1-7 Taa, tîmsom pokono komo tan wetahcas hara, Repita komo marha. Sorobabew yakro mohxapu komo tan wetahcasî, Seawciew mumuru yakro, Xesua yakro mohxapu kom ha, Seraias, Xeremias, Estras, Amarias, Maruke, Atus, Sekanias, Heun, Meremoce, Ito, Xinetoi, Abias, Miamin, Maacias, Biwka, Semaias, Xoiaribe, Xetaias, Saru, Amoke, Iwkias, Xetaias, ero wa xatken̂e. Tîmsom pokono komo yenîn̂e mîkyam xatken̂e. Xesua exitaw Kaan yaka cewomsom me ero yimaw n̂examro xatken̂e tîmsom pokono komo yenîn̂e me.

8 Taa, Repita komo yosotî tan wetahcas hara, waano yaan̂e komo mak ha ka, Kir̂wan̂he Kaan nai ham okre, kacho yaan̂e kom ha. Xesua, Binui, Kacmiew, Serebias, Xuta, Matanias, ero wa xatken̂e waano yaan̂e komo. Tîyanan komo yakro rma waano naar̂atken̂e.

9 Eeco po hara n̂ececetken̂e n̂examro yanan kom hara, Bakbukias, Uni, ero wa tî n̂examro yosotî xakn̂e.

10-11 Taa, Xesua yepamtho tan wetahcas hara, Xoiakin tî mîk xakn̂e Xesua mumuru, Eriasibe tî xakn̂e Xoiakin mumuru, Xoiata tî xakn̂e Eriasibe mumuru, Xonatas tî xakn̂e Xoiata mumuru, Xatua tî xakn̂e Xonatas mumuru. Ero wa tî xatken̂e Xesua yepamtho komo.

12-21 Taa, Xoiakin exitaw takî Kaan yaka cewomsom me moxam tî xatken̂e tîmsom pokono komo yenîn̂e me hara, tîyanan komo yenîn̂e me so. N̂examro yosotî tan wetahcas hara. Meraias tî xakn̂e Seraias yanan komo yenîn̂e me, Ananias tî xakn̂e Xeremias yanan komo yenîn̂e me, Mesuraw tî xakn̂e Estras yanan komo yenîn̂e me, Xoanan tî xakn̂e Amarias yanan komo yenîn̂e me, Xonatas tî xakn̂e Maruki yanan komo yenîn̂e me, Xose tî xakn̂e Sebanias yanan komo yenîn̂e me, Acina tî xakn̂e Arin yanan komo yenîn̂e me, Ewkai tî xakn̂e Meraioce yanan komo yenîn̂e me, Sakariasî tî xakn̂e Ito yanan komo yenîn̂e me, Mesuraw tî xakn̂e Xineton yanan komo yenîn̂e me, Sikri tî mîk xakn̂e Abias yanan komo yenîn̂e me, Piwtai tî xakn̂e Miamin yanan komo yenîn̂e me, Moacias yanan komo yenîn̂e me, Samua tî xakn̂e Biwka yanan komo yenîn̂e me, Xonatas tî xakn̂e Semaias yanan komo yenîn̂e me, Matenai tî xakn̂e Xoiaribe yanan komo yenîn̂e me, Usi tî xakn̂e Xetaias yanan komo yenîn̂e me, Karai tî xakn̂e Sarai yanan komo yenîn̂e me, Ebe tî xakn̂e Amoke yanan komo yenîn̂e me, Asabiasî tî xakn̂e Iwkias yanan komo yenîn̂e me, Natanaew tî xakn̂e Xetaias yanan komo yenîn̂e me. Ero wa tî xatken̂e tîmsom pokono komo yenîn̂e komo ero yimaw.

22 Taa, Eriasibe exitaw hara Kaan yaka cewomsom me osorwaw tî xatken̂e tîyanan komo yantoman̂e me. On wara tî xakn̂e osotî komo, Xoiata, Xoanan, Xatua, ero wara. Tîmsom pokono komo yenîn̂e tî mîkyam xatken̂e, Repita yenîn̂e komo marha. N̂examro yosotî tî mewretken̂e kayaritomo me exitaw Taar̂u, Pehsia yepamtho ha.

23 Miya roro tî mewretken̂e Repita yenîn̂e komo yosotî, tîyanan yenîn̂e komo yosotî ha. Karita yaka tî mewretken̂e, Kayaritomo Yehtoponho, kacho yaka. Xoanan yehtopo pona rorono komo yosotî tî mewretken̂e, Eriasibe mumuru yehtopo pona rorono kom ha.

