Ero yinhîrî takî tî on wara xatken̂e Moabita komo, Xeosapa waparî me tî mokyatken̂e okwe. Amonita komo yakro rma tî mokyatken̂e, anarî yana komo yakro marha.

2 Ero ke ekaiporen̂e komo takî tî mokyatken̂e Xeosapa yaka. On wara tî ketken̂e yîwya, Awaparî komo men mokyaxe mer̂pono pînî ro mak kopi. N̂ikitho imo yeco pono komo mokyaxe, Siriu komo marha. Asason-Tama po tak naxe kopi, ketken̂e tî. En-Xeti rma mîn Asason-Tama.

3 Ero ke n̂eraswakn̂e takî tî Xeosapa. Kporin komo takî tî n̂epor̂akn̂e. On wara marha tî kekn̂e Xuta komo ya, Oroto ka eseresmara cehcerî, kekn̂e tî yîwya so.

4 Ero ke takî tî iina mokyatken̂e Xuta komo Xerusaren pona mer̂pono pîn. Kporin komo yakro yîmtapotaxi tî mokyatken̂e tukurunpecho komo poko. Ahnoro tî mokyatken̂e Xuta yewton pono komo.

5 On wara tî xakn̂e Xeosapa ero yimaw, Kporin komo mîn yaw tî xakn̂e. Yîhroron po xakn̂e yaxan po. Iito marha tî xatken̂e Xuta komo, Xerusaren pono komo marha. N̂examro yeepatai tî n̂ecececekn̂e Xeosapa.

6 Kporin komo yakro takî tî nîmtapowakn̂e Xeosapa. On wara tî kekn̂e yîwya, Apa kah yawno, on wara wîîkes awya, ponaro amna porin pen komo yehtopo xa Amoro. Ponaro kah yawno komo yehtopo marha Amoro. Mîk hak rowon pono komo kayaritomon marha Amoro. Karitî xa mîn awamorî. Ayopono exihra ro mak nasî.

7 Kaan xa Amoro, ponaro amna yehtopo. Pahxa tantononhîrî komo men̂epepekn̂e ayanan komo ya, Ixaw Yana komo ya. On tak mîmyakn̂e Abraaw pen yepamtho ya, en̂epexapunhîrî komo yekenho. Eroromerono me mîmyakn̂e Abraaw pen yepamtho komo ya. Awakrono ro tî mîk xakn̂e Abraaw pen, Noro yepamtho komo ya mîmyakn̂e, amna ya ha.

8 Ero ke on po takî tî xatken̂e amna porin pen komo. On pona marha tî amîn n̂iir̂atken̂e awosotî yekenî ro me.

9 On wara tî ketken̂e awya on amîn ciriche, Apa kah yawno, amna tak na n̂esemetanmekya amn̂e. Amna waparî komo na mokyatu, eper̂a na amna nahsîya anarimaw, rooma poko na nai amna anarimaw, ero wa amna exitaw, amna mokyas oona amîn mîtkoso, awepatai ececetoso. Awosotî yeken on amîn Apa, Ero ke tan xa amna nîmtapowasî awakro cesemetanmesomu rma. Cerewre amna nîmtapowasî awakro. Ero wa amna yîmtapowataw awakro amna mtapotarî rma mencesî. Amna marha makronomesî esemetanmekîra tak amna yehtome, ketken̂e amna porin pen komo awya.

10 Oroto takî tî mokyatu Amonita komo, Moabita komo, Sei Yîpîn pono komo marha, ero yipu komo tî mokyatu amna waparî me okwe. On wara mîîkekn̂e pahxa amna porin pen komo ya n̂examro porin pen komo poko, N̂examro n̂ehcowpe, waihkara ehcoko, mîîkekn̂e. Ero wa mîîkekn̂e amna porin pen komo ya Exitu poi mokyataw so. Ero ke n̂examro mak mamrikyatken̂e amna porin pen komo, waihkara ro makî tî xatken̂e.

11 Wara rma n̂examro rma tak mokyaxe amna waparî me okwe. Arowon poi amna yen̂epe xe tak naxe, amna ya anmîthîrî poi rma okwe.

12 Apa, ponaro amna yehtopo xa Amoro. N̂examro cma re mepemesî waihtopo komo ke. Kar̂pen mak amna okwe. Mer̂pono pîn thakwa mîkyam amna waparî me tmohsom komo. Ahce wa na amna nai okwe. Apona mak amna n̂een̂asî, kekn̂e tî. Ero wa tî kekn̂e Xeosapa Kporin komo ya.

13 Iito rma tî xatken̂e Xuta komo ahnoro, yipici komo marha cenawnoyem komo meero, yîmxîkrî komo marha. Kporin komo yeepatai tî n̂ecececetken̂e.

14 Ero yinhîrî Kporin komo yekatî takî tî mokyakn̂e Xaasiew ropotaka, Sakarias mumuru ropotaka ha. Benaia tî xakn̂e Sakariasî yîîm, Xeiew tî xakn̂e Benaia yîîm hara, Matan̂ias pen tî xakn̂e Xeiew yîîm hara. Repi tribun tî mîkyam xatken̂e, Asape yepamtho ha. Esenmexapu komo chew tî xakn̂e Xaasiew.

