Ero ke takî tî kayaritomo cekn̂e cipici yaka eseresmaxi, Este yaka. Aman yakro rma tî cetken̂e.

2 Asakî ro takî tî xakn̂e ero wa eseresmachonhîrî komo. Ero ke wooku takî tî n̂eer̂atken̂e hara. Wooku yeer̂ataw yîwya so on wara takî tî kekn̂e xa hara kayaritomo, Ai Este, kayaritomo pici xa amoro. Ahce xe tak mai? Yiixe awehtopo wîmyas awya. Orowon raconho xe awexitaw ero rma wîmyas awya, kekn̂e tî yîwya.

3 Ero ke on wara takî tî Este n̂eyukyakn̂e, Tawake awexitaw opoko, owakre xe marha awexitaw on wara xa wîîkes awya, waipîra cma re ow miir̂asî. Oyanan komo marha cma re waipîra miir̂asî. Ero wa xa nasî yiixe xa oyehtopo ha.

4 Twaihkaxmu me ekanxapu ow okwe, epethîrî pona ekanxapu ha. Oyanan komo marha naxe ero warai me. Exihnî ro me xa tî amna waihketu okwe ahnoro ro mak. Epethîrî pona rma tî amna pen waihketu. Amna pen tîmyataw antonano me tahsîsom me mak ketaw ha re ekatîmra rma wexirî ha re awya. Ero wa amna pen tîmyataw ketaw ha re amna xatî pîn ya, kayaritomo nîwîrîmarî me xa nasî epematîkan me ro mak amna xatî pîn ya okwe. Wara rma ero yipu yekatîmra wexirî ha re awya, kekn̂e tî.

5 On wara takî tî kekn̂e kayaritomo Este ya, Onoke xa nai hara ero warai me awekanî xatî kom ha? Ahto nai ha? kekn̂e tî.

6 On wara takî tî n̂eyukyakn̂e Este, Moso rma amna xatî pîn Amanî rma kica. Kicicitho ro mak moso kica, kekn̂e tî. Ero yipu yentache tak n̂eraswakn̂e xa takî tî Aman kayaritomo pona, yipici pona marha.

7 Ero wa kacho yentache nîrwonakn̂e xa takî tî kayaritomo. Sai, nawomyakn̂e ro makî tî, twokru tî nînomyakn̂e, tînatîrî cheka tî cekn̂e ha ka. Tohra tko tî xakn̂e Aman. Owaikacho tak nîhtînoya ham okwe kayaritomo, kekn̂e takî tî tîhnaw. Ero ke iito rma n̂ecececekn̂e. Este yakro nîmtapowakn̂e. Owî cma re waihkapora masî kayaritomo ya, kekn̂e tî Este ya.

8 Ero yinhîrî tî kayaritomo mokyakn̂e hara naatî chewnonho. Eseresmano ritopo yaka tî n̂ewomyakn̂e hara. Ewomyataw rma Aman takî tî n̂etîrapekn̂e Este yawxari rma, kama warai pona rma tî. Kica, kekn̂e takî tî kayaritomo, opici poko ma nai ke kica tanî rma oyexitaw mîîmo yaw rma, kekn̂e tî. Ero wa kache rma takî tî Aman n̂ewoponcekn̂e kayaritomo maywen komo poono ke.

9 On wara tî kekn̂e Ahbona ewnuku me cehsom, Apa, mînto nai exewnukno ritopo kawno ro mak, 23 metru wicakî nasî ha. Aman mîn mîtwo rma nasî. Matokew yexewnutopo me tî re nakîhtopekn̂e. Kayaritomo waparî komo yekatîmn̂enho mîk noro rma exewnuku xe tî xakn̂e ero pona, kekn̂e tî. Taa, Amanî rma kr̂a exewnucoko ero pona rma, kekn̂e takî tî kayaritomo.

10 Ero ke Aman pen takî tî n̂exewnukyatken̂e yînakîtoponhîrî pona rma, Matokew yexewnutopo me nakîhtopekn̂e ero pona rma. Noro pen yexewnukuche takî tî n̂etîrwoxinkekn̂e kayaritomo. Ero wa tî xakn̂e.