Ero yinhîrî takî tî nîwînîkyakn̂e Xeosapa pen tporin pen komo yakro. Tporin pen yocho yawxaka rma tî okoputhîrî nahruyatken̂e Tapi pen Yewtontho pona. Ero yinhîrî yumumuthîrî takî tî xakn̂e kayaritomo me tîîm pen retawno me hara. Xeoraw tî xakn̂e yumumuthîrî yosotî.

2 Noro yakno komo tî xatken̂e yaake Xeosapa pen mumutho kom ha. Asarias, Xeiew, Sakarias, Asarias, Mikaew, Sepacias, ero wa tî xakn̂e akno komo yosotî. Ero wa tî xatken̂e Xeosapa pen mumutho komo, Ixaw Yana komo kayaritomonho pen mumutho komo yosotî.

3 N̂examro rma re tî n̂emyawnomekn̂e yîîm pen. Prata, ooru, ahce na cepethîkem nîmyakn̂e yîwya so mer̂pono pîn. Ewto mko marha tî nîmyakn̂e yîwya so, sowtatu ke tukuruyemu mko rma. Xeoraw reha tî n̂iir̂akn̂e kayaritomo me poturu komo me exirî ke.

4 Ero yinhîrî takî tî kayaritomo me xa takî tî noro nîhtînoyatken̂e maywen komo. Ero yimaw takî tî on wara xakn̂e Xeoraw, ahnoro taknonhîrî pen komo tî waihkekn̂e okwe kacipara imo ke. Anarî komo marha tî waihkekn̂e Ixaw Yana pen komo, antomano rin̂e pen komo.

5 32 cimn̂ipu tî xakn̂e Xeoraw yewrutoponho kayaritomo me ecir̂ataw. 8 cimn̂ipu makî tî xakn̂e kayaritomo me ehtoponhîrî. Xerusaren tî xakn̂e noro yewton.

6 Ixaw Yana komo kayaritomon komo yehtoponho yaw roro rma tî xakn̂e kica. Akabe pen yepamtho wara xa marha tî xakn̂e kica Akabe pen yemsîtho exirî ke noro pici me. Ero ke kicicme tî Xeoraw yehtopo n̂een̂akn̂e Kporin komo.

7 Wara rma Tapi pen yepamtho waihkara tî xakn̂e Kporin komo. Tapi pen yakro tîmtapotachonhîrî ponaro rma tî xakn̂e. Aweyuru komo eihkara wasî, awepamthîrî weyuru marha eihkatîkara wasî, pîra ro makî, kekn̂e tî yîwya, Tapi pen ya. Ero wa kachonho ponaro rma tî xakn̂e Kporin komo.

8 Kayaritomo me noro exitaw Eton pono komo takî tî n̂etowyatken̂e noro maywen me ehxapunhîrî komo. Tkayaritomonî ro komo takî tî n̂iir̂atken̂e hara.

9 Ero ke n̂examro waparî me takî tî cekn̂e Xeoraw. Sowtatu yantoman̂e komo tî naar̂akn̂e, tîtararan marha tî naar̂akn̂e yaake. Eton pono komo pahnoke exitaw so n̂examro takî tî mokyatken̂e, Xeoraw pen komo tî wamcetken̂e okwe, yîtararan yaan̂e komo pen marha. Kosope rma tko tî Xeoraw komo n̂etar̂metken̂e hara Eton pono komo yakro, twamton̂enhîrî komo yakro rma.

10 Wara rma tî n̂etowyatken̂e Eton pono komo. Xuta komo maywen mera tak naxe oroto rma. Ero yimaw marha tî Ribna pono komo n̂etowyatken̂e hara okwe Xeoraw maywen me ehxapunhîrî komo. Ero wa tî noro maywenînho komo tî n̂etowyatken̂e Kporin komo pona enîhra exirî ke so tak, ponaro tporin pen komo pona enîhra exirî ke so ha.

11 On wara marha tî xakn̂e Xeoraw, îh pona so tî nakîhtopekn̂e anarî ro komo ya tîmsom yakn̂itopo mko. Ero warai mko tî nakîhtopekn̂e Xuta rowon po kica. Cipici yairono me so marha ti xatken̂e Xerusarem pono komo noro yanme kica. Anato ro mak tak nîhtînoyatken̂e Xuta komo noro yanme okwe.

