On wara nasî takîhso kehtopo, tooto wara rma nîmtapowasî. Kar̂pe tîmtapotaxmu wara rma nasî yuhnari yîhtînon̂e me kehtopo ha.

2 Knocwan wara rma n̂ecececesî îh po kawno po. Esama yetakpacho to marha n̂ecececesî esama yakumyaw so.

3 Ewto potaw marha n̂ecececesî metataw. Mîîmo potaw so marha n̂ecececesî. Iito tak nîmtapowasî kakro so kar̂pe.

4 On wara kesî kîwya so, Okopuci komo, kîmtapowasî ka awakro so. Tooto komo xîkrî amyamro, awya so wîîkesî, omtapotarî ka entacoko.

5 Wara mak cesehtînosom komo amyamro, on wara wîîkes awya so, tweeno me awehtopo komo entacoko. Akpîra cehsom komo amyamro hara, awya so marha wîîkesî, yuhnari yîhtînon̂e me tak ehcoko, wîîkes awya so.

6 Omtapotarî entacoko. Kir̂wan poko mak tan kîmtapowasî, takîhso kehtopo poko mak.

7 Yaarono mak wekatîmyas awya so. Kicicitho poko omtapota xera ro mak wasî kica.

8 Kir̂wan̂he mak kîmtapowasî mîn hak poko. Cesemîknosom me yîmtapotara ro mak wasî. Kaan yanwecho poko yîmtapotara marha wasî.

9 Sara wara xa omtapotarî n̂encexe yuhnari yîhtînon̂e komo. Kir̂wan̂he omtapotarî n̂encexe mîn hak poko ehcamhokaxapu komo.

10 Ero ke tpoxwe xa entacoko omtapotarî. Prata reha encoko poxumra n̂he. Tpoxwe xa entacoko mîn hak poko awehcamhokacho ooru yopo kir̂wanî ro yopo.

11 Cepethîkem xa mîn takîhsom me kehtopo tohkarara yopo, cepethîkem yopo. Ahce xe xa na matu awemyawno komo xe, ero yopono me rma nasî takîhso kehtopo, cepethîke xa.

12 Takîhso awehtopo komo ow ha. On warai ow, twerî awehtopo komo yaw cenmaxmu ow. Mîn hak poko cehcamhokaxmu marha ow. Tweeno me awehtopo komo poko cehcamhokaxmu marha ow.

13 On wara maxe twerî awexitaw so Kporin komo poko, kicicme awehtopo komo xatî pîn me maxe. Poxumra marha meen̂asî awehcoyoponkacho komo, Owî xa kir̂wan, kacho ha. Ero wa xa marha meen̂asî kicicitho poko awehtopo komo. Poxumra ro mak wencesî kicicitho poko tîmtapotaxmu komo. Ero yipu nasî poxumra ro mak owya.

14 Ohyaw xa nasî awakîretopo komo. Yaarono xa wîhtînoyasî awakîretopo komo. Yuhnari yîhtînotopo marha nas ohyaw, karitî me awitopo komo marha.

15 Ooke rma kayaritomo me naxe anarî komo. Ooke marha tmaywen komo panatanmekyaxe.

16 Ooke marha antomano n̂iir̂axe antomano rin̂e komo, kopehnato komo. Ooke marha en̂ekano n̂iir̂axe en̂ekano rin̂e komo ahnoro.

17 Ooxe cehsom komo xatî xa marha ow ha. Oyen̂axe tak expora oyepon̂e komo.

18 Ohyaw xa nasî cemyawnoyem me awehtopo komo. Ohyaw marha nasî, Kîrwan mîkro, kacho me awehtopo komo. Ehcamnopîn yosom me awehtopo nas ohyaw, kir̂wan̂he awehtopo komo marha nas ohyaw.

19 Kir̂wan ke cepetaxmu warai ow. Ooru yopono xa mîn oyeperîrî, kir̂wan yopono. Prata yopono me marha nasî opokono me awepethîrî komo.

20 Kir̂wan komo yesamarî yaw tîtosom ow. Yaaro en̂ekano rin̂e komo yesamarî yaw xa kîwcesî.

21 Ero wara wasî ooxatî komo yemyawnomachome, copoyi tak ehtome yupurantan yen komo.

22 On wara marha wîîkes awya so, Kporin komo yaw wîxakn̂e pahxa ro mak yihcirî me xa, ahce na yakîhtotopo yihciyataw ka yîwya. Pahxa wîxakn̂e yîhyaw, ahce na yakîhtora ro makî ka exitaw.

23 Cehsom ro xa ow. Wîxakn̂e ro mak mehxa ro rma. Roowo exihra rma ka exitaw Kporin komo yaw wîxakn̂e.

24 Weyunu imo exihra ro makî ka exitaw kesenpekn̂e. Tuuna pîtho exihra exitaw marha wîxakn̂e, xoo kan̂e xa exihra ka exitaw.

25 Îîpî yerematîkara ka exitaw iito rma wîxakn̂e, matîwîn komo exihra ka exitaw marha.

26 Roowo yakîhtora ka exitaw Kporin komo iito rma wîxakn̂e, mararî yakîhtora exitaw marha. Sororono meero exihra ka exitaw roowo iito rma wîxakn̂e ow.

27 Kaapu mko yakîhcetaw iito wîxakn̂e. Tuuna imo wokpametaw Kporin komo ya iito wîxakn̂e.

28 Kaapu smun n̂iir̂akn̂e roowo yepoi. Tuuna imo kwaka marha n̂iir̂akn̂e tuuna pîtho mko. Porin me so n̂iir̂akn̂e ero yipu. Ero mko ciir̂ataw iito wîxakn̂e.

29 Tuuna imo marha wokpamekn̂e Noro. Wokpa ke rma porohkekn̂e ero watohra ro mak ehtome tuuna. Roowo yapon marha nukuknomekn̂e.

30 Ero yipu ciir̂ataw Kporin komo ya iito wîxakn̂e ow hara Noro panaw. Takîhso akîhton̂e me wîxakn̂e. Enmar̂atîxera opoko nahwowakn̂e Noro. Enmar̂atîxera marha kahwowakn̂e Noro wero ro hara.

31 Roowo poko kahwowakn̂e yin̂irithîrî poko ha. Tooto yakro marha tawake wîxakn̂e, ero pono komo yakro. Ero wa wîxakn̂e, kesî takîhso kehtopo.

32 Ero ke ow men entacoko okopuci komo. Tawake xa naxe oyehtopo yaw roro cehsom komo.

33 Awakîretopo komo entacoko takîhso tak awehtome so. Kica, ero yipu yenta xera ro mak wasî, kahra ro mak ehcoko.

34 Tawake xa naxe oyentan̂e komo. Omîn potaka mokyaxe enmar̂atîxera. Omîn metatan mîtwo roro naxe omtapotarî yentachome.

35 On wara naxe oyenîn̂e komo, waipîra cehtopo komo n̂een̂axe oyenîrî ke rma. Kporin komo nakronomarî me marha naxe noro yipu komo.

36 Anarî komo reha naxe kicicme omtapotachonho yaw rorohra ro mak okwe. Noro yipu komo n̂etwîrîmexe mak okwe, tîropotarî komo rma nîwîrîmexe. Ooxatî pîn komo naxe twaihkacho xatî me rma okwe. Ero wa naxe okwe, kesî. Ero wa kesî takîhso kehtopo.