Ero yinhîrî takî tî n̂etîrwoxinkekn̂e ha re kayaritomo. Pasci ponaro tko tî xakn̂e, tanwetoponhîrî ponaro. Noro pen poko tîmtapotachonhîrî ponaro marha tî xakn̂e.

2 Ero yimaw takî tî on wara ketken̂e kayaritomo ya noro maywen komo, Ai apa, amaywen komo takî cma re men̂epesî emasî komo yeposo, emasî yenpotho komo, iin̂omnî ro kom ha. Apici me cehsom komo n̂epocowpe.

3 Ekn̂e komo marha cma re miir̂asî arowon raco mko pono komo. N̂examro tak n̂ehcowpe wooxam yenpotho komo oona Susan pona amîn yaka. Ekai yaka n̂ehcowpe, ewnuku yaka, wooxam komo yenîn̂e ro yaka. Emasî komo yekîche wooxam yenporitopo tak nîmcowpe Ekai maywen komo yîwya so.

4 Ero yinhîrî tak ahyaka mohcowpe. Yiixe awehtopo xa tak miir̂asî apici ro me kayaritomo pici me tak ehtome, Pasci pen yekenho yakan me ha, ketken̂e tî. Ero wa tî ketken̂e kayaritomo ya. Kir̂wan̂he tî n̂encekn̂e ero wa kacho kayaritomo. Ero ke ero yaw roro rma tî antomano n̂iir̂akn̂e.

5 Taa, ero yimaw iito rma kayaritomo yewton po Susan po tî xakn̂e Ixaw Yana, kîîrî, Matokew tî mîk xakn̂e noro yosotî. Benxamin yepamtho mîk xakn̂e, Xai pen mumutho ha. Simei pen mumutho tî mîk xakn̂e Xai, Kis pen mumutho tî mîk xakn̂e Simei pen. Noro yipu tî mîk xakn̂e Matokew.

6 Nabukotonoso pen n̂ekîtho tî mîk xakn̂e Kis pen, Babiron̂a pono komo kayaritomon n̂ekîtho. Xekon̂ias xakn̂e Xuta komo kayaritomonînho, noro yakro rma n̂ekyakn̂e pahxa n̂he Xerusaren poi.

7 Matokew yepeka tî xakn̂e yîhyaw, yîîm yaknonho pen yemsîtho, Atasa tî mîk xakn̂e noro yosotî. Yînpor̂mamnothîrî tî mîk xakn̂e yîmîhra cexirî ke, yînocwamra cexirî ke marha. Este marha tî xakn̂e noro yosotî xa hara. Cenporem xa tî mîk xakn̂e emasî. Cemsîrî me rma nahsîyakn̂e Matokew yîîm pen waipuche, yîson pen waipuche marha. Ero wa tî xakn̂e Este.

8 Taa, kayaritomo mtapotacho tak n̂encetken̂e maywen komo miyan komo rma. Ero ke emasî komo n̂ekyatken̂e mer̂pono pîn Susan pona, Ekai yaka. Este marha n̂ekyatken̂e iina. Kayaritomo mîn yaka tî n̂ekyatken̂e Ekai yaka, wooxam komo yenîn̂e ro yaka.

9 Tawake tî xakn̂e Ekai Este poko, kir̂wan̂he tî n̂een̂akn̂e. Ero ke yohno rma tî noro yesenporitopo nîmyakn̂e yîwya. Yînahrî marha tî nîmyakn̂e yohno. 7 wooxam komo takî tî n̂iir̂akn̂e noro yanton me. Kayaritomo mîn yawnonho komo rma mîkyam n̂iir̂akn̂e anton me. Kir̂wanî ro marha tî n̂enpekn̂e yîwya amtakpon, yaw enmacho. Iina tî Este naar̂akn̂e anton komo yakro rma ero yaw enmachome so.

10 Tîyananî tko tî ekatîmra xakn̂e Este. Ixaw Yana ow ha, kahra tî xakn̂e. Ixaw Yana me awehtopo ekatîmra ro mak men esko, kekn̂e tî Matokew yîwya. Ero ke ekatîmra xakn̂e.

11 Kayaritomo mîn yaka Este yarîche Matokew takî tî n̂etar̂akn̂e kayaritomo pici komo roron potaw. Enmar̂atîxera tî ero wara xakn̂e. Este yekaci tî n̂encekn̂e roro iito.

12 Taa, on wara tî xatken̂e emasî komo, kayaritomo yaka ka tohra xatken̂e. 12 nuun̂i tî ka n̂enatketken̂e cenporem me xa cecitopo komo poko. Kayaritomo mtapotarî yanme rma tî ero wa xatken̂e. 6 nuun̂i tî ka n̂ekapetken̂e miiha ke. Ero yinhîrî 6 nuun̂i xa hara tî n̂ekotopekn̂e hara. Wooxam yenporitopo ro ke tî n̂etakir̂wametken̂e.

