Ero yinhîrî tak ero po rma Aman pen yemyawnonho nîmyakn̂e kayaritomo cipici ya, Este ya. Xutew komo xatî pîn mîk xakn̂e Aman pen. Ero yimaw marha tak Matokew mokyakn̂e kayaritomo yaka. Oyepeka mîkro Matokew, Apapa pen yaknonho mumutho ha, kekn̂e tî Este yîwya. Ero ke nan̂ikyakn̂e.

2 Pahxa Aman pen waihkapetaw kayaritomo ya tamoyeknarî tî mohkekn̂e noro pen yamorî pokononho. Matokew ya makîrha tak nîmyakn̂e hara. Ero yimaw marha on wara Matokew n̂iir̂akn̂e Este, Aman pen yemyawnonho yenîn̂e me n̂iir̂akn̂e.

3 Ero yinhîrî takî tî kayaritomo yenso cekn̂e xa hara Este. Noro yamrinaka tî n̂esewnapekn̂e, nîwracekn̂e marha. Noro yakro tî nîmtapowakn̂e Aman penî mtapotachonho yîramantopo poko. Xutew pen komo waihkacoko awanme ro so, kachonho yîramanpo xe tî xakn̂e kayaritomo ya.

4 Este mokuche tamoyin ke takî tî n̂ekanîyakn̂e xa hara kayaritomo noro wece xa hara. Ekanpuche nawomyakn̂e takî tî Este. N̂ecececekn̂e kayaritomo yeepatai.

5 On wara tî kekn̂e yîwya, On wara cma re wîîkes hara awya, tawake awexitaw opoko, takîhso marha na omtapotarî mence, an̂enîrî mexe na ow meen̂a. Ero wa oyen̂ataw awya amtapotarî cma re mîmewrepesî Aman Ametata penî mtapotachonho yîramantopo hara. Xutew komo waihkacho poko mewrekn̂e noro pen okwe, arowon raco mko poko hakno komo waihkacho poko ha. Ero ke ero wa kachonho yîramantopo cma re mîmewrepes hara.

6 Ahce wa thakwa re oyanan komo waihkacho wînîmya okwe. Apapa pen yananînho komo waihketaw tooto komo ya yînmîra thakwa was okwe, kekn̂e tî yîwya.

7 On wara tak n̂eyukyakn̂e kayaritomo Este ya, Matokew ya marha, Xutew komo waihka xe xakn̂e Aman pen. Ero ke Aman pen yanan komo wîmye Este ya. Noro pen tak n̂exewnukyatken̂e.

8 Ero ke awanme ro so mak tak mewrepocoko amyamro Xutew komo yetkurunpetopo pokono hara. Mewrepoche kayaritomo kuknon ke tak karita mewrecoko hara. Kayaritomo kuknon ke mewreche karita yîramanpon me ro mak nasî, kekn̂e. Ero wa kekn̂e kayaritomo Este ya, Matokew ya marha.

9 Ero ke ero po rma tak kayaritomo mtapotacho mewren̂e komo nan̂ikyakn̂e Matokew. 3-înhîrî nuun̂i po nan̂ikyakn̂e, Sipan po ha. 23-înhîrî kaamo po xa. Mokuche so Matokew mtapotarî tak mewretken̂e Xutew komo yakan, roowo raco mko yenîn̂e me cehsom komo yakan marha, antomano rin̂e komo yakan marha. Miyan komo yakanî rma mewretken̂e 127 roowo raconho pono komo yakan. Inca pona rorono komo yakan meero mewretken̂e, Eciopia pona rorono komo yakan marha, ero wicakno komo yakan mewretken̂e. Xutew komo mtapotarî yaro mewretken̂e, anarî yana komo mtapotarî yaro so marha.

10 Mewreche so kayaritomo yosotî tak mewrekn̂e Matokew karita mapitaw so. Noro yamoyeknarî ke marha yukuknon mewrekn̂e. Ero wa mewreche karita tak narpekn̂e aan̂e ro komo ya, kawaru mkaw tîtosom komo ya. Karitî mkaw so cetken̂e kawaru mkaw. Karitî yepamtho tî mîk xakn̂e kawaru, kayaritomo yanme epamkaxapu.

11-12 On wara kacho mîn xakn̂e Matokew nmewretho, Ai, Xutew komo amyamro, on wara wîîkes awya so, on wara ehcoko amn̂e 12-nhîrî nuun̂i po, ata po, 13-nhîrî kaamo po ha, tukurui esenmecoko yiixe awexitaw so. Awaparî komo mokuche so waihkacoko kr̂a men, ar̂macoko kr̂a exihra cehso ro. Mîk hak yana komo mokyatu awaparî komo me, ahtono pono komo na mokyatu. Mokyataw so awaparî komo n̂examro pen waihkacoko yiixe awexitaw so. Awosîn komo yahsîso na mokyatu, amxîkrî komo yahsîso marha na. Ero wa mokyataw so waihkacoko kr̂a. Waihkache awya so emyawnonhîrî komo tak ahsîcoko eroromero yiixe awexitaw so. Ero wa ehcoko amn̂e amyamro Xutew komo ahnoro, mîn hak pono komo Asueru rowon raco mko pono komo, kacho. Ero wa kacho mewrekn̂e Matokew kayaritomo mtapotacho me rma.

13 Ero wa kacho takî tî n̂epamnoyatken̂e iitono komo mîn hak pono komo n̂enîrî me, roowo raco pono komo n̂enîrî me. Mîk hak yana komo n̂enîrî marha mewretken̂e. Ero wa mewretken̂e Xutew komo tak ehtome so cetukurunpetopo komo ponaro, tîîxatî pîn komo waihkacho ponaro marha.

14 Ero ke karita yaan̂e komo cetken̂e kar̂pe kawaru mkaw so. Kayaritomo mtapotarî yanme rma tî cetken̂e kar̂pe. Susan po mewrexapu rma mîn naar̂atken̂e.

15 Ero yinhîrî tak kayaritomo mîn yai n̂epatakekn̂e Matokew kayaritomo ponon yaw. Tîswaye xakn̂e noro ponon, tumutwe marha tî xakn̂e. Aroko yaw marha n̂epatakekn̂e porin yaw, ooru ciixapu yaw. Poono mkarino marha xakn̂e kawno hara camnarexapu tak. Riin̂u kahxapu mîn xakn̂e. Ero warai yaw tak n̂epatakai Matokew. Ero yimaw tak nahwowatken̂e tak Susan pono komo. Tawake xa takî tî xatken̂e.

16 Tawake marha tî xatken̂e Xutew komo, tahwore marha. Cekaiporesom me takî tî n̂examro n̂een̂atken̂e anarî yana komo. Ero wa tî Xutew komo n̂een̂atken̂e.

17 Mîn hak pono komo takî tî tahwore xatken̂e Xutew komo. Ero wa tî xatken̂e ewto pono komo, roowo raconho pono komo ahnoro, kayaritomo mtapotachonho yentan̂e komo. N̂eseresmetken̂e, nahwowatken̂e xa tak okre etapickara. Xutew me takî tî n̂ecir̂atken̂e anarî yananînho komo. Ero wa tî n̂ecir̂atken̂e yukurumîkno me xa Xutew komo yenîrî ke. Ero wa tî xatken̂e.