On wara nasî takîhso kehtopo, knocwan wara nasî. Tîmîn ciin̂e wa nasî. Tîmîn mapatan warai n̂iir̂akn̂e, 7 ha.

2 Tootî marha paraxkekn̂e. Twokru marha n̂iir̂akn̂e. Tînahrî yapon pona n̂iir̂akn̂e paayu, parakwe, ahnoro knahrî yahtopo mko.

3 Tanton komo marha n̂en̂epekn̂e wooxam, an̂ikno rin̂e komo. Noro rma tko an̂ikno n̂iir̂asî ewto poi rma, îh poi.

4 On wara kesî tooto komo ya, Ai, wara mak cesehtînosom komo amyamro, oona ka amohcoko, kesî. On wara kesî yuhnari yîhtînon̂e pîn komo ya,

5 On hare he, eseresmatamcoko. Awokru komo eetamcoko onamkîrî.

6 Akpîra awehtoponhîrî komo kr̂a ahsîpînkacoko waipîra awehtome so. Yuhnari yîhtînopuche tak awya so anîhtînorî komo yaw roro tak ehcoko, kesî. Ero wa kesî takîhso kehtopo, wara mak cesehtînosom komo ya.

7 On wara naxe anarî komo, ero pîntho me n̂encexe tpanatanmetopo komo. Noro yipu komo yîtwermetaw awya so noro pîntho me awetacaxe so hara kica. Kicicitho komo yîtwermetaw awya so kicicitho me tak awetacexe so hara.

8 Ero ke n̂ehcowpe mak ero pîntho wara tpanatanmetopo yentan̂e komo, yîtwermara ehcoko. Aaxera tak men naxe okwe yîtwermache awya so. Takîhsom komo yîtwermetaw reha awya so aaxe so tak naxe noro yipu komo reha.

9 Takîhso cehsom yakîhretaw awya so takîhso n̂he tak n̂ehtîkesî. Takîhsom panatanmekyataw awya so miya xen poko tak n̂ehcamhoketîkes okre.

10 Kporin komo poko twerî cexpore nasî. Takîhso kehtopo yihcitopo rma mîn, Noro poko twerî kehtopo ha. Ero wa xa marha nasî Kir̂wanî ro poko kehcamhokacho awya so, yuhnari yîhtînotopo xa marha mîn, kesî takîhso kehtopo.

11 On wara marha kesî takîhso kehtopo, Oponaro awexitaw so pahkî n̂he tak maxe waipîra. Yaake ro tak micimn̂ipunwaxe kar̂pe rma.

12 Takîhso awexitaw so ero wa awehtoponhîrî komo yepetho tak mahsîyaxe amyamro rma amn̂e. Takîhsom komo poko awetaporetaw so reha ero wa awehtoponhîrî xa marha mepemesî amoro mak okwe, kesî. Ero wa kesî takîhso kehtopo.

13 On wara naxe akpîn komo, wooxam komo, twerîhra nîmtapowaxe kica. Wara mak cesehtînosom me naxe okwe, ahce na yîhtînopîra ro mak okwe.

14 Tîmîn potaw n̂eremesî noro yipu, wooxam. Îh po so marha n̂eremesî ewto pono po.

15 Tîhyari tîtosom komo nan̂ikyasî, pataw roro tîtosom kom ha.

16 On wara kesî yîwya so, wara kyam mak cesehtînosom me awexitaw so oona atîtmamcoko, kesî. On wara marha kesî yuhnari yîhtînon̂e pîn komo,

17 Tîkpore xa nasî anarî komo tunarî, en̂epanmexapu. Tpoxwe xa nasî knahrî komo en̂epa me ahxapu, kesî. Ero wa kesî wara mak cesehtînosom komo.

18 Waixa pen yokoputho tko nasî iito noro yipu komo mîn yaw okwe. Noro yipu yakro eseresmaxapunhîrî komo naxe wehto imo chew oco. Ero wa yîhtînopîra ro mak naxe yuhnari yîhtînon̂e pîn komo okwe. Ero wa naxe okwe.