Ero yinhîrî 36 cimn̂ipu takî tî xakn̂e kayaritomo me Asa yehtoponho. Ero yimaw takî tî mokyakn̂e Baasa, Ixaw Yana komo kayaritomon. Xuta komo wahkototopo ciiso tî mokyakn̂e ewto. Hama tî mîn xakn̂e ewto yosotî. Ero wa tî wahkotono ritopo n̂iir̂akn̂e Ixaw Yana komo cheka tohra ehtome so Xuta pono komo, yîhyaka so marha tohra ehtome so Ixaw Yana komo hara. Ero wa tî xakn̂e Baasa, Ixaw Yana komo kayaritomon.

2 Ero ke takî tî prata nowyakn̂e Asa, ooru marha tî, Kporin komo mîn yawnonho. Kayaritomo mîn yawnonho marha tî nowyakn̂e. Tînowthîrî takî tî narpekn̂e Siriu komo kayaritomon ya tîmsom me. Ben-Atace tî mîk xakn̂e noro yosotî. Tamasku pono tî mîk xakn̂e.

3 On wara tî kekn̂e aan̂e komo ya, Omtapotarî men ekatîmcoko Ben-Atace ya. On wara tî nîîke Asa, kacoko, Ai oyakno, ketkurunpetopo poko cma re tîmtapowasî oroto. Ero wa tî nîmtapowakn̂e apapa pen aamonhîrî pen yakro. Ero ke ero wa xa marha tîmtapotarî kîw hara. On men prata, ooru marha awya onîmrî. Ero ke ow tak akronomakî. Baasa oyakro cetar̂ma xe tî nai Ixaw Yana komo kayaritomon ha. Pahxa tî noro yakro tî on wara mîîketken̂e, etar̂mara tak cehcerî, mîîketken̂e tî. Wara rma ero wa kachonho yaw roro exihra takî cma re masî ohyai totohme noro, nîîke tî Asa, kacoko yîwya.

4 Ero ke Asa mtapotarî takî tî n̂ewehcakn̂e Ben-Atace. Ixaw Yana yewton pono komo waparî me takî tî n̂en̂epekn̂e tîsowtatun yantoman̂e komo. Iitono komo tî nar̂metken̂e Ixon pono pen komo, Taan pono pen komo, Abew-Main pono pen komo, ero warai pen kom ha tî. Nahtari pono pen komo marha tî nar̂metken̂e ewto pono pen komo, kayaritomo yemyawno yîmtotopo pono pen kom ha. Ero wa tî ar̂mano n̂iir̂atken̂e Siriu komo, sowtatu kom ha.

5 Ero ke takî tî waapa yekaci n̂encekn̂e Baasa. Ero ke takî tî, Hama wacan ciitîkara rma tî xakn̂e, wahkotono ritopo ha.

6 Ero yinhîrî takî tî Xuta komo ahnoro takî tî naar̂akn̂e Asa Hama pona. Iitononhîrî takî tî naar̂atken̂e toopu, weewe marha ewto me ciisomînhîrî. Ahnoro Baasa n̂enmekîtho tî naar̂atken̂e. Mîîmo me ciisom tî re mîn n̂enmekyakn̂e. Ero yipu tî naatîketken̂e Xuta komo anarî ewto pona. Eronhîrî ke takî tî mîîmo mko n̂irpekn̂e hara Asa. Xeba po, Mispa po, ero po so tî mîîmo n̂irpekn̂e.

7 Ero yinhîrî takî tî Anani cekn̂e Asa yenso. Kaanî n̂enporî yenîn̂e ro tî mîk xakn̂e Anani. On wara tî kekn̂e Asa ya, Ai oyakno, Siriu komo kayaritomon pona meen̂e ham okwe. Aporin komo Kaan pona yenîhra mehxe ham okwe. Ero wa awexirî ke Siriu sowtatun komo yopono me exihra tak maxe.

8 Pahxa Eciopia pono komo mokyatken̂e awaparî komo me. Ribia pono komo yakro mokyatken̂e. Mer̂pono pînî ro mak mîkyam xatken̂e. Mer̂pora ro mak xakn̂e tararan komo, mer̂pora marha xatken̂e kawaru mkaw tîtosom komo. Kporin komo pona awya enîrî ke makî tko n̂examro penî rma nar̂mapekn̂e awya. Ero wa awakronomekn̂e Kporin komo okre.

9 On warai xa Mîk Kporin komo, ahnoro roowo pono komo yenîn̂e roro Mîk ha. Tponarono komo xa nukurunpesî. Noro yipu komo yakronomacho poko n̂ekaricesî. Siriu komo kayaritomon pona tak meen̂e okwe. Kicicme xa n̂ehxe ero wa awehtopo. Ero ke tak awaparî komo yakro cetar̂maxmu me masî miya roro okwe, kekn̂e. Ero wa tî kekn̂e Anani Asa ya.

10 Ero wa kacho yentache nîrwonakn̂e takî tî Asa Kaan n̂enporî yenîn̂e ro poko. Noro pen tî nahruyakn̂e kahrutopo yaka okwe. Nîrwonîmtîkekn̂e ro mak noro poko yîmtapotarî yanme. Ero yimaw marha tî anarî komo n̂emetanmekyakn̂e Asa okwe, tmaywen komo rma. Ero wa tî xakn̂e Asa okwe ero yimaw.

11 Taa, miya rma nai Asa yehtoponho. Ahnoro nasî tmewreso karita yaw, Xuta Yepamtho Kayaritomon Komo Yehtoponho, kacho yaw, Ixaw Yana Kayaritomon Komo Yehtoponho, kacho yaw marha. Ero yipu yaw nasî tmewreso Asa yehtoponho.

12 Ero yinhîrî tak on wara tî xakn̂e Asa 39 cimn̂ipu exitaw kayaritomo me ehtoponhîrî, n̂erewakn̂e takî tî yîhtarî oko epera yanme. Cerewre ro makî tî xakn̂e noro yeper̂an okwe. Wara rma Kporin komo yakro yîmtapotara tî xakn̂e cehcematopo poko. Kehceman̂e komo yaka makî tî cekn̂e esehcemaposo okwe.

13 Ero yinhîrî takî tî Asa pen nîwînîkyakn̂e tporin pen komo yakro. 41 cimn̂ipu xakn̂e kayaritomo me ehtoponîrî. Ero yimaw tî waihyakn̂e okwe.

14 Pahxa rma tî nahtopekn̂e ewtarî tahruthopo me. Tapi pen yewtontho po tî xakn̂e yînahtopothîrî. Ero yaka rma takî tî noro pen yokoputho nahruyatken̂e. Kama pona tî nîrapetken̂e okoputhîrî. Kotoporem marha tî n̂iir̂atken̂e kama pona, katî marha n̂iir̂atken̂e iina anarmerpan yakro esmaxapu. Okoputhîrî yahruyataw takî tî kotoporem nakn̂iyatken̂e mer̂pono pînî ro mak. Ero wa tî xatken̂e Xuta komo.