Taa, on wara tî xakn̂e Xeosapa, mer̂pora tî xakn̂e noro purantan, noro yemyawno marha. Kyopono me cekacaxmu me marha tî xakn̂e. Ero yinhîrî takî tî Akabe yakrono me xakn̂e noro yemsîrî yahsîrî ke tumumuru pici me.

2 Ero ke yaake cimn̂ipu exiche Akabe yenso takî tî cekn̂e Xeosapa Samaria pona. Iito exitaw tî mer̂pora ro mak oper̂a pen waihkapekn̂e Akabe Xeosapa komo yotî me, paaka pen marha tî waihkapekn̂e iyotî komo me. Ero yimaw takî tî Xeosapa yakro nîmtapowakn̂e Akabe Hamoce Xireace pona tîtotopo komo poko. Cewetîsom me tî Akabe mtapotarî n̂encekn̂e Xeosapa.

3 On wara tî kekn̂e noro yîwya, Ai oyakno, oyakro mokuhra mai Hamoce Xireace pono komo yakro etar̂maxi? kekn̂e tî. On wara tî n̂eyukyakn̂e Xeosapa, Cewn̂an wara rma tasî kîw. Amaywen komo warai me rma naxe omaywen kom hara. Ero ke awakro so rma amna mokyasî etar̂maxi, kekn̂e tî.

4 On wara marha tko tî kekn̂e Xeosapa yîwya, Ixaw Yana komo kayaritomon ya, Oroto cma re ka Kporin komo mtapotacho mencesî etar̂maxi kîwtotopo komo pokono, kekn̂e tî.

5 Ero ke on wara takî tî xakn̂e Ixaw Yana kayaritomon, weronomano rin̂e komo tî nan̂ikpekn̂e. 400 tî mîkyam xatken̂e. Yîwya so tî kekn̂e on wara, Ai oyakno komo, on wara wîîkes awya so, Ahce wa nai amna awya so, amna cee Hamoce Xireace pona etar̂maxi? Tohra katî amna nai awya so? kekn̂e tî. On wara tî n̂eyukyatken̂e n̂examro, Etocoko rma, iyopono komo me rma awir̂axe so Kaan, ketken̂e tî.

6 On wara tko tî kekn̂e Xeosapa, Ai oyakno, Kporin komo poko kweronoman̂e exihra nai tan ahyaw so? Noro yipu mtapotarî xa ka centapore nasî, kekn̂e tî.

7 On wara tko tî n̂eyukyakn̂e Akabe, Nasî rma re Kporin komo mtapotarî yekatîmn̂e ro cewn̂e mak. Yiixera ro makî tko was ow ha. Yîmtapotarî yencetaw roro owya oyahworetopo yekatîmra ro mak nas okwe. Oyahwokacho xa matko n̂ekatîmyasî roro okwe. Mikaias tî mîk noro yosotî, Inira mumuru ha, kekn̂e tî. Okwe, ero wa kahra cma re masî, kekn̂e tî Xeosapa Akabe ya.

8 Ero ke takî tî tmaywen nan̂ikyakn̂e Akabe. On wara tî kekn̂e yîwya, Ai, Mikaias an̂ihta yohno, Inira mumuru, kekn̂e tî yîwya.

9 Ero yimaw on wara tî xatken̂e Ixaw Yana komo kayaritomon, Xuta komo kayaritomon marha, kayaritomo yapon po so tî n̂eremetken̂e. Kayaritomo ponon yaw so marha tî xatken̂e. Samaria potaw tî xatken̂e puruma yeperîrî yîpîpîtîkacho po. Iito exitaw so ahnoro weronomano rin̂e komo tî n̂ekatîmyatken̂e yîn̂entarî me so. Ero ke iina n̂eremetken̂e Akabe, Xeosapa yakro.

10 On wara tî xakn̂e anarî, Setekias, Kenaana mumuru, paaka meretîtho warai tî n̂iir̂akn̂e pehu asakî. Ero tî n̂enpekn̂e kayaritomo ya. On wara tî kekn̂e yîwya, Ai apa, on wara kesî Kporin komo awya, On ke rma Siriu komo mîparaxkesî twaihkatîkaxi ro, kesî, kekn̂e tî.

11 Ero wara xa marha tî ketken̂e ahnoro n̂examro weronoman̂e komo. Etoko Hamoce Xireace pona iitono komo yar̂maxi. Kporin komo rma tî iitono pen komo nar̂mape awya, ketken̂e tî.