24 On wara marha tî xakn̂e Repita yantoman̂e komo yosotî, Asabias, Serebias, Xesua. Kacmiew mumuru mîk ha Xesua. Ero wa tî xatken̂e Repita yantoman̂e komo. N̂examro yanan komo tî n̂ecececetken̂e eeco po. Waano tî naar̂atken̂e, Kir̂wan̂he Kaan nai ham okre, kacho. Xehxan komo ka naar̂atken̂e, ero yinhîrî mehxan komo n̂eyukyatken̂e hara. Ero wa ehcakumyaka so naar̂atken̂e. Tapi penî mtapotachonho yaw roro rma tî ero wa naar̂atken̂e, Kaan ponarono penî mtapotachonho yaw roro ha.

25 On wara tî xatken̂e metata yenîn̂e komo yosot hara, Matanias, Bakbukias, Obacias, Mesuraw, Tawmon, Akube, ero wara. Emyawno komo yamtakpon metatan mîtwo so tî xatken̂e. Ero yenîn̂e me tî xatken̂e n̂examro.

26 N̂examro tî xatken̂e ero pokono me Xoiakin exitaw Kaan yaka cewomsom me. Xesua mumutho mîk xakn̂e Xoiakin, Xosatake mumutho tî mîk xakn̂e Xesua. Ero yimaw xakn̂e Neemias Ixaw Yana komo kopenaton me, Estras xakn̂e tîmsom pokono me hara, kpanatanmetopo mewren̂e me marha. Ero wa tî xatken̂e n̂examro.

27 Taa, ero yinhîrî tak n̂esenmekyatken̂e tak Ixaw Yana komo Xerusaren pona ero wacan tîmtome Kaan ya. Ero yimaw Repita komo yeposo cetken̂e, tanhamyan pono komo yeposo. Nan̂ikyatken̂e marha waaca tîmtopo poko ahwotachome so. On wara tî ketken̂e yîwya so, Amohcoko Xerusaren pona waano yaaso, Kir̂wan̂he Kaan nai ham okre, kaxi. Car̂ar̂a kan̂e yakro rma waano aatamcoko, ahpa yakro marha, raatî yakro marha, tîyorkaxmu yakro, ketken̂e tî yîwya so.

28-29 Ero ke waano yaan̂e komo tak mokyatken̂e cewtonî mko poi, Xerusarenî mkaino mko poi. Netopata komo yewtoni mko poi marha, Bece-Xiwkaw poi, Xeba woskaran poi, Asmapece woskaran poi marha. Pahxa rma n̂esekenmetken̂e waano yaan̂e komo Xerusaren panaw so. Ero ke ero mko poi tî mokyatken̂e.

30 Ero yinhîrî takî tî n̂etakir̂wametken̂e tîmsom pokono komo, Repita komo marha. Ixaw Yana komo marha nakir̂wametken̂e. Waaca metatan marha nakir̂wametken̂e, waaca marha.

31 Ero yinhîrî tak Xuta yepamtho yantoman̂e komo waar̂akn̂e waaca kanahtaka. Waano yaan̂e komo marha waar̂akn̂e iina mer̂pono pîn. N̂examro wakpayakn̂e mehxa xehxa wara. Mehxa tak wen̂epekn̂e waano yaan̂e komo yaake. Kaari n̂ixa n̂examro wen̂epekn̂e metata wece yukpurukpuruntho yar̂matopo wece.

32 N̂examro wenari cetken̂e Osaias. Xuta yepamtho yantoman̂e komo naar̂akn̂e noro, yîraconhîrî mak.

33-34 On warai komo marha cetken̂e noro yakro, Asarias, Estras, Mesuraw, Xuta, Benxamin, Semaias, Xeremias, ero wara.

35 Noro yakro marha cetken̂e tîmsom pokono mumuru komo. N̂examro wetahcas hara tan, Sakarias, Xonatas mumuru mîkî. Noro tî xakn̂e Semaias mumutho, noro tî xakn̂e Matanias mumutho. Noro tî xakn̂e Mikaias mumutho. Noro tî xakn̂e Saku mumutho. Noro tî xakn̂e Asape mumutho. Ero wa tî xatken̂e Sakarias porin pen komo yosotî.

36 Sakarias yanan komo marha cetken̂e noro yakro. Semaias, Asarew, Mirarai, Xirarai, Maai, Natanaew, Xuta, Anani, ero wara xatken̂e noro yakro tîtosom komo. Raatî mko naar̂atken̂e Tapi pen n̂iritho, Kaan ponarono pen n̂iritho ha. N̂examro poturme tî cekn̂e Estras kpanatanmetopo mewren̂e ro.

37 Ceepataw roro so rma cetken̂e n̂examro anarî metata wece hara Tuuna Pîtho mîtwono wece. En̂exa tak awomtopo pore nawomyatken̂e, Tapi pen Yewtontho ponan pore. Waaca pona awomtopo nas iito, ero pore cetken̂e. En̂exa tak cetken̂e Tapi pen mîntho twatoso ro. Miya rma cetken̂e resce yaw roro Tuuna Metatan yaka roro.

