Taa, osorwaw ro enmapuche on wara takî tî xakn̂e Este, kir̂wan takî tî namruyakn̂e tponon, kayaritomo pici me cesenpotopo rma. Kayaritomo mîn roron pona tî cekn̂e. Yîmîn potawno rma mîn xakn̂e roron. Tîmîn yaw tî xakn̂e kayaritomo taponî ro po. Potarî wece cewru rma tî xakn̂e.

2 Ero ke Este takî tî n̂een̂akn̂e kayaritomo, tamtakpon potaw cececetoso exitaw tî n̂een̂akn̂e. Enîche tawake takî tî xakn̂e noro poko. Tamoyin ke tî pokupoku kekn̂e noro wece ooru ciixapu ke. Ero ke yîhyaka takî tî cekn̂e Este. Cei kekn̂e takî tî kayaritomo yamoyin poturu poko.

3 On wara kekn̂e kayaritomo yîwya, Ai, Este, kayaritomo pici amoro. Ahce xe wa mai? Ahce na xe awehtopo wîmyas awya. Orowon raconho rma wîmyas awya yiixe awexitaw, kekn̂e tî yîwya.

4 On wara cma re wîîkes awya, kekn̂e tî Este yîwya, amoku xe cma re wasî oroto oyakro eseresmaxi. Erewsî wirpo awokru marha. Aman yakro cma re mîmokyaxe, kekn̂e tî.

5 Ero ke on wara takî tî kekn̂e kayaritomo tmaywen ya, Aman an̂ihta yohno Este mtapotachonho yaw roro rma amna totohme, kekn̂e tî. Ero yinhîrî yohno rma tî cekn̂e kayaritomo, Aman yakro rma tî cetken̂e Este n̂irpotho yahso.

6 Ero yinhîrî wooku yeer̂ataw takî tî on wara kekn̂e xa hara kayaritomo Este ya, Taa, Este, ahce xe xara mai ha? Yiixe awehtopo wîmyas awya ha. Orowon raconho rma wîmyas awya yiixe awexitaw, kekn̂e tî yîwya.

7-8 On wara tî Este n̂eyukyakn̂e, Taa, tawake awexitaw opoko, owakre xe marha awexitaw pahxaxa cma re mîmokyaxe xa hara oyakro eseresmaxi xa hara. Amoro, Aman, ero wa cma re mîmokyaxe on̂irpotho yahso xa hara. Ero yimaw tak yiixe oyehtopo xa wekatîmyas awya, kekn̂e tî yîwya. Ero wa tî kekn̂e Este kayaritomo ya.

9 Ero ke takî tî Aman cekn̂e tahwore ro mak. Tîcetaw tko Matokew n̂een̂akn̂e xa hara. Awomra ro makî tî n̂een̂akn̂e xa hara, tpoko twerî exihra marha tî n̂een̂akn̂e. Ero ke nîrwonakn̂e xa tak noro poko.

10 Tîrwonî tko tî ka nînîmyakn̂e. Tîmîn yaka makî tî cekn̂e. Iito cexitaw takî tî takrono ro komo nan̂ikyakn̂e. Cipici marha tî nan̂ikyakn̂e. Seres tî xakn̂e yipici yosotî.

11 Yîwya so tî n̂ekatîmyakn̂e cemyawnoi xa cehtopo, yaake yumumuru komo yehtopo marha. Takîhsom me xa tak oyen̂a ham kayaritomo, kekn̂e takî tî. Anarî komo yopono me tak oriye kayaritomo me cehsom komo yopono me tak.

12 On wara marha nasî oyahworecho hara okre, ow mak oyan̂ikî kayaritomo pici Este, kayaritomo yakro oyeseresmachome, tîn̂irpothîrî yahso ha. Pahxaxa tî kîwce xa hara kayaritomo yakro eseresmaxi Este yaka.

13 Ahwora rma tko was okwe Xutew yenîrî ke, Matokew yenîrî ke ha. Kayaritomo roron potaw roro ween̂asî noro kica, kekn̂e tî. Ero wa tî kekn̂e Aman.

14 On wara tî n̂eyukyakn̂e yipici, Seres. On wara wîîkes awya cîwya, Exewnukno ritopo cirpoko ha ke kawno weewe. 23 metru wicakî cirko kaw xa. Pahxaxa tak amtapotakî kayaritomo yakro. On wara kasko yîwya, Ai apa, Matokew kr̂a tak wexewnukyasî on̂iritho pona, kasko yîwya. Noro pen yexewnukuche tak etoko amn̂e tahwore kayaritomo yakro eseresmaxi, kekn̂e tî yîwya. Ero wa xa marha tî ketken̂e Aman yakrono kom hara. Kir̂wan̂he tî yîmtapotarî komo n̂encekn̂e Aman. Ero ke exewnukno ritopo takî tî n̂irpekn̂e. Ero wa tî n̂irpekn̂e Aman.