12 Taa, on wara tî kekn̂e Mikaias yan̂ihso toxapu yîwya, Ai oyakno, on wara wîîkes awya, iito re mak n̂ekatîmyaxe kweronoman̂e komo kayaritomo yahworecho mak. Ero ke ero poko xa marha cma re mekatîmyasî amoro hara. Noro yahworecho marha cma re mekatîmyasî, kekn̂e tî yîwya.

13 On wara tko tî n̂eyukyakn̂e Mikaias, Yaarono xa mîn, Waipîn me nasî Kporin komo, kacho. Ero wa xa marha yaaro wîîkes ow hara, ahce wa na nîîke Kaan owya, ponaro oyehtopo, ero mak wekatîmyasî kayaritomo ya, kekn̂e tî.

14 Taa, kayaritomo yaka takî tî cekn̂e Mikaias. On wara tî kekn̂e kayaritomo yîwya, Ai oyakno, ahce wa nai amna awya, amna cee Hamoce Xireace pona ar̂mano riso, tohra katî amna nai? kekn̂e tî. On wara tî n̂eyukyakn̂e Mikaias, Etocoko rma ar̂mano riso. N̂etar̂mapetu rma iitono pen komo awya so, kekn̂e tî.

15 On wara tko tî kekn̂e kayaritomo yîwya, Kica, emapona roro mexe wîîkes awya, Yaaro mak Kporin komo mtapotarî ekatîmko owya, wîîkes awya. Yaarono mak tan wekatîmyas awya, kasko Kporin komo n̂entarî me rma, wîîkesî mexe awya emapona roro. Ahce kacho yaarono yekatîmra mai hara owya oroto kica? kekn̂e tî yîwya.

16 Ero ke on wara takî tî kekn̂e hara Mikaias, Ixaw Yana komo ahnoro wencow so. Îh pono wara wencow so cetakpaxi mak okwe. Oper̂a wara n̂ehcow, osomnî wara okwe. On wara kekn̂e Kporin komo owya, Moxam yosom exihra ro mak nas okwe. Ero ke tîmîn komo yaka tocowpe hara etar̂mara rma, kekn̂e owya, kekn̂e tî Mikaias.

17 Ero yinhîrî on wara tî kekn̂e Ixaw Yana komo kayaritomon Xeosapa ya, Enko ha ka, yaaro wa wîîka awya, oyahworecho yekatîmra nasî kica, oyahwokacho makî reha n̂ekatîmyasî kica, wîîka awya noro poko, kekn̂e tî.

18 Ero yinhîrî tî on wara marha kekn̂e Mikaias, Kporin komo mtapotarî xa hara wekatîmyas awya so. Ero ke yîmtapotarî rma ka entacoko, Kporin komo wenwo kayaritomo yapon po ceremaxi. Noro panaw so tî n̂ehcow kah yawno komo ahnoro. Kaari n̂ixa n̂ehcow, poowa n̂ixa marha.

19 On wara nîîka Kporin komo yîwya so, Onoke xa nîîce Akabe yaka, Ixaw Yana komo kayaritomon yaka on wara kaxi, Etoko rma Hamoce Xireace pona etarmaxi, kaxi. Ero wa kaxi nîîce iito tak waihtome noro pen, nîîka yîwya so. Ero ke anarmerpa so Kporin komo n̂eyuhcow. On wara wîhtînoyas owî, on wara wîhtînoyas ow hara, kacow yaake.

20 Ero yinhîrî tak anarî tomo Kporin komo yaka. Noro yeepatai tî n̂ececeto. On wara noro nîîka yîwya, Ow xa noro wahworesî iina totopo poko, nîîka. Ai ha, ahce wa xa mîîke yîwya cewetîsom me awentachome? nîîka Kporin komo yîwya.

21 Ekatî me rma kîwcesî, cemarontaxmu me ha tko. N̂examro weronoman̂e komo mtari yîmtapotaxi kîwcesî. Ahnoro noro ya ekatîmn̂e komo mtari kîmtapowasî cemaro me mak, nîîka. Taa, nîîka tak Kporin komo, cewetîsom me noro awence ham iina tîtotopo poko. Ero ke ero wa kaxi etoko, nîîka Kporin komo.

22 Ero ke on wara men wîîkes awya, Cemarontaxmu n̂irî ham Kporin komo aweronoman̂e komo mtaka, ekat ha. Awîrîmacho men wa n̂ekatmo Kporin komo okwe, kekn̂e tî Mikaias.

