Ero yinhîrî takî tî Amanî mtapotachonho n̂encekn̂e Matokew, Ixaw Yana komo waihkatîkacoko, kachonho ha. Ero ke tponon tak nahxaikekn̂e. Kumixitho mak tak namruyakn̂e tponon me. Wemronho marha pahyakn̂e tîhtîpîrî pore. Ewto roron pore n̂etar̂akn̂e tîwrataro. Kar̂pe nîwracekn̂e. Okwe okwe okwe, kekn̂e kar̂pe ro mak.

2 Kayaritomo roron potaka tko porohyakn̂e. Kumixitho yawno komo tî porohketken̂e roro enîn̂e komo ewomra ehtome so kayaritomo metatan yaro.

3 Matokew wara xa marha tî nîwracetken̂e miyan komo rma Xutew komo. Kayaritomo rowon pono komo ahnoro tî ero wa nîwracetken̂e. Okwe okwe okwe, ketken̂e tî kar̂pe. Cerewre ro makî tî nîwracetken̂e. Eseresmara tî ka xatken̂e anarî komo. Anarî komo tî n̂etîrapetken̂e kumixitho yaw. Wemronho cheka marha tî n̂etîrapetken̂e. Ero wa tî nîwracetken̂e Xutew komo.

4 Ero yinhîrî tak Matokew yîwratacho tî n̂ekatîmyatken̂e Este ya. Noro maywen komo tî n̂ekatîmyatken̂e yîwya wooxam komo, kîrkomo marha, ewnuku komo. Ero ke n̂eserepokekn̂e ro makî tî Este. Ero ke poono narpekn̂e Matokew yaka kumixitho yemtakan me. Ahsîra rma tko xakn̂e yîn̂ekpothîrî.

5 Ero yinhîrî takî tî Ata nan̂ikyakn̂e Este, ewnuku me cehsom. Kayaritomo nantomatho mîk xakn̂e Este yakronomacho poko. On wara tî kekn̂e Este yîwya, Ai Ata, Matokew yaka etok ha. Ahce kacho mîwrace okwe? kasko yîwya, kekn̂e tî.

6 Ero ke Matokew yaka takî tî cekn̂e Ata. Ewto imo roron po xakn̂e, kayaritomo roron potarî yecento. Este mtapotachonho yaw roro rma kekn̂e yîwya.

7 Ero ke Aman karitan mewretoponho n̂ekatîmyakn̂e Matokew yîwya, Ixaw Yana komo waihkacoko, kacho ha. Puranta pen tî nîmya Aman kayaritomo purantan yenîn̂e komo ya. Xutew pen komo waihkan̂e komo yepemacho tî mîn nîmya yîwya so, kekn̂e.

8 Aman karitan yepamnoxapu marha nîmyakn̂e yîwya karita, Xutew pen komo waihkacho pokono. Kayaritomo mtapotachonho me mewrexapu tî mîn xakn̂e karita. Susan pono komo n̂enîrî me mewrexapu mîn nîmyakn̂e yîwya. On wara kekn̂e yîwya, On karita arko Este yaka. Takîhso men ekatîmko yîwya amna yahwokacho. On wara marha kasko yîwya, Kayaritomo yaka men etoko amoro. On wara kasko yîwya, Ai, oyanan komo pînîn yaw cma re mas okwe. Oyanan komo cma re mukurunpesî, kaxi etoko, kasko men Este ya, kekn̂e. Ero wa kekn̂e Matokew Ata ya.

9 Ero ke n̂etîramekn̂e hara tî Ata Este yaka hara. Matokew mtapotachonho tî n̂ekatîmyakn̂e yîwya.

10-11 Ero ke on wara takî tî kekn̂e hara Este Ata ya, Matokew yaka etoko xa hara. On wara kasko yîwya, On wara kacho ponaro naxe kayaritomo maywen komo ahnoro yîrowon pono komo. Twaihkaxmu me men naxe kayaritomo yamtakponî ro yaka cemwomsom komo an̂ikîra exitaw kayaritomo, kacho ponaro. Noro yamoyin tko nai ooru ciixapu. Anarimaw so ero yipu ke n̂ekanîya tanme ro mohxapu rma. Ero ke twaihkaxmu mera nai noro yipu rma. Pahkî tko oyan̂ikîra nasî kayaritomo. 30 ro n̂enmai oyan̂ikîra rma. Ero ke ero wa oyehtopo men ekaktîmko Matokew ya, kekn̂e tî Este Ata ya.

12-13 Ero ke ero wa kacho tak n̂ekatîmyakn̂e Ata Matokew ya, Este mtapotachonho ha. Ero wa kacho yentache on wara tko kekn̂e hara Matokew Ata ya, Ai ha, taa, etoko xa hara Este yaka. On wara kasko yîwya, Kayaritomo mîn yawno rma re amoro. On wara tko kahra men esko aropotaw, Tan oyexirî ke owaikara naxe waapa komo amn̂e anarî pen komo waihketaw, Xutew pen kom ha, kahra esko.

14 Kayaritomo yakro yîmtapotara ro mak awexitaw ayanan komo yukurunpetopo poko, anarî tak n̂esenpesî Xutew komo yukurunpen̂e me hara. Amoro tko mîwaiyas okwe, aamo yanan pen komo marha waihyaxe okwe awakro. On yimaw tîmtapotaxmu me awehtome tko na kayaritomo pici me awire ha Kaan, kasko yîwya, kekn̂e Matokew.

15-16 Ero ke ero wa kacho takî tî n̂ekatîmyakn̂e Ata Este ya. Ero yipu yentache takî tî, On wara kasko Matokew ya, kekn̂e hara tî Este, Taa, ero wa ham Apa. On wara makî tko wîîkes awya, Susan pono komo enmeko ahnoro Xutew komo. N̂examro yakro tak amtapotacoko Kaan yakro opoko. Eseresmara ka ehcoko 3 kaamo. Kosope meero eseresmara ehcoko, katpanaw marha. Ow marha wasî eseresmara ka, oyanton komo marha eseremara wiir̂asî wooxam komo. 3 ro enmapuche tak kayaritomo yaka kîwcesî. Yîmtapotachonhîrî yanwekn̂e warai me rma kîwcesî. Ero yimaw owaiketaw tak noro ya kwaihsî rma, kekn̂e tî ekatîmn̂e Matokew ya.

17 Ero ke tak cekn̂e Matokew Xutew komo yan̂ihso. Este mtapotachonho yaw roro rma takî tî xatken̂e, N̂ewetîtîketken̂e yîmtapotarî ahnoro. Ero wa xatken̂e.