15 On wara tî kekn̂e noro yîwya so, Ai Xuta yepamtho komo amyamro, Xerusaren pono komo marha amyamro, kayaritomo amoro Xeosapa, on wara kesî Kporin komo awya so, Erasîra ro makî tî ehcoko n̂examro pona, ahwokara marha ehcoko. Mer̂pono pînî rma re mîkyam. Anar̂marî pîn komo tko mîkyam. Kaan nar̂marî mak mîkyam n̂examro.

16 Pahxaxa etocoko n̂examro wece. Sis yesamarî yaw etocoko îîpî yawnutopo yaw. Aporî pîtho mehxa tak n̂examro meen̂axe, Xeruew Yaxawan xehxa.

17 Etar̂mara rma tko maxe n̂examro yakro. Epanatocoko rma re. Iito mak ececetocoko. Encoko mak Kporin komo ya akurunperî komo. Awakro so nasî Noro ya akurunperî komo. Erasîra ro mak ehcoko, amyamro Xuta komo, Xerusaren pono komo marha. Ahwokara marha ehcoko. Pahxaxa n̂examro waparî wara rma etocoko. Awakro so rma wa nasî Kporin komo, kekn̂e tî. Ero wa tî kekn̂e Xaasiew yîwya so.

18 Ero wa kacho yentache n̂esewnapekn̂e takî tî Xeosapa. Ero wa xa marha tî n̂esewnapetken̂e ahnoro Xuta yepamtho komo, Xerusaren pono komo marha. Amna Porin xa Amoro, ketken̂e takî tî Kporin komo ya.

19 Ero yinhîrî takî tî piiri nawomyatken̂e hara Repita komo. Koace yepamtho komo tî mîkyam xatken̂e, Koore pen yepamtho yakro. Kporin komo poko tahwotachome so wa nawomyatken̂e. Kar̂pe so tî nîmtapowatken̂e kir̂wan̂he Noro yehtopo poko.

20 Ero yinhîrî, enmarî yakro ro takî tî paketken̂e Xuta komo. Tekoa Yaxawan pona tî cetken̂e. N̂examro cetaw on wara tî kekn̂e Xeosapa yîwya so, Ai Xuta komo, Xerusaren pono komo, awakro so ka kîmtapowasî. Ero ke omtapotarî ka entacoko. Kporin komo pona xa men encoko, ponaro awehtopo komo pona ha. Noro pona een̂ataw awya so ar̂man me maxe okre. Noro yanme aweronoman̂e komo mtapotarî marha ewetîcoko ehn̂an me tak awehtome so, kekn̂e tî. Ero wa tî kekn̂e Xeosapa yîwya so.

21 Ero yimaw marha tî Xuta komo yakro tî n̂esen̂cekn̂e Xeosapa wano yaan̂e komo poko. Ero yinhîrî Kporin komo poko cewanomaxmu komo tî n̂etahcatken̂e. N̂examro takî tî nahwowatken̂e kir̂wanî ro me Kaan yehtopo poko. Poturme tî cetken̂e. Sowtatu komo tî cetken̂e n̂examro wenari. On wara tî ketken̂e cewanomaxmu komo, Kir̂wan̂he Kporin komo nai ham okre. Eroromero kakronoman̂e me nas okre, ketken̂e tî.

22 Ero wa ewanometaw so kir̂wan̂he Kaan yehtopo poko, yihciyataw rma on wara tî xakn̂e Kporin komo, waapa me mohxapu komo waparî komo tî n̂iir̂akn̂e eseyamxapu kom hara. N̂examro takî tî xatken̂e takrono komo waparî me rma. Amonita pen komo waparî me, Moabita pen komo waparî me, Sei Yîpîn pono komo waparî me, ero warai me tak mokyatken̂e. Xuta komo waparî me mohxapu komo tî nar̂metken̂e eseyamxapunhîrî komo.

23 Sei Yîpîn pono pen komo waparî me takî tî xatken̂e Amonita kom hara, Moabita komo marha. Sei Yîpîn pono pen komo tî waihketîketken̂e exihra cehso ro. N̂examro pen waihkatîkache n̂etwaiketken̂e takî tî n̂examro re rma okyo. Ero wa tî n̂etwaiketken̂e Amonita pen komo, Moabita pen komo, n̂examro re rma.

24 Ero yinhîrî takî tî mokyatken̂e Xuta yepamtho komo axawa yemyatkoso. En̂exa takî tî etar̂maxapunhîrî komo n̂een̂atken̂e. Okputhîrî komo makî tî n̂een̂atken̂e, puknopukno wa so makî tî xatken̂e ahnoro okwe. Cewn̂e n̂hema etîmtoxapu exihra ro makî tî xakn̂e.