23 Setekias tko tî cekn̂e noro mîtkoso, Mikaias mîtkoso. Noro pen tî n̂ewkatapekn̂e oko. On wara tî kekn̂e yîwya, Ahto xa tom hara ekatî, Kporin komo n̂en̂epetho, oropotawnonho awakro yîmtapotax hara? kekn̂e tî. Ero wa tî kekn̂e Setekias kica.

24 On wara tko tî n̂eyukyakn̂e Mikaias, Yaarono me xa tak omtapotarî mîhtînoyas amn̂e. Mîîmo yatumnakan yaka xa mîîcesî amn̂e eseyamso, amtakpo yaka, ero yimaw xa mîhtînoyasî, kekn̂e tî. Ero wa tî kekn̂e Mikaias yîwya.

25 Ero yinhîrî on wara tî kekn̂e Akabe tmaywen ya, Moso Mikaias arko kr̂a Amon yaka, ewto yenîn̂e yaka, Xoas yaka marha arko, kayaritomo mumuru yaka.

26 On wara kasko yîwya so, Moso kr̂a men ahrucoko kahrutopo yaka. Puruma ke mak iyurmakî wahra mak, tuuna ke marha wokpakî wahra xa marha. Ero wa noro cirko tahwore omohtopo pona roro hara, kekn̂e tî yîwya tmaywen ya.

27 On wara tko tî kekn̂e Mikaias, Tahwore amokyataw hara etar̂maxapunhîrî Kporin komo mtapotacho pîn mak mîn wekatmo awya. Ero wa men yîhtînocoko omtapotarî amn̂e amyamro oyentan̂e komo, kekn̂e tî iitono komo ya. Ero wa tî kekn̂e Mikaias.

28 Ero yinhîrî takî tî cetken̂e Ixaw Yana komo kayaritomon, Xeosapa yakro, Xuta yepamtho komo kayaritomon yakro ha. Hamoce Xireace pona tî cetken̂e.

29 Iito exitaw so on wara tî kekn̂e Ixaw Yana komo kayaritomon Xeosapa ya, Anarî men wamruyasî poono ero yaw owtotome etar̂maxi. Ero wa kîwces owî reha. Amoro reha etoko kayaritomo ponon yaw rma, kekn̂e tî. Ero ke anarî yaw tî cekn̂e Ixaw Yana komo kayaritomon. N̂etar̂metken̂e takî tî Ixaw Yana komo Siriu komo yakro.

30 On wara tî kekn̂e Siriu komo kayaritomon tarara yaan̂e komo ya, Antomano rin̂e pîn komo yakro etar̂mara ro mak ehcoko, antomano rin̂e komo yakro marha etar̂mara ehcoko. Ixaw Yana kayaritomon yakro mak etar̂macoko, kekn̂e tî yîwya so.

31 Ero yinhîrî on wara tî xatken̂e tarara yaan̂e komo, Xeosapa tî n̂een̂atken̂e. Ero ke on wara tî ketken̂e, Noro ha, Ixaw Yana komo kayaritomon, ketken̂e tî noro poko. Ero ke noro pen takî tî wamcetken̂e okwe waihkachome. N̂emtarakekn̂e tko tî Xeosapa. Ero ke noro takî tî nakronomekn̂e Kporin komo. Noro waparî komo ropotarî tî naknamekn̂e Kaan yîhyai totohme hara.

32 Noro pîn ham, ketken̂e takî tî tarara yaan̂e komo, Ixaw Yana kayaritomon pînî rma mîkro ham, ketken̂e makî tî. Ero ke yîhyai tî cetken̂e hara. Ero wa tî cetken̂e.

33 Ero yimaw iito tî xakn̂e anarî hara sowtatu, Siriu. Noro tî n̂ehsakn̂e tîkrapan, Noro xa wîtwesî, kahra ro makî tî nar̂mekn̂e. Cak krow, Ixaw Yana komo kayaritomon penî tko tî wekn̂e oko. Kuripara ke tponoyemu rma re tî mîk xakn̂e. Ero yîpîmîsîtotopo yaw xa tî wekn̂e oko. Ero ke tî on wara kekn̂e tîtararan yaan̂e ya, Tarara ewkor̂mak hara, yaw xa marha kaika hara cetar̂maxu komo chei. Owocow okwe, kekn̂e tî.

34 Miya xe xa takî tî n̂etar̂metken̂e Ixaw Yana komo Siriu komo yakro kokon̂i cehso ro. Iito rma tî xakn̂e Ixaw Yana komo kayaritomon tarara yaw. Ahce na ke tî n̂ecececekn̂e Siriu komo wece cewru. Kokmamyataw takî tî waihyakn̂e okwe. Ero wa tî Akabe pen waihyakn̂e okwe.