38 Taa, yîraconhîrî komo tak cetken̂e poowa me hara, Kir̂wan̂he Kaan nai ham, kacho yaan̂e komo. Waaca kanahtari marha cetken̂e. N̂examro wenari kîwcekn̂e ow hara. Mîîmoci twatoso ro amna cekn̂e Puruma Yuputopo twatoso ro. Takwekem yaka roro amna cekn̂e, waaca maxixin yaka.

39 Eprain Metatan yepore amna cekn̂e, Pahxantho Metata kacho yepore marha, Ootî Yenmetopo kacho yepore marha. Anarî mîîmoci amna wacekn̂e hara, Ananeew Mîn kacho ha. Anarî xa hara mîîmoci amna wacekn̂e 100 kacho ha. Anarî metata yepore rma amna cekn̂e Oper̂a kacho yepore. Kahrutopo mîtwono yaka roro amna cekn̂e metata yaka roro. Iina tak amna n̂ecececekn̂e.

40 Ero yinhîrî tak Kaan mîn yaw n̂ecececetken̂e waano yaan̂e komo, ahnoro, xiya toxapunhîrî komo, miya toxapunhîrî komo marha. Akro so marha kecececekn̂e ow hara, Ixaw Yana yantoman̂e komo marha n̂ecececetken̂e oyakro, yîraconhîrî mak ha tko.

41 Amna yakro n̂ecececetken̂e tîmsom pokono komo. N̂examro yosotî tan wetahcasî, Eriakin, Maaseias, Miniamin, Mikaias, Erioenai, Sakarias, Ananias, ero wara. Raatî ke cemyarke so xatken̂e n̂examro.

42 Iito marha xatken̂e anarî kom hara, Maaseias, Semaias, Ereasa, Usi, Xoanan, Mawkias, Eraw, Ese, ero wara. Kar̂pe waano naar̂atken̂e aan̂e komo. Xesîraias mîk xakn̂e waano yihcin̂e ro.

43 On wara marha xatken̂e Ixaw Yana komo ero kaamo po, tokuthîrî komo pun nakn̂iyatken̂e Kaan ya tîmsom me. Mer̂pora ro mak nakn̂iyatken̂e. Nahwowatken̂e marha. Kaanî rma n̂examro nahworekn̂e tahwore xa cehso ro okre. Wooxam komo marha nahwowatken̂e, rikomo komo marha. Ero ke miya ro mak n̂esencekn̂e Xerusaren pono komo yahwotacho. Ero wara xatken̂e iitono komo.

44 Taa, ero yimaw iito tî xakn̂e mîîmo Kaan ya tîmxapu mîn. Yaake xakn̂e ero yamtakpon. Mararî pononho yeperîrî n̂enmekyatken̂e iina yihcirî me epetaxapu ha. Cisimu me tîmxapu marha n̂enmekyatken̂e iina. Mararî pononho n̂enmekyatken̂e iina mehxan pononho ewto mko panawno pononho ha. Kpanatanmetopo yaw roro rma mîn n̂enmekyatken̂e iina tîmsom pokono komo nahrî me, Repita komo nahrî me marha. Tawake tî xatken̂e Xuta yepamtho komo tîmsom pokono komo poko, Repita komo poko marha okre. Tîmsom pokono me exirî ke so tawake xatken̂e poko so.

45 Kaan yanme mak cemyawno ro poko so xatken̂e waano yaan̂e komo, metata yenîn̂e komo marha. Akir̂wamano ritopo poko roro marha xatken̂e. Tapi penî mtapotachonho yaw roro rma xatken̂e ero poko, Saromaw penî mtapotachonho yaw roro marha, noro pen mumutho mtapotachonho yaw roro ha.

46 Pahxa rma waano yaan̂e yenîn̂e komo xatken̂e, Tapi pen exitaw, Asape exitaw marha. Waano mko marha xakn̂e ero yimaw yaake, Kaan wanorî, Kir̂wan̂he Kaan nai ham okre, kacho mko.

47 Taa, kayaritomo me exitaw tak Sorobabew, Neemias exitaw marha kayaritomo me hara waano yaan̂e komo nahrî nîmyatken̂e Ixaw Yana komo ahnoro, metata yenîn̂e komo nahrî marha. Kaamo po roro yînahrî komo nîmyatken̂e. Cemyawno komo marha nîmyatken̂e Kaan ya Repita komo ya tîmsom me. Ero raconho tak nîmyatken̂e Repita komo Kaan ya tîmsom me hara. Tîmsom pokono komo ya nîmyatken̂e cemyawno komo raconho hara. Araw yepamtho komo mîkyam xatken̂e tîmsom pokono komo. Ero wa nîmyatken̂e Ixaw Yana komo, Repita komo marha.