13 Ero yinhîrî takî tî cetken̂e emasî komo kayaritomo yaka cewn̂e so mak. Tîcetaw takî tî cemyarke cekn̂e. Ahce na yarî xe exitaw kayaritomo mîn yawno ero rma narpetken̂e yîwya. Ero wa so cetken̂e kayaritomo mîn yaka.

14 Kokon̂i tî cekn̂e yîhyaka. Enmapuche takî tî mokyakn̂e hara wooxam mîn yaka anarî yaka mak hara tko. Saskas yaka takî tî mokyakn̂e hara, ewnuku yaka. Kayaritomo pici wara cehsom komo yenîn̂e ro yaka. Kayaritomo yaka takî tî tohra xa hara xakn̂e. Noro xe xa mak exitaw, Noro moku xe xa hara wasî, ketaw marha ero yimaw makî tî yîhyaka cekn̂e xa hara.

15 Ero yinhîrî takî tî Este pona tak xakn̂e kayaritomo yaka totopo, Matokew npor̂mamnotho mîk noro pona takî tî xakn̂e totopo. Noro yîîm yaknonho pen yemsîtho mîk xakn̂e Este, Abiaiw pen yemsîtho. Noro cetaw ahce na etacira tî xakn̂e tînarîrî. Onî mko xa men tarpore nasî kayaritomo yaka awcetaw, kekn̂e rma Ekai yîwya ero mko mak naar̂akn̂e. Tawake makî tî xatken̂e ahnoro tooto komo Este poko. Kir̂wan̂he roro tî n̂een̂atken̂e akrono komo ahnoro.

16 Ero ke Este takî tî naar̂atken̂e kayaritomo yaka Asueru yaka 10-înhîrî nuun̂i po, tebece po. 7-nhîrî cimn̂ipu po tî cekn̂e, kayaritomo me Asueru yehtoponho po. Ero yimaw xa tî cekn̂e yîhyaka.

17 Taa, noro xe xa takî tî xakn̂e kayaritomo. Yiixe ro makî tî xakn̂e anarî wooxam komo yopo. Ero ke noro takî tî n̂iir̂akn̂e cipici me. Kayaritomo pici yarokorî takî tî n̂iir̂akn̂e yîhtîpîrî pona. Ero ke kayaritomo pici me tak xakn̂e Este Pasci yemtakan me hara.

18 Ero yinhîrî tak erewusmano n̂iir̂akn̂e xa hara kayaritomo, Este yahsîtopo me takî tî. Enîno rin̂e me cehsom komo tî n̂erewusmekn̂e. Tmaywen komo nan̂ikyakn̂e ahnoro. On wara marha tî kekn̂e tmaywen komo ya, Etapickara ka ehcoko opici yahsîtopo me exirî ke, kekn̂e tmaywen komo ya, tîrowon raco pono komo ya. Tmaywen komo wakrecho marha tî nîmyakn̂e mer̂pono pîn komo ya. Kayaritomo me cexirî ke mer̂pono pîn komo wakrekn̂e.

19 Ero yinhîrî takî tî emasî komo n̂enmekyatken̂e xa hara. Ero yimaw kayaritomo mîn potaw rma xakn̂e Matokew ceremaxi.

20 Tîyanan yekatîmra rma tko tî xakn̂e Este. Ixaw Yana ow ha, kahra tî xakn̂e Matokew mtapotarî yanme. Yîmtapotarî yewetîn̂e me rma xakn̂e, pahxa rikomo me ka cexitawno wara rma, Matokew npor̂mamnorî me ka cexitawno wara ha. Ero wa tî xakn̂e Este.

21 Taa, ero yinhîrî tak kayaritomo mîn potaw exitaw Matokew kayaritomo maywen komo takî tî nîrwonatken̂e ewnuku me cehsom komo. Kayaritomo poko tî nîrwonatken̂e asakî. Kayaritomo waihkacho poko tî n̂esencetken̂e n̂examro kopi. Kayaritomo metatan yenîn̂e komo tî mîkyam xatken̂e. Biktan, Teres, ero wa tî xakn̂e osotî komo.

22 Ero poko esentacho komo tko tî n̂encekn̂e Matokew. Ero ke tî Este ya n̂ekatîmyakn̂e. Ero ke kayaritomo ya takî tî n̂ekatîmyakn̂e hara Este. Matokew mtapotarî tan wentamexpes awya, kekn̂e tî yîwya.

23 Ero ke Biktan komo takî tî n̂en̂ekekn̂e kayaritomo. Yaaro takî tî n̂encekn̂e twaihka xe ehtopo komo. Ero ke n̂examro pen tak n̂exewnukpekn̂e weewe pona waihkachome so tak. Ero wa ehtoponhîrî komo tko tî mewretken̂e mewren̂e ro komo kayaritomo karitan yaka. Kayaritomo wero ro rma tî mewretken̂e. Ero wa tî mewretken̂e.