On wara marha wîîkes awya okopuci, owya apanatanmetopo men cirko aropotaka yîhcamnopîn me. Puranta mîmcesî cemyapore ero wa xa marha omtapotarî yîmtoko aropotaka cemyapore.

2 Owya apanatanmetopo ewetko waipîra awehtome. Owya ahcamhokacho ponaro xa esko awewru yatho yewyoman̂e me masî ero wara rma.

3 Omtapotacho tak yimiko awamoyaran poko. Aropotaka marha mewreko karita yakan wara rma.

4 On wara kasko takîhso awehtopo ya, tooto yan wara rma kasko, Oyepeka amoro, kasko. Oyananî ro xa amoro, kasko marha yuhnari yîhtînon̂e me awehtopo ya.

5 Ero wa awehtopo ponaro xa awexitaw akurun me xa nasî, tweeno pîn nîwîrîmarî mera awehtome, wooxam nîwîrîmarî mera. Apohkan̂e me xa na nîmtapowa kica awakro. Noro yipu komo nîwîrîmarî mera masî omtapotarî ponaro xa awexitaw.

6 On wara wîxakn̂e anarî kaamo po, omîn yaw wîxakn̂e ewkanapan yecento. Ero yaro enîno wiir̂akn̂e, xwaraxwarano yaro.

7 Iito tak ween̂akn̂e wara mak cesehtînosom komo yaake. Yaake xatken̂e iito kar̂pamxan kom ha. Anarî tak ween̂akn̂e iito yuhnari yîhtînon̂e pînî ro mak okwe.

8 On wara xakn̂e noro, esama yaw cekn̂e wooxam mîn wece. Wow kekn̂e esama noro mîn wece. Ero yaw cekn̂e kar̂pamxan.

9 Kokmamche mak cekn̂e, kosope xa okwe. Awarpape ro mak xakn̂e.

10 Iina cetaw wooxam mokyakn̂e kar̂pamxan yakro esepotpona. Kîîrî pohkan̂e ro ponon yaw mokyakn̂e. Kar̂pamxan pen pohkacho ponaro xakn̂e kica.

11 Kar̂pe tîmtapotaxmu mîk xakn̂e wooxam. Oyanme ro mak wehsî ha, kan̂e mîk xakn̂e kica. Tîmîn yaw mak exihnî mîk xakn̂e, cetarisom kyam mak mîk xakn̂e kica.

12 Anarimaw so katpanaw xakn̂e, anarimaw so ewto roron po xakn̂e. Esama yakumyaw so ceseyamsom marha mîk xakn̂e kica.

13 Noro yipu tak on̂enîtho pen nahsîyakn̂e kar̂pamxan pen, n̂ewcokekn̂e marha kica. Cewukpinîmro mak nîmtapowakn̂e noro yakro.

14 On wara kekn̂e yîwya, Ai, on wara wîîkes awya, omîn yaw nasî Kaan ya tîmsom, Aaxe xa wasî, kacho me tîmsom ha. Kaan purantan me onîmrî marha wenkapu oroto, omtapotachonho yaw roro rma.

15 Ero ke xiya tak kmoko aweposo. Cerewre ro mak awenî xe weexi. Kenwo tak okre.

16 Okaman wamuhto tmewrem ke poono ke. Exipsiu komo nkaputho wiirî ero pona okre.

17 Kotoporem ke marha okaman kotopew miiha ke, aroe ke, kan̂era ke. Ero yipu ke okaman kotopew.

18 Ero ke kaika omîn yaka. Etîxe kehtopo poko cexirî cenmakaxi ro. Cepohkarî ketwakremecho ke.

19 Oyin̂o exihra nas omîn yaw. Miya ro mak toye mooxe ro mak.

20 Tupurantan naare kumixi yaw. Nuun̂i yepunwache makî tî mokya hara, kekn̂e. Ero wa kekn̂e wooxam kar̂pamxan ya.

21 Ero wa karî ke noro pohkekn̂e kica cewetîso ro, Aaxe ro mak wasî, karî ke kica.

22 Ero ke yohno rma tak cekn̂e kar̂pamxan wooxam yakro. Paaka naar̂asî waihkan̂e paraxkachome ero wara rma noro pen naar̂akn̂e. Akpîra cehsom naar̂axe porisia komo yîhrakîknotopo yaka, ero wa noro pen naar̂akn̂e wooxam tîmîn yaka okwe.

23 Cetwotopo pona makî tko cekn̂e oko kar̂pamxan pen. Ererî poko cetwoposom me mak cekn̂e okwe. Torowo cesî yohno cemcinotopo na, ero wa xa marha noro pen cekn̂e twen̂ekarî ro mak okwe. Owaitopo pona tan kîwces okwe, kahra ro mak xakn̂e okwe. Noro yipu ween̂akn̂e.

24 Ero ke omtapotarî men entacoko okopuci komo. Omtapotarî ponaro men ehcoko.

25 Noro yipu poko epohkara ro mak men ehcoko, wooxam poko. Noro yipu yesamarî yaw tohra ro mak ehcoko.

26 Mer̂pora ro mak naxe noro yipu komo nar̂matho pen komo okwe, yînwothîrî pen kom ha. Mer̂pora naxe yînwaikathîrî pen kom okwe.

27 Wehto imo yesamarî men mîn okwe noro yipu mîn. Puhyakan men mîn noro yesamarî awaitopo yakan okwe. Ero wa men wîîkes awya so okopuci komo.