Ero yinhîrî tak 12-nhîrî nuun̂i po, ata po, Xutew xatî pîn komo tî xatken̂e Xutew Yana komo waihkacho ponaro rma. 13-nhîrî kaamo po tî ero wa xatken̂e. Waihkara so rma tko tî xatken̂e. Iyopo so xa matko tî xatken̂e Xutew komo, tîîxatî pîn komo yopo ha tî.

2 Miyan pona rma tî n̂esenmekyatken̂e Xutew komo ewto pona, Asueru rowon raconho pona. Twaparî me cehsom komo yopo tî xatken̂e Xutew komo. Yukurunkan me ro makî tî xatken̂e. Yukurumîkno me tî Xutew komo n̂een̂atken̂e anarî yana komo. Ero ke iyopo so exihra tî xatken̂e.

3 Enîno rin̂e me cehsom komo ahnoro takî tî xatken̂e Xutew komo yakronoman̂e me. Ero wa tî xatken̂e ahnoro kayaritomo yanme enîno rin̂e komo. Xutew komo nakronometken̂e yukurumîkno me xa Matokew yenîrî ke tîwya so.

4 Kayaritomo mîn yawno komo n̂ewetîrî me tak tî xakn̂e Matokew. N̂ekaiwakn̂e marha tî miyan komo n̂entarî me rma, kayaritomo rowon raconho pono komo n̂entarî me. Anarî komo yopono me xa tak n̂ehtîkekn̂e. Ero wa xakn̂e Matokew.

5 Tîîxatî pîn komo tî waihketîketken̂e Xutew komo kacipara imo ke. Tanme ro so makî tî nar̂metken̂e.

6 Susan pono komo waihketken̂e 500 kîrkomo ha tî. Ero wa tî xatken̂e Xutew komo.

7-10 Aman pen mumutho komo marha tî waihketken̂e 10 pen komo. Ametata mumutho pen mîk xakn̂e Aman pen. Xutew komo xatî pînî ro makî tî mîk xakn̂e. On wara tî xakn̂e yumumuthîrî komo yosotî, Pahsantata, Tawpon, Aspata, Porata, Atar̂a, Aritata, Pahmasta, Arisai, Aritai, Paisata, ero wa tî xakn̂e yumumuthîrî pen komo yosotî. Emyawnonhîrî komo tko tî ahsîra xatken̂e. Ero wa tî xatken̂e Xutew komo.

11-12 Ero po rma takî tî waihkaxapu komo kuknomacho n̂ekatîmyatken̂e kayaritomo ya. Ero ke on wara tak noro kekn̂e Este ya hara, Ai Este, 500 kîrkomo tî waihkacow Xutew komo tanî rma Susan po. Aman pen mumutho komo marha tî waihkacow. Atararo na waihkacow miyan pen komo rma orowon raco pono kom ha? Ero ke ahce xe tak mai hara? Etacko yiixe awehtopo hara. Ahce na wirpesî rma awanme, kekn̂e tî yîwya.

13 On wara tî Este n̂eyukyakn̂e, On wara cma re wîîkes awya, on wara mîîkesî Xutew komo ya, Susan pono komo ya, Oroto aaxatî pîn komo mîwaikacow kayaritomo mtapotachonho yanme, ero wa xa marha kacoko xa hara pahxaxa yiixe awexitaw so hara, mîîkesî cma re Xutew komo ya, Susan pono komo ya. Aman pen mumutho komo yokoputho marha namposotocowpe weewe pona. Ero wa cma re mîîkesî tantono komo ya, kekn̂e tî yîwya.

14 Ero ke ero wa kacho rma tî mewrepekn̂e kayaritomo tmaywen komo ya. Ero ke Aman pen mumutho yokoputho takî tî namposocetken̂e.

15 Ero ke marha 14-nhîrî kaamo po xa hara tî n̂esenmekyatken̂e Xutew komo. 300 takî tî waihketken̂e tîîxatî pîn pen komo ero po. Emyawnonhîrî komo rma tko tî ahsîra xatken̂e. Ero wa tî xatken̂e Xutew komo, Susan pono komo.

16-17 Taa, on wara tî xatken̂e meyeno komo, kayaritomo rowon raco mko pono komo, Xutew komo, 13-nhîrî po makî tî n̂esenmekyatken̂e cetkurunpetome so. Tîîxatî pîn pen komo tî waihketken̂e, 75.000. Emyawnonhîrî komo tko tî ahsîra marha xatken̂e. Ero yinhîrî takî tî 14-nhîrî po n̂epokaretken̂e hara, n̂eseresmetken̂e marha tî tahwotachome so.

18 Asakî kaamo po reha tî Susan pono komo n̂esenmekyatken̂e tîîxatî pîn komo yar̂maxi. 13-nhîrî kaamo po n̂esenmekyatken̂e, 14-nhîrî kaamo po marha. 15-nhîrî po tak n̂epokaretken̂e n̂examro reha, n̂eseresmetken̂e marha tahwotarî me so.

19 Ero ke ero wa cetkurunpetoponhîrî komo poko nahwowatken̂e Xutew komo, ewtoci pono komo, wacamnî pono kom ha. N̂eseresmetken̂e roro 14-nhîrî kaamo po roro tahwotachome so. Etapickara ti xatken̂e, n̂etîmyatken̂e marha ero po. Ero wa xatken̂e.

