke so, Xeosapa pen mumutho mîk xakn̂e. Kporin komo ponarono xa tî mîk xakn̂e yîîm pen. Ero ke yumumuthîrî yokoputho tahrupore nasî, ketken̂e tî. Ero yinhîrî Akasias pen yepamtho exihra thakwa tî xakn̂e okwe kayaritomo me ciisom hara.

10 Ero yinhîrî takî tî on wara xakn̂e Ataria, Akasias pen nocwanînho. Tîmrethîrî pen waihtoponho yentache ahnoro Xuta komo kayaritomon me ciisom komo takî tî waihkekn̂e okwe.

11 On wara tko tî xakn̂e Xeosabeace, kayaritomo pen yemsîtho, Xoas ciki tî nahsîyakn̂e, Akasias pen mumutho ciki. Anarî pen komo waihketaw noro ciki tî naar̂akn̂e en̂epa me twaihkaxmu komo yai. N̂eyamyakn̂e takî tî amtakpo yaka, tîwîntopo yaka. Noro yenîn̂e ciki tî xakn̂e wooxam, rikomo yenîn̂e ro. Noro meero tî n̂eyamyakn̂e iina. Ero wa tî n̂iir̂akn̂e Xeosabeace, rikomo n̂eyamyakn̂e noro ciki waihkara ehtome Ataria. Kayaritomo pen yemsîtho mîk xakn̂e, Xeoraw pen yemsîtho. Xoiata pici tî mîk xakn̂e Xeosabeace, Kaan yaka tîtosom pic ha. Akasias pen yepekanho marha tî mîk xakn̂e. Noro yipu mîk xakn̂e Xeosabeace.

12 Taa, iito rma tî xakn̂e Xoas cik Kaan mîn yaw ceyamso n̂examro yakro. 6 cimn̂ipu tî xakn̂e iito. Xuta komo kayaritomon me tî xakn̂e Ataria ero wicakî pahkînon. Ero wa tî xakn̂e.