Taa, kakîhretopo komo tan wekatîmyas awya so. Saromaw ow, Tapi pen mumutho ha, Ixaw Yana komo kayaritomon pen mumutho.

2 Awakîretome so tan kîmtapowasî, yuhnari yîhtînon̂e komo mtapotarî men̂ekachome tak awya so.

3 Omtapotarî centapore nasî takîhso tak awehtome so. On yentache awya so ececenarî re cino rin̂e me tak maxe. Yaaro cino rin̂e me marha tak maxe, takîhsom me marha.

4 Omtapotarî yencetaw awya so twerî tak maxe wara mak cesehtînosomînhîrî. Kar̂pamxan komo yîhcamhokacho tan, panatanmetopo komo marha.

5 Omtapotarî n̂encexe takîhsom komo, n̂ehcamhoketîkexe tak. Ero wa naxe yuhnari yîhtînon̂e komo, takîhsom komo mtapotarî n̂encexe.

6 Omtapotarî yencetaw tak noro yipu komo ya takîhretopo komo yentan̂e me marha tak naxe, yuhnari yîhtînon̂e me marha naxe. Takîhsom komo mtapotarî tak n̂encexe, camkîno poko yîmtapowataw so camkîra rma tak n̂encexe. Ero wa tak naxe omtapotarî yentan̂e komo.

7 Ero ke on wara marha wîîkes awya so, Kporin komo ponaro xa ehcoko. Mîn hak poko cehcamhokaxmu me awehtopo yihcitopo mîn ha, Kporin komo ponaro awehtopo. Akpîn me awexitaw so reha poxumra ro mak mencexe awakîretopo komo, awehcamhokacho komo marha.

8 Okopuci, on wara wîîkes awya, aamo ya awakîretoponhîrî ponaro men ehcoko. Anocwan ya apanatanmetoponhîrî yai etowra ro mak men esko.

9 Awarokorî komo wara rma nasî yîmtapotachonhîrî komo, cenporem wara xa okre. Awarî komo wara marha nas okre.

10 On wara marha wîîkes awya okopuci, anarimaw kicicitho pokono komo na apohke ahce na poko. Noro yipu komo ya apohketaw ewetîra ro mak men esko.

11 On wara na ketu, Amna yakro amok ha. Noro kr̂a tîtwapantocerî waihkachome kr̂a. Esama yakumyaka ceseyamcerî waihkachome. Kicicme exihnî rma kr̂a tîtwaikacerî tohnaw mak.

12 Ermomn̂e wara kr̂a cehcerî, waixa pen yokoputho n̂ermomyasî ewtarî imo, roowo yatumnaka cexe cewararî rma, ero wa xa marha kr̂a noro pen tîtwaikacerî.

13 Yîmînthîrî yaw tak ceen̂axe emyawnonhîrî mîn hak mak okre, cepethîkem okre. Kîmîn komo tak nasî copoyi emyawnonhîrî ke okre.

14 Ero ke amna yakrono me tak esko. Ero re yaka marha tak cenkacerî kupurantan komo, ketu. Ero wa na ketu kica awya.

15 Ero ke on wara wîîkes awya okopuci, noro yipu komo yakro tohra ro mak men esko. Esamarî komo yaw tohra marha esko.

16 Kar̂pe cexe kicicitho poko ehso okwe. N̂erekanaxe waihkano riso tîtorî komo poko.

17 Ahce wa tatu torowo yemcinotopo ciri xe kexitaw so, torowo wero ro rma katî cicir̂atu? Pîra ro mak. Emcinopîra ro mak taxe torowo wero ro rma ciir̂ataw.

18 On wara naxe n̂examro reha kicicitho poko apohkan̂e komo, wapantono rma re n̂iir̂axe cetwaikachome rma ha tko okwe. N̂eseyamyaxe rma re, cetwaikachome marha kopi.

19 Ero wa men naxe cemyawno poko cepohkaxmu komo. Ero poko epohkacho komo rma nasî waihkan̂e komo me hara okwe. Ero wa nasî.

20 On wara xa nasî takîhso kehtopo, katpanaw tîmtapotaxmu wara nasî, twarawantaxmu komo roron po tîmtapotaxmu wara. Kar̂pe tîmtapotaxmu wara nasî.

21 Esama yaw tîtosom komo n̂entarî me nîmtapowasî. Ewto potaw marha nîmtapowasî. Iito so kakîhretopo poko nîmtapowasî.

22 On wara kan̂e wara nasî takîhso kehtopo, Ai, wara mak cesehtînosom komo, awakro so ka kîmtapowasî. Atî wicakî pahkî tpoxwe meen̂atu wara mak awesehtînotopo komo kica? Apanatanmetopo komo yîwîrîyakan̂e me maxe, tpoxwe rma meen̂axe ero wa awehtopo komo kica. On wara marha naxe akpîn komo, poxumra ro mak n̂encexe cehcamhokacho komo.

23 Omtapotarî tak men entacoko atwermacho komo. Entache tak awya so oyekatî rma wiir̂asî aropotaka so, wooku yukmamn̂e wara was apore so. Kîhcamhokexe so tak omtapotarî poko.

24 On wara tko mehce okwe, Ow men ka entacoko, wîîkai hara re awya so. Enta xera ro makî tko mehce okwe. Pokupoku wîîkekn̂e re awece so amohtome so. Enîn̂e pîn wara makî tko mîxatken̂e okwe.

25 Omtapotarî ponarora ro mak mîxatken̂e kica, awakîretopo komo ponarora. Poxumra ro mak mencetken̂e owya atwermacho komo.

26 Ero ke kewresî tak ow hara amn̂e apoko so awetwîrîmacho komo awepor̂ataw so. Awya kr̂a ha tî, wîîkes amn̂e, pona meraswaxe ero rma awepor̂ataw so.

27 Ocowo imo wara rma men mokyasî, pona meraswaxe ero kopi. Cetapomrisom wara mokyasî awetwîrîmacho komo. Awesemetanmetopo komo men awepor̂axe so okwe. Ahwora ro mak tak maxe okwe. Ero yimaw tak kewresî apoko so, kesî takîhso kehtopo komo awya so.

28 On wara marha kesî takîhso kehtopo, Omtapotarî yenta xera exirî ke so tooto komo on wara naxe amn̂e cetwîrîmetaw so, owya tak kexe. Ai, ow akronomatamko, kexe. Eikura ro mak tak wasî ero yimaw. Cerewre tak oyepor̂axe ero yimaw, oyenîra rma tko naxe okwe.

29 Ero wa naxe poxumra ro mak cehcamhokacho komo yentarî ke okwe, Kporin komo ponaro cexi xera cexirî ke so marha kica.

30 Omtapotarî yewetîra ro mak xatken̂e takîhretopo komo. Poxumra n̂encetken̂e owya tîtwermacho kom ha. Ero wa xatken̂e kica.

31 Ero ke ero wa cehtoponhîrî komo yeperîrî thakwa nahyaxe amn̂e okwe. Maxmiwaxe tak tpoxwe tîn̂enîthîrî komo ke rma kica.

32 Ero wa thakwa naxe wara mak cesehtînosom komo. Takîhretopo komo yai etaknamacho komo rma nas amn̂e waihkan̂e komo me okwe. Wara kyam mak ehtoponhîrî komo rma nasî akpîra cehsom komo waparî me okwe.

33 Omtapotarî yentan̂e komo naxe pahkî cetwîrîmacho komo chewra okre. Erasîn me naxe okre. Ero wa naxe omtapotarî yentan̂e komo okre, kesî takîhso kehtopo komo. Ero wa kesî.