Ero yinhîrî Xeosapa takî tî xakn̂e kayaritomo me tîîmînhîrî pen retawno me. Ero ke takî tî on wara xakn̂e, tukurunpen̂e komo n̂iir̂atken̂e miya so Ixaw Yana komo sowtatun komo wahkoton̂e me, waapa me mokuchen me ha.

2 Sowtatu komo tî n̂ekenmekn̂e ahnoro Xuta yewtonî mko pona so, twacayemu pona so. Xuta komo chere ro tî sowtatu komo n̂ekenmekn̂e Eprain komo yewton pona so meero, tîîmînhîrî pen nahsîtho pona so.

3 Xeosapa tî nakronomekn̂e Kporin komo tporin pen yehtoponho yaw roro exirî ke, Tapi pen xakn̂e pahxa ero wa ehtoponhîrî yaw roro xakn̂e Xeosapa. Baaw komo mtapotarî yentaxi tohra ro makî tî xakn̂e.

4 Kaanî mtapotarî yenta xe makî tî xakn̂e, ponaro tîîmînhîrî pen yehtoponho mtapotarî ha. Yîwya kpanatanmetopo tî n̂ewehcakn̂e roro Ixaw Yana komo warahra.

5 Ero wa exirî ke tî cewetîsom me xa tak Xeosapa n̂iir̂akn̂e Kporin komo. Mîn hakî tî nîmyatken̂e Xuta yepamtho komo Xeosapa ya. Mer̂pora ro mak takî tî xakn̂e noro yemyawno. Kyopono me cekacaxmu me marha tî xakn̂e.

6 Tahwore tî xakn̂e noro Kporin komo yewetîtopo poko. Îh pono mko tî n̂ixkekn̂e, anarî ro komo ya tîmsom yakn̂itopo mko. Asera kuknon ke wakîknoxapu mko marha tî namapekn̂e weewe, Xuta yepamtho komo n̂iritho.

7 On wara marha tî xakn̂e 3 cimn̂ipu exitaw kayaritomo me cehtoponhîrî, antomano rin̂e komo tî n̂en̂epekn̂e Xuta yewton pore ro. Panatanmekno rin̂e me tî n̂en̂epekn̂e. Ben-Aiw, Obacias, Sakarias, Natanaew, Mikaias, ero wa tî n̂en̂epekn̂e panatanmekno rin̂e komo.

8 Repita komo marha tî n̂en̂epekn̂e akro so. Semaias, Netanias, Sebacias, Asaew, Semiramoce, Xonatas, Atonias, Tobias, Tobe-Atonias, ero wara tî en̂epeno n̂iir̂akn̂e Repita komo. Tîmsom pokono komo marha tî n̂en̂epekn̂e akro so. Erisama, Xewraw, ero wara tî n̂en̂epekn̂e.

9 Ero ke Xuta yepamtho komo tî panatanmekyatken̂e n̂examro. Karita tî naar̂atken̂e Kporin komo ya Kpanatanmetopo. Xuta yewtonî mko tî n̂irihtîketken̂e. Ero pono komo tî panatanmekyatken̂e.

10 Ero yimaw on wara tî xatken̂e mîk hak rowon pono komo, Xuta rowon mîtwono komo, n̂eraswatken̂e takî tî Xuta yepamtho komo pona. Kporin komo yanme rma tî ero wa xatken̂e. Ero ke tî Xuta komo waparî me mokuhra xatken̂e.

11 Xeosapa ya tîmsom xa matko tî n̂ekyatken̂e Piristew komo. Prata marha tî n̂ekyatken̂e yîhyaka cepethîrî komo me. Arabia pono komo marha tî nîmyatken̂e tookuthîrî kom hara yîwya. Kahn̂eru tî nîmyatken̂e yîwya, 7.700. Boce marha tî nîmyatken̂e, 7.700 xa marha. Ero wara tî tîmsom nîmyatken̂e anarî yana komo Xeosapa ya.

12 Ero ke yukurumîkno me takî tî n̂ehtîkekn̂e Xeosapa. Sowtatu yewtonî mko tî n̂irpekn̂e Xuta pona twacayemu mko. Cemyawno yewton marha tî n̂irpekn̂e yaake Xuta pona.

13 Mer̂pora tî xakn̂e noro yemyawno Xuta yewton po so. Sowtatu komo tî xatken̂e Xerusaren po, karitî komo xa, erasîn kom ha.

14 On wicakî tî xatken̂e sowtatu komo ero yimaw. Cetîraconkaxi tî xatken̂e n̂examro re. Xuta sowtatun yantoman̂e komo tan wetahcasî, 1.000 komo yantoman̂e kom ha, Acna tî xakn̂e 300.000 komo yantoman̂e me. Karitî komo tî mîkyam xatken̂e noro nantomarî kom ha, erasîn komo.

15 Noro pona tî xakn̂e Xoanan hara, 280.000 tî xatken̂e noro nantomarî kom hara.

16 Noro pona hara tî xakn̂e Amasias, Sikri mumuru. Awanton me mak oyexi xe wasî, kekn̂e tî noro Kporin komo ya. Tanme ro makî tî ero wa kekn̂e. 200.000 tî xatken̂e noro nantomarî kom hara. Karitî komo marha tî mîkyam xatken̂e, erasîn kom ha.

17 On wara tî xatken̂e Benxamin yepamtho yantoman̂e kom hara, Eriata tî xakn̂e n̂examro sowtatun komo yantoman̂e me. Karitî marha tî mîk xakn̂e, erasîn. 200.000 tî xatken̂e noro nantomarî komo hara. Tukurui so tî xatken̂e noro nantomarî komo, krapa ke cemyarke so. Kecen̂an ke cemyarke so marha tî xatken̂e.

18 Noro pona tî xakn̂e Xosabace hara. 180.000 tî xatken̂e noro nantomarî komo. Tukurui so xa marha tî xatken̂e n̂examro.

19 Kayaritomo maywen komo re tî mîkyam xatken̂e sowtatu komo. Anarî komo xa hara tî xatken̂e sowtatu komo Xuta yepamtho yewtonî mko po, sowtatu mîn ken̂arî mko po ha. Xeosapa yanme tî iito so xatken̂e. Ero wa tî xatken̂e.