On wara marha wîîkes awya okopuci, anarimaw na amîtwono yakro mîmtapowa yîn̂epethîkathîrî yepemacho poko. On wara na mîîke yîwya, Apurantan exihra exitaw amn̂e an̂epethîkathîrî wepemesî owî rma, mîîke na. Ero wa na mîîke anîhtînorî ya, anîhtînorî pîn ya rma na anarimaw.

2 Ero wa amtapowataw amîtwono komo yakro emcinoxapu wara tak mas okwe. Amtapotachonhîrî rma nasî awemcinon̂e wara rma okwe.

3 Ero wa awexitaw apoyino n̂emcinoputho warai me rma mas okwe. Ero ke on wara wîîkes awya, Noro yakro amtapotata xa hara. On wara kasko yîwya, Oyakno, akpîra kîmtapotai kica awakro. Omtapotachonho tow xe xa wasî, kasko yîwya. Cerewre kasko yîwya ero poko.

4 Yîwînkîra ro makî ka esko. Owînîkî xe ka wasî, kahra ro mak men esko.

5 Kooso n̂emahciya twaparî yai ero wara cemahcisom wara men esko amoro hara. Torowo na n̂en̂epe ahsîn̂enhîrî mîîye yai ero wa etowko amtapotachonhîrî yai. Ero wa wîîkes awya, okopuci.

6 On wara marha wîîkesî, tuwun̂urem komo ya hara, Ai, oyakno, tuwun̂ure masî kica. Ero ke yawko yenso etoko. Noro yetapickacho poko eserepokakî takîhsom me tak awehtome.

7 Yawko kayaritomon exihra ro mak nasî, antoman̂e exihra nasî, enîn̂e marha exihra nasî. Ero wa nasî yawko.

8 Wara rma n̂etînamesî kaamo yimaw. Naatî yeperîrî yenmetopo yimaw tînahrî n̂enmekyasî.

9 Atî wicakî mîwînîkya amoro tuwun̂urem? Ahcemaw tak mîpake hara yîwînxapunhîrî?

10 On wara mak mîîkesî, Kîwînîkyasî rma ka yohno mak, ketakriyasî ka wahra mak, mîîkesî kica.

11 Ero wa karî ke awya emyawnomnî me tak awehtopo awepor̂asî cen̂epan̂em wara. Awesemetanmetopo awepor̂asî awaparî wara oko. Ero wara men mas okwe tuwun̂ure awexitaw.

12 Taa, on wara naxe anarî kom hara, kir̂wan̂he exihra ro mak naxe, kicicitho poko mak naxe. Kicicitho yekatîmrî poko mak n̂etar̂axe kica noro yipu komo.

13 N̂ewkpenaxe anarimaw, tîhtarî ke so ekanîno n̂iir̂axe, tamorî ke so marha ekanîno n̂iir̂axe kica.

14 Kanwekn̂e me mak naxe kica tîropotaw so. Emetanmekno ciitopo ponaro marha naxe. Ceseisom me na tatu anarimaw noro yipu komo yanme kica. Ero wara naxe anarî komo kica.

15 Ero ke ponan̂e tak Noro yipu komo n̂epor̂asî yîwîrîmacho komo. Yohno ro mak mokyasî waihtopo kom okwe. Twaparî komo yeen̂ataw emahcira ro mak naxe okwe. Ero wa naxe noro yipu komo.

16 Taa, on wara wîîkes hara, yaake nasî kicicitho me kehtopo, yiixera ro mak Kporin komo yehtopo, 6 nasî. 7 tko nasî poxumnî me ro mak kehtopo yîwya.

17 Ow xa ayopono, kan̂e wara enîno ritopo, cemarontaxmu me kehtopo, kicicme exihnî komo waihkan̂e me kehtopo,

18 emetanmekno ritopo poko cesehtînosom me kehtopo, kar̂pe tîtosom me kehtopo kicicitho poko ehso.

19 Tohnaw ro mak tpoyino komo yehtoponho yekatîmn̂e me naxe anarî komo, cemaronwaxe mak kica. Anarimaw etîxatî pîn me tak naxe anarî komo etakno re rma. Kîmtapotarî yanme mak naxe okwe. Ero wa so kehtopo xera ro mak nasî Kporin komo.

20 On wara marha wîîkes awya okopuci, aamo ya apanatanmetopo ponaro men esko. Anocwan ya apanatanmetopo marha ahsîpînkara esko.

21 Yîmtapotachonhîrî komo yimin̂e wara esko aropotaka, awarî wara marha cirko awexenakan wara.

22 Ero wa amna mtapotachonho ciir̂ataw awya awan̂e me nasî ahna na awcetaw. Awînîkyataw akurun me nasî. Apakache tak awakro tîmtapotaxmu wara nasî.

23 Ramha wara nasî kpanatanmetopo, kweyuru wara. Kîtwermacho nasî waipîn me kehtopo yesamarî yaw kaan̂e me.

24 Apanatanmetopo awar̂asî kicicitho yai wooxam yai. Kîîrî pohkan̂e komo yai awan̂e me nasî.

25 Wooxam yenpotho na nai anarimaw kicicitho rma. Ero wa exirî poko epohkara ro mak esko. Cewru ke rma apohkesî men okwe. Ero ke noro yipu poko epohkan me ro mak esko.

26 Yînapumnî me ro mak tak mas amn̂e tweeno pîn poko awexitaw wooxam poko. Kar̂pe awehtoponhîrî town̂e men mîk okwe noro yipu komo.

27 Ahce wa tatu kenaka wehto yahsîyataw oco? Ecakîra ma re nai kponon komo awya?

28 Ahce wa tatu wehto roron pore ketapikyataw so oco? Ecakîra ma re nai kîhtarî komo awya?

29 Ero wa xa marha nasî kîîrî tîmîtwono pici yahsîso tîcetaw. Noro yipu poko awexitaw, Kicicitho pîn mîkro, kacho mera ro mak men mas okwe.

30 On wara naxe anarî komo, knaputhîrî poko n̂en̂epanaxe rooma poko xa cexirî ke so mak. Ero wa cehsom yîwîrîyakara tasî rooma yanme mak en̂epanataw.

31 Wara rma cen̂epan̂em yîhtînopuche tînarîthîrî tîmpore nas hara osom ya. Ahce na yarîche 1 mak arîche, 7 tak tîmpore nas hara ero yepetho me. Ero ke cemyawnonhîrî na nîmtîke okwe anarimaw tînarîthîrî yepemacho me.

32 Cipici yai ro cehsom reha nasî yuhnari yîhtînon̂e pîn me ro mak kica. Ketwaikacho rma mîn kipici pîn yahsîtopo kopi.

33 Tparaxkaxmu me naxe oko noro yipu komo, tîwîrîyakaxmu me marha. Kicicitho mîkro, kacho me nasî miya roro yîtîhkan me ro mak.

34 Kîrwonmekn̂e xa mîn kipici yewyomacho, iin̂o yîrwonmekn̂e ha. Cesepanîyataw tak cipici pokononho pînîn yawra men nas iin̂o.

35 Puranta tîmyataw yîwya yipici poko ehtoponhîrî yepetho, ahsîra ro mak nas iin̂o. Ahce na tîmyataw iin̂o ya cepethîkem pen mer̂pono pîn, etîrwoxinkara rma nasî. Ero wa men nasî iin̂o cipici pokononho poko.