On wara marha wîîkes awya so okopuci komo, omtapotarî men entacoko, aamo komo ow ha. Ero ke kakîhrexe so. Omtapotarî ponaro ehcoko yuhnari yîhtînon̂e me tak awehtome so.

2 Kir̂wan poko xa kpanatanmekyaxe so. Ero ke owya apanatanmetopo komo ahsîpînkara ro mak ehcoko.

3 Pahxa ka apapa pen yaw wîxakn̂e rikomo me ka oyexitaw, wahra rma ka oyexitaw. Ow mak wîxakn̂e yememe penî mrerî me.

4 Ero yimaw oyakîrekn̂e apapa pen. On wara kekn̂e owya, Okopuci, omtapotarî ponaro men esko. Ero poko eponarononkara ro mak esko. Owya apanatanmetopo ewetko waipîra awehtome, kekn̂e owya.

5 Takîhso awehtopo xa ahsîko. Yuhnari yîhtînon̂e me awehtopo marha ahsîko. Omtapotarî yîhcamnopîra ro mak esko, ero yai etaknamara ro mak ha.

6 Takîhso awehtopo yahsîpînkara ro mak awexitaw akurun me nasî. Ero ke ero wa awehtopo pînîn yaw esko akurun me ehtome.

7 Tpoxwe xa nasî takîhso kehtopo. Ahce wa na kehtopo yopo ro mak nasî tpoxwe xa. Ero ke ero wa awehtopo xa ahsîko. Ahce na mahsîya amn̂e awemyawno. Ero yipu yakro ro rma men ahsîko yuhnari yîhtînon̂e me awehtopo hara.

8 Tpoxwe xa enko ero wa awehtopo. Ero wa een̂ataw awya, Takîhsom mîkro, kacho me tak awir̂a amn̂e. Tîyopono me awen̂axe amn̂e apoyino komo takîhso awehtopo ponaro awexitaw.

9 Anocwan wara rma nasî takîhso awehtopo. Noro rma tak ahtîpîrî porokucesî. Awarokocesî marha kir̂wan ke okre. Ero wa nasî takîhso kehtopo, kekn̂e. Ero wa kekn̂e apapa pen owya.

10 Ero ke awya wîîkes ow hara, okopuci. Omtapotarî men ewetko yaake cimn̂ipu yenatkachome awya waipîra.

11 Takîhso awehtopo poko kpanatanmekyakn̂e. Esama yaw awan̂e wara wîxakn̂e kir̂wan yaw.

12 Ero warai yaw roro rma awcetaw kir̂wan̂he mîîcesî ewahkoton me. Kar̂pe awcetaw ehrokan me marha mîîcesî.

13 Awakîretopo men ahsîko, ahsîpînkan me ro mak. Ahyaka men cirko, waipîn me awin̂e me exirî ke.

14 Kicicitho komo yesamarî yaw tohra ro mak esko. Kicicitho komo yukukmara ro mak esko.

15 Mooxe esko noro yipu komo yesamarî yai. Tohra ro mak esko ero yaw. Noro yipu yesamarî yeen̂ataw rma awya anana etoko, watoko mak anarimaw. Ero wa esko kicicitho komo yesamarî poko.

16 On wara naxe kicicitho komo, yîwînkîra ka naxe emetanmekno cirihra ka cexitaw so. N̂etwînîkpormexe ro mak ar̂mano cirihra ka cexitaw so.

17 Tuuru komo yokyatawno wara naxe kicicitho poko. Twokru komo yeer̂atawno wara marha naxe waihkano ritopo poko.

18 Takîhsom komo yesamarî reha nasî enmayatawno wara okre, saa ketawno wara. Saa kr̂owe, ketîketawno wara nasî. Ero wa nasî takîhsom komo yesamarî.

19 Awarpanawno wara nasî kicicitho komo yesamarî reha. N̂ehrokexe mak okwe enîhra cexirî ke so. Ahce na pona kehroka oko, kexe mak enîhra cexirî ke so.

20 Ero ke on wara wîîkesî xa hara awya, okopuci, omtapotarî ponaro men esko. Entakî xa men.

21 Omtapotarî enko roro enponkan me. Aropotaka xa cirko yîhcamnopîra ro mak awehtome.

22 Cenîn̂e komo karihton̂e tan omtapotarî, waipîn me ciin̂e ha. Yupun komo yakir̂waman̂e me nasî ehci komo wara rma.

23 On wara xa wîîkes awya, aropotarî wacanton̂e wara men esko. Kropotarî komo yai n̂epatakesî ahce wa na kehtopo. Ero ke twacantopore xa nasî.

24 Cemaro me yîmtapotara ro mak esko. Kicicitho me yîmtapotan me marha cirko amtarî.

25 Awepataw roro mak enko. Miya xiya wara enîhra esko.

26 Takîhso men enko awesamarî etowra ro mak awehtome. Ero wa awexitaw kir̂wan yaw roro tîtosom me mas okre.

27 Kir̂wan yai etowra ro mak esko esama yai. Poowa me etowra, kar̂me etowra marha. Kicicitho wece tohra ro mak esko. Ero wa xa men esko, wîîkes awya okopuci. Ero wa wîîkesî.