20-21 Ero yinhîrî tak karita mewrekn̂e xa hara Matokew Xutew komo yakan. Ahwotacho komo poko mewrekn̂e. Ero yinhîrî tak tînmewrethîrî narpekn̂e Xutew komo yaka. Miyan komo n̂enîrî rma mîn narpekn̂e kayaritomo rowon raco pono komo n̂enîrî me. On wara kacho mewrekn̂e, Oyakno komo, Xutew komo amyamro, on wara wîîkes awya so, 14-nhîrî kaamo po roro ahwotacoko, 15-nhîrî po roro marha. Ero wa ahwotacoko ahnoro cimn̂ipu po roro, ata po nuun̂i po ha.

22 Ero po aaxatî pîn komo pona meserasketken̂e. Tahwore tak mîxatken̂e hara ahwokaxapunhîrî. Tîwrataxmunhîrî tak mîxatken̂e tahwotaxmu me hara okre. Ero ke ero po roro eseresmacoko awahwotachome so. Etîmcoko marha mîk hak ya. Emyawnomnî komo marha wakrecoko ero po. Ero wara ehcoko roro ero po, kacho mewrekn̂e.

23 Ero ke Matokew mtapotachonho takî tî n̂ewehcatken̂e Xutew komo. Tahwotace kokon̂oro ero po roro tak tahwowat ha, ketken̂e tî.

24 On poko tî nahwowatken̂e, Xutew komo waihkacho poko tî n̂esencekn̂e okwe Aman Ametata pen, Akakita mumutho pen ha. Yiixatî pîn komo ro mak mîk pen xakn̂e okwe. Men̂ekacho tî nar̂mekn̂e n̂examro pen waihkacho yukuknomachome. Puru, kacho tî mîn, men̂ekacho, yîmtapotarî komo yaro. Ero yipu tî nar̂mekn̂e Aman pen.

25 Kayaritomo yaka tko tî cekn̂e Este Xutew komo waihkacho yekatîmso yîwya. Ero ke anarî me tak mewrepekn̂e hara kayaritomo. On wara kacho tî mewrepekn̂e, Aman pen xa matko waihkacoko Xutew komo waihka xatînhîrî. Matokew yexewnutopo me ciixapu pona noro pen xa matko exewnucoko, yumumuthîrî pen komo marha exewnucoko ero pona, kacho mewrepekn̂e. Ero wa mewrepekn̂e kayaritomo.

26-27 Ero ke ero kaamo mko n̂etahcatken̂e tak purin me, puru kacho wara rma. Ero kaamo mko nukuknometken̂e tahwotacho komo me roro kayaritomo karitan yenîrî ke, tîîxatî pîn pen komo waihkacho pokono yenîrî ke ha. Ero ke ero kaamo mko tak n̂iir̂atken̂e Xutew komo yahwotacho me, cepamthîrî komo yahwotacho me marha, Xutew me ecixapu komo yahwotacho me marha. Towîhnî me ro mak ero wa kacho nîhtînoyatken̂e. Cenîn̂e komo mtapotachonho yaw roro rma nahwowaxe, Ero wa ahwotacoko, ero kaamo po so marha asakî kaamo po, kacho yaw roro.

28 On wara marha ketken̂e tîmxîkrî komo ya, Ero po roro purin yar̂machonho poko ahwotacoko amyamro, awepamthîrî komo marha. Mîn hak pono komo amyamro, yîraco pono komo, ewto pono komo marha amyamro ero yipu ponaro ehcoko. Ahsîpînkan me ro mak ahwotacoko ero po roro, awepamthîrî komo meero, miya roro ehretawnomaxapu komo rma. Ero ponaro ro ehcoko yîhcamnopîra ro mak ehtome awepamthîrî komo.

29 Ero ke ero wa kacho mewrepekn̂e Este, kayaritomo pici, Abiaiw pen yemsîtho. Matokew marha mewrepekn̂e, Xutew ha. Karita ponanmacho mîn mewrepetken̂e. Yaaro men kes amna awya, ero wa ehcoko roro amyamro Xutew komo, purin yar̂machonho ponaro ahwotacoko roro, kacho mîn mewrepetken̂e.

30 Ero wa kacho narpetken̂e Xutew komo yaka karita epamnoxapu. Miyan komo yaka rma narpetken̂e, 127 yîraco mko pono komo yaka rma. Cerepore ehcoko, kacho mîn xakn̂e karita yawno, Kaan yehtopo pokono marha mîn xakn̂e.

31 Purin po ahwotacoko yukuknomaxapu po roro, kacho mewretken̂e ponaro xa ehtome so. Ero wa kacho mewrepekn̂e Este, Matokew yakro, Xutew mîk noro yakro ha. Ero wara ehtoponhîrî komo ponaro ehtome so tî tahwotacho komo nukuknometken̂e, ero ponaro cepamthîrî komo yehtome marha nukuknometken̂e. Ero wa tî xatken̂e Xutew komo, yaake nukuknometken̂e n̂examro hara ero wara cehtopo komo. Ahce wa na cehtopo komo, tahwotacho kom hara, tîwratacho komo marha. Ero wa so nukuknometken̂e ahce na poko cehtopo komo.

32 Ero ke purin poko tahwotacho komo ponaro xa tî xatken̂e Xutew komo Este karitan yenîrî ke. Ero poko tahwotacho komo marha mewrepetken̂e anarî yaka karita yaka hara, kayaritomo komo yehtoponho yaka. Ero wa mewrepetken̂e.