12 Ero yinhîrî Erias karitan takî tî n̂ekyatken̂e Xeoraw yaka. Kweronoman̂e mîk xakn̂e Erias. On wara tî kekn̂e noro tkaritan yaka, Xeoraw amoro, on wara kesî Kporin komo awya, ponaro xakn̂e Tapi pen, aporin pen, Noro kes awya on wara, mesemetanmekyasî amn̂e okwe kicicme awexirî ke. Aamo pen yehtoponho yaw roro exihra ro mak masî kica Xeosapa pen yehtoponho yaw roro exihra. Asa pen yehtoponho yaw roro exihra marha mas okwe, Xuta yepamtho komo kayaritomonînho yehtoponho yaw roro exihra.

13 Ixaw Yana kayaritomon komo yehtopo yaw roro mak reha masî kica. Xuta komo miir̂akn̂e cipici yairono me so kica. Xerusaren pono komo marha ero warai me miir̂akn̂e kica. Akabe pen yepamtho yehtoponho yaw roro rma mas okwe. Awaknonhîrî pen komo marha tî mîwaikai okwe, aamo pen mumutho pen kom ha. Kir̂wan̂he tko xatken̂e n̂examro pen, awarara reha.

14 Ero ke tak awîrîmetîkexe so ro mak Kporin komo. Amxîkrî pen komo nîwîrîmesî, apici pen komo marha. Ahnoro awemyawnonhîrî nîwîrîmetîkesî ro mak okwe.

15 Mamotoyas tak amoro pen okwe. Cerewrem ro mak awahsîyasî aropotarî yeper̂an oko. Mîmasucetîkesî ro mak okwe enmar̂atîxera, awexkiririnthîrî cepatakaxi ro oko, kacho tî n̂ekyatken̂e Erias karitan.

16 On wara takî tî xakn̂e Kporin komo Xeoraw poko, mîk hak rowon pono komo tî n̂iir̂akn̂e noro xatî pîn me so. Piristew komo, Arabia pono komo, ero warai komo tî n̂iir̂akn̂e yiixatî pîn me so. Eciopia mîtwono komo mîkyam xatken̂e Arabia pono komo.

17 Waapa me takî tî n̂examro mokyatken̂e Xuta pona. Kayaritomo yemyawnonho tî naar̂atken̂e ahnoro, noro mîn yawnonho. Kayaritomo mumuru komo marha tî naar̂atken̂e, kayaritomo pici komo marha tî. Xeoraw mumuru komo exihra takî tî xatken̂e yîhyaw. Cewn̂e makî tî xakn̂e yîhyaw, Xoakas mak, mahtîkîthîrî.

18 Ceperai takî tî Kporin komo niirakn̂e Xeoraw pen. Wexkiririn yeper̂an tî xakn̂e oko, ecpînî ro makî tî okwe.

19 Pahkî exiche takî tî, 2 cimn̂ipu exiche n̂epatakekn̂e takî tî noro wexkiririnthîrî okwe. Ero wa tî xakn̂e eper̂a yanme okwe. N̂erewakn̂e ro makî tî eperan oko. Ero wa xakn̂e twaihtopo pona roro okwe. Noro pen waipuche kotoporem yakn̂ipîra tî xatken̂e maywenînhîrî komo. Xeoraw porin pen komo waipuche reha tî kotoporem nakn̂iyatken̂e. Pîra reha tî xatken̂e Xeoraw waipuche okwe.

20 32 cimn̂ipu tî xakn̂e noro pen yewrutoponho kayaritomo me ciir̂ataw yîwya so. 8 cimn̂ipu makî tî xakn̂e kayaritomo me. Noro pen waipuche, Okwe okwe, kahra ro makî tî xatken̂e Xuta yepamtho komo. Noro yokoputho tî nahruyatken̂e Tapi pen Yewtontho pona rma ha re. Kayaritomo komo yahrutopo ro yaka tko tî ahrura xatken̂e. Ero wa tî xakn̂e Xeoraw pen.