On wara wîîkes hara awya okopuci, on wara na mai, omtapotarî ponaro rma na mai. Tpoxwe na mence owya apanatanmetopo okre. Aropotaka na ero miir̂a.

2 Tpoxwe na mence awakîretopo. Yuhnari yîhtînotopo ponaro xa na mai okre.

3 On wara na mîîke Kaan ya, Apa kah yawno, kir̂wan̂he oyehtopo men̂ekan̂e me xa ow cirko. Yuhnari yîhtînon̂e me xa ow cirko, mîîke na yîwya.

4 Ero na mepor̂a prata yepor̂atawno wara, puranta pen yepor̂atawno wara rma ha na, eyamxapu yepor̂atawno wara xa.

5 Ero wa awexitaw Kporin komo ponaro xa awehtopo tak mencesî, Kaan yehtopo poko tak mehcamhokesî.

6 Kporin komo xa nasî kakîhren̂e me. Tîmtapotarî ke rma kîhcamhokexe so mîn hak poko. Yuhnari yîhtînotopo marha n̂ekatîmyasî kîwya so.

7 Takîhso kehtopo komo n̂epamnoyasî Kporin komo kir̂wan komo ya enpotome amn̂e. Kir̂wan̂he cehsom komo kurun me nasî Noro.

8 Kir̂wan komo yesamarî yaw nasî Kporin komo emetanmekno rin̂e komo yen̂epen̂e me. Tînakir̂wamarî komo nukurunpesî ahna na cetaw so.

9 Yîmtapotarî ponaro awexitaw takîhso kehtopo poko cehcamhokaxmu me tak masî, yaaro en̂ekano rin̂e me tak mîhtînoyasî, yaaro ciino ritopo poko cehcamhokaxmu me marha masî. Kir̂wan̂he kehtopo men̂ekan̂e me roro tak masî pohcira ro mak.

10 On wara na mai, awakîretopo ponarono me tak na mai. Tpoxwe tak na mence mîn hak poko awehcamhokacho.

11 Ero wa awexitaw twerî awehtopo tak nasî akurun me. Yuhnari yîhtînon̂e me awehtopo nasî etwîrîmara awin̂e me.

12 Kicicitho komo poko pohnîmra tak masî. Kicicitho poko tîmtapotaxmu komo poko marha pohnîmnî me masî. Ero wa tak masî awakîretopo ponaro awexitaw.

13 On wara naxe anarî komo, Kicicme tak naxe, kir̂wan̂he ehxapunhîrî okwe. Awarpanawno yaw tîtosom wara naxe okwe, esama yaw.

14 Tpoxwe xa nasî yîwya so kicicitho poko ehtopo komo. Centapore xa n̂encexe Kaan yanwetopo kicicitho komo ya.

15 Anarmerpa so ciino rin̂e me naxe kica. Esama yai twaimamsom wara naxe okwe. Noro yipu komo poko pohnîmnî me masî awakîretopo yencetaw tpoxwe awya.

16 On wara marha awir̂asî awakîretopo ero ponarono me awexitaw, wooxam yai akurunpesî, tweeno pîn yai. On wara wooxam nîîke anarimaw, Kîîrî yenpotho amoro okre, nîîke ha na awya apohkachome mak kica.

17 On wara naxe noro yipu komo wooxam, emasî me ka cexitaw so ciin̂o ka nahsîyaxe. Ero yinhîrî yîhyai so n̂etowyaxe hara kica. Anarî kîîrî poko epohkan me ro mak wasî owaitopo pona roro, kexe cma re ka ciin̂o yahsîyataw. Kaan n̂entarî me rma ero wa kexe. Ero wa kachonho tko nîhcamnoyaxe hara kica.

18 Noro yipu mîn yaka awcetaw awaitopo yaka xa mîîces okwe. Noro yipu yesamarî yaw awcetaw waihxapu pen komo cheka men mîîces okwe.

19 En̂exa mokuhnî me ro mak tak naxe yîhyaka toxapu pen komo. Kar̂pe cehtopo komo yesamarî yenîhra ro mak tak naxe hara okwe. Ero wa naxe wooxam npohkatho komo, kicicitho komo npohkatho kom ha.

20 Kporin komo ya kakîhretopo ponaro awexitaw reha kir̂wan komo yesamarî yaw mak mîîces okre. Takîhsom komo yesamarî yai etowra masî.

21 Takîhsom komo naxe pahkî roowo po. Kicicitho mîkro, kacho pîn komo marha naxe tîrowon komo po miya roro.

22 Kicicitho pen komo reha naxe roowo poi cen̂epesom me. Kaan pona enîn̂e pîn pen komo n̂emohkexe roowo poi peen n̂emohkesî ero wara rma okwe. Ero wa naxe okwe.