Ero yinhîrî takî tî on wara xakn̂e Xeosapa, Xuta yepamtho kayaritomon, n̂etîramekn̂e tîmîn yaka hara, Xerusaren pono yaka. Waipîra tî xakn̂e noro reha.

2 Iina cetaw noro yakro esepotpona tî cetken̂e Xeu, Anani mumuru ha. Kaan n̂enporî yenîn̂e ro mîk xakn̂e Anani. On wara tî kekn̂e noro Xeosapa ya, Kir̂wan̂he ma re nai kicicitho yakronomacho awya? Kir̂wan̂he ma re nai Kporin komo xatî pîn xatî me awehtopo? Noro yipu yakronomarî ke awya Kporin komo tak nîrwonasî apoko okwe.

3 Kir̂wan̂he rma tko tî awehtopo n̂een̂a Kporin komo. Asera kuknonî mko mamapekn̂e Xuta yepamtho n̂iritho weewe ha. Aropotarî marha miir̂e Kporin komo yepon̂e me okre, kekn̂e tî. Ero wa tî kekn̂e Xeu Xeosapa ya.

4 Ero yinhîrî Xerusaren po tî xakn̂e Xeosapa. En̂exa takî tî cekn̂e xa hara Xuta komo chere. Behseba pona rorono komo chere tî cekn̂e, îîpî pona rorono komo chere marha tî cekn̂e Eprain yepamtho rowon pono komo chere. Iitono komo tî panatanmekyakn̂e Kporin komo ponaro ehtome so xa hara. Ero ke noro yanme takî tî xatken̂e Kaan ponaro hara, ponaro tporin pen komo yehtopo ponaro.

5 En̂ekano rin̂e komo marha tî n̂iir̂akn̂e Xeosapa. Ewto pona so tî n̂examro n̂ekenmekn̂e, sowtatu yeken me cehsom pona so ha.

6 On wara tî kekn̂e en̂ekano rin̂e komo ya, Takîhso men en̂ekano ciicoko. Tooto yanme mak en̂ekano rin̂e pîn amyamro, Kporin komo yanme mak en̂ekano rin̂e amyamro. Noro rma nasî awakro so en̂ekano riyataw awya so.

7 Ero ke Kporin komo poko men twerî ehcoko. Yaaro men tan wîîkes awya so. Kicicitho ken̂ehra ro mak wa nasî Noro, ponaro kehtopo kom ha. Ehcakumyaka kenîn̂e pînî ro mak Mîkî, epethîrî yahsîn̂e pîn marha Mîkî kicicme cehsom nîmîtho esen̂ekapora cehtamci. Noro yipu men Mîk Kaan, kekn̂e tî. Ero wa tî kekn̂e Xeosapa en̂ekano rin̂e komo ya.

8 Xerusaren pona cetîramache iitono komo marha tî n̂iir̂akn̂e. Kporin komo yanme en̂ekano rin̂e me hara, ceseisom komo yen̂ekan̂e me marha. Repita komo poyino, tîmsom pokono komo marha, Ixaw Yana yantoman̂e komo marha, poritomo komo marha, ero warai komo tî n̂iir̂akn̂e en̂ekano rin̂e me.

9 On wara tî n̂examro panatanmekyakn̂e Xeosapa, On wara men en̂ekano ciicoko, Kporin komo poko tweeno me, Noro ponaro xa cehsom me. Noro xe mak ehcoko.

10 Ero ke on wara ehcoko, anarimaw so anarî komo na mokyatu ahyaka so awakno komo, anarî ewto pono kom ha. Oyanan pen waihkai mîkro, kan̂e komo na mokyatu. Kaanî mtapotachonho yewetîra xakn̂e noro, kan̂e komo, kayaritomo mtapotacho yewetîra xakn̂e noro, kan̂e komo, ahce wa na kan̂e komo na mokyatu ahyaka so. Mokuche so yîtwermacoko men Kporin komo mtapotachonho yewetîra ehtopo komo poko. Yîtwermara awexitaw so kicicme so rma na natu Kporin komo poko. Ero ke Noro men nîrwona apoko so hara, awakno komo poko marha. Kir̂wan̂he yîtwermetaw awya so apona so cirihra reha nasî Kaan kicicme n̂examro yehtoponho.

11 On wara marha wîîkes awya so, Tan nasî Amarias, Kaan yaka cewomsom. Noro xa awakîrexe so Kporin komo yanme awehtopo komo poko. Tan marha nasî Sebacias, Ismaew mumuru. Xuta komo yenîn̂e ro mîk ha. N̂examro xa awakîrexe so kayaritomo yanme awehtopo komo poko hara. Repita komo marha tanî naxe ahce na yenîn̂e me awakro so. Erasîn me ro mak en̂ekano ciicoko. Takîhsom komo yakronoman̂e Mîk Kporin komo. Ero ke ero wa ehcoko, kekn̂e tî. Ero wa tî kekn̂e Xeosapa en̂ekano rin̂e komo ya.