Ero yinhîrî takî tî on wara xakn̂e Asarias, iitono ha. Otece mumuru tî mîk xakn̂e. Noro ropotaka tî mokyakn̂e Kaan Yekatî.

2 Ero ke Asa yenso tî cekn̂e. Enîche on wara tî kekn̂e Asarias yîwya, Ai, apa Asa, omtapotarî ka entakî. Amyamro hara Xuta yepamtho komo, Benxamin yepamtho komo marha, omtapotarî ka entacoko. Awakronoman̂e komo me wa nasî Kporin komo Noro yakro awexitaw so. Noro yenî xe awexitaw so n̂esenpesî rma awya so. Noro yahsîpînketaw tko awahsîpînkexe so hara men okwe.

3 On wara xatken̂e Ixaw Yana komo, pahkî ka xatken̂e Kaan ponarora, yaarono ponarora okwe. Kaanî mtapotarî poko panatanmekn̂e komo exihra marha xakn̂e, tîmsom pokono kom ha. Kpanatanmetopo komo exihra marha xakn̂e yîhyaw so okwe.

4 Cesemetanmekyataw so tko Kporin komo wece tak n̂etaknametken̂e hara, ponaro Ixaw Yana komo yehtoponho wece hara. Noro tak n̂epor̂atken̂e hara. Ero wa epor̂ataw yîwya so Noro rma n̂esenpekn̂e yîwya so.

5 Pahxa n̂he cerepore exihra ro mak xatken̂e Ixaw Yana komo ahnoro, erepotan me ro makî tî xatken̂e ahna so na tîcetaw so okwe. Ero wa xa marha xatken̂e en̂exa mokyataw so hara okwe. N̂esewrucpetken̂e mak mîk hak rowon pono komo.

6 Anarî yana komo cetken̂e anarî yana pen komo yar̂maxi. Anarî ewto pono komo marha tî cetken̂e anarî pono pen komo yar̂maxi. Kaanî rma tî ero wa emetanmekno n̂iir̂akn̂e anarmerpan ke. Ero wa tî xatken̂e pahxa.

7 On wara tko wîîkes awya so, kar̂pe ehcoko amyamro reha. Ahwokara ehcoko ahce na poko awekaricetaw so. Kaanî rma awakronomexe so ero poko, tohnaw ekaritora awehtome so, kekn̂e tî. Ero wa tî kekn̂e Asarias Asa komo ya.

8 Ero wa kacho tî n̂encekn̂e Asa, Asarias mtapotarî. Otece mtapotarî marha tî n̂encekn̂e, kweronoman̂e marha mîk hara. Ero ke tahwore takî tî xakn̂e Asa. Ero ke mîk hak warai me ciixaputho mko takî tî nar̂mekn̂e kr̂a Xuta komo chewnonho, Benxamin komo chewnonho marha. Kicicitho ro mak mîn xakn̂e ciixaputho mko kica. Eprain komo yewtontho pononho komo marha tî nar̂mekn̂e. Îîpî chew tî xakn̂e yînahsîthîrî ewto mko, iitono pononho marha tî nar̂mekn̂e kra ciixaputho mko. Kporin komo ya tîmsom yakn̂itopo marha tî nakir̂wamekn̂e hara Kporin komo mîn potuhremacho mîtwono ha.

9 Ero yinhîrî takî tî on wara xakn̂e Asa, ahnoro tî nan̂ikyakn̂e Xuta komo, Benxamin komo. N̂examro chewno komo marha tî nan̂ikyakn̂e, Eprain komo, Manases komo, Simeaw komo. Mer̂pono pîn mokyatken̂e Ixaw Yana tribun komo poyinonho Asa yaka. On wara tî ketken̂e, Kporin komo nai ham okre Asa yakro, ponaro noro yehtopo ha, ketken̂e tî. Ero ke tî mokyatken̂e yîhyaka.

10 Ero wa mokyatken̂e Xerusaren pona. Ero yimaw 15 cimn̂ipu tî xakn̂e kayaritomo me Asa yehtoponho. Ero po tî n̂esenmekyatken̂e iina, 3-nhîrî nuun̂i po ha.

11 Ero yimaw takî tî Kporin komo ya tîmsom nakn̂iyatken̂e, bui pun, 700. Oper̂a pun marha tî nakn̂iyatken̂e hara, 7.000. Ero wicakno pun tî nakn̂iyatken̂e tînar̂mathîrî komo yokutho poyinonho.

12 Ero yimaw marha tî Kporin komo xe cehtopo komo poko nîmtapowatken̂e n̂examro, Xerusaren pona mohxapu komo. On wara tî ketken̂e, Yaaro xa on wara tîtkexe, Kporin komo yakro tak tîmtapowaxe kakronomacho komo poko, ponaro kporin pen yehtopo yakro ha. Yiixe ro mak taxe miya roro, ketken̂e tî.

13 On wara marha tî ketken̂e, Kporin komo yakro tîmtapota xera exitaw kpoyino komo tîtwaikexe emyawnomnî komo, cemyawnoyem komo marha, kîîrî, wooxam marha, ketken̂e tî.

14 Yaaro xa tan amna kesî cemaro pîn me ro mak. Kporin komo ponaro mak nas amna, ketken̂e. Kporin komo n̂entarî me rma tî ero wa ketken̂e. Kar̂pe xa tî ketken̂e. N̂emtaraketken̂e marha tî, tuu ketken̂e marha tî raatî ke, kuripara ciixapu ke, oper̂a meretîtho ke marha.

15 Nahwowatken̂e takî tî Xuta komo ahnoro. Yaaro xa tîmtapotachonhîrî komo poko rma tî nahwowatken̂e. Kporin komo tî n̂epor̂atken̂e yaaro xa. Ero ke Noro takî tî n̂esenpekn̂e yîwya so. Yiixatî pîn komo marha tî n̂iir̂akn̂e tîtken̂arî me, waparî komo me mokuhnî me. Ero wa tî xakn̂e Kporin komo n̂examro poko.

16 On wara marha tî xakn̂e Asa, iito tî xakn̂e yîson, Maaka tî osot ha. Noro tî nowyakn̂e, Kayaritomo yon mîkro, kachonho. Ero wa tî nowyakn̂e onnoke kuknon cirporî ke yîwya, weewe. Kicicitho ro makî tî mîn xakn̂e yin̂irpothîrî. Ero ke takî tî ero yiputho namapekn̂e Asa, nakuhr̂apekn̂e, nakn̂iyakn̂e marha Ketîron yecihtaw. Ero wa tî xakn̂e Asa.

17 Îh po so rma tko tî xakn̂e mîk hak warai ya tîmsom yakn̂itopo mko. Yixkara rma tî xakn̂e Asa okwe ero yiputho. Kporin komo ponaro rma tko tî xakn̂e Asa miya roro twaihtopo pona roro.

18 On wara marha tî noro xakn̂e, Kaan mîn yaka tak n̂iir̂akn̂e tîîmînhîrî pen nîmîtho Kaan ya. Yîwya tînmîthîrî marha tî n̂iir̂akn̂e iina. Prata, ooru, ahce na me ciixapu mko tî n̂iir̂akn̂e Kaan mîn yaka.

19 Ero yimaw takî tî Xuta yepamtho komo waparî komo mokuhra ro makî tî xatken̂e pahkî. 35 cimn̂ipu exitaw tak kayaritomo me Asa yehtoponho ero yimaw makî takî tî mokyatken̂e xa hara waparî komo. Ero wa tî xatken̂e ero yimaw.