On wara wîîkes awya so, Kporin komo poko ahwotacoko. Kaan poko ahwotacoko yîmîn yaw. Kah yaw marha Noro poko ahwotacoko. Karitî mîn kaapu yînakîtothîrî, ero yaw ahwotacoko Noro poko.

2 Kar̂pe cehtopo n̂enpekn̂e ahce na ciitopo poko, ero yipu poko ahwotacoko yin̂irithîrî poko ha. Kyopono ro xa Mîk Kaan, kir̂wanî ro marha, ero wa Noro yehtopo poko marha ahwotacoko.

3 Noro poko ahwotacoko tuu kacho yakro. Poko ahwotacoko ahpa yakro, sawteru yakro marha.

4 Noro poko ahwotacoko maraka ke, amanîmtopo komo ke marha. Raatî yakro Noro poko ahwotacoko tîyorkaxmu yakro, cecesom yakro marha.

5 Car̂ar̂a kan̂e yakro marha Noro poko ahwotacoko, kar̂pe xa kan̂e yakro ha. Exehci me tîyorîrem yakro rma ahwotacoko.

6 Ahnoro mak kesehsîtopo ken̂arî komo nahwotacowpe Kporin komo poko. Kporin komo poko ahwotacoko, wîîkesî. Ero wa mak wîîkes awya so .