25 Ero yinhîrî takî tî Xeosapa komo mokyatken̂e n̂examro pen yemyawnonho yaaso. Mer̂pora tî n̂een̂atken̂e cepethîkem okoputhîrî komo yaw. Toopuci enporixapu mko tî n̂een̂atken̂e mer̂pora ro makî. Ero ke takî tî naar̂atken̂e. Arîrî yopo ro makî tî xakn̂e n̂examro pen yemyawnonho. 3 ro tî n̂enmayatken̂e ero yarîrî poko mer̂pora exirî ke.

26 4-nhîrî kaamo po takî tî n̂esenmekyatken̂e xa hara tî Xuta komo. Beraka Woskaran pona tî n̂esenmekyatken̂e. Iito takî tî nahwowatken̂e Kporin komo poko. Ero wa ahwotarî komo ke tî on wara n̂esosocekn̂e iitono woskara, Beraka Woskaran me tî n̂esosocekn̂e. Ero wara rma tî n̂etahcaxe oroto.

27 Ero yinhîrî takî tî n̂etîrametken̂e Xuta komo, Xerusaren pono kom ha. Xerusaren pona cetken̂e hara. Cetaw so poturme so tî cekn̂e Xeosapa. Tahwore tî cetken̂e. Kporin komo rma tî n̂examro nahworekn̂e yiixatî pîn komo yar̂marî ke.

28 Xerusaren pona cepatakache so takî tî Kporin komo mîn yaka tî cetken̂e. Raatî tî nîyorketken̂e tîcetaw so, pioraw warai, ahpa, tuu kacho, ero warai komo tî n̂eceyatken̂e tîtorî me so iina. Ero wa tî xatken̂e Xuta yepamtho komo.

29 Ero yimaw takî tî Ixaw Yana xatî pîn pen komo yar̂machonho n̂encetken̂e Kanan mîtwono komo mîk hak rowon pono komo. Kporin komo ya ar̂machonhîrî tî n̂encetken̂e. Ero ke Kaan pona takî tî n̂eraswatken̂e.

30 Ero ke Xeosapa yakro cetar̂maxmu komo mokuhra ro makî takî tî xatken̂e. Kaan yanme rma tî tîtken̂e xatken̂e.

31 Ero wa tî xakn̂e Xeosapa, Xuta yepamtho komo kayaritomon tî mîk xakn̂e. 35 cimn̂ipu tî xakn̂e noro yewrutoponho kayaritomo me ecir̂ataw. 25 cimn̂ipu tî xakn̂e kayaritomo me ehtoponhîrî. Xerusaren tî xakn̂e noro yewton. Asuba tî xakn̂e noro nocwan yosotî. Siri pen yemsîtho tî mîk xakn̂e.

32 Tîîmînhîrî pen yehtoponho yaw roro rma tî xakn̂e Xeosapa, Asa pen yehtoponho yaw roro. Anarî me cehtopo pona etowra ro makî tî xakn̂e. Takîhso makî tî xakn̂e. Ero ke tî kir̂wan̂he noro yehtopo n̂een̂akn̂e kporin komo.

33 Iito rma tko tî xakn̂e îh pono mko, anarî ro komo ya tîmsom yakn̂itopo mko, matîwîn pono mko. On wara tî kahra xatken̂e Xuta komo okwe, Kaan ponaro xa oyexi xe xa wasî, ponaro kporin pen komo yehtopo ponaro ha, kahra rma tî xatken̂e okwe.

34 Miya rma nai Xeosapa yehtoponho. Ahnoro rma nasî tmewreso karita yaw, Xeu karitan yaw, Anani mumuru karitan yaw, ha. Anarî karita yaw marha nasî tmewreso, Ixaw Yana Kayaritomon Komo Yehtoponho, kacho yaw ha.

35 Ero yinhîrî on wara takî tî xakn̂e Xeosapa, Xuta komo kayaritomon, Akasias yakro tî nîmtapowakn̂e cetakronomacho komo poko. Ixaw Yana komo kayaritomon tî mîk xakn̂e Akasias. Kicicitho pokono ro makî tî mîk xakn̂e kica.

36 On wara tî ketken̂e n̂examro re, Kanawa imo takîhtopocerî Tahsisi pona cen̂epesom, ketken̂e tî. Ero ke kanawa imo tî nakîhtopetken̂e Esion-Xebe po.

37 Ero yinhîrî tko tî Eriese mokyakn̂e Xeosapa yaka. Totapa mumuru tî mîk xakn̂e, Maresa pono mumuru. Kanawa poko ehn̂acho komo yekatîmso tî mokyakn̂e yîhyaka, Xeosapa yaka. On wara tî kekn̂e yîwya, Kicicme nasî Akasias yakrono me awehtopo. Noro makronomekn̂e kanawa yakîhtorî poko, Tahsisi pona tîtosom yakîhtorî poko. Kicicme awexirî ke tko anakîtothîrî mko takî tî nîwîrîme Kporin komo, kekn̂e tî yîwya. Ero yinhîrî n̂ewakrokekn̂e takî tî kanawa imo penî mko okwe. Ero ke Tahsisi pona tohra thakwa tî xakn̂e okwe. Ero wa tî xakn̂e.