Ero yimaw tak iito xakn̂e anarî hara kayaritomo maywen, Aman tî mîk xakn̂e noro yosotî. Ametata mumuru tî mîk xakn̂e, Akakita mumuru ha. On wara takî tî noro n̂iir̂akn̂e kayaritomo, Anarî komo yopono me tî n̂iir̂akn̂e, antomano rin̂e komo yopono me.

2 On wara tî kekn̂e kayaritomo tmaywen komo ya, Ahyari so cetaw Aman atupentacoko awosokmuru komo po noro mamakan me, kekn̂e tî. Ero ke ero wara tî nutupenwatken̂e kayaritomo maywen komo ahnoro tosokmuru komo po. Yutupentara rma tko xakn̂e Matokew noro mamakan me. Oyopono xa amoro okre, kahra marha xakn̂e yîwya. Ero wa xakn̂e Matokew Aman poko.

3 Ero yimaw iito xatken̂e anarî kom hara kayaritomo maywen komo, kayaritomo roron potaw xatken̂e. On wara ketken̂e n̂examro Matokew ya, Ahce kacho kayaritomo mtapotachonho yewetîra mai kopi? Aman mamakan me atupentacoko, kacho yewetîra masî kopi, ketken̂e yîwya.

4 Enmar̂atîxera ero wa ketken̂e yîwya. Ewetîra rma tko xakn̂e Matokew. Ero ke tak tî Aman ya n̂ekatîmyatken̂e hara okwe. On wara tî ketken̂e yîwya. Mînto nasî Xutew amna yakrono, Matokew tî mîk noro yosotî. Amamakan me eremara ro makî tko nas okwe tosokmuru po, ketken̂e tî yîwya. Tîyanan komo n̂ekatîmyakn̂e pahxa rma Matokew yîwya so, Xutew ow ha, kekn̂e yîwya so. Ero ke on wara tî ketken̂e n̂examro re mak, Ahce wa tak na Matokew pen n̂iir̂a kayaritomo. Cenîrî ika, ketken̂e tî. Ero wa tî ketken̂e Matokew yakrono komo.

5 Ero yinhîrî Matokew takî tî n̂een̂akn̂e Aman, tmamakan me yutupentara exirî tî n̂een̂akn̂e. Oyopono xa amoro, kahra ehtopo marha tî n̂een̂akn̂e. Ero ke takî tî nîrwonakn̂e xa tak noro poko.

6 Matokew yanan komo tî n̂ekatîmyakn̂e Aman ya. Ero ke noro pen mak waihka xera tî xakn̂e. Xutew komo waihka xe tî xakn̂e ahnoro, Asueru rowon poko hakno komo. Ero wa tî Matokew yanan pen komo waihka xe xakn̂e Aman okwe.

7 Ero yimaw 12 cimn̂ipu tak xakn̂e kayaritomo me Asueru yehtoponho. Ero po takî tî men̂ekacho nar̂mapekn̂e Aman tmaywen komo ya. Ahce nuun̂i po xa tak kîmtapowa kayaritomo yakro, ahce kaamo po xa wîîke, kacho yîhtînotome nar̂mapekn̂e men̂ekacho yîwya so. Ar̂mache 12-nhîrî ponan me takî tî n̂epîrkekn̂e men̂ekacho, ata ponan me. Nuun̂i yosotî mîn, ata, kacho.

8 Ero ke ero yimaw takî tî nîmtapowakn̂e Aman, kayaritomo yakro, Asueru yakro. On wara tî kekn̂e yîwya, On wara wîîkes awya apa, naxe tooto komo amaywen komo chew. Miyan komo chew rma naxe arowon poko hakno komo chew. Anarî me naxe n̂examro panatanmecho kopi, anarî yana komo panatanmecho warahra ro mak. Kayaritomo mtapotachonho yewetîra naxe kica amtapotacho ha. Ero ke iito rma exihra ro mak tak cexpore nasî.

9 Ero ke on wara wîîkes awya, amtapotarî cma re mîmewrepesî n̂examro waihkacho pokono. Owî rma wepemesî waihkan̂e komo prata ke. 10 miw tarentu wicakî wîmyasî yîwya so epethîrî, kekn̂e tî yîwya, kayaritomo ya.

10 Ero ke tamoyeknarî takî tî mohkekn̂e kayaritomo tukuknon ken̂arî. Aman ya tî nîmyakn̂e, Ametata mumuru ya, Akakita ya ha. Xutew komo xatî pînî ro mak mîk xakn̂e Aman kica.

11 On wara kekn̂e kayaritomo yîwya, Taa, ahyaw mak n̂expe puranta. Tooto komo marha wîmyas awya. Awanme ro mak n̂examro cirko ha, kekn̂e tî yîwya.

12 Ero ke yihcirî nuun̂i po tak kayaritomo mtapotarî mewren̂e komo tî nan̂ikyakn̂e Aman, 13-nhîrî kaamo po. Tîmtapotarî mewrepekn̂e yîwya so mîk hak yana komo mtapotarî yaro twero ro so tak entome kayaritomo maywen komo ya. Ahnoro roowo racho pono kopenaton komo yakan me mewrepekn̂e, ahnoro enîno rin̂e komo yakan me marha. Kayaritomo mtapotarî me rma tî mewrepekn̂e Asueru mtapotarî me ha. Kayaritomo yamoyeknarî ke tak mewrexapu nukuknomekn̂e hara.

13 Ero yinhîrî tak Aman karitan narpetken̂e miya so ro mak aan̂e ro komo ya. On wara kacho mîn xakn̂e noro karitan, On wara men ehcoko amn̂e ata po, 12-nhîrî nuun̂i po ha, Xutew pen komo waihkacoko ahnoro, poritomo pen komo, kar̂pamxan pen komo, wooxam pen komo, rikomo pen komo, ahnoro mak Xutew pen komo waihkacoko ero po. 13-nhîrî kaamo po xa waihkacoko. Waihkano riche tak emyawnonhîrî pen tak ahsîcoko awanme ro so, kacho mîn xakn̂e Aman karitan.

14 Kayaritomo mtapotachonho men tan ha, kacho marha xakn̂e tmewreso karita mko poko. Mîk hak yana komo n̂enîrî me tî nakpayatken̂e ero kaamo ponaro tak ehtome so, Xutew pen komo waihkacho ponaro ha.

15 Yohno men karita aacoko, kekn̂e tî kayaritomo karita yaan̂e komo ya. Ero ke cetken̂e miya so tak. Susan pono komo n̂entarî me marha nîmtapotaretken̂e. Ero wara tî Amanî mtapotarî nakpayatken̂e. Ero yinhîrî takî tî kayaritomo n̂eremekn̂e. Wooku tî n̂eer̂atken̂e Aman yakro. N̂eserepoketken̂e ro makî tko tî Susan pono komo Aman karitan poko. Ero wa xatken̂e.