Taa, on wara takî tî xakn̂e kayaritomo, kosope yîwînkîra tî xakn̂e okwe. Ero ke karita tî n̂ekpekn̂e ahce na poko cehtoponhîrî yekatîmtopo. Ero tî nîmtapotarepekn̂e tmaywen ya tîn̂entarî.

2 Ero ke takî tî ero nîmtapotarekn̂e maywen kayaritomo n̂entarî me. Mîk hak yehtoponho tî nîmtapotarekn̂e. Kayaritomo roron potarî yenîn̂enho pen komo yehtoponho meero tî nîmtapotarekn̂e. Biktana pen, Teres pen, n̂examro pen yehtoponho tî nîmtapotarekn̂e. On wara kacho tî nîmtapotarekn̂e karita, Pahxa n̂he ka n̂esencetken̂e Biktana pen, Teres pen yakro. Kayaritomo waihkacho poko tî n̂esencetken̂e, Asueru waihkacho poko ha. Yîmtapotarî tko n̂encekn̂e Matokew ero poko esentacho komo. Ero ke kayaritomo ya tak n̂ekatîmyakn̂e noro, Matokew, kacho. Ero wa ehtoponhîrî komo tî nîmtapotarekn̂e kayaritomo n̂entarî me.

3 Ero yipu yentache on wara takî tî kekn̂e kayaritomo tmaywen komo ya, Ai, Ahce wa Matokew cicir̂atken̂e ero yekatîmtoponho yepetho me. Cekaiporesom me na cicir̂atken̂e anarî komo yopono me esenpotome ha? kekn̂e tî. Pîra apa, ahce wa na noro cirihra ro mak cehce ero yekatîmtoponho yepetho, ketken̂e tî.

4 Ero yinhîrî takî tî on wara kekn̂e hara kayaritomo, Ai, onoke nai mînto ohroron po, kekn̂e tî. Ero yimaw rma tî mokyakn̂e Aman kayaritomo roron pona. Kayaritomo yakro tîmtapota xe tî xakn̂e. Matokew penî kr̂a exewnuku xe wasî onakîhtotho pona exewnukno ritopo pona, ka xe tî xakn̂e yîwya. Ero wa kaxi tî wa mokyakn̂e ero yimaw xa.

5 Aman mîk ha. Ahroron po n̂ecececesî, ketken̂e maywen komo kayaritomo ya. Taa, n̂ewomhe tak xiya ha, kekn̂e tî kayaritomo.

6 Ero ke n̂ewomyakn̂e takî tî Aman. Ewomuche rma on wara takî tî kekn̂e kayaritomo yîwya, Ai, Aman, on wara wîîkes awya, Tawake wasî tantono poko. Anarî komo yopono me cekaiporesom me xa enpo xe wasî. Ero ke ahce wa noro wiir̂a awya ero warai me xa enpotome? kekn̂e tî yîwya. Ero wa entache on wara tî kekn̂e Aman tîropotaw mak, Onoke xa anarî komo yopono me enpo xe nai ha? Owî tko na, kekn̂e tîhnaw mak.

7-8 Ero ke on wara tî kekn̂e kayaritomo ya, On wara xa cirpore nai iyopono me xa enpo xe awehtopo, aponon n̂ehcowpe amaywen komo, kayaritomo me xa awesenpotopo tak. Kawaru marha n̂ehcowpe yiipo awtotopo ro. Kayaritomo xapikan marha n̂ehcowpe yaw awehtopo ro.

9 Ero yipu tak nîmcowpe amaywen ya, antomano rin̂e me cehsom ya xa ha. Noro tak aponon namrupope yîwya, cekaiporesom me xa enpo xe awehtopo ya ha. Awoku mkahsî marha nakripe ha. Taa, ero wa tak narpe kawaru mkaw miya roro ha ewto pore so. On wara kape roro amaywen aar̂ataw, On wara xa kayaritomo n̂iir̂asî cekaipresom me xa enpo xe cehtopo ha, kape roro, Ero wa kape noro poko, cekaiporesom me xa enpo xe awehtopo poko, kekn̂e tî Aman kayaritomo ya.

10 Taa, kekn̂e takî tî kayaritomo Aman ya, amoro rma etoko oroto. Oponon ehta, oyok marha kawaru. Matokew tak cirko amtapotachonhîrî yaw roro rma. Xutew mîk, ohroron po ceremaxmu roro noro cirko ero wara ha. Amtapotachonhîrî yaw roro xa noro cirko watohra ro mak, kekn̂e tî yîwya.

11 Ero ke thakwa tî kayaritomo ponon n̂ekyakn̂e Aman, kawaru marha. Matokew ya takî tî namrupekn̂e poono. Ero yinhîrî tak kawaru mkaw naar̂akn̂e ewto pore. Aar̂ataw nîmtapowakn̂e kar̂pe tooto komo n̂entarî me. On wara kekn̂e emapona, On wara kayaritomo n̂iir̂asî cekaiporesom me xa enpo xe cehtopo, kekn̂e. Ero wa kekn̂e Aman Matokew poko.

12 Ero wa arîche tak kayaritomo roron potaka takî tî cekn̂e hara Matokew. Aman marha tî cekn̂e hara yohno tîmîn yaka. Ahwora ro makî tko tî cekn̂e. N̂ehtîwomcekn̂e mak tîcetaw.

13 Tîmîn yaw cexitaw takî tî cipici ya takî tî n̂ekatîmyakn̂e ahwora cehtoponhîrî. Takrono komo ya marha tî n̂ekatîmyakn̂e, takîhren̂e komo ya ha. Ehtoponhîrî yentache on wara takî tî kekn̂e yîwya yipici, N̂ihciw tak ham okwe awepîrkacho. Matokew nai ham awar̂man̂e me amn̂e. Xutew tko mîkro noro. Noro yanan me exirî ke awar̂metîke tak ha men okwe, kekn̂e tî yîwya yipici. Ero wa xa marha tî ketken̂e Aman yakrono kom hara.

14 Aman yakro yîmtapowataw so rma mokyatken̂e takî tî kayaritomo maywen komo ewnuku komo. Aman takî tî naar̂atken̂e yohno rma eseresmachome, Este n̂iritho yahtome xa hara tî. Ero wa tî naar̂atken̂e.