On wara wîîkes xa hara awya okopuci, owya apanatanmetopo ponaro men esko miya roro. Omtapotarî poko twen̂ekarî exihra ro mak esko.

2 Ero ponaro awexitaw, pahkî n̂he waipîn me awin̂e me nas okre, mer̂pora cimn̂ipu menatkesî. Ahwokan me awin̂e me marha nasî.

3 Etpînîn yawno me awehtopo ahsîpînkara esko, yaarono ponarono me awehtopo marha ahsîpînkara. Ero wa awehtopo yamrun̂e wara esko awarî mamruyasî ero wara rma. Aropotaka marha mewreko karita yakan wara rma.

4 Ero wa awexitaw kir̂wan̂he awen̂axe so Kaan. Takîhsom mîkro, kacho me tak masî yîwya. Ero wa kacho me xa marha masî tooto komo ya hara.

5 On wara marha wîîkes awya, Kporin komo pona enîn̂e me roro esko awero ro xa. Yuhnari yîhtînon̂e ow oyanme ro mak, kan̂e pîn me ro mak esko.

6 Ahce wa xa cexpore nai awya Apa, kasko xa matko Kaan ya ahce wa na awehtopo poko. Ero wa awexitaw awesamarî tak n̂enpesî Noro.

7 Takîhsom xa ow ha, kahra ro mak esko. Twerî mak esko Kporin komo poko. Kicicitho yai ro mak etok ha.

8 Ero wa awexitaw kar̂pe tak nas apun. Ceipu marha nas ayochîrî.

9 On wara ehcoko Kporin komo poko, kyopono me Noro yehtopo yenpon̂e me esko awemyawno komo raconho tîmrî ke awya, Anatîrî yeperîrî raconho marha tîmko yîwya yihcirî me epetaxapu.

10 Ero warai tîmn̂e me awexitaw yîwya tawronohkatîkaxi tak nas amîn amn̂e, anatîrî yeperîrî yîmtotopo ha. Copoyi so marha nas awokru yen, ciixan yen, iyopo rma nas okre. Ero wa nasî.

11 On wara marha wîîkes awya okopuci, Okwe okwe, kahra esko Kporin komo ya apanaretaw. Poxumra marha enîhra esko apanaretopo yîwya.

12 Ahnoro yiixe cehtopo komo panaren̂e Mîk. Ero wara rma nasî rikomo yîîm, panaresî tumumuru, tîpîn̂emu rma. Ero wa xa marha nasî Kporin komo kpoko so hara. Ero ke, Okwe okwe, kahra esko ero wara awitopo poko.

13 Taa, kakîhretopo komo poko tan kîmtapowasî xa hara. Tawake xa taxe takîhso kehtopo komo yeen̂ataw kîwya so. Tawake marha taxe yuhnari yîhtînotopo yahsîyataw kîwya so.

14-15 Cepethîke rma re nasî prata, ooru marha nasî cepethîke, kir̂wan ooru ha. Cepethîke marha nas rubi mko. Ero yipu yopo ro makî tko nasî takîhso kehtopo cepethîke xa tak ha. Ahce na xe awehtopo komo yopo ro mak nas ha.

16 Knocwan wara nasî takîhso kehtopo. Noro yemyawno wara nasî pahkî waipîra kehtopo, kaari n̂ixan yawno wara. Poowa n̂ixan yawno wara reha nasî cemyawnoi kehtopo hara, Takîhsom mîkro, kacho me kehtopo marha.

17 Tawake taxe takîhso kehtopo ponaro kexitaw. Cerepore marha taxe ero yesamarî yaw kexitaw.

18 Weewe warai marha mîn, waipîn me kiin̂e yepu warai. Ero wa kiin̂e me nasî tponarono me kexitaw. Tawake xa naxe ahnoro ero yahsîn̂e komo. Ero wara kiin̂e mîn takîhso kehtopo.

19 Kir̂wanî ro me cesehtînosom xa Mîk Kporin komo. Ero wa cexirî ke mak roowo nakîhcekn̂e. Yuhnari yîhtînorî ke marha kaapu mko nakîhcekn̂e.

20 Camkîra cexirî ke tuuna nakpekn̂e yuhnawno ha. Ero wara cexirî ke marha cicakî n̂ekmexpesî kaapu smun chei. Ero wa n̂iir̂asî Kporin komo camkîra ro mak cexirî ke.

21 On wara marha wîîkes awya okopuci, takîhso awehtopo yenîn̂e wara roro esko, twerî awehtopo yenîn̂e me marha. Ero wa awehtopo yenponkan̂e pîn me ro mak esko.

22 Ero yipu ponaro awexitaw so awahworen̂e me xa nasî. Aporokru wara marha nasî, awarî wara.

23 Ero wa awehtopo ponaro awexitaw awesamarî yaw mîîcesî kir̂wan̂he, ehrokan me.

24 Awetakriche tak erasîra marha masî, tpoxwe xa metakriyasî awîntome okre.

25 Awetwîrîmacho pona erasîra esko, ponan̂e tmohsom pona. Kicicitho komo pona marha erasîra esko awemetanmekn̂e komo pona. Awemetanmekyataw rma yîwya so erasîra esko.

26 Kporin komo pona xa meen̂asî. Noro xa etamxikîra n̂iir̂asî ahtarî ahna na awcetaw. Ero wa mas okre takîhso awehtopo ponaro awexitaw.

27 On wara marha wîîkes awya, Anarimaw na n̂esemetanmekya amîtwono ahce na xe. Ero wara exitaw on wara kahra ro mak esko, Noro yakronomara wasî, kahra esko noro yipu poko. Akronomakî rma ehn̂ara awexitaw.

28 On wara marha kahra esko amîtwono ya, Etok hara ka, pahxaxa mak kepemesî, kahra esko noro yepetho exitaw rma ahyaw.

29 On wara marha kahra esko ahnaw amîtwono poko, On wara noro pen wemetanmekyas amn̂e, kahra esko. Tukurunpen̂e me tko awen̂asî. Ero ke amîtkoso n̂esekenmai. Ero ke ero wara kahra esko.

30 Tohnaw mak eino cirihra marha esko. Awemetanmekîra exitaw eihra esko.

31 Emetanmekno rin̂e poko pohnîmra ro mak esko. Noro wara oyexi xe was okre, kahra ro mak esko ahce wa na ehtopo poko.

32 On wara nasî Kporin komo, kicicme ro mak n̂een̂asî tanwekn̂e komo. Ero warahra reha nasî kir̂wan komo poko, noro yipu komo ya nîhtînomexpesî cesehtînotopo ekatîmnînhîrî rma.

33 Kicicitho komo mîn nasî Kporin komo nîwîrîmarî me. Tpoxwe xa n̂iir̂asî takîhsom komo yeken.

34 Yîwîrîyakano rin̂e komo nîwîrîyakesî Kporin kom hara. Ehcoyoponkan komo reha nakronomesî.

35 On wara kacho me naxe amn̂e takîhsom komo, Kir̂wanî ro mîkro, kacho me naxe okre. Cehn̂axmu me makî reha n̂esenpexe amn̂e akpîn kom okwe. Ero wa naxe.