On wara marha wîîkes awya okopuci, kakîhresî tan okre, yuhnari tan wekatîmyas awya. Ero ke omtapotarî men entakî.

2 Omtapotarî ponaro awexitaw tweeno me tak mas okre miya roro. Camkîra marha tak mîmtapowas okre mîn hak poko.

3 On wara nasî tweeno pîn, wooxam, weenu wara xa nasî yîmtapotarî, cipicipi kan̂e wara. Katî wara marha nasî tapeswe xa. Ero wa nasî yîmtapotarî.

4 Cîmîkno wara ro makî tko nasî noro yipu wooxam pahkî awexitaw yîhyaw, erexkuthîrî wara nasî kica. Tîyokem wara marha nas oko noro yipu, kacipara imo wara, ececokan wara.

5 Twaihtopo yaka tîtosom mîk noro yipu wooxam okwe. Wehto imo ywaka ces okwe.

6 Takîhso oyexi xe wasî waipîra oyehtome, kan̂e pîn me ro mak nasî noro yipu. Kwexixpe tîtosom wara mak nasî pataw tohnî me ro mak. Ero wa tîtotopo poko twen̂ekarî mak nas okwe. Ero wa nasî wooxam tweeno pîn okwe.

7 Ero ke omtapotarî men entakî okopuci komo. Omtapotarî ahsîcoko ahsîpînkan me.

8 Noro yipu yesamarî yai mooxe esko, anarî yaw mak etoko. Yîmîn mîtkoso tohra ro mak men esko.

9 Yîhyaka awtoche so rma, Takîhsom mîkro, kacho mera ro mak tak maxe okwe. Anarî komo xa n̂esenpexe ero warai me awemtaka so hara. Apînîn yawno pîn komo yanton me tak maxe pahkî ro mak okwe.

10 Apoyino pîn komo marha nahsîyaxe awemyawnonhîrî. Kar̂pe men metapickesî anarî yana komo yemyawno yepamnotome mak okwe.

11 Okwe, okwe, okwe, mîîkesî tak amn̂e poritomotho me tak awehtîkache. Ero wa men mîîkesî cekar̂katîkaxi thakwa awexirî ke, takporoso awexirî ke marha okwe.

12 Ero yimaw on wara tak mîîkesî, Poxumra ro mak wencekn̂e oyakîretoponho kica? Centaporera ro mak wencekn̂e otwermachonho, ahce kacho hara kica?

13 Opanatanmekn̂e komo mtapotarî yewetîn̂e pîn me wîxakn̂e kica. Oyakîretken̂e cma re. Enta xera ro makî tko wîxakn̂e kica.

14 Ero ke oyetwîrîmatîkacho yaka epîrkaporo tak was okwe. Ero wa wasî tan opoyino komo chew rma, esenmexapu komo chew, mîîkexe. Ero wa mîîkexe tweeno pîn pokononho me awexirî ke so mak okwe. Ero wa men mîîkexe amn̂e.

15 Ero ke on wara xa esko okopuci, anakwarî yawno ro mak erko tuuna. Anahtothîrî ro yai anîmxapu mak erko ha.

16 Atunarî ma re mîmya mîk hak ya? Ero yipu ma re nîîce ewto roron pore? Pîra ro mak kica.

17 Awyanî ro me mak n̂expe atunarî warai. Anarî ro komo ya tîmîhra ro mak esko.

18 Kaanî nakronomarî me mak n̂expe atunarî warai. Ahwotakî apici ro poko mak. Kar̂pamxan me ka awexitaw mahsîyakn̂e noro poko mak ahwotakî.

19 Tupunporem wara xa noro enko pixkaru wara woosî wara. Noro manatîrî poko mak eserepotanmeko miya roro. Noro ya mak ewakremekpoko awepokachome okre.

20 Ahce kacho mepohke tweeno pîn poko hara kica? Ahce kacho awakman̂e yenaka metakriya kica?

21 Kporin komo wero ro men nasî kehtopo komo. Ahna so na kîwcetaw so kukuknomexe so.

22 Kicicitho poko kexitaw ero wara kehtoponhirî rma kahsîyas hara amn̂e. Kimin̂e wara ro mak men nas amn̂e okwe kicicitho poko kehtoponhîrî rma.

23 Ero wa cehsom komo waihyaxe ro mak okwe takîhretopo komo yentara cexirî ke so okwe. Akpîn me cexirî ke so anana ro mak cexe okwe. Ero ke omtapotarî men entakî. Ero wa wîîkes awya okopuci.