Ero yinhîrî on wara takî tî kekn̂e kayaritomo, Asueru, tmaywen komo ya tî kekn̂e, Opurantan tîmcoko, kayaritomo purantan ha, kekn̂e tmaywen komo ya. Miyan komo ya rma ero wa kekn̂e tîrowon pono komo ya, ciwya pono komo ya meero.

2 Kayaritomo yehtoponho nasî tmewreso karita yaw kar̂pe xa ehtoponhîrî, Mecia Pono Komo Kayaritomon Yehtoponho, Pehsia Pono Komo Kayaritomon Yehtoponho Marha, kacho yaw nasî tmewreso. Matokew yehtoponho marha nasî ero yaw tmewreso. Tooto n̂ewetîrî me xa tak noro n̂iir̂akn̂e kayaritomo.

3 Antoman̂e komo me xa takî tî xakn̂e Matokew, Xutew ha. Asueru makî tî xakn̂e iyopono me. Tîn̂ewetîrî me tî Matokew n̂een̂atken̂e Xutew komo. Kir̂wanî ro mîkro okre, kacho me tî xakn̂e tpoino komo ya, mer̂pono pîn komo ya rma. Tîyanan komo yakronomacho poko roro xakn̂e, tpoyino komo yerepotanmetopo poko roro marha. Ero wa xakn̂e Matokew.